1 Áádóó baa hoolzhiizh Jared dóó bikʼis, dóó yił háájéíʼ, dóó ałdóʼ Jared bikʼis dóó dabikʼéí dóó yił haajéí, éí haalgai goyáa eekai nahookǫsjigo, (éí halgaigiʼ Nimrod hoolyé, ákweʼé ayóó naalzheehii bee hóójiʼ) binaaldlooshii ahídeiyiniiłkaad yił, bikąʼ dóó dabiʼáádii, ałʼąą ádaatʼéego.

2 Áádóó ałdóʼ tsídii yá ndaʼiiznil áko yił dadidoodiłgo; áádóó ałdóʼ łóóʼ biih dooʼniłígíí hashtʼedeiyiilaa, éí łóóʼ hadeiyizlóʼígíí yiih deiznilgo deiníką́.

3 Áádóó ałdóʼ deseret deiníjaaʼ, éí, áá haʼnínígíí, éí tsísʼná; dóó áko tsísʼná dahnáʼásołgo deiníjaaʼ, dóó tʼáá ałtsoní ałʼąą átʼéego nahasdzáán bikááʼgóó dahólóonii, álástsiiʼ ałʼąą átʼéego.

4 Áádóó baa hoolzhiizh Nimrod haalgaigi yíkaigo Diyin Bóhólníihii bichʼįʼ adááyá dóó Jared bínaaí yił ahił hoolneʼ; dóó kʼos dahʼoojołígíí yiyiʼdééʼ, áko Jared bínaaí tʼáadoo yiyiiłtsą́ą da.

5 Áádóó baa hoolzhiizh Diyin Bóhólníihii doo kééhojitʼínígóó dahdidoonééł bidííniid, aooʼ, éí hazʼą́ągi diné doo hólǫ́ǫ da ńtʼę́ę́ʼ. Áádóó baa hoolzhiizh áko Diyin Bóhólníihii biníʼeezh dóó kʼos dahʼoojoł biyiʼdééʼ bichʼįʼ yááłtiʼ, dóó háajigo dah didoonéłígíí yee yił hoolneʼ.

6 Áádóó baa hoolzhiizh doo kééhojitʼínígóó níná, dóó tsin naaʼeeł ádeiyiilaa, éí yee tónteel yikááʼgóó tséʼnaa daʼníłʼéél, Diyin Bóhólníihii áłahjįʼ nabinitingo biníʼeezh.

7 Áádóó Diyin Bóhólníihii éí doo tʼáá bichʼiʼdóó tónteel doo kééhojitį́ biyiʼjįʼ nidooneełgóó yá hoolʼaʼ da, ákondi kéyah baa deetʼánéé yaa doonééłgo éí kéyah aláahdi yáʼátʼéehii átʼé, éí Bóhólníihii Diyin God diné Diyinkʼehgo deiyíkáhígíí yá hashtʼeʼniiníʼą́.

8 Áádóó hashkéego Jared bínaaí áyidííniid, tʼáá háíshį́į́ díí kéyah baa deetʼánígíí yikááʼ kéédahatʼį́į dooleełgo, íídą́ą́ʼ dóó ahoolʼáágóó, deidósin doo, Diyin God tʼáá aníínii dóó tʼáá bí tʼéiyágo, doodago éí nahjįʼ ábidiʼdooldįįł éí hashkéego haadziʼę́ę́ doo tʼáá kólzingóó bikʼijįʼ kódoolnííł.

9 Áádóó áko, Diyin God díí kéyah yá hadziʼígíí bikʼidaʼdiitą́, áko kéyah baa deetʼánígíí átʼé; dóó tʼáá háíshį́į́ yikááʼ kéédahatínígíí éí Diyin God bibee hazʼáanii yikʼeh dahółʼį́į doo, doodago éí nahjįʼ ábidiʼdooldįįł éí hashkéego haadziʼę́ę́ doo tʼáá kólzingóó bikʼijįʼ kódoolnííł. Áádóó bąąhági átʼéii tʼáá íiyisíí yiiʼ deeskaigo hashkéego haadziʼę́ę́ doo tʼą́ą́ʼ kólzingóó bikʼijįʼ kódoolnííł.

