1 Áádóó áko Shí, Moroni, dineʼé abiʼdisdįįdgo baa naʼíísóóhyę́ę éí kʼad ałtso áshłééh.

2 Háálá áko shooh, Ether bizaad tʼáá átʼé doo deiniizį́į́ʼ da; háálá tʼáá ałtso tʼáá aaníí ádaatʼéí yee yił hoolneʼ, nihokááʼ dineʼé bił hahoolzhiizhdę́ę́ʼ; áádóó nahasdzáán bikáaʼgi tó yaa aʼnoolʼąądgo díí kéyah kédaayah yiláahdi átʼé silį́į́ʼ, áko díí kéyah Diyin Bóhólníihii yikʼidiilniiʼ; ákohgo Diyin Bóhólníihii tʼáá átʼé nihokááʼ dineʼé yikááʼ kéédahatʼínígíí dabidóósin doo nízin;

3 Áádóó áko ákweʼé Jerusalem Ániidígíí hadidoolnííł, éí yáʼąąshdę́ę́ʼ niʼbikáaʼjįʼ hodooleeł, éí Diyin Bóhólníihii hodílzingo bá hazʼą́ą dooleeł.

4 Áko shooh, Ether éí Christ biiníłkánígíí yiyiiłtsą́, áádóó Jerusalem Ániidígíí díí nahasdzáán bikááʼ hodooleełgo yaa haadzííʼ.

5 Áádóó Israel dabighandooʼígíí ałdóʼ yaa yááłtiʼ, dóó Jerusalem Lehi yitsʼą́ą́dóó doogáłígíí ałdóʼ—áádóó yíchxǫʼ bikééʼdóó háádidoolnííł, kintahgi Diyin Bóhólníihii bá hodílzinii; ákohgo, doo éí Jerusalem ániidígíí átʼée da háálá éí ałkʼidą́ą́ʼyę́ę átʼé; ákondi háádidoolnííł, dóó kintahgi Diyin Bóhólníihii bá hodílzinii átʼée dooleeł; dóó Israel dabighandóóʼígíí bá háádidoolnííł—

6 Áádóó Jerusalem Ániidígíí díí kéyah bikááʼ hadidoolnííł, Joseph baʼáłchíní chʼéékaiʼígíí bá, háálá éí éí bikʼehgo ádahoolyaa.

7 Háálá Joseph éí bizhéʼé kéyah Egyptjįʼ yił níná, éí áadi daaztsą́; ákohgo, Diyin Bóhólníihii Joseph baʼáłchíní chʼéédziʼígíí kéyah Jerusalemdę́ę́ʼ chʼíiníʼeezh, áko Joseph baʼáłchíní yaa joozbaʼ dooleeł áko dóó dadínóonééł da, jó Joseph bizhéʼé tʼáadoo dahnídiidzáágóó yaa joozbaʼyę́ęgiʼ átʼáo.

8 Ákohgo, Joseph bighandóó chʼééhkaiígíí díí kéyah bikááʼ dadinóósééł; dóó kéyah bídadooleeł; dóó kintah Diyin Bóhólníihii bá hodílzingo hadeididoolííł, ałkʼidą́ą́ʼ Jerusalem hadilyaayę́ęgi átʼáo; doo ndibił dahalą́ą da doo, nihoníyáajįʼ nahasdzáán yooʼ ályaajįʼ índa.

9 Áádóó yádiłhił ániidígíí dóó nahasdzáán ániidígíí ádoolnííł; éí ałkʼidą́ą́ʼyę́ęgiʼ átʼée doo tʼáá hazhóʼó ałkʼidą́ą́ʼyę́ę yóóʼályaa, áádóó tʼáá ałtsóní ániidgo ádoolnííł.

10 Áko índa Jerusalem Ániidígíí hodooleeł; dóó tʼáá háíshį́į́ yiyiʼkééhatʼínígíí bikʼihojidoodliił, háálá éí Diyin biDibé Yázhí bidił deeznaʼą́ą bee dabiʼééʼ daalgai dadooleeł; dóó éí éí Joseph baʼáłchíní chʼéédziʼę́ę bił yíídóoltah, éí Israel bighandóóʼígíí ádaatʼį́.

