1 Ճշմարիտ ասում եմ ձեզ, իմ բարեկամնե՛ր, ես տալիս եմ ձեզ մի խորհուրդ և մի պատվիրան՝ բոլոր այն ունեցվածքի վերաբերյալ, որը պատկանում է միաբանությանը, որը ես պատվիրեցի կազմակերպել և հաստատել, որ լինի միացյալ միաբանություն, և հավիտենական միաբանություն՝ իմ եկեղեցու օգտի համար, և մարդկանց փրկության համար, մինչև որ ես գամ,–

2 Անխախտ ու անկոտրում խոստումով, որ, որքան որ նրանք, ում ես պատվիրել եմ, հավատարիմ են, նրանք պիտի օրհնվեն բազում օրհնություններով.

3 Բայց որքան որ նրանք հավատարիմ չեն, նրանք մոտ կլինեն անեծքին:

4 Հետևաբար, որքան որ իմ ծառաներից ոմանք չեն պահել պատվիրանը, այլ դրժել են ուխտն ագահության պատճառով, և հնարովի խոսքերով, ես նրանց անիծել եմ շատ դառը և վշտալի անեծքով:

5 Քանզի ես՝ Տերս, իմ սրտում որոշել եմ, որ, որքան որ միաբանությանը պատկանող որևէ մեկն օրինազանցի, կամ, այլ խոսքով, դրժի ուխտը, որով դուք կապված եք, նա պիտի անիծվի իր կյանքում, և պիտի կոխկրտվի նրա կողմից, ում ես կկամենամ.

6 Քանզի ես՝ Տերս, չպետք է ծաղրի ենթարկվեմ այս բաներում,–

7 Եվ այս բոլորը՝ որպեսզի ձեր միջից անմեղը չդատապարտվի անարդարի կողմից. և որ ձեր միջից մեղավորը խույս չտա. քանզի ես՝ Տերս, ձեզ խոստացել եմ փառքի պսակն իմ աջ կողմում:

8 Հետևաբար, որքան որ օրինազանցեք, դուք ձեր կյանքում չեք կարող խույս տալ իմ ցասումից:

9 Որքան որ դուք կտրվեք օրինազանցության պատճառով, դուք չեք կարող խույս տալ Սատանայի հարվածներից, մինչև փրկագնման օրը:

10 Եվ այժմ ես ձեզ տալիս եմ զորություն, այս ժամից ի վեր, որ եթե ձեր միջից միաբանությանը պատկանող որևէ տղամարդ օրինազանցի և չապաշխարի չարիքից, դուք պիտի հանձնեք նրան Սատանայի հարվածներին. և նա զորություն չպիտի ունենա չարություն բերելու ձեր վրա:

11 Դա իմ իմաստությամբ է. հետևաբար, ես ձեզ տալիս եմ պատվիրան, որ դուք պետք է կազմակերպվեք և ամեն մարդու նշանակեք իր տնտեսությունը.

12 Որ ամեն մարդ կարողանա ինձ հաշիվ տալ իր տնտեսության վերաբերյալ, որը նշանակված է իրեն:

13 Քանզի նպատակահարմար է, որ ես՝ Տերս, ամեն մարդու՝ իբրև տնտեսի, պատասխանատու դարձնեմ երկրային օրհնությունների վրա, որոնք ես արարել եմ և պատրաստել իմ արարածների համար:

14 Ես՝ Տերս եմ տարածել երկինքները և հաստատել երկիրը՝ իմ իսկ ձեռքերի գործերը. և բոլոր բաները նրանցում իմն են:

15 Եվ իմ նպատակն է՝ ապահովել իմ սրբերին. քանզի բոլոր բաներն իմն են:

16 Սակայն դա անպայման պետք է արվի իմ իսկ ձևով. և ահա, սա է այն ձևը, որը ես՝ Տերս, որոշել եմ իմ սրբերին ապահովելու համար, որ աղքատը պիտի բարձրացվի, նրանով, որ հարուստը կխոնարհեցվի:

17 Քանզի երկիրը լի է, և բավականաչափ կա նաև խնայելու համար. այո, ես պատրաստել եմ բոլոր բաները և շնորհել եմ մարդկանց զավակներին լինելու գործակալն իրենց անձի:

18 Հետևաբար, եթե մի մարդ վերցնում է այն առատությունից, որը ես պատրաստել եմ, և իր մասից բաժին չի հանում աղքատին ու կարիքավորին, իմ ավետարանի օրենքի համաձայն, նա, ամբարիշտների հետ, իր աչքերը կբարձրացնի դժոխքում՝ տանջանքի մեջ լինելով:

19 Եվ արդ, ճշմարիտ ասում եմ ձեզ միաբանության ունեցվածքի վերաբերյալ,–

20 Թող իմ ծառա Սիդնի Ռիգդոնին նշանակվի այն վայրը, որտեղ այժմ բնակվում է, և դաբաղանոցի հողաբաժինը, որպես իր տնտեսություն, որպես աջակցություն իրեն, մինչ նա կաշխատի իմ այգում, ճիշտ ինչպես ես եմ կամենում, երբ որ ես պատվիրեմ նրան:

21 Եվ թող բոլոր բաներն արվեն միաբանության խորհրդով, այն միաբանության ձայների ընդհանուր համաձայնությամբ, որը բնակվում է Կիրթլենդի հողում:

22 Եվ այս տնտեսությունն ու օրհնությունը, ես՝ Տերս, շնորհում եմ իմ ծառա Սիդնի Ռիգդոնին, որպես օրհնություն նրա վրա և նրա գալիք սերնդի վրա.

23 Եվ ես կբազմապատկեմ նրա օրհնությունները, որքան որ նա խոնարհ կլինի իմ առաջ:

24 Եվ բացի այդ, թող իմ ծառա Մարտին Հարրիսին, իր համար և իր գալիք սերնդի համար, որպես իր տնտեսություն նշանակվի հողաբաժնի այն կտորը, որն իմ ծառա Ջոն Ջոնսոնը ձեռք բերեց իր նախկին ժառանգության փոխարեն.

25 Եվ որքան որ նա հավատարիմ է, ես կբազմապատկեմ նրա և նրա գալիք սերնդի օրհնությունները:

26 Եվ թող իմ ծառա Մարտին Հարրիսն իր դրամները նվիրի իմ խոսքերը հռչակելուն, համաձայն նրա, ինչպես իմ ծառա Ջոզեֆ Սմիթ կրտսերը կհրահանգի:

27 Եվ բացի այդ, թող իմ ծառա Ֆրեդերիկ Գ. Վիլյամսին տրվի այն տեղը, որտեղ այժմ նա բնակվում է:

28 Եվ թող իմ ծառա Օլիվեր Քաուդերիին տրվի այն հողաբաժինը, որն առանձնացված է կից տնից, որտեղ պիտի լինի տպարանը, որը թիվ առաջին հողաբաժինն է, և նաև այն հողաբաժինը, որի վրա բնակվում է իր հայրը:

29 Եվ թող իմ ծառաներ Ֆրեդերիկ Գ. Վիլյամսին և Օլիվեր Քաուդերիին տրվի տպարանը և դրան պատկանող բոլոր բաները:

30 Եվ դա պիտի լինի նրանց տնտեսությունը, որը նշանակված կլինի նրանց:

31 Եվ որքան որ նրանք հավատարիմ են, ահա ես կօրհնեմ և կբազմապատկեմ նրանց օրհնությունները:

32 Եվ դա սկիզբն է այն տնտեսության, որը ես նշանակել եմ նրանց՝ իրենց և իրենց գալիք սերնդի համար:

33 Եվ որքան որ նրանք հավատարիմ են, ես կբազմապատկեմ նրանց և նրանց գալիք սերնդի օրհնությունները, նույնիսկ բազում օրհնություններով:

34 Եվ բացի այդ, թող իմ ծառա Ջոն Ջոնսոնին տրվի այն տունը, որտեղ նա ապրում է, և ժառանգություն, բոլորը, բացի այն հողից, որը պահպանվել է իմ տները կառուցելու համար, որը պատկանում է այն ժառանգությանը և այն հողաբաժիններին, որոնք անվանվել էին իմ ծառա Օլիվեր Քաուդերիի համար:

35 Եվ որքան որ նա հավատարիմ է, ես կբազմապատկեմ նրա օրհնությունները:

36 Եվ իմ կամքն է, որ նա վաճառի այն հողաբաժինները, որոնք հատկացված են իմ սրբերի քաղաքը կառուցելու համար, որքան որ նրան հայտնի կդարձվի Հոգու ձայնով, և միաբանության խորհրդով, և միաբանության ձայնով:

37 Եվ սա է այն տնտեսության սկիզբը, որը ես նշանակել եմ նրան, որպես օրհնություն նրա համար և նրա գալիք սերնդի համար:

