1 Áádóó Com bíyoołkááłgóó ląʼí Diyin yá yádaałtiʼí ałdóʼ ndahaaskai, dóó dineʼé ayóó átʼéii ádaańdaʼooskango tʼéiyá doo ábiʼdidooldįįł da dadííniid, dóó Diyin Bóhólníihii yadaʼoolíigo tʼéiyá, dóó ndaʼałtseed dóó bąąhági ádaatʼéí yaa naakaiígíí nahjįʼ kódeiyilaago tʼéiyá.

2 Áádóó baa hoolzhiizh dineʼé Diyin yá yádaałtiʼí éí nahjįʼ kódeiyiilaa, dóó Com yichʼįʼ adahineezchą́ą́ʼ biká adoolwołgo, háálá dineʼé ndabidoołtsxiłgo biká ádaatʼį́.

3 Áádóó náás ádahodooniłígíí łą́ągo Com yee yił dahoolneʼ; áádóó bikʼihojídlíigo ałtso biiníłką́.

4 Áádóó nízaadgóó yáʼátʼéehgo są́ yiih yíyá, áádóó Shiblom bá yizhchį́; dóó hooʼááłyę́ę góneʼ Shiblom dahneezdá. Áádóó Shiblom bikʼis bikʼijį́ silį́į́ʼ, áádóó ayóó átʼáo kéyah bikááʼgóó anaaʼ haslį́į́ʼ.

5 Áádóó baa hoolzhiizh Shiblom bikʼis éí Diyin yá yádaaltiʼí dineʼé náásdi ábidiʼdooldįįł daanínééʼ éí ndabidiʼdooltsxił dííniid;

6 Áádóó tʼóó báhádzidgo kéyah bikááʼgóó ntsohodinídéél, háálá ayóó átʼáo hoyééʼgo nahasdzáán bikááʼ hodooleeł dadííniid, dóó dineʼé bitahgo ałdóʼ, dóó ayóó átʼáo bitahgóó dahodoochxǫǫł, nahasdzáán bikááʼgóó tsʼídá doo łaʼ kóhonééh da ńtʼę́ę́ʼ, dóó bitsʼin nahasdzáán bikááʼ deeskʼidgo ádoolnííł tʼáá hazhóʼó bibąąhági ádaatʼéii yaa ndaʼooskango tʼéiyá.

7 Áádóó Diyin Bóhólníihii doo yikʼeh dahółį́į da, bąąhági átʼéii nahonitʼingo yee ałhaʼdaʼdeestʼáago ádaʼałʼínígíí biniinaa; ákohgo, kéyah tʼáá áłtso bikááʼgóó anaaʼ dóó ałhinááʼdiijahgo bee hahoolzhiizh, dóó ałdóʼ ląʼí dichin aghą́ dóó naałniih, hónáásiiʼ yéego hoochxǫ́, tsʼídá hádą́ą́ʼda díí kéyah bikáaʼgi kótʼéego doo haleeh da ńtʼę́ę́ʼ; áádóó díí tʼáá átʼé ádahóótʼįįd Shiblom hiinánéedą́ą́ʼ.

8 Áádóó dineʼé bibąąhági ádaatʼéii yaa ńdaʼookąąhgo hahoolzhiizh, áádóó kódaadzaago Diyin Bóhólníihii baa joozba.

9 Áádóó baa hoolzhiizh Shiblom biʼdiisxį́, áádóó Seth biʼdisnah, dóó ąąh sidáago ałtso biiníłką́.

10 Áádóó baa hoolzhiizh biyeʼ, Ahah, nahatʼá bił hazʼą́ yee ádíhoosnííʼ, áádóó bidineʼé yikʼi hooʼááłgo ałtso bííníłką́. Áádóó tʼáá ałtso bąąhági ádaatʼéii yaa naagháago biiníłką́, éí bąą ląʼígo naʼastseed; dóó tʼáadoo ląʼí biiníłką́ą da.

11 Áádóó Ethem, Ahah yitsʼą́ą́dóó yigááł, nahatʼá bił hazʼą́ yee ádíhoosnííʼ, áádóó bí ałdóʼ bąąhági átʼéii yaa naagháago bííníłką́.