11 Áádóó Jerusalem ałkʼidą́ą́yę́ę ałdóʼ náhodoodleeł; dóó yiyiʼkéédahtʼį́į dooleełígíí ałdóʼ, dóó bikʼidahojisdliʼ dooleeł, háálá éí Diyin biDibé Yázhí bidił deeznaʼą́ą bee táádaasgiz; dóó éí adahwiisʼáago daʼníłtsʼą́ąjigo ałtsʼádahineeskaad dóó dį́į́ʼ hodeezʼą́ądééʼ ałhaninádahashtʼeezh, áádóó náhookǫs kédaayahdééʼ ałdóʼ, áádóó Diyin God bizhéʼé, Abraham yił ahaʼdeetʼánéé bohoolyaago atah bikʼidahojidoodliił.

12 Áádóó díí tʼáá ałtsóní bidahoolyaago, éí Diyin God bizaad biyiʼdóó kóhodoonííł haʼnínée bohodoolnííł, łaʼ éí áłtsé yíkai, éí akéédóó dadooleeł, dóó łaʼéí akéédi yíkai, éí alą́ąjįʼ dadooleeł.

13 Áádóó łaʼ baa nínááhideesoh nisin ńtʼę́ę́ʼ, ndi dooda shidooʼniid; ákotʼée ndi Ether diyingo yaa hoolneʼę́ę éí ayóó adaatʼé dóó doo ła beełtʼéhí da; dóó doo ílį́įgo yaa tsídadeezkééz, dóó chʼídeineeshchʼą́ą́ʼ; áádóó jį́įgo tséʼáán góneʼ nínádítʼį́į́h ńtʼę́ę́ʼ, áádóó tłʼééʼgo diné bikʼijįʼ ádahodooníłígíí haisííd ńtʼę́ę́ʼ.

14 Áádóó tséʼáán góneʼ nanitʼingo díí haneʼ ałtso áyiilaa, tłʼéégo, diné bitahgóó hoochxǫǫłígíí haisíídgo.

15 Áádóó baa hoolzhiizh tʼáá éí yiihahígíí biyiʼ diné bitahdóó chʼíbidiʼnoolchą́ą́ʼgo ayóó átʼáo diné bitahgóó anaaʼ hazʼlį́į́, háálá ląʼída ałkʼiijééʼ, éí hastóí ayóó dabidziil, dóó Coriantumr deidiyoołhééł nichxǫʼígo nahonitʼingo nahatʼá bee, éi baa haʼoodziʼyę́ę.

16 Áádóó áko Coriantumr, tʼáá bí, anááʼjí ádaʼałínígíí dóó tʼáá ałtso adahwiisʼáago bee ndaʼágizígíí, yee naʼádínééstʼą́ą́ʼ, ákohgo biká ndaabaahígíí yił anaaʼ áyiilaa.

17 Ákondi tʼáadoo ádaanáʼooskan da, biyeʼké dóó bitsiʼké danizhóníyę́ę ałdóʼ; dóó Cohor biyeʼké dóó bitsiʼké danizhóníyę́ę ałdóʼ; dóó Corihor biyeʼké dóó bitsiʼké danizhóníyę́ę ałdóʼ; áádóó áko, tsʼídá ádin doo ła nihokááʼ bikááʼgóó biyeʼké dóó bitsiʼké danizhóníyę́ę bibąąhági ádaaʼtéii yaa ndaʼooskan da.

18 Ákohgo, baa hoolzhiizh ałtsé yihahgo Ether tséʼáán góneʼ nanitʼingo, nahonitʼingo dahweeʼaahígíí ląʼí dineʼé béésh hał yee ndeistseed, áko Coriantumr yikʼijįʼ dadeezbaaʼ nahatʼá hazʼą́ yighadeidooʼááł danízingo.

19 Áádóó baa hoolzhiizh Coriantumr biyeʼké yéego ndaazbaaʼ dóó bidił ląʼígo dadeeznaʼ.

