O Le Atalii Faamaumau Oa, na saunia e Clark Kelley Price

Lesona 25 Anomea mo Sauniuniga o le Vasega

Salamo ma le Faamagaloga i le Olaga Faaleaiga

“O faaipoipoga ma aiga manuia e faavae ma faatumauina i mataupu faavae” o le talalelei a Iesu Keriso (“O Le Aiga: O Se Folafolaga i le Lalolagi,” ChurchofJesusChrist.org). O le lua o nei mataupu faavae o le salamo ma le faamagaloga. O le a le matafaioi na faia e nei mataupu faavae i lou olaga faaleaiga? A o e suesue i lenei anomea, mafaufau pe mafai faapefea e Iesu Keriso ona fesoasoani ia te oe i au taumafaiga e salamo i mea sese po o mea sese atonu na e faia i tagata o lou aiga. Mafaufau foi pe mafai faapefea e le Faaola ona fesoasoani ia te oe e faamagalo tagata o le aiga o e ono faatausuai pe faatiga ia te oe.

Vaega 1

E mafai faapefea e lo‘u salamo ona faamanuiaina lo’u aiga?

A o galue ai i le Au Peresitene Aoao o le Peraimeri, sa aoao mai ai Sister Cheryl A. Esplin:

Sister Cheryl A. Esplin

O aiga o falea’oga ia a le Alii i luga o le fogaeleele e fesoasoani ia i tatou ia aoao ma ola ai i le talalelei. (“Faatumu o Tatou Aiga i le Malamalama ma le Upumoni,” Liahona, Me 2015, 8)

A o tatou taumafai e aoao ma ola i le talalelei a le Faaola i o tatou aiga, o le a i ai taimi tatou te faia ai ni mea sese. E ui lava o feeseeseaiga ma faatausuai e tutupu i aiga uma, e le faapea o le a tuusaunoaina ai tagata o le aiga mai le avea faapei o Keriso i le ala latou te taulimaina ai le tasi ma le isi. Ae, o a tatou mea sese tatou te maua ai avanoa e faataitai ai mataupu faavae o le talalelei o le salamo ma le faamagaloga i o tatou aiga.

Na faamalamalama mai e Elder Dieter F. Uchtdorf o le Korama a Aposetolo e Toasefululua le uiga o le salamo:

Elder Dieter F. Uchtdorf

O le salamo o lona uiga o se suiga o le mafaufau ma le loto—tatou te tuu le faia o mea sese, ma amata ona faia mea e sa’o. E aumaia ai ia i tatou se uiga faaalia fou agai i le Atua, le tagata lava ia, ma le olaga i se tulaga lautele. (“Vaega Tonu o le Toe Foi Saogalemu,” Liahona, Me 2007, 100)

Sa faamatala e le Faaola se faataoto e uiga i se atalii sa manaomia ona salamo ona o filifiliga na afaina ai o ia lava ma lona aiga. Sa vave ona ave e lenei atalii lona tofi ma faamaumau ai i le ola faatamala. O le mativa ma le fiaai, sa amata ai ona ia fafagaina puaa e avea o se galuega ma sa oo lava ina naunau e ‘ai meaai a puaa. (Tagai Luka 15:11–16.)

aikona, suesue

Suesue e Sauniuni ai mo le Vasega

Faitau le Luka 15:17–24, ma mafaufau e faailoga mataupu faavae ua e aoaoina e uiga i le salamo i le olaga faaleaiga.

ua tamoe le tamā e opo mai le atalii faamaumau oa

Na aoao mai Elder Neil L. Andersen o le Korama a Aposetolo e Toasefululua e uiga i le ala e mafai ai ona faamanuiaina i tatou ma tagata o o tatou aiga e ala i lo tatou salamo:

Elder Neil L. Andersen

O le salamo e le gata e suia ai i tatou, ae e faamanuiaina ai foi o tatou aiga ma i latou tatou te alolofa i ai. Faatasi ai ma lo tatou salamo amiotonu, i le taimi faatulagaina a le Alii, o aao faaloaloa o le Faaola o le a le gata ina siomia ai i tatou ae o le a oo atu foi i olaga o a tatou fanau ma fanau. O le salamo o lona uiga o loo i ai se fiafia sili atu i luma atu. (“Salamo … Ina Ia Ou Faamaloloina Outou,” Liahona, Nov. 2009, 42)

A o avea ai o se tasi o Fitugafulu, sa aoao atu e Elder L. Whitney Clayton le ala e mafai ai e le suesueina e le aunoa o le tagata lava ia ma le uunaia o le salamo ona faamanuiaina ai faaipoipoga. Mafaufau pe mafai faapefea e nei faiga ona fesoasoani i au sootaga uma faaleaiga:

