Lesona 19 Anomea a le Faiaoga

O Tiutetauave Paia o Tina

Na saunoa mai Peresitene M. Russell Ballard o le Korama a Aposetolo e Toasefululua, “E leai se matafaioi e sili ona taua ma sili ona faavavau nai lo le tulaga faatina” (“O Afafine o le Atua,” Liahona, Me 2008, 108). I lenei lesona o le a faamalamalama ai e tagata aoga le natura e faavavau ma le taua o le tulaga faatina ma le faafaileleina o isi. O le a latou talanoaina le ala na faaaoao mai ai e le Faaola le faafaileleina. O le a faataitaia ai e tagata aoga le faamalamalamaina o mataupu faavae e uiga i le tulaga faatina i isi.

Fautuaga mo le Aoao Atu

Faaleleia o Lo Tatou Aoao Atu ma le Aoaoina

Filimaoti le saoasaoa. Aloese mai le soona faaaluina o le taimi i le vaega muamua o le lesona ona faatatope ai lea o mea o totoe. A o e tapenapena, fuafua pe fia le taimi o le a faaaoga e tagata aoga e punouai ai i vaega taitasi o le lesona e faaaoga ai metotia ua e filifilia. Fetuunai metotia pe a tatau ai, e faalagolago i manaoga ma mea e fiafia i ai au tagata aoga.

Ua i ai i tina se tiutetauave paia e faafailele ai.

Faaali atu le saunoaga lenei a Peresitene Russell M. Nelson:

Peresitene Russell M. Nelson

I le taimi o la’u matata faapolofesa o se fomai o vailaau, sa i ai taimi sa fesiligia ai au pe aisea na ou filifili ai e fai lea galuega faigata. Sa ou tali ma lo’u manatu faapea o le galuega aupito maualuga ma tamalii i lenei olaga o le galuega lea a se tina. Talu ai e lei avanoa mo au lena filifiliga, sa ou mafaufau ai faapea o le tausia o e mama’i e ono latalata i ai. …

I le tele o tausaga ua mavae, sa tuuina mai ai e le Au Peresitene Sili se faamatalaga sa i ai se tosinaga tumau maoae ia te au. “O le tulaga faatina,” sa latou tusia ai “e latalata i le paia faalelagi. O se galuega aupito maualuga, ma aupito paia lea e faia e le tagata. E tuu ai o ia o le e faamamaluina lona valaauga paia ma le auaunaga, e sosoo ma agelu” [i le James R. Clark, comp., Messages of the First Presidency of The Church of Jesus Christ of Latter-day Saints (1975), 6:178]. (“Our Sacred Duty to Honor Women,” Ensign, May 1999, 38)

• O le a se mea o tumatila mai ia te oe i le saunoaga a Peresitene Nelson, ae pe aisea foi?

• Pe mata e faapefea ona e faamalamalamaina le natura e faavavau o le matafaioi o le tulaga faatina?

• E faapefea ona fesootai le matafaioi o le tulaga faatinā i tamaitai uma lava, e aofia ai ma i latou e leai ni fanau? (Afai e manaomia, valaaulia tagata aoga e toe faamanatu saunoaga a Sister Sheri L. Dew ma Peresitene Nelson i le vaega 1 o anomea mo sauniuniga. Fesoasoani i tagata aoga e faailoa mai se upumoni e pei o lenei: O tamaitai uma o se tina e ala i le paia o lona taunuuga e faavavau [tagai i le Russell M. Nelson, “Auai o Tuafafine i le Faapotopotoina o Isaraelu,” Liahona, Nov. 2018, 68].)

• O le a le uiga o lenei upumoni mo oe ma tamaitai e te iloaina?

Mafaufau e aumai i le vasega pe faaali ni ata o se laau ola lelei ma se laau ua mamae.

o se rosa ola lelei

rosa ua mamae

Valaaulia tagata aoga e mafaufau po o le a se mea atonu na fai mo le laau ola lelei e lei faia mo le laau ua mamae.

• E mafai faapefea e le tausia o laau ona faatusatusa i le faafaileleina o tagata? (Pe a manaomia, toeiloilo ma tagata aoga le uiga o le faafaileleina o loo aumaia e Peresitene Susan W. Tanner i le vaega 2 o le anomea mo sauniuniga.)

Faaali le faamatalaga lea mai le folafolaga i le aiga: O le uluai matafaioi a tina o le faafaileleina o a latou fanau (tagai i le ChurchofJesusChrist.org).

• O a meaalofa na tuuina e le Tama Faalelagi i tamaitai e fesoasoani ai ia te i latou e faataunuu lenei tiutetauave paia? (I le avea o se vaega o le talanoaga e mafai ona outou toe faamanatuina ma le vasega ia saunoaga a Sister Neill F. Marriott ma Peresitene Henry B. Eyring i le vaega 2 o le anomea mo sauniuniga.)

