1 Áádóó baa hoolzhiizh Omer bá yizhchį́, áádóó hooʼááłyę́ę góneʼ Omer dah nááneezdá. Áádóó Omer éí Jared bá yizhchį́; dóó Jared biyeʼké dóó bitsiʼké haazlį́į́ʼ.

2 Áádóó Jared bizhéʼé yitsʼą́ą́jí silį́į́ʼ, dóó Heth kéyahjįʼ níyá dóó ákweʼé kééhatʼį́į ńtʼę́ę́ʼ. Áádóó baa hoolzhiizh diné ląʼí yinaʼaloʼgo, saad yee łídílchíídgo, nahatʼá bił hazʼą́ ałnííʼdóó aghahodiitʼą́.

3 Áádóó nahatʼá bił hazʼą́ ałnííʼdóó aghahodiitʼą́ągo bizhéʼé yikʼijįʼ nídiibaaʼ, dóó bizhéʼé yah ayííłtʼeʼ, dóó yisnáago bá naalnishgo áyiilaa;

4 Áádóó áko, Omer hooʼáałgo biyoołkááłyę́ędą́ą́ʼ łahdóó yisná nilį́įgo biiníłką́. Áádóó baa hoolzhiizh biyeʼké dóó bitsiʼké haazlį́į́ʼ, éí Esrom dóó Coriantumr atah;

5 Áádóó bikʼis Jared átʼínígíí biniinaa tʼáá íiyisíí bádahóóchįįd, wonáásdóó bá ndaabaahí ahídeiyiizhʼeezh dóó Jared yikʼiijééʼ. Áádóó baa hoolzhiizh tłʼééʼ hazlį́įʼgo yikʼiijééʼ.

6 Áádóó baa hoolzhiizh Jared bindaabaahí nideistseedgo bí ałdóʼ kʼadę́ę biʼdiilyéeʼgo; dóó tʼáadoo dashiyołhéhé níigo ádaa náʼooskan, dóó hootʼááł bee bóhólnííhę́ę bizhéʼé yeedidooʼááłgo haadzííʼ. Áádóó baa hoolzhiizh beʼiinaʼ yaa nídeideezʼą́.

7 Áádóó áko Jared tʼáá íiyisíí yínííł niizį́į́ʼ háálá bihootʼááł bighahodiitʼánígíí biniinaa, háálá bihootʼááł éí tʼáá íiyisíí bił nilį́į́ ńtʼę́ę́ʼ dóó adahwiisʼáágóó yee atʼį́įgo ádaa haʼniih.

8 Áko Jared bitsiʼ tʼáá ałtsojįʼ ayóó bił ééhózin, dóó bizhéʼé yínííł naagháago yooʼį́, haitʼáo bizhéʼé bee bóhólníhę́ę baa nídidootʼááłgo yee hodeezʼą́.

9 Áko Jared bitsiʼ éí tsʼídá nizhóní. Áádóó baa hoolzhiizh bizhéʼé yichʼįʼ haadzííʼ, dóó neiyídéíłkid: Shizhéʼé haʼátʼíísh biniinaa yínííł nílį́? Danihizhéʼé tónteel tséʼnaa yíkaiyę́ę baa haneʼ eiísh tʼáadoo yiníłtaʼ da? Áko shooh, daʼ ałkʼidą́ą́ʼ ádáátʼįįdyę́ęísh baa haneʼ hólǫ́, áko nahonitʼingo nahatʼá bee hootʼááł bił nahazʼą́ą́góó yee ádídahoosniiʼ dóó ayóó átʼéego yee ádaa dahaʼniih?

10 Áádóó áko, éí bąą, bineʼ shizhéʼé Akish hágo yididoonííł, éí Kimnor biyeʼ; áádóó áko shooh, nishzhóní yeeʼ, dóó bidááhdóó adeeshzhish, dóó bil yáʼátʼééh doo, áko bichʼooní deeshłééłgo shaa tsídookos; ákohgo bichʼooní deeshłeełgo nanídéíłkidgo, kóbididííniił: Aláahdi naatʼáanii, shizhéʼé bitsiitsʼiin shéíníʼą́ągo naadeeshtééł.