10 Háálá áko shooh, díí kéyah nááná łaʼ kédaayah yiláahdi yáʼátʼéehii átʼé; ákohgo tʼáá háíshį́į́ díí kéyah yikááʼ kééhatʼį́įgo Diyin God yídósin doo doodago éí nahjįʼ ábidiʼdooldįįł; háálá éí Diyin God hoolʼáágóó hadziʼígíí átʼé. Áádóó kéyah yikááʼ kéédahatʼínígíí bąąhági átʼéii tʼáá íiyisíí yiih yikaigo, áko índa nahjįʼ ábidiʼdooldįįł.

11 Áádóó díí nihił ííshjáá ádoolnííł, O Gentile dineʼé, áko Diyin God yee haadzííʼyę́ę nihił béédahodoozįįł—áko da ádaańdaʼdoohkąął, dóó tʼahdoo yéego bąąhági átʼéii biih nohdééhdą́ą́ʼ niʼ kódáołééh, áko Diyin God yéego hashkéego haadziʼę́ę́ doo nihikʼijįʼ kódoolnííł da háálá éí kéyah íídą́ą́ʼ yikááʼ kéédahatʼínéé ákódaadzaa.

12 Áko shooh, díí kéyah yáʼátʼéehii átʼé, dóó tʼáá háíshį́į́ diné éí yikááʼ kéédahatʼínígíí doo ąąh shijééʼ da doo dóó doo biʼdisnáago dabiʼdótąʼ da doo, dóó tʼáá ałtso yáʼąąsh biyaadóó dah daʼíldééhígíí bitsʼą́ą́dóó, éí kéyah biDiyin God deidósingo tʼéiyá, éí Jesus Christ átʼį́, éí nihizází ndeiyídzohyę́ę biyiʼdóó nihił hooneʼ.

13 Áádóó shaa haneʼ kʼad baa nááháshneʼ doo, háálá áko shooh, baa hoolzhiizh Diyin Bóhólníihii éí Jared dóó bikʼiské tónteel ayóó átʼéii kéyah bitaʼ siyį́įjįʼ yiníʼeezh. Áádóó tónteeldi nínáago biníbaal nideiznil; dóó Moriancumer yee dahóózhiʼ; níbaal yii dabighan, dóó tónteelgi níbaal yiiʼ kéédahatʼį́įgo dį́į́ʼ nááhai.

14 Áádóó baa hoolzhiizh dį́į́ʼ nááhaigo Diyin Bóhólníihii Jared bínaaí yaa náánádzá, dóó kʼos yiiʼ sizį́įgo yił yááłtiʼ. Áádóó Diyin Bóhólníihii Jared bínaaí yił yááłtiʼgo tááʼ ahééʼílkid, dóó yichʼahóóshkeed Diyin Bóhólníihii bízhiʼ yinahjįʼ sonídílzįįhígíí doo yénáłniihígíí biniinaa.

15 Áádóó Jared bínaaí doo yáʼáshóonii áátʼįįdígíí yaa náʼooskan, dóó Diyin Bóhólíihii yizhiʼ yinahjįʼ sodoolzin bikʼiské bił naaldeehígií yá. Áádóó Diyin Bóhólníihii ábidííniid: Ni dóó nikʼiské bąąhági ádáodzaayę́ę bee nahanídideeshʼááł; áko doo bąąhági ánáádadoohnííł da, áko béédaałniih shiʼIiʼ Sizį́ Diyiinii doo áłahjįʼ nihił hólǫ́ǫ da doo; ákohgo, bąąhági átʼéii tsʼídá ałtso bee ndaʼsoołdįįdgo Diyin Bóhólníihii doo nihił dahólǫ́ǫ da doo. Áádóó kéyah nihaa dideeshʼááłígíí díígiʼ átʼáo baa ntséskees; háálá éí kéyah aláahdi yáʼátʼéehii átʼé.

16 Áádóó Diyin Bóhólníihii ádííniid: Bindaołnishgo ádaołééh, tsin naaʼeeł ádaołaayę́ę bikʼehgo. Áádóó baa hoolzhiizh Jared bínaaí deeshnish, dóó nááná łaʼ bikʼiské bikáʼííjééʼ, dóó tsin naaʼeeł ádeiyiilaayę́ę bikʼehgo, Diyin Bóhólníihii nabineeztą́ʼígíí bikʼehgo. Áko ádaałtsʼíísí, dóó tó bikááʼ aszólígo dahndaaʼeeł, tó bikáaʼgi tsídi aszólígíí nahalingo.

