1 Áádóó baa hoolzhiizhgo Orihah diyinkʼehgo kéyah bikááʼgóó ánahwiiʼaahgo biiníłką́, éí nízaadgóó biiníłką́.

2 Áádóó biyeʼké dóó biktsiʼké hazlį́į́ʼ; aooʼ, tádiin doo baʼaan tʼááłáʼí bee hazlį́į́ʼ, éí bitah naadiin táá biyeʼké holǫ́.

3 Áádóó baa hoolzhiizh haastihgo Kib ałdóʼ bá yizhchį́. Áádóó baa hoolzhiizhgo hooʼááłyę́ę góneʼ Kib dah nááneezdá; áádóó Kib éí Corihor bá yizhchį́.

4 Áádóó Corihor tádiin dóó baʼaan naaki binááhaigo bizhéʼé yitsʼą́ą́jí silį́į́ʼ, dóó Nehor bikéyahjigo ííná dóó áadi kééhatʼį́į ńtʼę́ę́ʼ; dóó biyeʼké dóó bitsiʼké dahazlį́į́ʼ, dóó éí tsʼídá danizhóní daazlį́į́ʼ; ákohgo Corihor ląʼí diné bikééʼ dahdiikai.

5 Áádóó ndaabaahí ahíyiizhʼeezhgo Moron kéyahgóó níná áadi aláahdi naatʼáanii kééhatʼį́, dóó yisnah, éí Jared bínaaí doo nihíhólníihgóó nihił hwidooʼaał yił nínéé bohoolyaa.

6 Áko Moron kéyahdi, áadi aláahdi naatʼáanii kééhatʼį́, éí kéyah Ádahasdįįd hoolyé éí Nephi dineʼé yee deiyíízhiʼ.

7 Áádóó baa hoolzhiizhgo Kib biʼdisnah, dóó bidineʼé ałdóʼ éí Corihor biyeʼ bisnah, éí tʼáá íiyisíí haastihjįʼ; ákotʼée ndi Kib haastih ndi Shule bá yizhchį́, tʼah ąąh jiztį́įgo.

8 Áádóó baa hoolzhiizh Shule bínaaʼí yichʼįʼ báhóóchįįd; áádóó Shule bidziilgo neiyą́, dóó hastį́į́ʼ ayóó bidziilígíí silį́į́ʼ; dóó ałdóʼ hoyą́ągo nahaʼá silį́į́ʼ.

9 Ákohgo, Ephraim dah yiskʼidjįʼ níyá, dóó dah yiskʼid yitsʼą́ą́dóó béésh yidííłʼhxį́į́ʼ, dóó bééshígíí yee béésh hał áyiilaa dahyidiiʼeezhígíí bá; áádóó béésh hał yaayiznilgo Nehor kin dashijaaʼgóó náʼná, dóó bínaaʼí Corihor yikʼiijééʼ, dóó yikʼeh deesdlííʼgo éí hazʼánéé yee ádíhoosniiʼ dóó bizhéʼé Kib yaa néíníʼą́.

10 Áádóó áko Shule áátʼįįdígíí biniinaa, bizhéʼé éí hazʼánígíí yeidiníʼą́; éí bąą bizhéʼé dah sidáyę́ędóó bohólnííh silį́į́ʼ.

11 Áádóó baa hoolzhiizhgo diyinkʼehgo nahwiiʼááh ńtʼę́ę́ʼ; áádóó bił hazʼánígíí kéyah tʼáá átʼé bikááʼgóó hólǫ́ǫgo áyiilaa, háálá diné tʼóó ahayóí silį́į́ʼ.

12 Áádóó baa hoolzhiizh Shule ląʼí biyeʼké dóó bitsiʼké ałdóʼ hazlį́į́ʼ.

13 Áádóó Corihor ląʼí da bąąhági áátʼįįdyę́ę yaa ádaanáʼooskan; ákohgo Shule bił hazʼą́ądi yikʼi hooʼááłgo áyiilaa.

14 Áádóó baa hoolzhiizh Corihor ląʼí da biyeʼké dóó bitsiʼké hazlį́į́ʼ. Áádóó Corihor biyeʼké bitah łaʼ Noah joolyé.

15 Áádóó baa hoolzhiizh Noah éí Shule, aláahdi naatʼáanii yitsʼą́ą́jįʼ silį́į́ʼ, dóó bizhéʼé Corihor ałdóʼ, dóó Cohor bikʼis yooskango bikééʼ dahdiiyá, dóó tʼáá átʼé bikʼiské dóó ląʼí bidineʼé ałdóʼ.

