1 Áádóó kʼad shí, Moroni, náhásóóhígíí baahashneʼ. Éí bąą, áko shooh, baa hoolzhiizh Akish dóó bikʼis nahonitʼingo nidahaʼáhígíí bikʼehgo, áko shooh, Omer hooʼáałgo bił hazʼánée yighadahodeestʼą́.

2 Ákótʼée ndi, Diyin Bóhólníihii Omer yaa joozbaʼ, dóó biyeʼké dóó bitsiʼké ałdóʼ éí doo atídadiilnííł dabóʼníi da.

3 Áádóó Omer Diyin Bóhólníihii yaa neiyizyeelgo kéyah bikááʼdóó dahdidííʼnééł bidííniid; ákohgo Omer dóó yił kéédahatʼínii kéyahdóó chʼíníná, dóó yinéełgo ląʼí yiską́, dóó Shim dah yiskʼidjįʼ yíkai dóó yítsʼį́į́góó chʼíníʼná, áádóó Nephi dineʼé nidabiʼdistseed yę́ęjįʼ níná, áádóó haʼaʼaahjigo, dóó Ablom hoolyééjįʼ níná, éí tónteel bíighahjįʼ, dóó ákweʼé biníbaal nideiznil, dóó biyeʼké dóó bitsiʼké ałdóʼ, dóó tʼáá ałtso yił kéédahatʼínígíí, ákondi Jared dóó baʼáłchíní éí tʼáá bídin.

4 Áádóó baa hoolzhiizh Jared éí diné aláahdi binaatʼáanii nilį́į doogo akʼah yee biʼdoolzį́į́ʼ, dóó bitsiʼ Akish bichʼooní dooleełgo yeiníłtʼį.

5 Áádóó baa hoolzhiizh Akish baadaaní yidiyoołhéełgo yíká átʼį́; áádóó ałkʼidą́ą́ʼ yee nidaalnishyę́ę choyoosʼįįd dóó yił ałhadaʼdeestánééʼ bikáʼadoojahgo yíyííkeed, dóó baadaaní bitsiitsʼíínyę́ę kʼííníkal, hooʼááłdi dahsidą́ągo, éí bidineʼé lą́ yidííniidgo yił áłah silį́į́ʼ.

6 Háálá ayóó átʼáo bąąhági átʼéii dóó ndahonitʼingo dahʼooldahígíí tʼáá ałtso diné bitah hazlį́įʼgo yijéí deiyiiłchxǫʼ; éí bąą Jared hooʼááłgi dahsidáhą́ą́gi biʼdiisxį́, áádóó Akish ákóneʼ aláahdi naatʼáanii silį́į́ʼ.

7 Áádóó baa hoolzhiizh Akish biyeʼ yoołchʼį́į́d silį́į́ʼ, éí bąą awáalyah góneʼ yah ayiiłtʼeʼ, dóó chʼiyáán áłchʼį́į́dígo éí doodaiiʼ ádin doo yaa neikááhgo yee yiyiisxį́.

8 Áádóó áko biʼdiisyínééʼ bikʼis, (dóó éí Nimrah wolyé) bizhéʼé yichʼįʼ báhóóchįįd háálá bizhéʼé éí bikʼis atíyiilaaʼígíí biniinaa.

9 Áádóó baa hoolzhiizh Nimrah diné áłchʼį́į́dígo áłah áyiilaa, dóó kéyahdóóʼ dahdiijééʼ, dóó Omer yaa yíkai dóó áadi yił kéédahaatʼį́į́ ńtʼę́ę́ʼ.

10 Áádóó baa hoolzhiizh Akish biyeʼké łaʼ nááhásdlį́į́ʼ, dóó diné bijéí deiyoosbą́, dóó bąąhági ádaatʼį́į dooleełgo tʼáá íídą́ą́ʼ yił ałhadaʼdeestʼą́ yinízinígíí bikʼehgo.

11 Áádóó kʼad Akis bidineʼé nihichʼįʼ azlą́ą doo danízin, Akish adziilii yinízinígi átʼáo, ákohgo, Akish biyeʼké béeso yee yichʼįʼ yídaʼooskan, éí bąą diné kʼasdą́ą́ʼ tʼáá átʼé bikééʼ niikai.

12 Áádóó Akish bikʼiské dóó Akish ałchʼįʼ dadeezbaaʼ, éí ákódaatʼį́įgo ląʼí ńááhai, aooʼ, éí bąą diné bihootʼááł bił hazʼánéedi kʼasdą́ą́ʼ tʼáá átʼé nidabiʼdistseed, aooʼ, tʼáá átʼé, tʼáá hazhóʼó tádiin tʼéiyá chʼéédzííʼ, dóó Omer bighandóóʼ yił dahdadínííchą́ʼą́ą́ ałdóʼ.

13 Ákohgo, Omer kéyah baa deetʼánée hashtʼéʼnályaa.