20 Áádóó naaki yihah góneʼ Ether éí Diyin Bóhólníihii bizaad yidiiztsʼą́ą́ʼ, áko Coriantumr yichʼįʼ doogááłgo Diyin bikʼeh áhodooníłígíí yee yił hodoolnih áko, ádaanáʼooskango, dóó tʼáá átʼé yił háájéʼígíí, Diyin Bóhólníihii nahatʼá bił hazʼą́ yikʼi bóhólnííhgo íídoolííł dóó bidineʼé doo neidoołtsxił da—

21 Doodago éiyá ndabidiʼdooltsxił, dóó tʼáá ałtso yił háájéʼígíí ałdóʼ tʼáá hazhóʼó tʼáá bí tʼéiyá chʼídoogááł. Áádóó nááná łaʼ dineʼé kéyah baa dahideestʼą́ągo diyingo bił ííshją́ą́ ályaayę́ę bohoolyaaʼgo yidoołtsééł; éí dineʼé Coriantumr leeh deidoołtʼééł; dóó tʼáá ałtso abidiʼdooldįįłgo Coriantumr tʼéiyá chʼídoogááł.

22 Áádóó baa hoolzhiizh Coriantumr tʼáadoo ádaanáʼooskan da, yił háájéʼígíí ałdóʼ tʼáadoo da, dineʼé ńdi; dóó anaaʼ tʼáadoo niʼ kódzaa da; dóó Ether deidiyoołhééłgo yíká ádaatʼį́, ákondi yitsʼą́ą́jįʼ dahyiiteʼ dóó tséʼaan góneʼ nínáádeestʼį́į́ʼ.

23 Áádóó baa hoolzhiizh Shared akʼijįʼ deezbaaʼ, dóó Coriantumr ałdóʼ yikʼijįʼ naazbaaʼ; dóó yikʼeh deesdlį́į́ʼ, honáásiiʼ tááʼ yiihah góneʼ yisná áyiilaa.

24 Áádóó Coriantumr bikʼiské, dį́į́ʼ yihah góneʼ, Shared yikʼeh dadeesdlį́į́ʼ, dóó nahatʼá bił hazʼą́née bizhéʼé yikʼi hooʼááłgo ándeiyiidlaa.

25 Áko tʼáá ałtso kéyah bikááʼgóó anaaʼ hazlį́į́ʼ, hastóí tʼáá łaʼí nízínígo yił ndaabaahígíí deinízinígíí yíká ádaatʼį́.

26 Áádóó daʼniʼįįhígíí, dóó ałdóʼ, tʼáá ałtso ałʼąą átʼéego bąąhági ádaatʼéii tʼáá ałtso kéyah bikááʼgóó dahazlį́į́ʼ.

27 Áádóó baa hoolzhiizh Coriantumr tʼáá íiyisíí Shared yichʼįʼ báhóóchįįd, dóó bá ndaabaahígíí yił yikʼijįʼ dadeezbaaʼ, dóó ayóó átʼáo baa dahachįʼgo ałchʼįʼ niikai, dóó Gilgal halgaidi ałchʼįʼ niikai, dóó ayóó átʼáo daʼahijoogą́ą́.

28 Áádóó baa hoolzhiizh Shared bikʼijįʼ naabaahgo tááʼ yiską́. Áádóó baa hoolzhiizh Coriantumr bikʼehdeesdlį́į́ʼ, dóó yinoołchééłgo Heshlon halgaijįʼ yikééʼ níbaaʼ.

29 Áádóó baa hoolzhiizh Shared halgaigi bichʼįʼ náádeezbaaʼ, áádóó áko shooh, Coriantumr yikʼeh deesdlį́į́ʼ, dóó Gilgal halgaijįʼ nátʼą́ą́ʼ anéínííłchą́ą́ʼ.

30 Áádóó Coriantumr éí Shared Gilgal halgaigi yił nááʼahoogą́ą́ʼ, áko Shared yikʼehdeesdlį́į́ʼ dóó yiyiishxį́.

31 Áádóó Shared éí Coriantumr bitsooskʼid atíyiilaa, áko doo naabaahgóó naaki nááhai, éí hoolzhiizhgo tʼáá ałtso dineʼé kéyah bikááʼgóó ndaʼahiltseed, doo łaʼ tʼą́ą́ʼ dabótąʼgóó.