17 Áádóó yéego ahineestihgo ádeiyiilaa, áádóó łeetsʼááʼ nahalingo doo tó biníkánééh da; dóó bitłʼááhdi ałdóʼ ahineestihgo ályaa; dóó booshkʼiizh ahééníʼáhígíí ahineestihgo; ałtsʼą́ą́jigo heetsʼóózgo; áádóó łeetsʼááʼ nahalingo, áádóó tsingiʼ áníłnééz; dóó dándílkałígíí, daʼdeelkaalgo, łeetsʼą́ą́ ahineestih nahalin.

18 Áádóó baa hoolzhiizh Jared bínaaí Diyin Bóhólníihii náyoozkan, kóníigo, naanish ádíílííł shidíníniidyę́ę ííshłaa, dóó tsin naaʼeeł ádíílííł dinínée bikʼehgo ádeishłaa.

19 Áádóó áko shooh, O Diyin Bóhólníihii, biyiʼ doo daʼdinídíín da; haash yitʼáo tsin naaʼeeł ndeidloʼ doo. Áádóó ałdóʼ dadínííʼnééł, áko hááléítʼáo biyiʼ ndadiidzih doo, tʼáá hazhoʼó níłchʼi biyiʼígíí bee tʼéiyá; éí bąą dadínííʼnééł.

20 Áádóó Diyin Bóhólníihii Jared bínaaí ííłní: Áko shooh, bikáaʼgi biníkáhoodzą́ągo ádadííliił, áádóó dabiyaagi ałdóʼ; áádóó niłchʼi nínízingo biníkádahazdzánígi ąą ádadííliił dóó niłchʼi niheeh hólǫ́ǫ doo. Áádóó tó nihikʼijįʼ kódzaago, áko shooh, biníkáhoodzánígi bidádaʼdiʼdoohʼááł, áko doo tó ánihidoołdįįł da.

21 Áádóó baa hoolzhiizh Jared bínaaí Diyin Bóhólníihii abidííniidę́ę́ yikʼeh áhoolaa.

22 Áádóó Diyin Bóhólníihii nínááyoozkan kóníigo: O Diyin Bóhólníihii, áko shooh ádííłííł shidíniidyę́ę bohooshłaa; dóó shidineʼe tsin naaleeł bá hashtʼeeshłaa, áádóó áko shooh adinídíín biiʼ ádaadin. Áko shooh, O Diyin Bóhólníihii, daʼ chahałheeł biyiʼ díí tónteel tséʼnaa niikah.

23 Áádóó Diyin Bóhólníihii Jared bínaaí ííłní: Haash deeshnííł áko nihitsinaaʼeeł biyiʼ adinídíín doo? Háálá áko shooh, tsésǫʼ dooda, háálá éí nihidooltǫǫł; kǫʼ ałdóʼ dooda, kǫʼ bitsʼą́ą́dóó adinííd éí doo choołʼį́į da doo.

24 Háálá áko shooh, łóóʼtsoh nahalingo tónteel biiʼ wohʼoł doo; áko tónteel náádiidááhgo anánihiilghą́ą́h doo. Ákótʼée ndi, tónteel biyiʼdééʼ háánihiishnił doo; háálá shizééʼdóó niyol doo, nahaltin dóó tónteel ałdóʼ bihidééchid.

25 Áádóó áko shooh, díí tʼáá átʼé bikʼijįʼ bídanółdzilgo niháʼííshłaa; háálá tónteel ditánígíí bikááʼ doo tséʼnaa ninohkáh da tʼáá hazhoʼó tónteel náádiidááhgo, dóó niłchʼí biʼdoochidgo, dóó tónteel łą́ dooleełgo bichʼįʼ niháhashtʼéhooshlaa. Éí bąą haʼátʼííh nihá hashtʼedeeshłííł áko ádinídíín nihee hólǫ́ǫ doo ńléí tónteel ditą́ą́góóyaa adaohʼéélgo?