1 Áádóó baa hoolzhiizh Coriantumr atíbiʼdiilyaayę́ę bitsʼą́ą́dóó yáʼátʼééh násdlį́įʼgo, Ether saad yee haadzíʼę́ę yénáálniiʼ.

2 Naaki dimííl bilááhgóó bidineʼé béésh hał tʼáá íídą́ą́ʼ bee nidabiʼdiztseedígíí yaa ákoniizį́į́ʼ, áádóó bijéí biyiʼdi yaa yínííł niizį́į́ʼ; aooʼ, háálá naaki dimííl hastóí dabidziilyę́ę nidaaztseed, dóó bichʼóoní dóó baʼáłchíní danilínée ałdóʼ.

3 Doo yáʼáshóonii yaa naagháʼą́ą yaa náʼookąąhgo yaa nídiidzá; tʼáá ałtso Diyin yá yádaałtiʼii yee hadaasdziʼę́ę yénáálniiʼ, dóó tʼáá ałtso bidahoolníiłgo yaa ákoniizį́į́ʼ, tsʼídá tʼáá ádaatʼéejįʼ; dóó biiʼ sizíinii yínííł silį́į́ʼ dóó haʼólníi dooleełyę́ę doo yinízin da.

4 Áádóó baa hoolzhiizh Shiz yichʼįʼ íʼiilaa, dineʼé yisdáníʼéésh yiłníigo, dóó nahatʼá bił hazʼą́ dineʼé bedaʼiinaʼ bá nahjįʼ ndideeshʼááł níigo.

5 Áádóó baa hoolzhiizh Shiz bichʼįʼ eʼelyaayę́ę beiyíltsoozgo Coriantumr yichʼįʼ íʼiilaa, niʼdisziłgo tʼéiyá, áko shibéésh hał bee ndiyeeshhééł, áko índa dineʼé yisdádeeshʼish dííniid.

6 Áádóó baa hoolzhiizh dineʼé bibąąhági átʼéii tʼáadoo yaa ńdaʼooskan da; dóó Coriantumr bidineʼé Shiz bidineʼé yichʼįʼ bádahóóchįįd; dóó Shiz bidineʼé Coriantumr bidineʼé yichʼįʼ bádahóóchįįd; ákohgo, Shiz bidineʼé éí Coriantumr bidineʼé yił ałkʼiijééʼ.

7 Áádóó Coriantumr bidiʼyoolyééł yaa ákoniizį́įʼgo Shiz bidineʼé yitsʼą́ą́dóó náádadínéezhchą́ą́ʼ.

8 Áádóó baa hoolzhiizh tó naazyį́ Ripliancumjįʼ níná, éí, ááh yíłnínígíí éí, ntsaa, éí doodago tsʼídá álááhdiígíí; ákohgo, díí tó naazyį́įjįʼ nínáago biníbaal nideiznil; dóó Shiz ałdóʼ áyíídígóó biníbaal nideiznil; dóó biiskání ałkʼiijééʼ.

9 Áádóó baa hoolzhiizh tʼoo báhádzidgo daʼahoogą́ą́ʼ, áko Coriantumr atínáánályaa, dóó dił bąąh ásdįįdgo bąą bił chʼaa hazʼlį́į́ʼ.

10 Áádóó baa hoolzhiizh Coriantumr bindaabaahí Shiz bindaabaahí hózhó yikʼiijééʼ áko yikʼeh dadeesdlį́į́ʼ, áko hakʼee dadínéezchą́ą́ʼ; dóó shádiʼáahjigo adahineezhchą́ą́ʼ, dóó Ogath hoolyéegi biníbaal nideiznil.

11 Áádóó baa hoolzhiizh Coriantumr bindaabaahí biníbaal Ramah dahyiskʼid bíighahígi nideiznil; dóó éí dah yiskʼidgi shizhéʼé Mormon Diyin Bóhólníihii yichʼįʼ haneʼ néideesʼį́į́ʼ, éí dadílzingo átʼé.