11 Áádóó áko Omer éí Akish bikʼis nilį́; ákohgo, Jared Akish hágo yidííniid, Jared bitsiʼ éí yidááh oolzhiizh áko bił yáʼíítʼééh, dóó shichʼooní dooleeł niizį́į́ʼ. Áádóó baa hoolzhiizhgo Jared ííłní: Shichʼooní dooleełgo shaa dííłtééł.

12 Áádóó Jared ábidííniid: Naa deeshtééł, aláahdi naatʼáanii, shizhéʼé bitsiitsʼiin sheiníʼą́ągo.

13 Áádóó baa hoolzhiizh Akish éí Jared bighan hazʼą́ą́dóóʼígíí tʼáá átʼé bikʼéí danilínígíí ahíyiizhʼeezh, dóó áyidííniid: Tʼáadoo leʼé nihitsʼą́ą́dóó nisinígííʼíísh bee shikééʼ ndoohkahgo bee ádee hadadoodzih?

14 Áádóó baa hoolzhiizh tʼáá átʼé yichʼįʼ ádee hadaasdzííʼ, Diyin God yáʼąąshdi hólóonii binahjįʼ, dóó ałdóʼ yáʼąąsh binahjįʼ, dóó ałdóʼ nahasdzáán binahjįʼ, dóó bedaʼiinaʼ bee, dóó tʼáá háí shį́į́ Akish yinízinígíí yitsʼą́ąjįʼ kódzaago bitsiitsʼiin kʼídookał; dóó tʼáá háida Akish bee bił hoolneʼígíí yaa hoolneʼgo, éí beʼiinaʼ ndootʼih.

15 Áádóó baa hoolzhiizh Akish tʼáá áko deidííniid. Áádóó Akish ałkʼidą́ą́ʼ bee ádee hadaʼiisdzíʼę́ę yaa yiizlá jó éí ałdóʼ óhólnííh deinízin ńtʼę́ę́ʼ, éí Cainyę́ę bitsʼą́ą́dę́ę́ʼ haadahasyá, éí hodeeyáádą́ą́ʼ naʼałtseedii nilį́į́ ńtʼę́ę́ʼ.

16 Áádóó áko biʼiiníziinii bibeʼadziilii bikáʼalwodgo diné bee ádéíhaʼdoozih yichʼįʼ kódeiyiilaa, áko tʼóó bił dahalą́ągo ádabiʼdólzin doo, adziil yíká ádaatʼínígíí hózhǫ́ akʼidabidziilgo bikáʼanálwoʼ, dóó nidaʼałtseed, dóó aghadaʼiiʼnííł, dóó dabiyoochʼííd, dóó ałʼąą átʼéego bąąhági ádaatʼį́ dóó ajiłii yaa naakai.

17 Áádóó Jared bitsiʼ éí ałkʼidą́ą́ʼyę́ę yikʼínídiʼnóotaałgo bijéí biyiʼ siláago áyiilaa; áádóó Jared éí Akish bijéí biyiʼ siláago áyiilaa; ákohgo, Akish bikʼéí dóó bikʼis danilínígíí yichʼįʼ kóyiilaa, tʼáá bí yinízingíí yichʼįʼ yiʼoołkąąhgo ádéíhadaʼiidziih yee yoʼayiizhʼeezh.

18 Áádóó baa hoolzhiizh nahonitʼingo ałhaʼdiitʼaah hadeiyiiswod, ałkʼidą́ą́ʼyę́ę nahalingo; éí ałhaʼdiitʼaah tsʼídá woolchʼį́dígíí dóó aláahdi bąąhági átʼéii, Diyin God yooʼínígíí átʼé.

19 Háálá Diyin Bóhólníihii éí doo nahonitʼingo ałhaʼdiitʼaahgo naalnish da, áádóó ałdóʼ diné naʼałtseedgo doo yá yinízin da, ndi tʼáá ałtsogóó doo yee yá hasʼą́ą da, tʼáá nihokááʼ dineʼé ályaadą́ą́ʼ.

20 Áádóó áko shí, Moroni, yee ádéíhadaasdzíʼígíí dóó haitʼáo yee áłhaʼdaʼdeestʼánígíí doo baa náʼiideesoh da, háálá diné tʼáá ałtso dah deíkááhgóó bee dahólǫ́ǫgo shił ííshją́ą́ ályaa, dóó Laman dineʼé bitah hólǫ́.

