1 Áádóó áko shí, Moroni, Jared dóó bikʼis baa haneʼę́ę bínídiishnish.

2 Áko íídą́ą́ʼ Diyin Bóhólníihii tsé hashtʼeyiilaayę́ę éí Jared bínaaí dził yikááʼgóó yiníjaaʼyę́ę, Jared bínaaí dziłdééʼ adanáádzá, dóó tsinaaʼeeł ádeiyiilaaʼyę́ę yiiʼ neiyiznil, tʼááłáʼígo tsinaaʼeeł biyiʼ ałtsʼą́ą́jí neiyiiznil; áádóó áko shooh, éí tsin naaʼeeł biyiʼ bee daʼdiltłiʼ.

3 Áádóó áko Diyin Bóhólníihii éí tsé chahałheeł biyiʼ daʼdinídííngo áyiilaa, hastóí, sáanii, dóó áłchíní bee bá adeezdíín doo biniyé, áko doo chahaałheełgóó tónteel tsénaa bił ndaʼdooʼoł da.

4 Áádóó baa hoolzhiizh chʼiyáán ałʼąą átʼéego áhídeiyiizjaaʼ, áko tónteel yikáágóó yee dahiináa doo, dóó bilį́į́ʼ dóó ndanilkaadígíí bichʼiyąʼ ałdóʼ, dóó ałʼąąh ádaatʼáo daʼałchinígíí doodaiiʼ ndaaldlooshígíí doodaiiʼ ndaatʼaʼígíí deiníjaaʼ—áádóó baa hoolzhiizhgo díí deiníjaaʼígíí yił tsin naaʼeeł doodaiiʼ tó yiiʼndaaʼeełígíí, tónteel yiih yikai, biDiyin God Bóhólníihii yadaʼólį́įgo.

5 Áádóó baa hoolzhiizh Bóhólníihii Diyin God tó bikááʼgóó tʼóó bááhádzidgo niyolgo áyiilaa, kéyah baa deetʼánée bichʼįʼjigo; dóó áko tónteel bikááʼgóó niyol ndabiiłhango bił daʼníʼéél.

6 Áádóó baa hoolzhiizh tʼóó ahayóídi tónteel bitłááhdi tó bikʼindadiilkǫʼ ńtʼę́ę́ʼ, háálá tó dziłgiʼ átʼéego hachʼįʼ náádiidááhgo hakʼih néíłdas, áádóó ałdóʼ ayóó átʼáo dóó tʼóó báhádzidgo nahałtin níyoltsoh bitsʼą́ą́dóó.

7 Áádóó baa hoolzhiizh tónteel bitłʼááhdi tó bikʼidiilkǫʼgo tó doo atíbiilaa da, bitsinaaʼeeł ásaaʼ bidziilgo ályaaʼígíí nahalingo, áádóó ałdóʼ Noah bitsinaaʼeeł bidziilgo ályaaʼígiʼ átʼáo; éí bąą tó bił dadiilkǫʼgo Diyin Bóhólníihii yichʼįʼ ńdaʼooskan, áádóó tókááʼjįʼ háábííłʼéél.

8 Áádóó baa hoolzhiizh níyol doo niʼkónééhgóó kéyah baa deetʼánéegóó tó ńteeł bikááʼ bił daʼníʼéél; áádóó áko bikééʼ yiiyołgo bił daʼníʼéél.

9 Áádóó Diyin Bóhólníihii yaa dahaniihgo yichʼįʼ dahóótááł, aooʼ, Jared bínaaí Diyin Bóhólníihii yaa haniihgo yichʼįʼ hóótáál; dóó Diyin Bóhólníihii yichʼįʼ ahééhnízin dóó yaa haniihgo iʼííʼą́; dóó tłʼééʼ hazlį́įgo, Diyin Bóhólníihii yaa dahaniihgo tʼáadoo niʼ kódeiyiilaa da.

10 Áádóó áko bił deiyíyóółgo bił daʼníʼéél; dóó tónteel biyiʼ naayééʼ hólónígíí tʼáadoo dabidiiłtááʼ da, łóóʼtsoh ndi tʼáadoo atídabiilaa da, áádóó adinídíín tʼáá áłahjįʼ bee dahólǫ́ǫ ńtʼę́ę́ʼ, tółkááʼ doodago tó bitłʼááhdi.

11 Áádóó áko táadi neeznádiin dóó baʼaan dizdiin dóó baʼaan dį́į́ʼ yiską́ tónteel biyiʼ náás bił daʼníʼéél.

12 Áádóó tó bąąhjįʼ bił ndaʼiizʼéél kéyah baa deetʼánéejįʼ. Áádóó tó bąąhjįʼ kéyah baa deetʼánée yikááʼ ndadeesʼeezgo niʼjįʼ nitsidadeezgoʼ, Diyin Bóhólníihii yichʼįʼ hoojoobaʼ danizį́į́ʼ, dóó Diyin Bóhólníihii yidááhdóó bił dahózhǫ́ǫgo binákʼeeshtoʼ dadeezna, háálá tʼóó ahayóídi bee ajoobaʼ yee yikáʼeelwod.