Elder L. Whitney Clayton

Ua ou iloaina o faaipoipoga fiafia e faalagolago i le meaalofa o le salamo. O se elemene taua i sootaga lelei uma faaleulugalii. O taitoalua e faia e le aunoa se suesuega faamaoni o ia lava ma faatino loa lava ia laasaga e moomia e salamo ma faaleleia, e maua se pulupasama faamalolo i a latou faaipoipoga. (“Faaipoipoga: Matau ma Aoao,” Liahona, Me 2013, 84)

o se talavou matua o loo mafaufau loloto

aikona, mafaufau loloto

Mafaufau Loloto e Sauniuni ai mo le Vasega

Faaalu ni nai minute e faatautaia ai se suesuega faamaoni o le tagata lava ia. E manaomia ona e salamo i soo se filifiliga na afaina ai pe faaleagaina ai sootaga ma soo se tagata o le aiga? Afai o lea, o le a se mea e mafai ona e faia e liliu atu ai i le Alii ma amata ai lenei faagasologa? Ia mafaufau foi i filifiliga o loo e faia e faamanuia ai au sootaga ma tagata o lou aiga ma le auala e mafai ai ona faaauau pea ona e faia filifiliga faapena.

Vaega 2

E mafai faapefea ona ou faamagaloina se tagata o le aiga na faia se mea sese ia te au?

I le faataoto a le Faaola i le atalii faamaumau oa, sa musu le atalii matua e auai i le faafiafiaga sa faia e faamamaluina ai le toe foi mai o lona uso laitiiti (tagai Luka 15:25–32). E pei o lenei atalii matua, atonu e i ai taimi tatou te manaomia ai ona faaaoga le fautuaga lenei mai ia Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

Tuu atu tagata ia salamo. Tuu atu i tagata ia tuputupu a’e. Talitonu e mafai e tagata ona sui ma faaleleia. (“‘Remember Lot’s Wife’: Faith Is for the Future” [Brigham Young University devotional, Jan. 13, 2009], speeches.byu.edu)

E pei lava ona i ai taimi e manaomia ai lou sailia o le faamagaloga mai se tagata o le aiga, o nisi taimi atonu e manaomia ona e tuuina atu le faamagaloga i se tagata o le aiga o le sa faatausuai pe faatiga ia te oe.

o se ulugalii o loo talanoa

aikona, suesue

Suesue e Sauniuni ai mo le Vasega

Faitau le Mataupu Faavae ma Feagaiga 64:8–11, ma vaavaai mo mea na aoao mai e le Alii i le Au Paia o Aso e Gata Ai anamua e uiga i le faamagalo atu o isi.

Ina ua uma ona sii mai se vaega o lenei fuaitau o mau, sa faamalamalama mai e Elder Holland:

Elder Jeffrey R. Holland

Peitai … e taua mo nisi o outou o loo ola i le tiga moni ona matau mea sa le’i fetalai ai [le Alii]. Sa le’i fetalai mai o Ia, “E le faatagaina outou e lagonaina le tiga moni po o faanoanoaga moni mai aafiaga matuitui na e oo i ai ona o le isi tagata.” Pe na Ia fetalai foi, “Ina ia mafai ona faamagalo atu atoatoa e ao ona e toe faia se sootaga faatiga pe toefoi atu i se tulaga faasaua ma faataumaoi.” Ae e ui i ni faatiga sili ona matuitui e ono oo mai ia i tatou, e mafai lava ona tatou tutulai ae i o tatou tiga pe afai tatou te savavali i luga o le ala i le faamalologa moni. O lena ala o le ala o le faamagaloga sa savalia e Iesu o Nasareta, lea o loo valaau mai ia i tatou taitoatasi, “Sau, mulimuli mai ia te a’u” [Luka 18:22]. (“O Le Galuega o le Faaleleiga,” Liahona, Nov. 2018, 79)

o se talavou matua o loo tatalo

O nisi taimi atonu e te lagonaina le musuā po o le le mafai ona faamagalo atu. Pe atonu foi e te lagonaina o le mamao i le va o oe ma se tagata o le aiga e maoae tele mo lau sootaga ina ia faaleleia. Mafaufau pe mafai faapefea e le fautuaga lenei mai ia Peresitene James E. Faust o le Au Peresitene Sili ona fesoasoani ia te oe i au taumafaiga e faamagalo atu:

Peresitene James E. Faust

E manaomia ona tatou iloa ma faailoa lagona ita. E manaomia ai le lotomaualalo e faia ai, peitai afai tatou te o ifo i o tatou tulivae ma ole atu i le Tama Faalelagi mo se lagona o le faamagaloga, o le a fesoasoani mai o Ia ia te i tatou. …

