1 Áádóó baa hoolzhiizh Coriantumr atíbiʼdiilyaayę́ę bitsʼą́ą́dóó yáʼátʼééh násdlį́įgo, Ether saad yee haadzíʼę́ę yénaalniiʼ.

2 Naaki dimííl bilááhgóó bidineʼé béésh hał tʼáá íídą́ą́ʼ bee ndabiʼdiztseedígíí yaa ákoniizį́į́ʼ, áádóó bijéí biyiʼdi yaa yínííł niizį́į́ʼ; aooʼ, háálá naaki dimííl hastʼóí dabidziilyę́ę nidaaztseed, dóó bichʼóoní dóó baʼáłchíní danilínée ałdóʼ.

3 Doo yáʼáshóonii yaa naagháʼą́ą yaa náʼookąąhgo yaa nídiidzá; tʼáá ałtso Diyin yá yádaałtiʼii yee hadaasdziʼę́ę yénáálniiʼ, dóó tʼáá ałtso bidahoolnííłgo yaa ákoniizį́į́ʼ, tsʼídá tʼáá ádaatʼéejįʼ; dóó biiʼ sizíinii yínííł silį́į́ʼ dóó haʼólníi dooleełyę́ę doo yinízin da.

4 Áádóó baa hoolzhiizh Shiz yichʼįʼ íʼiilaa, dineʼé yisdáníʼéésh yiłníigo, dóó nahatʼá bił hazʼą́ dineʼé bedaʼiinaʼ bá nahjįʼ ndideeshʼááł níigo.

5 Áádóó baa hoolzhiizh Shiz bichʼįʼ eʼélyaayę́ę beiltsoozgo Coriantumr yichʼįʼ íʼiilaa, niʼdisziłgo tʼéiyá, áko shibéésh hał bee ndiyeeshééł, áko índa dineʼé yisdádeeshʼish dííniid.

6 Áádóó baa hoolzhiizh dineʼé bibąąhági átʼéii tʼáadoo yaa ńdaʼooskan da; dóó Coriantumr bidineʼé Shiz bidineʼé yichʼįʼ bádahóóchiid; dóó Shiz bidineʼé Coriantumr bidineʼé yichʼįʼ bádahóóchiid; ákohgo, Shiz bidineʼé Coriantumr bidineʼé yikʼiijééʼ.

7 Áádóó Coriantumr bidiʼyoolyééł yaa ákoniizį́į́ʼgo Shiz bidineʼé yitsʼą́ą́dóó náádadínéézchą́ą́ʼ.

8 Áádóó baa hoolzhiizh tó naazyį́ Ripliancumjįʼ níná, éí, ááh yíłnínígíí éí, ntsaa, doodago tsʼídá álááhdiígíí; ákohgo, díí tó naazyį́įjįʼ nínáago biníbaal ndeiznil; dóó Shiz ałdóʼ áyíídígóó biníbaal ndeiznil; dóó biiskání ałkʼiijééʼ.

9 Áádóó baa hoolzhiizh tʼoo báhádzidgo daʼahoogą́ą́ʼ, áko Coriantumr atínáánályaa, dóó dił bąąh ásdįįdgo bąą bił chʼaa hazʼlį́į́ʼ.

10 Áádóó baa hoolzhiizh Coriantumr bindaabaahí Shiz bindaabaahí hózhó yikʼiijééʼ áko yikʼeh dadeesdlį́į́ʼ, áko hakʼee dadínéezchą́ą́ʼ; dóó shádiʼááhjigo adahinéezchą́ą́ʼ, dóó Ogath hoolyéegi biníbaal nideiznil.

11 Áádóó baa hoolzhiizh Coriantumr bindaabaahí biníbaal Ramah dayiskʼid bííghahagi nideiznil; dóó éí dah yiskʼidgi shizhéʼé Mormon Diyin Bóhólníihii yichʼįʼ haneʼ néideesʼį́į́ʼ, éí dadílzingo átʼé.

