1 Tan-awa, karon nahitabo nga sa dihang nakapamulong na si Jesus niini nga mga pulong gilibot niya pag-usab sa pagtan-aw ang pundok sa katawhan, ug miingon siya kanila: Tan-awa, ang akong panahon miabot na.

2 Nakasabot ko nga huyang kamo, mao nga dili ninyo masabtan ang tanan nakong pulong nga gisugo sa Amahan nga akong isulti nganha kaninyo niini nga higayon.

3 Busa, pamauli kamo sa inyong mga panimalay, ug pamalandongi kini nga mga butang nga akong gisulti, ug pangayoa sa Amahan, pinaagi sa akong ngalan, aron kamo makasabot, ug iandam ang inyong mga hunahuna pagkaugma, ug moanhi ako kaninyo pag-usab.

4 Apan karon moadto ako sa Amahan, ug usab aron mopakita sa akong kaugalingon ngadto sa nawala nga mga tribo sa Israel, kay sila wala mawala ngadto sa Amahan, kay nasayod man siya kon asa niya sila gidala.

5 Ug nahitabo nga sa dihang nakapamulong na si Jesus, gilibot na usab niya ang iyang panan-aw ngadto sa pundok sa katawhan, ug nakita nga naghilak sila, ug nagtan-aw kaniya ingon og nagpasabot nga sila mohangyo kaniya sa pagpabilin og diyotay pa nga panahon uban kanila.

6 Ug miingon siya kanila: Tan-awa, ang akong kasingkasing napuno sa kaluoy diha kaninyo.

7 Aduna ba kamo dihay mga masakiton? Dad-a sila ngari. Aduna ba kamo dihay mga bakol, o mga buta, o mga pungkol, o mga angol, o mga sanglahon, o mga dili makalihok, o mga bungol, o mga gitakboyan sa bisan unsa nga matang sa sakit? Dad-a sila ngari ug ako moayo kanila, kay ako naluoy kaninyo; ang akong kasingkasing napuno sa kaluoy.

8 Kay nakasabot ako nga kamo nagtinguha nga akong ipakita kaninyo ang unsay akong gibuhat sa inyong kaigsoonan sa Jerusalem, kay akong nakita nga ang inyong pagtuo igo na nga ako moayo kaninyo.

9 Ug nahitabo nga sa dihang nakapamulong na siya, ang tanang pundok sa katawhan, nagkahiusa, miduol kauban sa ilang mga masakiton ug may mga balatian, ug sa ilang mga bakol, ug kauban sa ilang mga buta, ug kauban sa ilang mga amang, ug kauban sa tanan kanila nga gitakboyan sa bisan unsa nga matang sa sakit; ug miayo siya kanila sa matag usa dihang sila gidala ngadto kaniya.

10 Ug silang tanan, kadtong nangaayo ug kadtong mga himsog, miluhod sa iyang tiilan, ug misimba kaniya; ug kutob sa miduol sa pundok sa katawhan mihalok sa iyang mga tiil, hangtod nga ang iyang mga tiil napuno sa ilang mga luha.

11 Ug nahitabo nga misugo siya nga ang ilang gagmayng mga bata dad-on ngadto kaniya.

12 Busa gidala nila ang ilang gagmayng mga bata ug gipalingkod sila sa yuta nga nag-alirong kaniya, ug si Jesus mitindog sa ilang taliwala; ug ang pundok sa katawhan mihatag og agianan hangtod nga silang tanan nadala ngadto kaniya.

13 Ug nahitabo nga sa dihang nadala na silang tanan, ug si Jesus nagbarog sa taliwala, gisugo niya ang pundok sa katawhan nga sila mangluhod sa yuta.

14 Ug nahitabo nga sa dihang nakaluhod na sila sa yuta, si Jesus miagulo, ug miingon: Amahan, nahasol ako tungod sa pagkadaotan sa katawhan sa balay ni Israel.

15 Ug sa dihang nakapamulong na siya, miluhod usab siya sa yuta; ug tan-awa nag-ampo siya sa Amahan, ug ang mga butang nga iyang giampo dili ikasulat, ug ang pundok sa katawhan nga nakadungog kaniya mipamatuod.

16 Ug sa ingon niini nga paagi sila nagpamatuod: Sukad masukad ang mata wala pa makakita, ni dunggan makadungog, og ingon ka talagsaon ug kahibulongan nga mga butang nga among nakita ug nadungog nga gisulti ni Jesus ngadto sa Amahan;

17 Ug walay dila nga makalitok, ni adunay si bisan kinsang tawo nga makasulat, ni mga kasingkasing sa mga tawo nga makasabot niining mahinungdanon ug kahibulongang mga butang nga among nakita ug nadungog nga gipamulong ni Jesus; ug walay usa nga makasabot sa kalipay nga mipuno sa among mga kalag sa panahon nga nadungog namo siya nga nag-ampo alang kanamo ngadto sa Amahan.

18 Ug nahitabo nga sa dihang nahuman na si Jesus sa pag-ampo ngadto sa Amahan, mitindog siya; ug hilabihan ang kamaya sa pundok sa katawhan nga sila wala makabarog.

19 Ug nahitabo nga si Jesus namulong kanila, ug gipatindog sila.

20 Ug nanindog sila gikan sa yuta, ug miingon siya kanila: Bulahan kamo tungod sa inyong pagtuo. Ug karon tan-awa, puno ang akong kamaya.

21 Ug sa dihang nasulti na niya kini nga mga pulong, mihilak siya, ug ang pundok sa katawhan nakasaksi niini, ug gikuha niya ang ilang gagmay nga mga bata, sa tinagsa, ug mipanalangin kanila, ug nag-ampo ngadto sa Amahan alang kanila.

22 Ug sa dihang nahimo na niya kini mihilak siya pag-usab;

23 Ug namulong siya sa pundok sa katawhan, ug miingon kanila: Tan-awa ang inyong gagmayng mga bata.

24 Ug sa ilang pagtan-aw aron makita ang ilang gagmayng mga bata ilang gipunting ang ilang mga mata paingon sa langit, ug nakita nila ang langit nga naabli, ug nakita nila ang mga anghel nga nanaog gikan sa langit nga ingon og anaa sa taliwala sa kalayo; ug nanganaog sila ug mialirong sa gagmayng mga bata, ug giliyokan sila sa kalayo; ug ang mga anghel nangalagad kanila.

25 Ug ang pundok sa katawhan nakakita ug nakadungog ug nagpamatuod; ug nasayod sila nga ang ilang pagpamatuod tinuod kay silang tanan nakakita ug nakadungog, matag tawo alang sa iyang kaugalingon; ug ang ilang gidaghanon mga duha ka libo ug lima ka gatos nga mga kalag; ug sila naglakip sa mga lalaki, mga babaye, ug mga bata.