38 Եվ որքան որ նա հավատարիմ է, ես կբազմապատկեմ նրա բազում օրհնությունները:

39 Եվ բացի այդ, թող իմ ծառա Նյուել Ք. Ուիթնիին նշանակվեն այն տները և հողաբաժինը, որտեղ այժմ բնակվում է, և այն հողաբաժինն ու կառույցը, որտեղ առևտրի հաստատություն է հիմնվել, և նաև այն հողաբաժինը, որն առևտրի հաստատության հարավային անկյունում է, և նաև հողաբաժինը, որի վրա տեղակայված է մոխրանոցը:

40 Եվ այդ բոլորը ես նշանակել եմ իմ ծառա Նյուել Ք. Ուիթնիին, որպես իր տնտեսություն, որպես օրհնություն նրա վրա, և նրա գալիք սերնդի վրա, իմ միաբանության առևտրի հաստատության օգտի համար, որը ես հաստատել եմ Կիրթլենդի իմ ցցի համար:

41 Այո, ճշմարիտ, սա է այն տնտեսությունը, որը նշանակել եմ իմ ծառա Ն. Ք. Ուիթնիին, այսինքն՝ այս ողջ առևտրի հաստատությունը, նրան և նրա գործակալին և նրա գալիք սերնդին:

42 Եվ որքան որ նա հավատարիմ լինի իմ պատվիրանները պահելիս, որոնք տվել եմ նրան, ես կբազմապատկեմ նրա և նրա գալիք սերնդի օրհնությունները, նույնիսկ բազում օրհնություններով:

43 Եվ բացի այդ, թող իմ ծառա Ջոզեֆ Սմիթ կրտսերին նշանակվի այն հողաբաժինը, որը հատկացված է իմ տունը կառուցելու համար, որը քառասուն հինգմետրանոց ձողի երկարություն և տասներկու՝ լայնություն ունի, և նաև այն ժառանգությունը, որի վրա այժմ բնակվում է նրա հայրը.

44 Եվ դա այն տնտեսության սկիզբն է, որը ես նշանակել եմ նրան, որպես օրհնություն նրա համար և նրա հոր համար:

45 Քանզի ահա, ես մի ժառանգություն եմ պահել նրա հոր համար՝ որպես աջակցություն. հետևաբար, նա պիտի համարվի իմ ծառա Ջոզեֆ Սմիթ կրտսերի տան թվում:

46 Եվ ես կբազմապատկեմ իմ ծառա Ջոզեֆ Սմիթ կրտսերի տան օրհնությունները, որքան որ նա հավատարիմ է, նույնիսկ բազում օրհնություններով:

47 Եվ արդ, ես մի պատվիրան եմ տալիս ձեզ Սիոնի վերաբերյալ, որ այսուհետև, դուք՝ որպես միացյալ միաբանություն, Սիոնի ձեր եղբայրների հետ կապված պիտի լինեք միայն այս ձևով,–

48 Հետո, երբ կազմավորվեք, դուք պիտի կոչվեք Կիրթլենդ Քաղաքի Սիոնի Ցցի Միացյալ Միաբանություն: Իսկ ձեր եղբայրները, իրենց կազմավորվելուց հետո, պիտի կոչվեն Սիոն Քաղաքի Միացյալ Միաբանություն:

49 Եվ նրանք պետք է կազմավորվեն իրենց իսկ անուններով, և իրենց իսկ անվանումով. և նրանք պետք է իրենց գործերը վարեն իրենց իսկ անվանումով, և իրենց իսկ անուններով.

50 Եվ դուք պետք է ձեր գործերը վարեք ձեր իսկ անվանումով, և ձեր իսկ անուններով:

51 Եվ դա ես պատվիրել եմ, որ արվի ձեր փրկության համար, և նաև նրանց փրկության համար, նրանց դուրս քշվելու և այն բանի հետևանքով, որը պիտի գա:

52 Քանի որ ուխտերը դրժվել են օրինազանցության միջոցով՝ ագահությամբ և հնարովի խոսքերով,–

53 Հետևաբար, դուք՝ որպես միացյալ միաբանություն, լուծարվում եք ձեր եղբայրներից, այնպես որ դուք նրանց հետ կապված եք միայն մինչև այս ժամը, միայն այն ձևով, ինչպես ես ասացի, փոխառությամբ, ինչպես կորոշվի այս միաբանության կողմից, խորհրդով, ինչպես որ ձեր պայմանները թույլ կտան և ինչպես որ խորհրդի ձայնը կթելադրի:

54 Եվ բացի այդ, ես ձեզ պատվիրան եմ տալիս ձեր տնտեսությունների վերաբերյալ, որոնք ես նշանակել եմ ձեզ:

55 Ահա, այդ բոլոր ունեցվածքն իմն է, եթե ոչ, ապա ձեր հավատքն ունայն է, և դուք համարվում եք կեղծավոր, և ուխտերը, որոնք դուք կապել եք ինձ հետ, դրժված են.