12 Áádóó baa hoolzhiizh tʼáá ałtso dineʼé tʼáá ałtso kédaayahdę́ę́ʼ ahandeiyizhʼeezh, tʼahdoo ndabiʼditseedígíí, Ether tʼéiyá ndagaʼ.

13 Áádóó baa hoolzhiizh Ether éí dineʼé tʼáá átʼé ádáátʼįįdígíí yiyiiłtsą́; áádóó dineʼé Coriantumr yił danilínígíí éí Coriantumr bindaabaahí yíł ahííkai; áádóó dineʼé Shiz yił danilínígíí éí Shiz bindaabaahí yíł ahííkai.

14 Ákohgo, dį́į́ʼ nááhai dineʼé ahanídayiiʼééshgo, áko tʼáá átʼé kéyah bikááʼdóó ahandeidooʼish biniyé, áko tʼáá átʼé yee dabidziil doogo ahandeiyiizhʼeezh.

15 Áádóó baa hoolzhiizh ałtso ahíikaigo, tʼáá łąʼí nízinígo ndadoobahígíí, bizáanii dóó badaʼáłchíní yił—hastʼóí, sáanii, dóó áłchíní yee ndadoobahígíí dahdeiyíjahgo ádeiyiilaa, achʼą́ą́h naatʼáhí, dóó béésh ééʼ, dóó béésh-chʼah yee hadadítʼéego, dóó anaaʼjí ééʼ yee hadadiidzaa—daʼahidoogą́ą́łgo ałkʼijįʼ ndadiʼnééh; áádóó daʼahighą́ą́go ałtso iʼííʼą́, ákondi tʼáadoo akʼehdeesdlįʼí da.

16 Áádóó baa hoolzhiizh tłʼééʼ hazlį́įgo chʼééhdeeskai, dóó biníbaal naazniljįʼ anídahaskai; áádóó biníbaal naazniljįʼ anídahaskaigo bidineʼé ndabiʼdiztseedyę́ę yaa daa chah dóó yaa dadiʼníigo yaa nídiikai; dóó ayóó átʼáó daachah, dóó dadilwosh dóó dadiʼní, áko niłchʼih tʼáá íiyisíí biiʼhodiitsʼaʼ.

17 Áádóó baa hoolzhiizh biiskání ałkʼináánéijééʼ, ayóó átʼáo dóó tʼóó báhádzidgo ayííłką́; ákotʼée ndi, tʼáadoo akʼehdeesdlįʼí da, áádóó tłʼééʼ nááhásdlį́įgo tʼáá íiyisíí daachago niłchʼih biiʼnááhodiistsʼą́ą́ʼ, dóó dadilwosh, dóó dadiʼníigo, háálá bidineʼé ndabiʼdiztseedyę́ę yaa daachah.

18 Áádóó baa hoolzhiizh Coriantumr éí Shiz yichʼįʼ ánááʼiidlaa, nihikʼijįʼ náádadoohbahgo doo nisin da yiłní, áko nahatʼá bił hazʼą́ éí ni dooleeł, dóó áko dineʼé bedaʼiinaʼ yisdándiidlííł.

19 Ákondi shooh, Diyin Bóhólníihii biʼIiʼ Sizį́ Diyinii doo bił hólǫ́ǫ da silį́į́ʼ, dóó Chʼį́įdii dineʼé tʼáá átʼé bijéí yikʼi bidziil silį́į́ʼ, háálá bijéí dáátłʼisʼígíí biniinaa bikʼideeyá, dóó biniʼ doo chodayoołʼínígíí bąąh ndooltsxił; ákohgo náádaʼahiʼniighą́ą́ʼ.

20 Áádóó baa hoolzhiizh daʼahighą́ągo iʼííʼą́, tłʼéé hazlį́įgo bibééshʼhał yikʼi daʼiiłhaazh.

21 Áádóó biiskání náádaʼahighą́ągo anááʼootʼą́.

22 Áádóó ahiłiijį́įʼgo áháchįʼ yee tsiʼdahikah, hastiin léíʼ tó diłhił tsiʼnabiiłáh nahalingo; áádóó bibééshʼhał yikʼi náádaʼiiłhaazh.

23 Áádóó biiskání náádaʼahiʼniighą́ą́ʼ; áádóó iʼííʼą́ągo tʼáá átʼé bibééshʼhał yee ndaʼahistseed tʼáá hazhoʼó Coriantumr bidineʼé ashdladiin dóó baʼaan naaki tʼéí chʼéékai, dóó Shiz bidineʼé hastą́diin dóó baʼaan náhástʼéí chʼéékai.

24 Áádóó baa hoolzhiizh éí bitłʼééʼ bibééshʼhał yikʼi nááneezhjééʼ, áádóó biiskání náádaʼahooghą́ą́ʼ, dóó bibéésh hał dóó achʼą́ą́h naatʼáhí yee yéego atínáádaʼahilʼį́įgo, anááʼootʼą́.

25 Áádóó iʼííʼą́ągo Shiz bidineʼé tádiin dóó biʼaan naaki yiltʼé, áádóó Coriantumr bidineʼé éí naadiin tsostsʼid yiltʼé.

26 Áádóó baa hoolzhiizh daʼííyą́ą́ʼ dóó neezhjééʼ, biiskání ndaʼahidooltsxiłgo yiká hastʼeʼádaʼdiilyaa. Áádóó hastóí bitah dahósxaas dóó ayóó átʼéego dabidziilígíí danilį́.

27 Áádóó baa hoolzhiizh daʼahigą́ąʼgo tááʼ ahééʼílkid, áádóó dił bąąh ndaheeznaʼgo bíniʼ ádaasdįįd.

28 Áádóó baa hoolzhiizh Coriantumr bándaabaahí tʼáá ndaakai ńdaasdlį́įʼgo, doo kʼadę́ę́ dahdadinííchééhgo; ákondi shooh, Shiz yiizįʼ, dóó bindaabaahí ałdóʼ, áádóó báháchįʼgo ádééhaadzííʼ Coriantumr diyeeshééł doodaiiʼ béésh hał bee shiʼdiyoolyééł.

29 Ákohgo, yikéé níná, dóó biiskání yékai; dóó béésh hał yee náádaʼahooʼgą́ą́ʼ. Áádóó baa hoolzhiizh tʼáá ałtso béésh hał yee ndaʼahistseed, tʼáá hazhoʼó Coriantumr dóó Shiz tʼéiyá chʼééʼáázh, áko shooh Shiz dił bąąh háánaʼgo bíniʼ ásdįįd.

30 Áádóó baa hoolzhiizh Coriantumr béésh hał yinahjįʼ ntsidinígoʼ, áko tʼįįhdígo hanáályį́į́ʼgo, Shiz bikʼos kʼííníkal.

31 Áádóó baa hoolzhiizh Shiz yitsiitsʼiin kʼííníkal, áko Shiz bighaan yee nídiinééh ńtʼę́ę́ʼ naaʼíítłizh; áádóó chʼééh didziihgo, daaztsą́.

32 Áádóó baa hoolzhiizh Coriantumr niʼjįʼ íítłizh, dóó doo hiináa da nahalin silį́į́ʼ.

33 Áádóó Diyin Bóhólníihii Ether yichʼįʼ haadzííʼ, dóó kóyidíídniid: Nílááhgóó dahdiinááh. Áádóó dahdiiyá, dóó yaa ákoniizį́į́ʼ Diyin Bóhólníihii bizaad ałtso bohoolyaa; dóó bahaneʼ ałtso áyiilaa; (tʼáá łáhídi neeznádiin bidooltsʼiʼ ndi tʼáadoo nahízoh da) áádóó néideesʼį́į́ʼ áko Limhi bidineʼé ákótʼáo yikídaneeztʼą́ą́ʼ.

34 Áko Ether akéédi saad neiyizohígíí éí díí: Diyin Bóhólníihii nááshididoołtééł, doodaiiʼ Diyin Bóhólníihii íínízinígiʼ átʼáo shitsʼíís bee tihwiideeshnih, éí doo bikʼeh da, tʼáá hazhoʼó Diyin God bił hazʼą́ądi yahanáásdzáago tʼéiyá nisin. Amen.