12 Áádóó baa hoolzhiizh tʼáá ałtso dineʼé tʼáá ałtso kédaayahdę́ę́ʼ ahandeiyiizhʼeezh, tʼahdoo ndabiʼditseedígíí, Ether tʼéiyá ndagaʼ.

13 Áádóó baa hoolzhiizh Ether éí dineʼé tʼáá átʼé ádáátʼįįdígíí yiyiiłtsą́; áádóó dineʼé Coriantumr yił danilínígíí éí Coriantumr bindaabaahí yił ahíikai; áádóó dineʼé Shiz yił danilínígíí éí Shiz bindaabaahí yił ahíikai.

14 Ákohgo, dį́į́ʼ nááhai dineʼé ahanídayiiʼééshgo, áko tʼáá átʼé kéyah bikááʼdóó ahandeidooʼish biniyé, áko tʼáá átʼé yee dabidziil doogo ahandeiyiizhʼeezh.

15 Áádóó baa hoolzhiizh ałtso ahíikaigo, tʼáá łąʼí nízínígo ndadoobahígíí, bizáanii dóó badaʼáłchíní yił—hastóí, sáanii, dóó áłchíní yee ndadoobahígíí dahdeiyíjahgo ádeiyiilaa, achʼą́ą́h naatʼáhí, dóó béésh ééʼ, dóó béésh-chʼah yee hadadítʼéego, dóó anaaʼjí ééʼ yee hadadiidzaa—daʼahidoogą́ąłgo ałkʼijįʼ ndadiʼnééh; áádóó daʼahigą́ągo ałtso iʼííʼą́, ákondi tʼáadoo akʼehdeesdlįʼí da.

16 Áádóó baa hoolzhiizh tłʼééʼ hazlį́įʼgo chʼééhdeeskai, dóó biníbaal naazniljįʼ anídahaskai; áádóó biníbaal naazniljįʼ anídahaskaigo bidineʼé nidabiʼdiztseedyę́ę yaa daacha dóó yaa dadiʼníigo yaa nídiikai; dóó ayóó átʼáo daacha, dóó dadilwosh dóó dadiʼní, áko níłchʼi tʼáá íiyisíí biiʼhodiitsʼaʼ.

17 Áádóó baa hoolzhiizh biiskání ałkʼináánéijééʼ, ayóó átʼáo dóó tʼóó báhádzidgo ayííłką́; ákótʼée ndi, tʼáadoo akʼehdeesdlįʼí da, áádóó tłʼééʼ nááhásdlį́įgo tʼáá íiyisíí daachago níłchʼi biiʼnááhodiistsʼą́ą́ʼ, dóó dadilwosh, dóó dadiʼníigo, háálá bidineʼé nidabiʼdiztseedyę́ę yaa daacha.

18 Áádóó baa hoolzhiizh Coriantumr éí Shiz yichʼįʼ ánááʼiidlaa, nihikʼijįʼ náádadoohbahgo doo nisin da yiłní, áko nahatʼá bił hazʼą́ éí ni dooleeł, dóó áko dineʼé bedaʼiinaʼ yisdándiidlííł.

19 Ákondi shooh, Diyin Bóhólníihii biʼIiʼ Sizį́ Diyinii doo bił hólǫ́ǫ da silį́į́ʼ, dóó Chʼį́įdii dineʼé tʼáá átʼé bijéí yikʼi bidziil silį́į́ʼ, háálá bijéí dáátłʼisʼígíí biniinaa bikʼideeyá, dóó bíniʼ doo chodayoołʼínígíí bąąh ndooltsxił; ákohgo náádaʼahiʼniigą́ą́ʼ.

20 Áádóó baa hoolzhiizh daʼahigą́ągo iʼííʼą́, tłʼééʼ hazlį́įʼgo bibéésh hał yikʼi daʼiiłhaazh.

21 Áádóó biiskání náádaʼahigą́ągo anááʼootʼą́.

22 Áádóó hiłiijį́įʼgo áháchįʼ yee tsiʼ dah yikah, hastiin léiʼ tó diłhił tsiʼnabiiłáh nahalingo; áádóó bibéésh hał yikʼi náádaʼiiłhaazh.