56 Եվ եթե այդ ունեցվածքն իմն է, ապա դուք տնտեսներ եք. հակառակ դեպքում դուք տնտեսներ չեք:

57 Բայց, ճշմարիտ ասում եմ ձեզ. Ես ձեզ նշանակել եմ տնտեսներ լինելու իմ տան վրա, այսինքն՝ իրական տնտեսներ:

58 Եվ այդ նպատակով եմ ես ձեզ պատվիրել կազմակերպվել, նույնիսկ տպագրել իմ խոսքերը, իմ սուրբ գրքերի լրիվությունը, հայտնությունները, որոնք ես տվել եմ ձեզ, և որոնք ես պետք է այսուհետև, ժամանակ առ ժամանակ տամ ձեզ,–

59 Իմ եկեղեցին ու արքայությունը երկրի վրա կառուցելու և իմ ժողովրդին նախապատրաստելու նպատակով, այն ժամանակի համար, երբ ես կբնակվեմ նրանց հետ, որը մոտ է՝ առ ձեռն:

60 Եվ դուք ձեզ համար պետք է պատրաստեք մի տեղ՝ որպես գանձարան, և այն նվիրաբերեք իմ անվանը:

61 Եվ ձեր միջից դուք պետք է մեկին գանձապահ նշանակեք, և նա պիտի կարգվի այդ օրհնության համար:

62 Եվ գանձարանի վրա մի կնիք պիտի լինի, և բոլոր սրբազան բաները պիտի տարվեն գանձարան. և ձեզանից ոչ ոք այն չպիտի կոչի իրենը, ոչ էլ դրա որևէ մասը, քանզի այն պիտի պատկանի ձեզ՝ բոլորիդ միասին:

63 Եվ այս պահից ի վեր ես այն տալիս եմ ձեզ. և արդ, տեսեք, որ դուք սկսեք և գործածեք այն տնտեսությունը, որը նշանակել եմ ձեզ, բացառությամբ սրբազան բաների, այդ սրբազան բաները տպագրելու համար, ինչպես ես ասացի:

64 Եվ այդ սրբազան բաներից ստացված օգուտը պիտի պահվի գանձատանը, և նրա վրա կնիք պիտի լինի. և այն չպետք է որևէ մեկի կողմից օգտագործվի կամ գանձատնից դուրս հանվի, ոչ էլ նրա վրա դրված կնիքը պիտի հեռացվի, բացի միայն միաբանության ձայնով կամ պատվիրանով:

65 Եվ այսպես սրբազան բաներից ստացված օգուտը դուք պետք է պահպանեք գանձատանը՝ նվիրական և սուրբ նպատակների համար:

66 Եվ այն պիտի կոչվի Տիրոջ սրբազան գանձարան. և նրա վրա կնիք պիտի լինի, որպեսզի այն լինի սուրբ և Տիրոջը նվիրաբերված:

67 Եվ բացի այդ, պիտի մեկ այլ գանձարան պատրաստվի, և մի գանձապետ նշանակվի՝ գանձարանը պահպանելու, և մի կնիք պիտի դրվի նրա վրա.

68 Եվ ամբողջ դրամը, որը դուք կստանաք ձեր տնտեսություններից, ավելացնելով ունեցվածքը, որը նշանակել եմ ձեզ, տներով, թե՛ հողերով, թե՛ անասուններով և թե՛ բոլոր բաներով, բացառությամբ սուրբ և սրբազան գրությունների, որոնք ես պահպանել եմ ինձ համար՝ սուրբ և նվիրական նպատակների համար, անմիջապես, դրամներ ստանալուց հետո պիտի գցվեն իմ գանձարանը՝ հարյուրներով, թե հիսուններով, թե քսաններով, թե տասերով, թե հինգերով:

69 Կամ այլ խոսքով, ձեզանից ամեն ոք, ով ստանում է հինգ դոլլար, թող նա գցի դա գանձարան. կամ, եթե նա ստանում է տաս, կամ քսան, կամ հիսուն, կամ հարյուր, թող նա վարվի նույն ձևով.