14 Áádóó baa hoolzhiizh Omer haastih; ákótʼée ndi, haastihgo Emer bá yizhchį́; dóó Emer aláahdi naatʼáanii dooleełgo akʼah bee biʼdoolzį́į́ʼ éí bitséskʼeh góneʼ dahnááneezdá.

15 Áádóó Emer akʼah bee biʼdoolzį́į́ʼ aláahdi naatʼáanii dooleełgo áko naaki nááhaijįʼ kéyah bikááʼgóó kʼé bił hólǫ́ǫgo yiyííłtsą́, áádóó bizééʼ hazlį́į́ʼ, dóó ląʼí yiiʼ tádííyą́ągo bííníłką́, éí ląʼí yínííł biyiʼ hólǫ́ǫ ńtʼę́ę́ʼ. Áádóó baa hoolzhiizh Emer éí naatʼáanii nilį́įgo dahnááneezdá, dóó bizhéʼé áyiilaayę́ę yikʼehgo nahaʼáá ńtʼę́ę́ʼ.

16 Áádóó Diyin Bóhólníihii éí kéyah hóyéeʼgo bá haʼoodzííʼyę́ę nahjįʼ kónááyiidlaa, dóó Emer bighandóóʼígíí tsʼídá náás deeskai Emer hooʼáałgo, áádóó hastą́diin dóó baʼaan naaki nááhaijįʼ tʼáá íiyisíí dabidziil daazlį́ʼ, hónáásdóóʼ tʼáá íiyisíí daʼatʼį́.

17 Tʼáá ałtso ndanitʼį́į́hii, dóó kʼéédadilyéehii; naatʼą́hí daʼílíinii, ééʼ daʼílíinii, dóó béésh óola, dóó béésh łigaii, dóó daʼílíinii ádaalyai;

18 Áádóó ałdóʼ tʼáá átʼé dóola, béégashii ndaʼałbąąsígíí, béégashii dabiʼáadii, dóó dibé, dóó bisóodi, dóó tłʼízí, dóó łaʼí da ałʼąą áátʼeełgo naaldlooshii diné bichʼiiyą́ ádeiłʼínígíí.

19 Áádóó ałdóʼ łį́į́ʼ bee dahólǫ́ ńtʼę́ę́ʼ, dóó télii, dóó bíchį́į́h yee adilohii dóó cureloms dóó cumoms ałdóʼ; díí tʼáá átʼé diné chodeiyoołʼį́į ńtʼę́ę́ʼ, tʼáá íiyisíígíí éí bíchį́į́h yee adilohii dóó cureloms dóó cumoms.

20 Áádóó áko Diyin Bóhólníihii díí kéyah yikʼihojisdliʼ; éí kédaayah tʼáá átʼé yiláahdi ílíinii átʼé; dóó háiida yikʼi bóhólníihgo Diyin Bóhólníihii deidósin doo dííniid, doodaiʼ bąąhági átʼéii ałtso yiih yíkaigo ábidiʼdooldįįł; háálá éí bikʼi ní Diyin Bóhólníihii: Tʼáá átʼé sháháchįʼígíí hakʼijįʼ kódeeshłííł.

21 Áádóó Emer diyinkʼehgo nahwiiʼaahgo biiníłką́, dóó bikʼiské dóó bitsiʼké bá yizhchį́; dóó Coriantum bá yizhchį́, áádóó Coriantum akʼah yee yiyíísį́į́ʼ bí dah sidáá góneʼ hooʼááł dooleełgo áyiilaa.

22 Áádóó Emer éí Coriantum akʼah yee yiyíísį́į́ʼ éí dahsidáyę́ę góneʼ hooʼáałgo dį́į́ nááhai, áádóó Emer díí kéyah bikááʼgóó kʼé hólǫ́ǫgo yiyiiłtsą́; aooʼ, dóó Diyin Tʼáá Ákogi Átʼéii biYeʼ ałdóʼ yiyiiłtsą́, dóó bił hózhǫ́ dóó bił ayóó ahootʼéego biiníłką́; dóó kʼe bił hólǫ́ǫ́go bizééʼ hazlį́į́ʼ.

23 Áádóó baa hoolzhiizh Coriantum bizhéʼé yikékʼeh níyá, dóó łąʼí kintah ayóó ádaatʼéigo dahólǫ́ǫgo áyiilaa, dóó yáʼátʼéehii bidineʼé yichʼįʼ kwííłʼį́įgo biiníłką́. Áádóó baa hoolzhiizh ląʼí binááhaigo índa baʼáłchíní hazʼlį́į́ʼ.

24 Áádóó baa hoolzhiizh bichʼooní bizééʼ hazlį́į́ʼ, neeznádiin dóó baʼaan naaki binááhaigo. Áádóó baa hoolzhiizh Coriantum haastihgo, bichʼooní hazlį́į́ʼ, éí chʼikę́ę́h nilį́į léiʼ, dóó biyeʼké dóó bitsiʼké hazlį́į́ʼ; ákohgo neeznádiin dóó baʼaan dízdiin dóó biʼaan naaki binááhai.