23 Áádóó biiskání náádaʼahiʼniigą́ą́ʼ; áádóó iʼííʼą́ągo tʼáá átʼé bibéésh hał yee ndaʼahistseed tʼáá hazhóʼó Coriantumr bidineʼé ashdladiin dóó baʼaan naaki tʼéiyá chʼéékai, dóó Shiz bidineʼé hastą́diin dóó baʼaan náhástʼéí chʼéékai.

24 Áádóó baa hoolzhiizh éí bitłʼééʼ bibéésh hał yikʼi nááneezhjééʼ, áádóó biiskání náádaʼahoogą́ą́ʼ, dóó bibéésh hał dóó achʼą́ą́h naatʼáhí yee yéego atínáádaʼahilʼį́įgo, anááʼootʼą́.

25 Áádóó iʼííʼą́ągo Shiz bidineʼé tádiin dóó biʼaan naaki yiltʼé, áádóó Coriantumr bidineʼé éí naadiin tsostsʼid yiltʼé.

26 Áádóó baa hoolzhiizh daʼííyą́ą́ʼ dóó neezhjééʼ, biiskání ndaʼahidooltsxiłgo yíká hashtʼeʼádaʼdiilyaa. Áádóó hastóí bitah dahótsxaaz dóó ayóó átʼéego dabidziilígíí danilį́.

27 Áádóó baa hoolzhiizh daʼahigą́ąʼgo tááʼ ahééʼílkid, áádóó dił bąąh ndaheeznaʼgo bíniʼ ádaasdįįd.

28 Áádóó baa hoolzhiizh Coriantumr bá ndaabaahí tʼáá nidaakai ńdaasdlį́įʼgo, doo kʼadę́ę dahdadinííchééhgo; ákondi shooh, Shiz yiizįʼ, dóó bindaabaahí ałdóʼ, áádóó báháchįʼgo ádee haadzííʼ Coriantumr diyeeshhééł éí doodaiiʼ béésh hał bee shidiʼyoolhééł.

29 Ákohgo, yikééʼ níná, dóó biiskání yékai; dóó béésh hał yee náádaʼahooʼgą́ą́ʼ. Áádóó baa hoolzhiizh tʼáá ałtso béésh hał yee ndaʼahistseed, tʼáá hazhóʼó Coriantumr dóó Shiz tʼéiyá chʼééʼáázh, áko shooh Shiz dił bąąh háánaʼgo bíniʼ ásdįįd.

30 Áádóó baa hoolzhiizh Coriantumr béésh hał yinahjįʼ ntsidinígoʼ, áko tʼįįhdígo hanáályį́į́ʼgo, Shiz bikʼos kʼííníkal.

31 Áádóó baa hoolzhiizh Shiz yitsiitsʼiin kʼííníkal, áko Shiz bigaan yee nídiinééh ńtʼę́ę́ʼ naaʼíítłizh; áádóó chʼééh didziihgo, daaztsą́.

32 Áádóó baa hoolzhiizh Coriantumr niʼjįʼ íítłizh, dóó doo hináa da nahalin silį́į́ʼ.

33 Áádóó Diyin Bóhólníihii Ether yichʼįʼ haadzííʼ, dóó kóyidíídniid: Nílááhgóó dahdiinááh. Áádóó dah diiyá, dóó yaa ákoniizį́į́ʼ Diyin Bóhólníihii bizaad ałtso bohoolyaa; dóó baa haneʼ ałtso áyiilaa; (tʼáá łáhídi neeznádiin bidooltsʼiʼ ndi tʼáadoo náhézoh da) áádóó néideesʼį́į́ʼ áko Limhi bidineʼé ákótʼáo yikʼídaneeztą́ą́ʼ.

34 Áko Ether akéeʼdi díí saad neiyíízo: Diyin Bóhólníihii nááshididoołtééł, éí doodaiiʼ Diyin Bóhólníihii íinízinígi átʼáo shitsʼíís bee tiʼhwiideeshnih, éí doo bikʼeh da, tʼáá hazhóʼó Diyin God bił hazʼą́ądi yah anááshdzáago tʼéiyá nisin. Amen.