12 Áádóó baa hoolzhiizh Ethem hiinánéedą́ą́ʼ Diyin yá yádaałtiʼii tʼóó ahayói nahaaskai, dóó dineʼé Diyin bikʼeh áhodooníłígíí yee yichʼįʼ hadahaasdzííʼ; aooʼ, éí Diyin Bóhólníihii bikʼeh áhodoonííłgo nahasdzáán bikááʼdóó tsʼídá tʼáá ałtso ábiʼdooldįįł tʼáá hazhóʼó bibąąhági ádaatʼéii yaa ńdaʼooskango tʼéiyá.

13 Áádóó baa hoolzhiizh dineʼé bijéí deestłʼis, dóó bizaad doo yikʼeh dahółʼį́į da; áádóó Diyin yá yádaałtiʼii baa yínííł daniizį́į́ʼ dóó dineʼé yitahdóó chʼídahaazná.

14 Áádóó baa hoolzhiizhgo Ethem doo yáʼáshǫ́ǫgo nahwiiʼaahgo biiníłką́, áádóó Moron bá yizchį. Áádóó baa hoolzhiizh Moron éí naatʼáanii nilį́įgo dahnááneezdá; dóó Moron éí Diyin Bóhólníihii yidáádóó doo yáʼáshǫ́ǫgo yigááł ńtʼę́ę́ʼ.

15 Áádóó baa hoolzhiizh dineʼé akʼijį́ danilį́įgo nídiijééʼ, háálá nahonitʼingo ałhaʼdaʼdeestʼánééʼ biniinaa éí ohólnííh dóó akʼehodidlí bee hadadilyaa; dóó bitah łaʼ hastiin ayóó bidziilgo bąąhági ááníiłgo níyá, dóó Moron yikʼijįʼ deezbaaʼ, nahatʼá bił hazʼą́ ałnííʼdóó yikʼeh deesdlį́į́ʼ, dóó ałníídóó nahatʼá bił hazʼą́ yikʼi hooʼááłgo ląʼí da nááhai.

16 Áádóó baa hoolzhiizh Moron hakʼehdeesdlį́į́ʼ, dóó nahatʼá bił hazʼą́ yee adínááhoosnííʼ.

17 Áádóó baa hoolzhiizh nááná łaʼ hastiin léíʼ ayóó bidziilgo bitah níyá, dóó éí Jared bínaaí yitsʼą́ą́dééʼ yigááł.

18 Áádóó baa hoolzhiizh Moron yikʼehdeesdlį́įgo nahatʼá bił hazʼą́ yee ádíhoosnííʼ, ákohgo, Moron ąąh sidáago ałtso biiníłką́; dóó Coriantor bá yizhchį́.

19 Áádóó baa hoolzhiizh Coriantor ąąh sidáago ałtso biiníłką́.

20 Áádóó baa hoolziizh Coriantor hiinánéedą́ą́ʼ Diyin yá yádaałtiʼii tʼóó ahayói nahaaskai, ayóóʼatʼáo dóó ayóó ánoolningo náás ádahodoonííłígíí yaa dahoolneʼ, dóó dineʼé ádaańdaʼoohkąąh deiłníigo ńdeiyooskan, Bóhólníihii Diyin God ałtso ábiʼdooldįįłgo bikʼijįʼ nahwiidooʼááł tʼáá hazhóʼó ádaańdaʼooskango tʼéiyá;

21 Áádóó Bóhólníihii Diyin God diné nááná łaʼ náánéídooʼish doodaiiʼ nááná łaʼ kéyah yikááʼ kéédahatʼį́į doogo yidoołʼaał, dabizází biʼdootʼeezhę́ęgiʼ átʼáo.

22 Áádóó éí Diyin yá yádaałtiʼii bizaad tʼáá átʼé doo deiniizį́į́ʼ da háálá nahonitʼingo dah ooldah dóó tʼáá íiyisíí ádajoodléii ádeiłʼínígíí biniinaa.

23 Áádóó baa hoolzhiizh Coriantor éí Ether bá yizhchį́, dóó bizééʼ hazlį́į́ʼ, éí ąąh sidáago ałtso biiníłką́.