1 Áádóó Diyin Bóhólníihii éí Jared bínaaí áyídííniid dziłdę́ę́ʼ Diyin Bóhólníihii bitsʼą́ą́dééʼ adaanááh, áádóó yiniłtsánígíí nááhízóóh; dóó nihokááʼ dineʼé doo bił ííshjání ádoolnííł da tsin ałnáosdzoh bikááʼ dahbidistį́ bikééʼdóó índa; éí bąą aláahdi naatʼáanii Mosiah tʼah neijaah, nihokááʼ dineʼé doo bił ííshjáá ádoolnííł da Christ bidineʼé yichʼįʼ ííshjání aʼdiilyaago índa.

2 Áádóó Christ bidineʼé tʼáá aaníigo yichʼįʼ ííshjáá aʼdiilyaa éí bił ííshją́ą́ ádoolnííł dííniid.

3 Áádóó áko, éí bikééʼdééʼ, tʼáá ałtso beʼoodląʼyę́ę yaa dáádiikai; áádóó Laman dineʼé tʼéiyá tʼáadoo da, dóó dahdiikaihę́ę éí Christ binahatʼá bee yisdáʼiildéehii nahjįʼ kódeiyiilaa; éí bąą nihosdzáań biyiʼ nináádiłʼįįh shiʼdooʼniid.

4 Áko shooh, béésh tąhí bikááʼ Jared bínaaí yiyiiłtsánééʼ náhézoh; dóó tsʼídá doo díígiʼ átʼáo daʼílíinii ííshjááh ádaalnééh da ńtʼę́ę́ʼ éí Jared bínaaí bił ííshjááʼ ályaa.

5 Ákohgo Diyin Bóhólníihii nahidíízoh shidííniid; áádóó nahízoh. Áádóó bidáʼdidííłjah shidííniid; dóó tsé binahjįʼ ééhodoozįįłyę́ę ałdóʼ bidáʼdidííłjah shidííniid; ákohgo tsé binahjįʼ ééhodoozįįłyę́ę bidáʼdiníłjééʼ, Diyin Bóhólníihii ádííniidígíí bikʼehgo.

6 Háálá Diyin Bóhólníihii áshídííniid: Gentile dineʼé éí doo bichʼįʼ kódoolnííł da bibąąhági átʼéii yaa ńdaʼooskango indá, áko Diyin Bóhólníihii yidááhdóó bąąhági átʼéii bąąh ádaadin dooleeł.

7 Áádóó áajįʼ ayííłką́ąʼgo dashoodlą́ą doo, ní Diyin Bóhólníihii, Jared bínaaí ádzaayę́ęgiʼ átʼáo, áko shí shinahjįʼ hadaałtʼée doo, ákogo índa Jared bínaaí yiyiiłtsánéeʼ bił ííshjání ádadeeshłííł, tʼáá ałtso shitsʼą́ą́dóó ił ííshją́ą́ ádadoolníłígíí bichʼįʼ ąą ádeeshłííł, ní Jesus Christ, Diyin God biYeʼ, yáʼąąsh dóó nahasdzáán yiZhéʼé nilíinii, dóó tʼáá ałtsóní bikááʼ siléí.

8 Áádóó Diyin Bóhólníihii bizaad yikʼijįʼ nilínígíí, bikʼijįʼ hóyééʼgo haʼdoodzih; dóó tʼáá háíshį́į́ díí doo yinízinígíí éí hoyééʼgo bá haʼdoodzih; háálá doo ayóó ádaatʼéii bichʼįʼ ííshją́ą́ ádeeshłííł da, ní Jesus Christ; háálá shí éí yáshtiʼ.

9 Áádóó shí ádishníigo yáʼąąsh ąą ádaatʼįįh dóó ałchʼįʼ kónídaatʼįįh; dóó shizaad bikʼehgo nahasdzáán nahiʼná; dóó ádíshníigo yikááʼ dahiináanii abidiʼdooldįįł, kǫ́ ndi bee.

10 Áádóó shizaad doo deiyoodlánígíí éí shikééʼ naazíinii doo deiyoodlą́ą da; dóó tʼáá aaníí daatsʼí díí bee haasdzííʼ, bee ndahonohʼaah; háálá nihoníyáadi, nihił béédahodoozįįł tʼáá aaníí shí ádíshní.

11 Ákondi tʼáá háída díí beehaasdzíʼígíí yoosdląądgo, éí shiʼIiʼ Sizį́ Diyiinii bikʼihodooleeł, dóó bił bééhodoozįįł dóó yaa hodoolnih. Háálá shiʼIiʼ Sizį́ Diyiinii binahjįʼ díí tʼáá aaníí ádaatʼéhígíí bił bééhózin doo; háálá nihokááʼ dineʼé yee yáʼátʼéehii deidínóozįįł.