16 Áádóó Shule, aláahdi naatʼáanii yikʼiijééʼ, éí kéyah áłtsé baadeitʼánéé yee ádínídahoosnííʼ; dóó éí kéyahígíí biʼaláahdi naatʼáanii abiʼdiilyaa.

17 Áádóó baa hoolzhiizh Shule, aláahdi naatʼáanii yichʼįʼ náádadeezbaaʼ, dóó Shule, aláahdi naatʼáanii deisił, dóó Morongóó deiyótʼąʼgo adeistį́.

18 Áádóó baa hoolzhiizh kʼadę́ę́ʼ biʼdiilyéego, Shule biyeʼké Noah bighan góneʼ tłʼéégo yah adaneestʼį́į́ʼ dóó deiyiishxį́, dóó awalyah bidááʼdílkał kʼídeiztįʼ dóó bizhéʼé chʼídeizlóóz, dóó bił hazʼą́ą́di dah sidahę́ę́ʼdóó nahaʼáago ándeiyiidlaa.

19 Ákohgo, Noah biyeʼ éí hooʼáłę́ęgiʼ bidziilgo áyiilaa; ákotʼée ndi aláahdi naatʼáanii Shule doo yighá náádahodeestʼą́ą da, áádóó aláahdi naatʼáanii Shule diné yikʼi hooʼááłígíí táá íiyisíí náásdeeskai dóó ayóó daʼatʼį́ daazlį́į́ʼ.

20 Áádóó kéyah ałtsʼádzoh; dóó naaki hootʼááł bił hooʼaʼ, Shule bee bóhólníhígíí, dóó Cohor bóhólníhígíí, éí Noah yiyeʼ nilį́.

21 Áádóó Cohor, Noah biyeʼ, bidineʼé éí Shule yikʼiidoojahgo yihodeezʼą́, Shule bikʼehdeesdlííʼ dóó Cohor biʼdiishxį́.

22 Áádóó Cohoryę́ę łaʼ biyeʼ Nimrod wolyé; áko Nimrod éí Cohor bihootʼááł bił hazʼánééʼ Shule yeediníʼą́, dóó Shule ayóó bił aaníigo yaa ntsékees; ákohgo Shule ayóó átʼáo baa joozbaʼ, áádóó éí Shule bihootʼááł biyiʼ tʼáá bínííkʼeh áátʼįįł.

23 Áádóó ałdóʼ Shule hooʼááłgo Diyin yá yáłtiʼí diné bitahgóó dahazlį́į́ʼ, éí Diyin Bóhólníihii bitsʼą́ą́dééʼ ayeesʼaʼ, éí Diyin bikʼeh áhodoonííłgo diné doo yáʼáshóonii yaanaakaiígíí dóó tʼóó biʼdaʼalyaai deidísingíí biniinaa kéyah hóyééʼgo bił hazʼą́ silį́į́ʼ, dóó tʼáadoo ádaańdaʼooskangóó da ábidiʼdooldįįł.

24 Áádóó baa hoolzhiizh diné éí Diyin yá yádaałtiʼii deiyíídzííʼ, dóó tʼóó yá ndahaastiʼ. Áádóó baa hoolzhiizh aláahdi naatʼáanii Shule tʼáá ałtso Diyin yá yádaałtiʼii deiyíídzíhígíí yá nahwiizʼą́.

25 Áádóó adahwiisʼáago bee hazʼáanii łaʼ áyiilaa, éí Diyin yá yádaałtiʼii éí tʼáá áltsogóó ndaakaigo bá ályaa; dóó díí biniinaa diné ádaańdaʼdookąąłgo bá hooʼaʼ.

26 Áádóó díí biniinaa diné bibąąhági ádaatʼéii ádaatʼínée dóó tʼóó bidaʼalyaai deidísinée yaa ńdaʼooskan áko Diyin Bóhólníihii tʼáadoo ábísdįįd da, dóó kéyah bikááʼ daʼatʼį́ náádaasdlį́į́ʼ. Áádóó baa hoolzhiizh Shule haastihgo biyeʼké dóó bitsiʼké haazlį́į́ʼ.

27 Áádóó Shule biiníłką́ą́jįʼ tʼáadoo anaaʼ náádahasdlį́į́ʼ da; áádóó Diyin Bóhólníihii haitʼáo dabizhéʼé ayóó átʼéego yá íʼiilaayę́ę yénáálniiʼ éí tónteel tséʼnaa kéyah aa deetʼánéejįʼ biníʼeezh; ákohgo diyinkʼehgo nahwiiʼaahgo biiníłką́.