1 Áádóó baa hoolzhiizh Ether hiinánéedą́ą́ʼ Coriantumr áłdóʼ hiináá ńtʼę́ę́ʼ; dóó Coriantumr éí kéyah tʼáá átʼé biʼaláahdi naatʼáanii nilį́į́ ńtʼę́ę́ʼ.

2 Áádóó Ether Diyin Bólólníihii yá yáłtiʼí nilį́į́ ńtʼę́ę́ʼ; ákohgo Ether Coriantumr hiinánéedą́ą́ʼ níyá, dóó Diyin bikʼeh áhodooníłígíí dineʼé yił chʼíiníʼą́, háálá Diyin Bóhólníihii biʼIiʼ Sizį́ Diyinii bił hólǫ́ǫgo doo tʼáá kóbósin da.

3 Háálá abínídą́ą́ʼ naʼnitin, azhą́ iʼííʼą́ą́jįʼ ndi, dineʼé Diyin God deinóhdlą́ągo ádaańdaʼoohkąąh doodago éiyá anihidiʼdoolʼdįįł yiłní, oodląʼ binahjįʼ éí tʼáá ałtsoní boholnííł yiłní—

4 Ákohgo, tʼáá háíshį́į́ Diyin God tʼáá aníigo yoodlánígíí éí aláahdi kéyah hazʼą́ądi yee haʼólníi doo, aooʼ, azhą́ Diyin God bił hazʼą́ądi ndi, éí haʼólnínígíí éí oodląʼ binahjįʼ hodooleeł, éí tsin naaʼeeł bee dahastłʼónígíí nahalingo nihokááʼ dineʼé biiʼ sizínii biyiʼ hólǫ́, éí bidziilgo doo nabiiłnání da doo, tʼáá áłahjįʼ yáʼátʼéehii yindaalnishgo, Diyin God ayóó átʼáo deidósingo yichʼįʼ deiyíkááh doo.

5 Áádóó baa hoolzhiizh Ether ayóóʼatʼáo dóó ayóó ánóólningo Diyin bikʼeh áhodooníłígíí dineʼé yee yił hoolneʼ, éí doo deiyoodlą́ą da, háálá tʼáadoo deiyiiłtsánígíí biniinaa.

6 Áádóó áko, Shí, Moroni, díí łahgo baa hadeesdzih nisin; nihokááʼ dineʼé bichʼį́ ííshjání ádeeshłííł oodląʼ éí biká chodahooʼínígíí dóó doo daatʼínígíí átʼé; ákohgo, doo daatʼínígíí biniinaa tʼáadoo saad dahonohłóní, háálá neʼoodląʼ bóhodinóotah áadi índa ádahodooníłígíí nihił ííshją́ą́ ádadoolnííł.

7 Háálá oodląʼígíí binahjįʼ éi danihizázíyę́ę Christ anoonééłdę́ę́ʼ nahiiʼnaʼgo, yichʼįʼ ííshjání íʼdiilyaa; áko daboosdląądgo índa yichʼįʼ ííshją́ą́ íʼdiilyaa; ákohgo, łaʼ daboodlą́ą́ ńtʼę́ę́ʼ, háálá nihokááʼ dineʼé tʼáadoo yichʼįʼ ííshjání íʼdiilyaa da.

8 Ákondi nihokááʼ diné beʼoodląʼ binahjįʼ yichʼįʼ ííshjání íʼdiilyaa, dóó diyingo aZhéʼé nilíinii bízhiʼ ayóó átʼáo deidíísįįd, áádóó nááná łaʼ yáʼááshdééʼ aaʼílyé baa dadoolyééłgo yá hashtʼeʼdahoolaa, háálá tʼahdoo bił ííshjání ádaalnéhígíí yíká hadaʼólníi doo.

9 Ákohgo, nihí ałdóʼ hadaʼíínółníi doo, aʼílyéhígíí nihaa dadoolyééł, niheʼoodląʼ nihee dahólǫ́ǫgo.

10 Áko shooh oodląʼ binahjįʼ ałkʼidą́ą́ʼ dinéhę́ę́ʼ Diyin God bidiyingo ádaʼoolʼįįł bee bikʼidahodiiniiʼ.

11 Ákohgo, Moses bibee hazʼáanii oodląʼígíí binahjįʼ baa yílyá. Ákondi biYeʼ eyílyá nilį́įgo Diyin God tsʼídá aláahdi hoogááłgo hashtʼeyiilaa; dóó oodląʼígíí binahjįʼ ałtso bohoolyaa.

12 Háálá nihokááʼ dineʼé baʼáłchíní bitahgóó oodląʼ doo hólǫ́ǫgo Diyin God álílee doo bitahgóó łaʼ íídoolííł da; ákohgo, háálá beʼoodląʼ chodeiyoosʼįįdgo índa bichʼį́ ííshjání íʼdiʼdoolnííł.

13 Áko shooh, Alma dóó Amulek beʼoodląʼ choyoosʼįįdgo awaalyah niʼjį́ nááłdááz.

14 Áko shooh, Nephi dóó Lehi beʼoodląʼ choyoosʼįįdgo Laman dineʼé beʼiinaʼ łah ádeiyiilaa, áko kǫ́ dóó Iiʼ Sizį́ Diyinii bee dabidiʼdoolzį́į́ʼ.

15 Áko shooh, Ammon dóó bikʼéí beʼoodląʼ choyoosʼįįdgo Laman dineʼé bitahgóó álilee ayóó átʼéego bitah hazʼlį́į́ʼ.

16 Aooʼ, dóó tʼáá ałtso álílee ádeiyiilaaʼígíí éí oodląʼ yinahjįʼ ádaʼiilaa, azhą́ Christ tʼahdoo biʼdichíhę́ędą́ą́ʼ dóó yizhchį́ dóó bikʼéédóó ałdóʼ.

17 Áádóó tááʼgo Diyin Jesus yikééʼ naazíinii oodląʼ binahjįʼ doo dínóonééłgóó baa dahideestʼą́; dóó beʼoodląʼ chodeiyoosʼįįdgo índa díí baa dahideestą́.

18 Áádóó tʼáá háída éí álílee tʼáadoo ádeiyiilaa da tʼáá hazhóʼó beʼoodląʼ chodeiyoosʼįįdgo índa; ákohgo Diyin God biYeʼ ałtsé deiyoosdląąd.

19 Áádóó ląʼí da beʼoodląʼ ayóó dabitsxeʼ, azhą́ Christ tʼahdoo yiighááyę́ędą́ą́ʼ ndi, diyingo daʼdiníbaal doo bichʼą́ą́h siláágóó daʼiiłtsą́, ákondi tʼáá aaníigo binááʼ yee daʼiiłtsą́ éí oodląʼ yee daʼooʼį́įgo daʼiiłtsą́, dóó bił dahóózhǫǫd.

20 Áádóó áko shooh, díí haneʼ ályaaʼígíí biyiʼ łaʼ Jared bínaaí átʼį́; háálá Diyin God ayóó átʼéego yoodlą́ą́ ńtʼę́ę́ʼ, áko Jared bínaaí éí Diyin God bilázhoozh yee dahdoolnihgo yiyiiłtsą́ doo bitsʼąą nanilʼíngóó, háálá bizaad yee bichʼį́ haadziʼígíí biniinaa, éí saadígíí oodląʼ binahjiʼ bił bééhoozin.

21 Áádóó Jared bínaaí Diyin Bóhólníihii bílázhoozh yiyiiłtsą́, háálá Jared bínaaí ádééhaʼoodzíʼígíí beʼoodląʼ yee néidiilá, Diyin Bóhólníihii tsʼídá doo yitsʼąą neididoołʼį́łí da; ákohgo tʼáá ałtsóní yił ííshją́ą́ áyiilaa, háálá dáádiníbaal yiníká hooʼį́įgo bá ályaa.

22 Áádóó oodląʼ bee shizhéʼé Gentile dineʼé binahjįʼ bikʼéí bee bá haʼoodzííʼ bíł ííshjání ádadoolnííł; éí bąą Diyin Bóhólníihii áshíłní, aooʼ, éí Jesus Christ ndi.

23 Áádóó ábidishní: Diyin Bóhólníihii, Gentile dineʼé díí yándahałtiʼ doo, háálá doo nihidziilgo ndaʼiidzo da; háálá Diyin Bóhólníihii oodląʼ binahjiʼ nihizaad bidziilgo áyiilaa, ákondi ndaʼiidzo éí tʼáadoo bee danihidziilgo ánihiinilaa da; háálá tʼáá ałtso díí dineʼé ayóó yádaałtiʼgo iinlaa, háálá Iiʼ Sizį́ Diyinii bił hólǫ́ǫgo íínilaa;

24 Ákondi áłchʼį́į́dígo ndaʼiidzogo ánihiinilaa, naʼadzo nihilaʼ doo hazhǫ́ yee danilínígíí biniinaa. Áko shooh, doo saad daʼílį́įgo ndeidzohgo ánihiiniilaa da Jared bínaaí íínilaaʼígíí átʼáo, háálá nigiʼ átʼáo tsʼídá deiyoodlą́ągo naʼazohgo íínilaa, háálá diné ayóó yikʼidaʼdiitįįh.

25 Áádóó nihizaad ayóó bidziil dóó ayóó átʼáo íínilaa, doo náhádzóóh átʼéegóó; ákohgo, ndaʼiidzohgo doo bídaniilʼánígíí baa ákonídaniidzįįh, háálá saad nizhónígo ndahidiidzohígíí chʼééh ádeilʼį́, dóó bąąh danihíneʼ háálá Gentile dineʼé nihizaad da tʼóó yánidahałtʼiʼ doo.

26 Áádóó díí kódííniidgo, Diyin Bóhlólníihii áshíłní, kóní: Aa daadlohígíí éí tʼóó ndahałtʼiʼ, ákondi yínííł dadooleeł; dóó shee ajoobaʼ éí dajoobaʼígíí bikʼéstiʼ, ákodi doo bídanółdzilígíí doo yikʼeh dadidoodleeł da;

27 Áádóó nihokááʼ dineʼé shichʼįʼ nehekááhgo doo yídaneilʼánígíí bił ííshjání ádeeshłííł. Nihokááʼ dineʼé yiʼohdaneelʼánígíí baa hashłé áko joobaʼ dadínóozįįł; dóó tʼáá ałtso shidááhdóó joobaʼ daniizį́hígíí éí sheʼajoobaʼ łą́ągo bichʼįʼ kódeeshłííł; háálá shidááhdóó hojoobaʼ danízinígíí, dóó dashoodlánígíí, ákó índa yiʼoh danéésąądyę́ę yee dabidziilgo ádeeshłííł.

28 Áko shooh, Gentile dineʼé doo yídaneelʼánígíí bichʼį́ ííshjání ádadeeshłííł, dóó oodląʼ, chohooʼį́, dóó diyingo ayóóʼóʼóní éí binahjįʼ eʼélʼínígíí bił ííshją́ą́ ádeeshłííł—éí diyingo oodááł bitsʼą́ą́dóó hahaztʼiʼ.

29 Áádóó Shí, Moroni, díí saad sidétsʼą́ą́ʼgo, shiiʼhááhooldoh, dóó ádííniid: O Diyin Bóhólníihii, nidiyin oodááł bohodoolnííł, háálá shił bééhózin nihokááʼ dineʼé baʼáłchíní bedaʼoodląʼ binahjįʼ ninaanish áníłʼį́;

30 Háálá Jared bínaaí dził Zerin íídííniid, Nahjįʼ anilzhood—áádóó nahjįʼ eelzhóód. Áádóó beʼoodlą ádingo éí tʼáadoo nahjįʼ eelzhóód da doo ńtʼę́ę́ʼ; ákohgo nihokááʼ dineʼé beʼoodląʼ dahazlį́įʼgo índa bá nanilnish.

31 Háálá díígiʼ átʼáo nikééʼ nazínígíí bichʼįʼ ííshjání adinilyaa; beʼoodląʼ dahazlį́įʼgo índa, dóó nízhiʼ yinahjįʼ hadaasdzííʼgo, ayóó átʼáo neʼadziil bee bichʼįʼ ííshjání ádiʼnilyaa.

32 Áádóó ałdóʼ nihokááʼ dineʼé hoghan bá hastʼeishłaa díníniidyę́ę bénááshniiʼ, aooʼ, azhą́ niTaaʼ nilíinii bił hazʼą́ bitahdi ndi, éí binahjįʼ da nihokááʼ dineʼé tsʼídá yéego sih hasin bee hólǫ́ǫ doo; ákohgo nihokááʼ dineʼé tsʼídá sih hasin bee hólǫ́ǫ doo, doodaiiʼ hazʼą́ądi bá hashtʼehwiinilaayę́ę doo baa dahidoolyééł da.

33 Áádóó nááná, nihokááʼ dineʼé ayóóʼííníshní díníniidyę́ę bénááshniiʼ, nihokááʼ dineʼé neʼiinaʼ bá niʼníínilaa ndi, áko da nínáádidíídlééł áko nihokááʼ dineʼé bá hwiidooʼaałgi bá hashtʼehodíílííł.

34 Áádóó kʼad shił bééhoozįįd díí ayóóʼóʼóóní nihokááʼ dineʼé baʼáłchíní bee ayóóʼíníʼnínígíí éí diyingo ayóóʼóʼóní átʼé; ákohgo, niTaaʼ nilíinii bił hazʼą́ądi doo bá hwiidooʼaał da tʼáá hazhóʼó nihokááʼ dineʼé diyingo ayóóʼóʼóní bee dahólǫ́ǫgo tʼéiyá.

35 Ákohgo, díí bee háínídzíʼígíí binahjįʼ shił bééhózin, áko Gentile dineʼé diyingo ayóóʼóʼóní doo bee dahólǫ́ǫgo, doo bídaneilʼánígíí biniinaa, áko bee baa ndínííʼtaał, dóó talent bitsʼą́ą́ʼ nahjįʼ kódííłííł, aooʼ, azhą́ baa dahasyáhígíí ndi, dóó łahjígo ląʼígo baa dahidoolyééł.

36 Áádóó baa hoolzhiizh Diyin Bóhólníihii bichʼįʼ sodeeszin áko Gentile dineʼé bibee ajoobaʼ yichʼįʼ kwíidoolííł, áko diyingo ayóóʼóʼóní bee dahólǫ́ǫ doo.

37 Áádóó baa hoolzhiizh Diyin Bóhólníihii áshidííniid: diyingo ayóóʼóʼóní doo bee dahólǫ́ǫgo tʼáadoo niʼdiiłʼáhé, háálá shikééʼ yíínááł, ákohgo, niʼééʼ chin bąąh ádingo ádoolnííł. Áádóó biʼohnílínígíí nił bééhoozingo biniinaa nidziilgo ánidiʼdoolnííł, azhą́ shiTaaʼ bił hazʼą́ądi ná hashtʼehooshłaayę́ędi díníídaał.

38 Áádóó áko Shí, Moroni, Gentile dineʼé hágoóneeʼ bidishní, aooʼ, dóó ałdóʼ shikʼéí ayóóʼííníshníinii, Christ bibee nahwiitʼaah-hooʼááł bidááhdóó náádaʼahiiltsą́ągo índa, áadi tʼáá ałtso nihokááʼ dineʼé bił béédahodoozįįł shiʼééʼ doo nihidił bąąh da.

39 Ákohgo índa nihił béédahodoozįįł Jesus yiiłtsą́, dóó bidááhdóó sizį́įgo ałchʼįʼ haidzííʼ, dóó hojoobaʼ nízingo áshidííniid, azhą́ diné nááná łaʼ shizaad yee yichʼįʼ yáłtiʼígiʼ átʼáo, díí bídéítʼiʼígíí baa yeiltiʼ;

40 Áádóó tʼáá díkwíhígo tʼéiyá nahíízoh, háálá naʼadzo doo hazhoʼó yiishchiih da.

41 Áádóó áko, díí Jesus Diyin yá yádaałtiʼii dóó hastóí bikʼihodiiniiʼígíí baa naʼíízohígíí hadanohtá nihidishní, áko Diyin God nihiTaaʼ nilíinii bibee ajoobaʼ, dóó ałdóʼ Diyin Bóhólníinii Jesus Christ, dóó Iiʼ Sizį́ Diyinii, éí haneʼ tʼáá aníinii yaa dahalneʼ, éí nihił dahiináa doo dóó hoolʼáago nihił dahólǫ́ǫ doo. Amen.