25 Áádóó baa hoolzhiizh Com bá yizhchį́, dóó hooʼááłyę́ę góneʼ Com dah neezdá; éí nahaʼáago dízdiin dóó baʼaan náhástʼéí nááhai, dóó Heth bá neheezhchį́ʼ; dóó łaʼ biyeʼké dóó bitsiʼké bá neheezchį́.

26 Áádóó dineʼé kéyah bikááʼgóó tʼáá ałtso ąą dínéestʼą́, dóó kéyah bikááʼgóó tsʼídá yéego bąąhági ádaatʼį́įgo baa nínááʼdiildeeʼ, Heth ałkʼidą́ą́ʼ nidaʼnilʼingo nahatʼánée náádeiyiiłtsood, bizhéʼé yidiyoołhéełgo.

27 Áádóó baa hoolzhiizh bizhéʼé hooʼááłyę́ędóó nahjįʼ kóyiilaa, áko éí tʼáá bí bibéésh hał yee yiyiisxį́; dóó hooʼááłyę́ę góneʼ dah neezdá.

28 Áádóó Diyin yá yádaałtiʼii náádahasdlį́į́ʼ, dóó dineʼé ádaa ńdaʼoohkąąh deiłníigo ńdeiyooskan—áko Diyin Bóhólníihii bihoogááł yá hashtʼeʼ dahodoolííł éí doodaiiʼ nahasdzáán bikááʼ hóyéeʼgo hazʼą́ą dooleeł dadííniid; aooʼ, ayóó átʼéego dichin dahaghą́ągo hodooleeł, tʼáadoo ádaa ńdaʼooskango éí ábidiʼdooldįįł.

29 Ákondi dineʼé Diyin yá yádaałtiʼii doo deiyoodlą́ą da, áko chʼídeineeskaad; dóó łaʼ éí łeeyiʼ ahoodzą́ą́ góneʼ adeiyiistłʼííd dadínóonééł biniyé. Áádóó baa hoolzhiizh díí tʼáá átʼé ádeiyiilaa aláahdi naatʼáanii, Heth bibee hazʼáanii bikʼehgo.

30 Áádóó baa hoolzhiizh kéyah bikááʼgóó ayóó átʼéego tʼáadoo leʼé ádaadingo bił hooʼaʼ, díí nízingo bił hooʼaʼígíí biniinaa ląʼí kéédahatʼínée tsxį́įłgo ábiʼdisdiin, háálá nahasdzáá bikááʼ doo nahałtin da.

31 Áádóó baa hoolzhiizh tłʼiish tsoh daʼdiłhashgo nidaʼałtseedii ałdóʼ kéyah bikááʼ hazlį́į́ʼ, dóó díne ląʼí nideiyiishazhgo nideistseed. Áádóó baa hoolzhiizhgo bindaaldlooshii éí tłʼiish tsoh daʼdiłhashii yitsʼą́ąjigo dahdiijééʼ, kéyah shádiʼáahjigo bichʼįʼ, éí Nephi dineʼé Zarahemla deiłní.

32 Áádóó baa hoolzhiizh ląʼí da akǫ́ǫ́ deiyíjeehgo daneezná; ákótʼée ndi, łaʼ kéyah shádiʼáahjigo adahineezhchą́ą́ʼ.

33 Áádóó baa hoolzhiizh Diyin Bóhólníihii tłʼiish tsoh daʼdiłhashgo nidaʼałtseedii niʼ kóyiilaa áko doo bikééʼ yíkai da, ákondi yichʼą́ą́h niikai áko diné ákóneʼ chʼídookahgo doo bá bíighah da silį́į́ʼ, áko háiida ákóneʼ chʼégháahgo tłʼiish tsoh daʼdiłhashgo nidaʼałtseedii ndabiłtseed.

34 Áádóó baa hoolzhiizh diné naaldlooshii daʼałchiní yikééʼ deíkáahgo, dóó atiinbąąhgóó nidaaztseedígíí bitsįʼ deilghał, hónáásiiʼ ałtso deiyoolghal. Áko kʼad diné dadínóonéełgo yaa ákodaniizį́įʼgo bibąąhági ádaatʼéii yaa naakaiyę́ę yaa ńdaʼooskan dóó Diyin Bóhólníihii yichʼįʼ sodadiʼniilzin.

35 Áádóó baa hoolzhiizh Diyin God Bóhólníihii íinízinígi átʼéego hojoobaʼ ádaʼdiilyaago nahasdzáán bikááʼgóó nahałtin yeʼníłniiʼ; dóó diné bidziil nídaasdlį́į́ʼ, dóó náhookǫsjigo kédaayah bikááʼgóó chʼil bineestʼąʼ nídahasdlį́į́ʼ, dóó tʼáá átʼé hanaagóó kédaayahgóó. Áádóó Diyin Bóhólníihii beʼadziilii yichʼįʼ ííshjání, áyiilaa dichin aghą́ bitsʼą́ą yisdáhwííʼeezh.