21 Áádóó díí diné baa yáshtiʼígíí ndeiyiishchxǫ́, áádóó Nephi bidineʼé ałdóʼ ndeiyiishchxǫ́.

22 Áádóó tʼáá háí shį́į́ diné dah deíkáhígíí díí nahonitʼingo ałhaʼdiitʼaah bił tʼáá daʼákogo, óhólnííh dóó akʼehodiʼdlí deinízingo, dóó tʼáá ałtsogóó hazlį́įʼgo, áko shooh, éí abidiʼdooldįįł; háálá Diyin Bóhólníihii yá naazínígíí ndabidiʼdoołtsxiłgóó doo yee hasʼą́ą da, éí nidabiʼdistseedgo, niʼdóó bichʼįʼ áłahjįʼ daachago bá akʼeh nídoodleeł dóó ákótʼée ndi tʼáadoo nátʼą́ą́ʼ yá akʼeh deesdlííʼ da.

23 Ákohgo, O Gentile dineʼé, Diyin God biʼééhózinii bikʼehgo díí nihił ííshjání ádadoolnííł, áko nihibąąhági ádaatʼéii baa ádaa ńdaʼiidoohkąął, áko díí nidaʼałtseedgo ahadaʼdeestánígíí doo nihikʼeh dadidoodleełgóó yee hasʼą́, éí ohólnííh dóó akʼehoʼdídlí bee hadadilyaa—dóó naaninsh, aooʼ, tsʼídá adoolchxoǫǫłgo naanish nihikʼijįʼ dooleeł, aooʼ, áko Hoolʼáago Diyin God bibéésh hał bee nahwiitʼahii nihikʼi ndookǫs, dóó bá dahosoołʼą́ągo nihikʼeh dadidoodleeł dóó danihidooghą́ą́ł.

24 Ákohgo, Diyin Bóhólníihii ánihiłní, díí nihitah hazlį́įʼgo daołtsą́ągo áko tʼóó baaʼihgo nihił hooʼaʼgo bichʼįʼ chʼéédadoohdził, háálá nahonitʼingo yee yił ahadaʼdeestʼánígíí nihitah hazlį́ʼígíí biniinaa; éí doodago yíí nihił hólǫ́ǫ doo, háálá nidaaztseed yę́ę bidił dadeeznaʼígíí biniinaa, háálá niʼdóó daacha bikʼehodidoodleeł biniyé, áádóó hadeiyiiswodígíí ałdóʼ.

25 Háálá baa hodoolzhish tʼáá háiida tʼáá bí ádeinízingo kéédahatʼínígíí, dah deíkáhígíí, dóó adahwiisʼáágóó kéédahatʼínígíí yikʼeh didoodleełgo yindahaʼá; dóó éí binahjįʼ diné tʼáá ałtso ndabidiʼdooltsxił, háálá biʼiiníziinii haidiilaa; éí yoochʼííd tʼáá átʼé yizhéʼé nilį́; éí biyoochʼíidii áłtsé danihishchíiniiyę́ę yinaʼazloʼ, aooʼ, tʼáá éí biyoochʼíidii hodeeyáádę́ę́ʼ diné nidaʼałtseedgo áyiilaa; éí nihokááʼ dineʼé bijéí danitłʼizgo áyiilaa, éí Diyin yá yádaałtiʼii nideistseed, tsé yee yił ndajiisneʼ, dóó tʼáá ńléí hodeeshzhiizhdę́ę́ʼ chʼídeineeskaad.

26 Ákohgo, shí, Moroni, díí nahidíízoh shiʼdooʼniid áko doo yáʼáshóonii áhátʼínígíí da yooʼádoolnííł, áádóó baa hodoolzhish Chʼį́įdii nihokááʼ dineʼé bijéí doo yikʼi bidziil da dooleeł, ákondi tʼáá áłahjįʼ yáʼátʼéehii éí ádaołʼį́ bidiʼníi doo, áko tʼáá átʼé diyinkʼehgo oodááł bá hólǫ́ǫ doo dóó yisdádookah.