13 Áádóó baa hoolzhiizh kéyah bikááʼgóó ndahaazná, dóó kʼidaʼdeezlá.

14 Áádóó Jared biyé dį́į́ʼ bee hazlį́į́ʼ; áádóó éí Jacom, dóó Gilgah, dóó Mahah, dóó Orihah dabízhiʼgo áyiilaa.

15 Áádóó Jared bínaaí ałdoʼ biyeʼké dóó bitsiʼké hazlį́į́ʼ.

16 Áádóó Jared dóó bikʼis yił ahéédahólzinígíí naadiin naaki yiltʼé; áádóó ałdóʼ biyeʼké dóó bitsiʼké dahazlį́į́ʼ tʼahdoo kéyah baa deetʼánéeʼjįʼ yíkááhgóó; dóó éí bąą tʼáá ląʼí silį́į́ʼ.

17 Áádóó Diyin Bóhólníihii bidááhdóó hojoobaʼ ádeinízingo dahiináago bee ndabidiʼneestą́ą́ʼ; áádóó yáʼąąshdę́ę́ʼ ałdóʼ ndabidiʼneestą́ą́ʼ.

18 Áádóó baa hoolzhiizh kéyah bikááʼ daʼniłtsʼą́ą́góó adahaazná, dóó ałʼąą nootʼį́į́łjįʼ dóó niʼ bikááʼ kʼéédaʼdidlééh; áádóó daʼatʼį́įgo náás deeskai.

19 Áádóó Jared bínaaí są́ yiihíyá, dóó beʼiinaʼ nidootihgo yaa ákoniizį́į́ʼ; ákohgo Jared íídííniid: Nihidineʼé ahíidiitʼishgo yídiiltah, áko haʼátʼíí danihooʼnínígíí nihił bééhodoozįįł tʼahdoo niheʼiinaʼ nihaa náádiilyéédą́ą́ʼ.

20 Áádóó ákótʼáo diné áłah silį́į́ʼ. Áko Jared bínaaí éí biyeʼké dóó bitsiʼké tʼáá átʼégo naadiin naaki; áádóó Jared biyeʼké dóó bitsiké éí naaki tsʼáadah yiltʼé, biyeʼké éí dį́į́ʼ.

21 Áádóó baa hoolzhiizh bidineʼé yiyííłtaʼ, dóó yiyííłtaʼ dóó bikʼijįʼ, haʼátʼíí lá laanaa danohsin tʼahdoo niheʼiinaʼ niitʼééhdą́ą́ʼ yidííniid.

22 Áádóó baa hoolzhiizh diné éí kódeinízin łaʼ biyé aláahdi naatʼáanii bá hooʼááł dooleełgo akʼah yee deiyíísį́į́ʼ.

23 Áádóó áko shooh, díí yaa yínííł niizį́į́ʼ. Áádóó Jared bínaaí íídííniid: Háálá tʼáá aaníí díí doo nihíhólníihgo nihił hwidooʼaał.

24 Ákondi Jared bikʼis ííłní: Biniʼ tʼáá áko aláahdi naatʼáanii bee hólǫ́ǫ doo. Áádóó áko áhodííniid, Nihíyeʼ bitahdóó aláahdi naatʼáanii dooleełígíí łaʼ bikʼidoołnííh.

25 Áádóó baa hoolzhiizh Jared bínaaí aláajįʼ bá yizhchinígíí yikʼidadiilniiʼ; dóó éí Pagag wolyé. Áádóó baa hoolzhiizh aláahdi naatʼáanii doo deeshłeeł da dííniid. Áádóó diné bizhéʼé ádíílííł bidiní deiłní; ákondi bizhéʼé éí dooda dííniid; áádóó diné éí háída aláahdi naatʼáanii dooleełgo tʼáadoo bídanółchéhí yidííniid.

26 Áádóó baa hoolzhiizh, tʼáá átʼé Pagag bikʼiské yikʼidadiilniiʼ, dóó tʼáá átʼé dooda dadííniid.

27 Áádóó baa hoolzhiizh Jared biyeʼké ndi dooda dadííniid, tʼáá átʼé ákondi tʼááłʼáʼí tʼéiyá; éí Orihah diné yikʼi aláahdi naatʼáanii nilį́įgo akʼah yee deiyíísį́į́ʼ.

28 Áádóó akʼihodeezʼą́, dóó diné náás deeskai, dóó tʼáá íiyisíí daʼatʼį́ daazlį́į́ʼ.

29 Áádóó baa hoolzhiizh Jared éí bizééʼ hazlį́į́ʼ, áádóó bikʼis ałdóʼ.

30 Áádóó baa hoolzhiizh Orihah éí Diyin Bóhólníihii yikéé hojooba nízingo yigááł, áádóó Diyin Bóhólníihii haitʼáo bizhéʼé ayóó átʼéego yá íʼiilaayę́ę yénálniih, dóó bidineʼé Diyin Bóhólníihii haitʼáo dabizhéʼé ayóó átʼéego yá íʼiilaayę́ę ałdóʼ yee neineeztą́ą́ʼ.