… E le faigofie ona faagalo ma faamama o tatou loto mai le faateleina o le ita. Ua uma ona ofoina mai e le Faaola ia i tatou uma se filemu taua e ala i Lana Togiola, peitai ua na o lo tatou naunau e lafoai lagona le lelei o le ita, lotovale, po o le tauimasui e mafai ai ona oo mai. (“O Le Mana Faamalolo o le Faamagaloga,” Liahona, Me 2007, 69)

Sa faamamafa mai foi e Elder Massimo De Feo o le Fitugafulu le taua o le taulai atu i le Faaola:

Elder Massimo De Feo

O’u uso e ma tuafafine pele, afai o e tauivi e sue le malosi e faamagalo atu ai, aua e te mafaufau i mea na faia e isi ia te oe, ae mafaufau i le mea na faia e le Alii mo oe, ma o le a e maua le filemu i faamanuiaga laveai o Lana Togiola. (“Alofa Mama: O Le Faailoga Moni o Soo Moni Uma o Iesu Keriso,” Liahona, Me 2018, 82)

O le faamagalo atu ma le faamalologa e mafai ona umi se taimi e alu ai. Ia e onosai ia te oe lava a o e sailia le fesoasoani a le Alii ma Lana meaalofa o le faamalologa.

aikona, tusi faamaumau

Tusifaamaumau Ou Manatu

Mafaufau i mea ua e aoaoina ma lagonaina a o suesueina lenei anomea. Tusifaamaumau ou manaoga po o sini e faatatau i le salamo ma le faamagaloga i lou olaga faaleaiga. E mafai faapefea ona e valaaulia le Faaola e fesoasoani ia te oe i au taumafaiga?

E Te Fia Aoao Atili? (Tuu i le faitalia)

O fea e mafai ona ou aoao atili ai e uiga i le matafaioi o le salamo i lo’u aiga?

I le vaega o le “Salamo” o le family.ChurchofJesusChrist.org, e mafai ona e maua ai aoaoga e uiga i le ala e mafai ai e le salamo ona faateleina le fiafia i lou olaga faaleaiga.

Peresitene Russell M. Nelson

O le saunoaga a Peresitene Russell M. Nelson “E Mafai Ona Tatou Faia ia Lelei Atu ma Ia Tatou Lelei Atu” (Liahona, Me 2019, 67–69) e mafai ona fesoasoani ia i tatou e malamalama ai i le mataupu faavae o le salamo ma le auala e faia ai ma ia lelei atili.

Peresitene Dallin H. Oaks

Mafaufau i mea e mafai ona e aoaoina e uiga i le salamo mai se aafiaga o Iosefa ma Ema Samita, e pei ona faamatalaina e Peresitene Dallin H. Oaks o le Au Peresitene Sili i lana saunoaga “O Laina e Lua o Fesootaiga” (Liahona, Nov. 2010, 85).

Iosefa ma Ema Samita o loo opogi

O fea e mafai ona ou aoao atili ai e uiga i le aoaoga faavae o le faamagalo atu?

Elder Kevin R. Duncan

I lana saunoaga “O Le U’u Faamalolo o le Faamagaloga” (Liahona, Me 2016, 33–35), na aoao mai ai e Elder Kevin R. Duncan o le Fitugafulu ni upumoni taua e uiga i le faamagalo atu.

I le tusiga “Forgiving Others: Misconceptions and Tips” (Ensign, Apr. 2018, 18–21), o loo talanoaina ai e le tusitala ni manatu sese o i ai i tagata e uiga i le faamagalo atu ma ofoina mai fautuaga e fesoasoani ai ia i tatou e faamagalo atu i isi.

E mafai faapefea ona fesoasoani le Alii ia ou faamagalo atu?

Faitau le tala na faasoa mai e Kelly Smith i le tusiga “Fausiaina o se Faaipoipoga Faamanuiaina” (Liahona, Nov. 1998, 31) e aoao ai pe na faapefea ona fesoasoani le Alii i se ulugalii e faalelei i se taimi o feteenaiga.

I le tusiga “My Journey to Forgiving” (Ensign, Fep. 1997, 40–43), sa faamalamalama mai ai e se tagata o le Ekalesia le ala na mafai ai ona ia faamagalo atu i lana tane muamua o le sa le faamaoni ia te ia.

E mafai faapefea e le faamagaloga ona faamanuiaina a‘u ma a’u sootaga ma tagata o lo‘u aiga?

Aoao mai se tasi o aafiaga o se tagata o le Ekalesia ma le faamagaloina o lona tama i le vitio “I’m a Mormon, New York Mother, and Forgiving Daughter” (3:32).