12 Áádóó nihokááʼ dineʼé tʼáá haʼátį́į da yáʼátʼéehii ádeidoolííłgo deidínóozįįłígíí éí shí shitsʼą́ą́dóó átʼée doo; háálá yáʼátʼéehii éí doo tʼáá háádééʼ hodooleeł da tʼáá shí shitsʼą́ą́dóó tʼéiyá. Tʼáá shí áshtʼį́ nihokááʼ dineʼé tʼáá ałtso yáʼátʼéehii ádeidoolííłígíí bichʼįʼ neheshʼéésh; háida shizaad doo yoodlánígíí éí shí doo shoodlą́ą da doo—éí shí ashtʼįʼ; dóó háida doo shoodlánígíí éí shiZhéʼé nilíinii shiníłʼaʼígíí doo yoodlą́ą da doo. Háálá áko shooh, Shí éí aZhéʼé nishłį́, Shí éí adinídíín nishłį́, dóó íiná nishłį́, dóó nahasdzáán bitʼááʼaníinii nishłį́.

13 Shaa hoohkááh, O Gentile dineʼé danóhłíinii, dóó ayóó ádaatʼée nihił ííshjáá ádeeshłííł, éí ééhózinii nídadeesʼį́į́ʼ háálá doo daʼoodlánígíí biniinaa.

14 Shaa hoohkááh, O Israel dineʼé danóhłíinii, áádóó nihił ííshją́ą́ ádoolnííł haitʼáo ayóó ádaatʼée nihiZhéʼé nihá hashtʼeʼyiilaaígíí, nihosdzáán tʼáhdoo álnééhyę́ędą́ą́ʼ dóó hóshdę́ę́ʼ; dóó tʼahdoo niheeyílyée da, háálá doo daʼiinóhdlánígíí biniinaa.

15 Áko shooh, daaʼdiníbaal binahjįʼ doo daʼiinóhdlánígíí ndahisiyoołdláadgo éí tsʼídá bąąhági ádaahtʼį́įgo biyiʼ tʼahdii nihóótą́ʼ, dóó nihijéí daastłʼis, dóó nihíniʼ doo bee daʼoohį́į da, áko índa nihokááʼ tʼahdoo álnééhdą́ą́ʼ ayóó átʼáo dóó doo beełtʼéhí da nihitsʼąą nanilʼínéé—aooʼ, nihiZhéʼé nilíinii shizhiʼ binahjįʼ nashidółkidgo, nihijéí dóó nihiyiʼ sizíinii yínííł nilį́įgo, ákohgo índa nihiZhéʼé nilíinii danihizází yee yił ahadaʼdeestʼánée nihił bénídahodoozįįł, O Israel bighandóó danohłíinii.

16 Áádóó índa ił ííshją́ą́ ádeeshłaayę́ę éí shánaalʼaʼí John neiyízoh éí nihokááʼ dineʼé tʼáá ałtso deidoołtsééłgo bichʼįʼ ąą ádoolnííł. Béédaołniih, díí daołtsʼą́ągo, tsʼídá tʼáá aníigo ííshją́ą́ ádoolnííłígíí baa hoolzhiizhgo nihił béédahodoozįįł.

17 Éí bąą, díí haneʼ nihichʼįʼ kólyaago binahjįʼ nihił bééhózin doo aZhéʼé nilíinii binaanish ádahwiisʼáago bee hadaʼiizhnish.

18 Éí bąą, adahwiisʼáágóó tʼáá anółtso ádaańdaʼoohkąąh, dóó shaahoohkááh, dóó shinahatʼá bee yisdáʼiildéehii deidoohdląął, áádóó shízhiʼ binahjįʼ tó bee danihiʼdiilzį́į́h, áko háida oodlánígíí dóó tó bee biʼdoolzį́ʼígíí éí yisdáʼdoogááł; ákondi doo oodlánígíí éí doo yisdáʼdoogááł da; áádóó shízhiʼ binahjįʼ daʼoodlánígíí éí bee ééhózinii bikééʼgóó ádahoonííł dooleeł.

19 Áádóó nihoníyáadi shízhiʼ yoodlánígíí hadeilʼį́įgo bikʼihojidoodliił, háálá éí nihosdzáán álnééhyę́ędą́ą́ʼ Diyin bił hazʼą́ądi bá hashtʼehoolyaago yisdádoogááł. Áádóó áko shooh, shí ádíshníigo bee haasdzííʼ. Amen.