Lesona 14 Anomea a le Faiaoga

Taulimaina o le Faaaogaina o Ponokalafi

E mafai e le Tama Faalelagi ma Iesu Keriso ona fesoasoani e puipuia i tatou mai faatosinaga lautele o ponokalafi. I lenei lesona, o le a valaaulia ai tamaiti aoga e fuafua po o a mea e mafai ona latou faia e maua ai lenei fesoasoani faalelagi. O le a mafaufau foi tagata aoga pe mafai faapefea ona latou sailia le mana o le Alii e faamalolo ai mai aafiaga o le faaaogaina o ponokalafi.

Fautuaga mo le Aoao Atu

O le malamalama i lo tatou faasinomaga paia ma le faamoemoega e fesoasoani ia i tatou e tetee atu ai i ponokalafi.

Faaleleia o Lo Tatou Aoao Atu ma le Aoaoina Mai

Ia faatumauina se leo lelei ma le faamoemoe i le lesona. O le leo lea e mafai ai e oe ma au tamaiti aoga ona talanoaina aoaoga o le talalelei e mafai ona tosina ai uiga faaalia ma aafiaga e aoao ai isi tamaiti aoga. E taua le talanoaina o autu e pei o ponokalafi i se auala e faailoa ai lona ogaoga e aunoa ma le matua’ia ai o le maasiasi. O le leo o le lesona e mafai ona fesoasoani ia i latou o o latou olaga na aafia leaga i ponokalafi ia lagona ai le faamoemoe i le mana faamalolo o Iesu Keriso.

Faaali atu le faamatalaga lenei ma valaaulia tamaiti aoga e tali mai:

Ua faateleina le faaaogaina o ponokalafi. O a mafuaaga e tuuina mai e nisi tagata mo le tauamiotonuina o le faaaogaina o ponokalafi?

(Atonu e fautua mai e tamaiti aoga nisi o mea nei: O se mausa; E le mafai ona ou tuua; e le afaina ai se isi tagata; o se mea masani; ua na o se faafiafiaga; o nisi o suesuega ua fautuaina mai ai e aoga mo le atinaega faalefeusuaiga ma sootaga vavalalata.)

• O le a le mea na aoao mai e le Alii e faatatau i le teenaina o ponokalafi? (Atonu e te manao e faasino tamaiti aoga i aoaoga o loo i le vaega 1 o le anomea mo sauniuniga. O se vaega o le talanoaga, e mafai ona e valaaulia se tagata aoga e faitau leotele le Mataio 5:28 po o le Mataupu Faavae ma Feagaiga 63:16.)

• O a ni aafiaga faataumaoi e mafai e ponokalafi ona aumaia ia i latou o e faaaogaina ma o latou aiga?

Faaali atu le saunoaga lenei a Elder Tad R. Callister a o ia auauna atu i le Au Peresitene o Fitugafulu:

Elder Tad R. Callister

I se sauniga faaleaoaoga talu ai nei mo le Au Pulega Aoao, sa fai mai ai le fesili: “E mafai faapefea ona tatou fesoasoani ia i latou o loo tauivi ma ponokalafi?”

Sa tulai Elder Russell M. Nelson ma tali atu, “Aoao i latou i lo latou faasinomaga ma lo latou faamoemoega.” (“Our Identity and Our Destiny” [Brigham Young University Education Week devotional, Aug. 14, 2012], speeches.byu.edu))

Tusi le upumoni lenei i luga o le laupapa: O le malamalama i lo tatou faasinomaga paia ma le faamoemoega e mafai ona fesoasoani ia i tatou e tetee atu ai i le faaaogaina o ponokalafi.

• E mafai faapefea e le malamalama i faasinomaga paia ma faamoemoega a i tatou lava ma isi ona fesoasoani ia i tatou e tetee atu ai i le faaaogaina o ponokalafi? O le a se mea e mafai ona tatou faia ia malamalama atili ai i lo tatou faasinomaga ma le faamoemoega?

• O a isi mataupu faavae, faataitaiga, po o punaoa ua fesoasoani ia te oe e puipuia ai oe lava mai ponokalafi? (I le avea ai ma se vaega o lenei talanoaga, mafaufau e valaaulia tagata aoga e utuvai mai mea sa latou aoaoina mai le vaega 2 o anomea mo sauniuniga.)

E mafai e Iesu Keriso ona faamalolo tagata taitoatasi mai aafiaga o ponokalafi.

Afai e mafai, faaali atu le ata o le fafine o loo i ai le puna toto o loo aapa atu i le Faaola, o loo maua i le vaega 3 o anomea mo sauniuniga. Valaaulia se tamaitiiti aoga e toe faamatala le aafiaga o lenei fafine e pei ona tusia i le Luka 8:43–48.

• Afai sa e i ai i le tulaga o lenei fafine, mata o le a sou lagona ina ua mavae le tele o tausaga o tauiviga?

• O le a se mea e mafai e i latou o loo saili ina ia faamaloloina mai aafiaga o ponokalafi ona aoao mai le faataitaiga a lenei tamaitai? (Atonu e faailoa mai e tagata aoga se mataupu faavae e pei o lea: A o tatou aapa atu ma le filiga i le Alii i le faatuatua, e mafai ona Ia fesoasoani ia i tatou ia malolo mai aafiaga o le faaaogaina o ponokalafi.)

• Aisea e taua ai le aapa atu ia Iesu Keriso i a tatou taumafaiga e faatoilalo le faaaogaina o ponokalafi po o le tiga e mafua mai i le faaaogaina e se isi tagata o ponokalafi?

Valaaulia se tagata aoga e faitau leotele le saunoaga a Peresitene Russell M. Nelson o loo maua i le vaega 3 o le anomea o sauniuniga.

• O le a le eseesega e faia ai pe a naunau se tagata e faia soo se mea e tatau ai ina ia faamaloloina ai e le Alii?

E mafai ona e faamalamalama atu e mafai ona tatou saili e fesoasoani ma le onosai i isi o loo feagai ma aafiaga o ponokalafi ma vaai i la latou malaga i auala faaKeriso. Faitau faatasi le saunoaga lenei a Peresitene Dallin H. Oaks o le Au Peresitene Sili:

Peresitene Dallin H. Oaks

O lenei o se upu e faatatau i le auala tatou te taulimaina ai i latou o e ua faaseseina e ponokalafi. O i tatou uma e manaomia le Togiola a Iesu Keriso. O i latou o loo tauivi ma ponokalafi e manaomia lo tatou agaalofa ma le alolofa ao latou mulimuli i mataupu faavae e manaomia ma laasaga o le toe faaleleia. Faamolemole aua le tausalaina i latou. E le leaga i latou pe ua aunoa ma le faamoemoe. O i latou o atalii ma afafine o lo tatou Tama Faalelagi. E ala i le salamo e tatau ai ma le atoatoa, e mafai ona latou mama, mama aiai, ma agavaa mo feagaiga ma faamanuiaga uma o le malumalu ua folafola mai e le Atua. (“Recovering from the Trap of Pornography,” Ensign, Oke. 2015, 37)

Faatulaga tagata aoga i ni vaega toalaiti. Filifili se taitai mo vaega taitasi, ma tuu atu i taitai taitasi se kopi o le tufaaga lenei. Faatonu le vasega e mulimuli i faatonuga o i le tufaaga.

Fesoasoani i se Tasi ia Malolo mai Aafiaga o Ponokalafi

Anomea a le Faiaoga O Le Aiga e Faavavau—lesona 14

Iloilo faatasi tulaga nei, ma filifili se tasi e talanoaina:

1. Ua ta‘u atu e se tasi [tou te] potu faatasi na latou matamata i ponokalafi mo le taimi muamua.

2. Sa tau atu e se uo tama a se uo ia te ia anapo, o loo tauivi o ia ma le faaaogaina o ponokalafi.

3. E vaai soo se uo i ponokalafi ma sa taumafai e taofi ia te ia lava i le tele o taimi ae e lei faamanuiaina, e ui lava i le lagonaina ua ia faia toetoe lava o mea uma na te mafaia e tuu ai.

4. Ua faasoa atu e se uo ia te oe o loo tauivi lona toalua ma ponokalafi ma na te le iloa pe faapefea ona fesoasoani ia te ia. Ua faaleagaina ai le la faaipoipoga ma ua ia lagona le faanoanoa.

Talanoaina fesili nei:

• Mafaufau faapea ua sau lenei tagata ia te oe mo se fesoasoani. I le faaaogaina o mea ua e aoaoina mai le suesueina o anomea mo sauniuniga ma le vaega o le “Manao Atili?” o le a se fautuaga o le a e tuuina atu i lenei tagata?

• E mafai faapefea e lenei tagata ona maua le fesoasoani a le Alii i lenei tulaga?

© 2022 Puletaofia e le Intellectual Reserve, Inc. Ua taofia aia tatau uma.

Fesoasoani i se Tasi ia Malolo mai Aafiaga o Ponokalafi

tufaaga a le faiaoga

A ua lava se taimi, valaaulia se tamaitiiti aoga se toatasi pe toalua e faasoa mai mea sa latou aoaoina pe na lagonaina i le taimi o la latou talanoaga faavaega.

Mafaufau e tuu atu i tamaiti aoga se taimi e toe manatunatu ai ma tusi a latou tali i se tasi o fesili nei:

• O le a se mea e mafai ona ou faia e aapa atu ai mo le mana o le Alii o le puipuiga mai ponokalafi ma maua Lana fesoasoani e faamalolo ai mai ona aafiaga?

• E mafai faapefea ona ou fesoasoani ma le alofa i se tasi o loo tauivi mai aafiaga o ponokalafi?

Faaiu le lesona i le faamautinoa atu i tagata aoga le moni o mataupu faavae na faailoa mai i le lesona.

Mo Le Isi Taimi

E mafai ona e faaali atu i tagata aoga le gaoioiga o le talanoaga i le faaiuga o le vaega 1 o anomea mo sauniuniga mo le lesona e sosoo ai ma uunaia i latou e amata ona mafaufau po o ai e mafai ona latou talanoa i ai mo lenei gaoioiga.