Faamalamalama o Iesu Keriso o le faataitaiga atoa o le faafaileleina. Valaaulia tagata aoga e toeiloilo fuaitau o mau sa latou aoaoina i le vaega 2 o anomea mo le sauniuniga, ma vaavaai mo mea e mafai ona latou aoaoina e uiga i le faafaileleina mai le faataitaiga a le Faaola. Valaaulia ni nai tamaiti aoga e faasoa mai o latou manatu.

E i ai se matafaioi paia ma tatau ai a tina i le fuafuaga a le Atua.

Valaaulia tamaitai i le vasega e tali mai i le fesili lea:

• O a ni ou mafaufauga, lagona, po o popolega e uiga i le avea ma se tina?

Ona fai atu lea o fesili nei i le vasega:

• O a ni uunaiga faamalosi i la tatou aganuu e ono manatu se tamaitai e fesootai i le tulaga faatina?

• O a eseesega e mafai ona e vaaia i le ala e vaai ai nisi tagata i le tulaga faatina ma le ala e silasila ai le Atua i le tulaga faatina? (I le avea o se vaega o lenei talanoaga, e mafai ona e faasino tagata aoga i saunoaga a Peresitene Nelson ma Elder D. Todd Christofferson i le vaega 3 o anomea mo le sauniuniga. Fesoasoani i tagata aoga e faailoa mai upumoni e pei o nei: O le fanauina ma le tausiga o fanau a le Atua e taua tele i le galuega ma le mamalu o le Atua.)

• Aisea e taua ai le fanauina (pe a mafai) ma le tausiga o fanau i le fuafuaga o le fiafia a le Tama Faalelagi?

Faaali atu se ata o le autau talavou. Valaaulia tagata aoga e faasoa mai mea ua latou iloa e uiga i le faatuatua o nei alii talavou (tagai i le Alema 56:45–48; 57:21–26).

Fitafita Talavou e Lua Afe, saunia e Arnold Friberg

• O le a se aafiaga na faia e tina o le autau talavou i olaga o a latou fanau tama ma le malupuipuiga o le malo o sa Nifae?

I Ie sauniuniga mo le vasega, sa valaaulia ai tagata aoga e auina atu se faamatalaga i o latou tina po o e ua avea ma tina o se sa faamanuiaina ai o latou olaga. E mafai ona e valaaulia ni nai tagata aoga e faasoa mai pe na faapefea e tamaitai na latou tusi i ai ona faaaafiaina o latou olaga. A le o lena, afai o le toatele o le vasega e lei faia se faamatalaga, e mafai ona e valaaulia i latou e faaalu ni nai minute e tusi ai se tesi po o se imeli i le taimi o le vasega.

Fesili i tagata aoga e filifili se tasi o faataitaiga nei o loo faamatala ai manatu po o uiga faaalia e mafai ona latou maua i luga o upega tafailagi. Valaaulia i latou e tusi se tali fatu latou te manatu e mafai ona talanoaina lelei ai lenei alofa faavalea. (Afai e i ai se faataitaiga o se mea moni o le olaga o tagata aoga latou te fia faaaogaina nai lo lea, valaaulia i latou e faaaoga lena faataitaiga.) Fautuaina tagata aoga e faaaoga mea sa latou aoaoina ia latou suesuega o anomea mo sauniuniga ma mai aafiaga patino, ma faasoa foi a latou molimau, a o latou fatuina a latou tali.

• Ua faaalia e se uo le tulaga faatina faapea o le maimau o gafatia moni o se tamaitai, fai mai o le filifili e fai se aiga ae le o se galuega faalematata, o le a faatapulaa ai mea e mafai e se tamaitai ona fai ma ausia i le olaga.

• Ua lagona e se uo le le talisapaia o ia---ua manatu faapea o mea na te faia mo lana fanau e le afaina ma e le o lava sona lelei e avea ai o se tina.

• Ua popole se uo, “Ae faapefea pe afai e le o au o se tagata e iloa faafailele? E mafai ea faapefea ona avea au ma ituaiga o tina e finagalo le Alii e avea ai au?”

• Ua lagona e se uo le faanoanoa loloto ona sa le mafai e lana tane ona maua se fanau.

A uma ua lava se taimi, valaaulia ni nai tagata o le vasega e mananao e faasoa mai mea sa latou tusia e faia.

Fuafua e faaali le vitio o le “Just a Mom” (1:02).

Ina ia faauma le lesona, e mafai ona e valaaulia ni nai tagata o le vasega e mafaufau po o a mea e mafai ona latou faia e faataunuu ai la latou matafaioi paia o ni tina pe lagolago ai tamaitai e latalata ia i latou i lenei matafaioi. Faamalosiau i tagata aoga e faalagolago i le fesoasoani a le Alii a o latou faia nei taumafaiga. Molimau atu, pe valaaulia se tagata aoga e molimau i le taua o le tulaga faatina i le fuafuaga a le Tama Faalelagi.

Mo Le Isi Taimi

Valaaulia tagata aoga e mafaufau i matafaioi a tama a o latou suesue i le anomea mo sauniuniga mo le lesona 20. Atonu e mananao tagata o le vasega e tusi se faamatalaga o le lotofaafetai i o latou tama po o se tasi ua avea o se tama ua faamanuiaina ai o latou olaga.