1 Ug karon tan-awa, nahitabo nga ang tanang katawhan sa yuta nakadungog niini nga mga pulong, ug nakasaksi niini. Ug human niini nga mga pulong dihay kahilom sa yuta sulod sa daghang oras;

2 Kay hilabihan gayod ang katingala sa katawhan nga sila mihunong sa pagdanguyngoy ug pag-agulo tungod sa pagkawala sa ilang kaliwatan nga gipamatay; busa dihay kahilom sa tibuok yuta sulod sa daghang oras.

3 Ug nahitabo nga dihay miabot na usab nga usa ka tingog ngadto sa katawhan, ug ang tanang katawhan nakadungog, ug nakasaksi niini, nga nag-ingon:

4 O kamo nga katawhan niining dagko nga mga siyudad nga nangapukan, kinsa mga kaliwat ni Jacob, oo, kinsa sakop sa balay ni Israel, kapila ba ako mipundok kaninyo sama sa himungaan nga mipundok sa iyang mga pisô sa ilawom sa iyang mga pako, ug miamuma kaninyo.

5 Ug usab, kapila ba ako mopundok unta kaninyo sama sa himungaan nga mopundok sa iyang mga pisô sa ilawom sa iyang mga pako, oo, O kamo nga katawhan sa balay ni Israel, nga nangapukan; oo, O kamo nga katawhan sa balay ni Israel, kamo nga nagpuyo sa Jerusalem, ingon man kamo nangapukan; oo, kapila ba ako mopundok unta kaninyo sama sa himungaan nga mopundok sa iyang mga pisô, ug dili gayod kamo mosunod.

6 O kamo nga balay ni Israel nga akong giluwas, kapila ba ako mopundok kaninyo sama sa himungaan nga mopundok sa iyang mga pisô sa ilawom sa iyang mga pako, kon kamo maghinulsol ug mobalik ngari kanako nga may hingpit nga katuyoan sa kasingkasing.

7 Apan kon dili, O balay ni Israel, ang mga dapit sa inyong mga pinuy-anan mahimo nga biniyaan hangtod sa panahon sa katumanan sa pakigsaad ngadto sa inyong mga amahan.

8 Ug karon nahitabo nga human nga ang katawhan nakadungog niining mga pulong, tan-awa, sila misugod sa paghilak ug sa pagdangoyngoy pag-usab tungod sa pagkawala sa ilang kaliwatan ug sa ilang mga higala.

9 Ug nahitabo nga sa ingon niini ang tulo ka adlaw milabay. Ug usa kadto ka buntag, ug ang kangitngit nawala sa ibabaw sa yuta, ug ang yuta mihunong sa pagkurog, ug ang dagko nga mga bato mihunong sa pagkabuak, ug ang makalilisang nga mga pag-agulo mihunong, ug ang tanang nagkaguliyang nga mga kasaba milabay.

10 Ug ang yuta nagkatakdo og usab, nga kini nakasugakod; ug ang mga pagbangotan, ug ang paghilak, ug ang pagdanguyngoy sa katawhan nga naluwas nga buhi mihunong; ug ang ilang pagbangotan napulihan og kamaya, ug ang ilang mga pagbakho ngadto sa pagdayeg ug pagpasalamat ni Ginoong Jesukristo, ang ilang Manunubos.

11 Ug sa ingon niini ang mga kasulatan natuman nga gipamulong sa mga propeta.

12 Ug mao kini ang mas matarong nga bahin sa katawhan kinsa naluwas, ug mao kini sila ang midawat sa mga propeta ug wala mobato kanila; ug mao kini sila ang wala mopaagas sa dugo sa mga santos, kinsa giluwas—

13 Ug naluwas sila ug wala maunlod ug nalubong sa ilawom sa yuta; ug wala sila malumos sa kinahiladman sa dagat; ug wala sila masunog sa kalayo, ni sila mapukan ug madugmok sa kamatayon; ug wala sila madagit sa alimpulos; ni sila mabuntog sa inalisngaw nga aso sa kangitngit.

14 Ug karon, kinsa kadtong nakabasa, sabton niya; siya nga adunay mga kasulatan, ipapangita kini kanila, ug sud-onga ug tan-awa kon ang tanan niining mga kamatayon ug mga kalaglagan pinaagi sa kalayo, ug pinaagi sa aso, ug pinaagi sa mga bagyo, ug pinaagi sa mga alimpulos, ug pinaagi sa pagbuka sa yuta aron pagdawat kanila, ug ang tanan niining mga butang dili ba mao ang katumanan sa mga panagna sa daghang balaan nga mga propeta.

15 Tan-awa, sultihan ko kamo, Oo, daghan ang nagpamatuod niini nga mga butang sa pag-anhi ni Kristo, ug gipamatay tungod kay sila nagpamatuod niini nga mga butang.

16 Oo, si propeta Zenos nagpamatuod niini nga mga butang, ug usab si Zenock namulong kabahin niini nga mga butang, tungod kay sila nagpamatuod ilabi na gayod kabahin kanato, kinsa mao ang salin sa ilang binhi.

17 Tan-awa, ang atong amahan nga si Jacob nagpamatuod usab kabahin sa usa ka salin sa binhi ni Jose. Ug tan-awa, dili ba kita usa ka salin sa binhi ni Jose? Ug kini nga mga butang nga nagpamatuod bahin kanato, wala ba kini mahisulat nganha sa mga panid nga bronse nga gidala sa atong amahan nga si Lehi gikan sa Jerusalem?

18 Ug nahitabo nga sa pagkatapos sa ikakatloan ug upat nga tuig, tan-awa, akong ipakita kaninyo nga ang katawhan ni Nephi nga naluwas, ug usab kadtong gitawag og mga Lamanita, nga naluwas, nakaangkon og dakong kaluoy nga gipakita ngadto kanila, ug daghang panalangin ang gibu-bo ngadto sa ilang mga ulo nga niana human sa pagkayab ni Kristo ngadto sa langit siya sa pagkatinuod mipakita ngadto kanila—

19 Ang pagpakita sa iyang kaugalingon ngadto kanila, ug pagpangalagad kanila; ug ang usa ka asoy sa iyang pagpangalagad ihatag human niini. Busa niining higayona ako motapos sa akong mga pagpamulong.