70 Եվ թող ձեզանից ոչ ոք չասի, թե դա իր սեփականն է. քանզի դա, ոչ էլ դրա որևէ մի մասը, չպիտի կոչվի իրենը:

71 Եվ դրա ոչ մի մասը չպիտի օգտագործվի, ոչ էլ դուրս հանվի գանձարանից, բացի միայն միաբանության ձայների ընդհանուր համաձայնությամբ:

72 Եվ սա պետք է լինի միաբանության ձայնը և ընդհանուր համաձայնությունը,– որ ձեզանից որևէ մեկն ասի գանձապահին. Ես այսքանի կարիք ունեմ՝ որպես օգնություն իմ տնտեսության մեջ,–

73 Եթե դա լինի հինգ դոլլար, կամ եթե դա լինի տաս դոլլար, կամ քսան, կամ հիսուն, կամ հարյուր, գանձապահը նրան կտա այն գումարը, որը նա պահանջում է՝ որպես օգնություն իր տնտեսության համար,–

74 Եթե նա չի օրինազանցել և միաբանության խորհրդի առաջ պարզորոշ հայտնի չի դարձել, որ նա անհավատարիմ և ոչ իմաստուն տնտես է:

75 Բայց քանի դեռ նա լիարժեք ընկերակցության մեջ է, և հավատարիմ ու իմաստուն է իր տնտեսության մեջ, դա նշան պիտի լինի գանձապահի համար, այնպես որ գանձապահը չպետք է մերժի:

76 Սակայն օրինազանցության դեպքում, գանձապահը պիտի ենթարկվի միաբանության խորհրդին ու ձայնին:

77 Իսկ եթե գանձապահն անհավատարիմ և ոչ իմաստուն տնտես գտնվի, նա կենթարկվի միաբանության խորհրդին ու ձայնին, և կհեռացվի իր տեղից, և մեկ ուրիշը կնշանակվի նրա տեղում:

78 Եվ բացի այդ, ճշմարիտ ասում եմ ձեզ, ձեր պարտքերի վերաբերյալ,– ահա, իմ կամքն է, որ դուք վճարեք ձեր բոլոր պարտքերը:

79 Եվ իմ կամքն է, որ դուք ձեզ խոնարհեցնեք իմ առաջ և ստանաք այս օրհնությունը ձեր ջանասիրությամբ ու խոնարհությամբ և հավատքի աղոթքով:

80 Եվ որքան որ դուք ջանասեր եք և խոնարհ, և գործադրում եք հավատքի աղոթքը, ահա, ես կփափկացնեմ նրանց սրտերը, որոնց պարտական եք, մինչև որ ես միջոցներ ուղարկեմ ձեզ՝ ձեր ազատման համար:

81 Հետևաբար, շտապ գրեք Նյու Յորք, և գրեք համաձայն նրա, ինչ կթելադրի իմ Հոգին. և ես կփափկացնեմ նրանց սրտերը, ում դուք պարտք եք, որ ձեր վրա չարչարանքներ բերելու միտքը նրանցից հեռանա:

82 Եվ որքան որ դուք խոնարհ եք ու հավատարիմ և կանչում եք իմ անունը, ահա, ես հաղթանակը ձեզ կտամ:

83 Ես տալիս եմ ձեզ խոստում, որ այս մեկ անգամ դուք կազատվեք ձեր գերությունից:

84 Որքան որ դուք հնարավորություն ունենաք փոխառությամբ դրամ վերցնել՝ հարյուրներով, թե հազարներով, այսինքն՝ մինչև որ դուք վերցնեք բավականաչափ՝ գերությունից ազատվելու համար, դա ձեր արտոնությունն է:

85 Եվ գրավ դրեք ունեցվածքը, որը ես դրել եմ ձեր ձեռքում, այս մեկ անգամ, տալով ձեր անունները, ընդհանուր համաձայնությամբ կամ այլ ձևով, ինչպես որ ձեզ բարի կերևա:

86 Ես տալիս եմ ձեզ այս արտոնությունն այս մեկ անգամ. և ահա, եթե դուք շարունակեք կատարել այն բաները, որոնք դրել եմ ձեր առաջ, համաձայն իմ պատվիրանների, բոլոր այս բաներն իմն են, և դուք իմ տնտեսներն եք, և տերը թույլ չի տա, որ իր տունը թալանեն: Ճիշտ այդպես: Ամեն: