1 Áádóó baa hoolzhiizh Shez, éí Heth yitsʼą́ą́dóó hazlį́į́ʼ—háálá Heth éí dichin dahaghą́ągo atah dichin hwiisxį́, dóó tʼáá átʼé yił dabighanígíí ałdóʼ tʼáá hazhóʼó Shez tʼéiyá chʼééyá—ákohgo, Shez diné tiʼhooʼnííh yiyiʼdééʼ hasdáákaaígíí bidziilgo ánéídlééh.

2 Áádóó baa hoolzhiizh Shez bizází ábiʼdisdiinyę́ę yénálniih, dóó yáʼátʼéehgo hootʼááł bił hazʼą́ągo haidiilaa; jó áko Jared dóó bikʼis tónteel yikááʼdę́ę́ʼ Diyin Bóhólníihii biníʼeezhyée yénáálniiʼ, Diyin Bóhólníihii yikʼeh hósingo níyá; dóó biyeʼké dóó bitsiʼké dahazlį́į́ʼ.

3 Áádóó álą́ąjįʼ biyeʼ. éí Shez wolyé, éí hatsʼą́ą́jí silį́į́ʼ; ákótʼée ndi, tʼáá bí Shez łaʼ aniʼįįhii biisxį́ háálá ayóó atʼį́įgo, éí bąą bizhéʼé házhóʼó bíł hazʼą́ągo bił náhootʼaʼ.

4 Áádóó baa hoolzhiizh bizhéʼé kéyah bikááʼgóó tʼóó ahayóí kin dah naazhjaaʼgo áyiilaa, dóó diné kéyah bikááʼgóó ałʼąądínééstʼą́. Dóó Shez tʼáá íyisíí są́ yiihyíyá; dóó áko biyeʼ Riplakish bá yizhchį́. Áádóó bizééʼ hazlį́į́ʼ, dóó dahjizdáhę́ę góneʼ Riplakish aláahdi bóhólnííhgo hodeeshzhiizh.

5 Áádóó baa hoolzhiizh Riplakish Diyin Bóhólníihii doo yikʼeh hółʼį́įgo hooʼááł ńtʼę́ę́ʼ, háálá tʼóó ahayóó beʼasdzą́ą́ áyiilaa dóó ałjiłnii bee hólǫ́ǫ́ ńtʼę́ę́ʼ, dóó bidineʼé neiniłkaadgo tiʼdahoonííhgo áyiilaa, aooʼ, tʼáá íiyisíí ląʼí ínáoltąʼ ndeiyiiléego yeehoołʼaʼ; dóó éí ínáoltaʼí kin danitsaaígíí yee niyiiznil.

6 Áádóó aláahdi naatʼáanii yikááʼ dasidá tsʼídá nizhónígíí ádá áyiilaa; dóó ląʼí awáályah nayiznil, dóó doo ínáóltąʼí yiyaaʼiikáhígíí awáalyah góneʼ ayiiznil; dóó doo ínáóltąʼí ndeiyiiléhígíí awáalyah góneʼ ayiiznil; dóó łahdóó ákaʼadoojahgo áłahjįʼ ndaalnishgo áyiilaa; dóó doo ndadoolnishígíí neistseed.

7 Ákohgo tsʼídá daʼílíinii bá bindaʼanishgo baaheesyá, aooʼ, béésh óola aláahdiʼígíí ndi awáályahdi bá ályaa; dóó tʼáá ałtso tsʼídá daʼílį́įgo awáályahdi bá ádaalyaa. Áádóó baa hoolzhiizh bidoo yáʼádaashóonii dóó tsʼídá aláahdi daolchʼį́įdii diné yee átíyiilaa.

8 Áádóó hooʼááłgo dį́zdiin dóó biʼaan naaki nááhaigo dineʼé bikʼijįʼ daazlį́į́ʼgo bikʼijįʼ nídiijééʼ; áádóó kéyah bikááʼgóó anaaʼ nááhálį́į́ʼ, hónáásiiʼ Riplakish biʼdiisyį́, dóó bikʼéí kéyahdóó chʼíbiʼdinoolkaad.

9 Áádóó baa hoolzhiizh ląʼí nááhaigo, Morianton, (Riplakish yikʼéí nilį́įgo) chʼíbiʼdinoolkaadyę́ę łaʼ daabaahí dadooleełgo ahíyiizhʼeezh, áádóó dadiiná dóó dineʼé yił yikʼiijééʼ; dóó ląʼí kindaatah yee ádíhoosnííʼ; áádóó anaaʼyę́ę yéego achʼįʼ nahwiiłná silį́į́ʼ, dóó tʼáá daʼahijighą́ągo ląʼí ńdááhai; áádóó éí kédaayah tʼáá áłtso yikʼi ádíhoosnííʼ, dóó kédaayah yikʼi áláadi naatʼáanii nilį́įgo ádiilyaa.

10 Áádóó áláadi naatʼáanii áʼdiilyaago dineʼé naanish bikʼi naazláyę́ę doo hózhǫ́ ndaazgóó áyiilaa, éí yee dineʼé badaʼólí daazlį́į́ʼ, áádóó aláahdi binaatʼáanii nilį́į doogo akʼah yee deiyiyíísį́į́ʼ.

11 Áádóó hazhoʼó dineʼé yikʼi hodeezʼą́, ákondi tʼáá bí ákʼih éí ndagaʼ háálá tʼóó ahayóí bąąhági átʼéí yaa naayáhígíí biniinaa; ákohgo Diyin Bóhólníihii doo bíł hólǫ́ǫ da ńtʼę́ę́ʼ.

12 Áádóó baa hoolzhiizh Morianton tʼóó ahayóí kintah dahólǫ́ǫgo áyiilaa, dóó dineʼé yikʼi hooʼááłgo tʼáá íyisíí daʼatʼį́ daazlį́į́ʼ, kin ádaalneʼ, dóó béésh óola dóó béésh łigaii, dóó kʼéédaʼdidlééhgo, dóó binaaldlooshii, dóó ndaniłkaadígíí, éí bichʼįʼ ndaaslį́ʼígíí.

13 Áádóó Morianton tʼáá íyisíí są́ yiihyíyá, dóó Kim bá yizhchį́; dóó Kim bizhéʼé dahsidáhę́ę́ góneʼ naatʼáanii silį́į́ʼ, dóó hooʼááłgo tseebíí nááhai, áádóó bizhéʼé bizééʼ hazlį́į́ʼ. Áádóó baa hoolzhiizh Kim doo Diyinkʼehgóó hooʼááł da ńtʼę́ę́ʼ, ákohgo Diyin Bóhólníihii doo bikʼijidlíi da ńtʼę́ę́ʼ.

14 Áádóó bikʼis bikʼijįʼ silį́į́ʼ, áádóó yisnáh; dóó ąąh sidáago ałtso biiníłką́; dóó ąąh sidáago biyeʼké dóó bitsʼiké hazlį́į́ʼ, dóó są́ yiihyíyá Levi bá yizhchį́; dóó bizeeʼ hazlį́į́ʼ.

15 Áádóó baa hoolzhiizh Levi bizhéʼé dahnídiidzáádóó ąąh sidáago, dizdiin dóó baʼaan naaki nááhai. Áádóó kéyah bikáaʼgi aláahdi naatʼáanii nilínígíí yił anaaʼ áyiilaa, ákótʼáo hootʼááł bił hazʼánígíí yee ádíhoosniiʼ.

16 Áádóó hootʼááł bił hazʼánígíí yee ádíhoosniiʼ dóó Diyin Bóhólníihii yinááł yáʼátʼéehgo hooʼááł ńtʼę́ę́ʼ; dóó diné kéyah yikááʼ náás deeskai; dóó nízaadgóó biiníłką́ągo índa są́ yiihyíyá, dóó biyeʼké dóó bitsiʼké hazlį́į́ʼ, Corom ałdóʼ bá yizhchį́, éí dahsidáhę́ę́ góneʼ naatʼáanii nilį́į dooleełgo akʼah yee yiyíísį́į́ʼ.

17 Áádóó baa hoolzhiizh Corom éí Diyin Bóhólníihii yinááł yáʼátʼéehgo hooʼááłgoo ałtso biiníłką́; dóó ląʼí biyeʼké dóó bitsiʼké hazlį́į́ʼ; áádóó ląʼí yiiʼ tádííyą́ągo bizééʼ hazlį́į́ʼ, nahasdzáán bikááʼ anoonééłígiʼ átʼáo; áádóó dahsidáhę́ę́ góneʼ Kish aláahdi bóhólnííh silį́į́ʼ.

18 Áádóó baa hoolzhiizh Kish ałdóʼ bizééʼ hazlį́į́ʼ, áádóó dahsidáhę́ę́ góneʼ Lib aláahdi bóhólnííh silį́į́ʼ.

19 Áádóó baa hoolzhiizh Lib ałdóʼ Diyin Bóhólníihii yinááł yáʼátʼéehgo hooʼááł ńtʼę́ę́ʼ. Áádóó Lib hiinánéedą́ą́ʼ tłʼish tsoh báhádzidii ałtsoʼ ndeistseed ńtʼę́ę́ʼ. Ákohgo shádiʼááhjigo kéyah yichʼįʼ dahdiikai, diné kéyah yikááʼ kéédahatʼínígíí chʼiyáán yá yiká ndaalzheeh doo biniyé, háálá áadi kéyah bikááʼgóó naaldlooshii dziłyiʼ naaldeehígíí tʼóó adahayóí. Áádóó Lib ałdóʼ ayóó naalzheeh silį́į́ʼ.

20 Áádóó kintah ayóó átʼéii ádeiyiilaa kéyah ałchʼįʼhootsózídi, tónteel bee kéyah ałtsʼááʼnil hazʼą́ągi.

21 Áádóó kéyah shádiʼááhjigoígíí doo diné kééhatʼínídi, naʼazheeh doogo baa áháyą́ągo ádeiyiilaa. Áádóó nahookǫsjigo éí kéyah bikááʼgóó diné kéédahatʼį́.

22 Áádóó tsʼídá ayóó ndaalnish ńtʼę́ę́ʼ, dóó ałhąą ndaʼiiłniih dóó baa ndaʼiiniih, áko da daʼatʼį́į doo biniyé.

23 Áádóó béésh ałʼąąh ádaatʼéego yee ndaalnish, dóó béésh óola, dóó béésh łigaii, dóó béésh ditʼóódígíí, dóó béésh łitsoii, dóó ałʼąąh ádaatʼáo dabééshígíí; dóó nahasdzáán yiyiʼdóó hadeiyizgeed; ákohgo, nahasdzáán biyiʼdóó ląʼí hadaʼiisgeed béésh ałʼąąh ádaatʼéhígíí, béésh óola, béésh łigaii, béésh ditʼóódígíí, dóó béésh łichíiʼii. Áádóó ałʼąąh átʼáo naanish yitsʼą́ą́dóó tsʼídá yáʼádaatʼéhígíí ádeiyiilaa.

24 Áádóó naatʼą́hí daditsxǫsígíí bee dahólǫ́, dóó naatʼą́hí nizhónígo-daastłʼónígíí; dóó naatʼą́hí ałʼąą ádaatʼéego yindaashnish, áko tʼáá daalchiʼí dago biniinaa biʼééʼ ádeiyiilaa.

25 Áádóó kéyah yee ndeiyiiłʼdlaad ałʼąą ádaatʼéego ádeiyiilaa, yee ndahwiiłdlaad dóó yee kʼéédaʼdidlééhgo, yee ńdaʼiilááh dóó yee ndahagodgo, dóó ałdóʼ yee daʼałdééh.

26 Áádóó bee naʼanishí ałʼąąh ádaatʼéego yee binaaldlooshii daʼałchiní chodeiyoołʼį́.

27 Áádóó anaaʼdi bee ndaʼaltseedígíí ałʼąąh ádaatʼéego ádeiyiilaa. Áádóó ałʼąąh átʼéego tsʼídá nizhónígo bee ndaʼachą́ą́hígíí ádeiyiilaa.

28 Háálá diné doo díígiʼ átʼáo tsʼídá doo łaʼ bikʼidahojídlíi da ńtʼę́ę́ʼ, dóó Diyin Bóhólníihii yinahjįʼ hózhǫ́ náásdeeskai. Áádóó kéyah tsʼídá aláahdi átʼéii yiiʼ kéédahaatʼį́, háálá Diyin Bóhólníihii éí yee haadzííʼ.

29 Áádóó baa hoolzhiizh, Lib ląʼí nááhaigo biiníłką́, dóó biyeʼké dóó bitsiʼké hazlį́į́ʼ, áádóó Hearthom ałdóʼ bá yizhchį́.

30 Áádóó baa hoolzhiizhgo bizhéʼé hooʼááłyę́ę góneʼ Hearthom dah nááhoodiiʼą́. Áádóó Hearthom naadin dį́į́ʼ nááhai hooʼááłgo, áko shooh, hootʼááł bił hazʼą́ bighahodeestʼą́. Áádóó ląʼí nááhai ąąh sidáago, aooʼ, ałtso biiníłką́ąjįʼ ndi.

31 Áádóó Heth bá yizhchį́, dóó Heth ąąh sidáago ałtso biiníłką́. Áádóó Heth Aaron bá yizhchį́, áádóó Aaron ąąh sidáago ałtso biiníłką́, áádóó Amnigaddah bá yizhchį́, dóó Amnigaddah ałdóʼ ąąh sidáago ałtso biiníłką́, áádóó Coriantum bá yizhchį́, dóó Coriantum ałdóʼ ąąh sidáago ałtso biiníłką́, áádóó Com bá yizhchį́.

32 Áádóó baa hoolzhiizh Com nahatʼá bił hazʼą́ ałnííʼdóó dahyidiiʼeezh. Áádóó nahatʼá bił hazʼą́ ałnííʼdóó yikʼi hooʼááłgo dizdiin dóó baʼaan naaki nááhai; dóó aláahdi naatʼáanii, Amgid, yikʼijįʼ deezbaaʼ, dóó ląʼí nááhai ałkʼijįʼ ndaabaahgo, ákweʼé hoolzhishgo Com éí Amgid yighahodeestʼą́, dóó nahatʼá bił hazʼą́ chʼéédziʼígíí yikʼi bóhólnííh silį́į́ʼ.

33 Áádóó Com hiinánéedą́ą́ʼ kéyah bikááʼgóó daʼniʼįįhii dahazlį́į́ʼ, dóó ałkʼidą́ą́ʼ ndahatʼáhę́ę́ nídeidiilá, dóó ałkʼidą́ą́ʼ bee ádéíhadaʼiisdzíʼę́ę́ aadeiyizlá, dóó nahatʼá bił hazʼánéé deidoołchxǫǫłgo yináádahazʼą́.

34 Áko Com tʼóó ahayóídi yikʼijįʼ nídeezbaaʼ; ákotʼée ndi, tʼáadoo yikʼehdeesdlį́į da.