Lesona 10 Anomea a le Faiaoga: O Le Feagaiga Fou ma Faavavau o le Faaipoipoga
“Lesona 10 Anomea a le Faiaoga: O Le Feagaiga Fou ma Faavavau o le Faaipoipoga,” Anomea a le Faiaoga O Le Aiga e Faavavau (2022)
“Lesona 10 Anomea a le Faiaoga,” Anomea a le Faiaoga o le Aiga e Faavavau
Lesona 10 Anomea a le Faiaoga
O Le Feagaiga Fou ma Faavavau o le Faaipoipoga
O le ulu atu ma le faamamaluina “o le feagaiga fou ma tumau-faavavau o le faaipoipoga” (Mataupu Faavae ma Feagaiga 131:2)) e taua mo le faaeaga. I lenei lesona, o le a maua ai e tamaiti aoga le avanoa e faamalamalama ai le taua e faavavau o le feagaiga o le faaipoipoga ma pe aisea o loo latou tauivi ai mo se faaipoipoga e faavavau. O le a latou mafaufau foi i mea e mafai ona latou faia e saunia ai e ulu atu pe faamamalu a latou feagaiga o le faaipoipoga.
Fautuaga mo le Aoao Atu
O le faaipoipoga e faavavau o se faapaaga ma le Atua.
Mafaufau e amata le vasega i le valaaulia o ni nai tagata aoga e faasoa mai mea na latou aoaoina mai a latou talanoaga ma se tasi ua faamauina i le malumalu (tagai i le valaaulia i le vaega 1 o anomea mo sauniuniga). (Manatua: Atonu e te manao e faafesootai se tamaitiiti aoga se toatasi pe toalua i ni nai aso a o lei amataina le vasega e fesili i ai pe o le a latou o mai saunia e faasoa mai mea na latou aoaoina mai a latou talanoaga.)
E mafai ona e fesili i tamaiti pe i ai ni a latou fesili e uiga i le feagaiga o le faaipoipoga po o le sauniga o le faamauga o le faaipoipoga. (Mafaufau e fetuunai le anotusi o le lesona e faavae i fesili e fai mai e tamaiti aoga. Ia mautinoa o tali i fesili a tamaiti aoga e faaaloalogia ai le paia o le malumalu.)
Faaleleia o Lo Tatou Aoao Atu ma le Aoaoina Mai
Tali atu ma le manatunatu loloto i fesili a tamaiti aoga. Ia lotofaafetai pe a naunau tamaiti aoga e fai mai ni fesili. Faaalu se taimi e faalogo moni ai ma malamalama i a latou fesili ma fai atu ni fesili tulitatao pe a manaomia. O nisi taimi atonu e talafeagai le taliina sa‘o o fesili, ae i nisi taimi atonu e sili atu le fesoasoani i tamaiti aoga ia maua tali i a latou lava fesili. E mafai foi ona e valaaulia isi tagata o le vasega e tali i fesili.
Faitau faatasi le saunoaga lenei a Elder Parley P. Pratt o le Korama a Aposetolo e Toasefululua, lea e faamatalaina ai ona lagona ina ua ia aoaoina i le taimi muamua lava faapea o le faaipoipoga e mafai ona faavavau.
Ata
Parley P. Pratt
Na ou aoao mai [le Perofeta o Iosefa Samita] e faapea, o lau ava peleina e mafai ona faamauina ia te au mo le taimi nei ma le faavavau atoa. … Sa mai ia te ia na ou aoaoina ai ia atiina ae nei lagona alofa, ma tuputupu a’e ma faateleina i lea lava alofa i le faavavau atoa; o le taunuuga o a tatou faatasiga e le iu, o se fanau e pei le toatele o fetu o le lagi, po o le oneone o le matafaga. … Na ou alofa muamua, ae sa ou le iloa pe aisea. Ae o lea ua ou alofa---ma le mama a’ia’i---o se lagona tele, siitia, faaeaina. (Autobiography of Parley P. Pratt, ed. Parley P. Pratt Jr. [1938], 297–98).
E mafai faapefea e le iloaina o le faaipoipoga e mafai ona faavavau ona aafia ai a tatou filifiliga ma lagona e faatatau i le faaipoipoga i lenei olaga?
Toe faamanatu faatasi le Mataupu Faavae ma Feagaiga 131:1–4, ma vaavaai mo upumoni faaopoopo na aoao mai e Iosefa Samita e uiga i le faaipoipoga e faavavau. Ona mafai lea ona e fesili i le vasega po o le a le mea e tulaga ese ia i latou i lenei fuaitau. Atonu latou te faailoa maia upumoni e pei o nei: E manaomia le faaipoipoga e faavavau ina ia maua ai le tikeri aupito maualuga o le malo selesitila O i latou e ulu atu i le feagaiga fou ma faavavau o le faaipoipoga e mafai ona maua le faatelega e faavavau.
Mai mea ua e aoaoina i le vaega 1 o anomea mo sauniuniga, e faapefea ona fesootai le feagaiga fou ma le faavavau o le faaipoipoga ia Aperaamo ma Sarai? (Mafaufau e fesoasoani i tagata aoga ia iloa na tuuina mai e le Alii lenei folafolaga taualuga ia Aperaamo ma Sarai, e aofia ai le folafolaga o le a la maua se faatelega e faavavau [o se fanau e le mafaitaulia].)
E mafai faapefea e le feagaiga o le faaipoipoga ona mafai ai ona tatou avea e faapei o o tatou matua faalelagi?
Faaali atu le ata o loo i ai i le lesona e faatusa i le sootaga o le feagaiga o le faaipoipoga. Fai i le vasega e faamatala mai mea na aoao mai e Elder David A. Bednar e uiga i lenei ata (tagai i le vaega 1 o anomea mo sauniuniga).
Faaali atu le saunoaga lenei a Peresitene Russell M. Nelson: “O se faaipoipoga i le malumalu e le gata i le va o le tane ma le ava; e opomauina ai se faigapaaga ma le Atua [tagai i le Mataio 19:6]” (“Faaipoipoga Faaselesitila,” Ensign po o le Liahona, Nov. 2008, 93)
E mafai faapefea e le malamalama i lenei upumoni ona tosina ai filifiliga e faia e se tane ma se ava?
Afai e toatasi pe sili atu tagata o lau vasega ua faamauina i le malumalu, mafaufau e fesili atu ia i latou pe o le a latou naunau e faasoa mai i le vasega nisi o o latou lagona e uiga i le faamauina i le malumalu ma le uiga o lena feagaiga ia i latou. (Atonu e te manao e fai atu i nei tamaiti aoga a o lei amataina le vasega ina ia lava so latou taimi e saunia ai a latou tali.)
Faaali ma faitau faatasi le saunoaga lenei mai ia Peresitene Thomas S. Monson:
Ata
Peresitene Thomas S. Monson
Ou te fia apoapoai atu ia te oe ia tausisia se vaaiga i le faavavau. Ia faamautinoa o le faaipoipoga i lou lumanai o se faaipoipoga i le malumalu. E leai se vaaiga e sili atu ona suamalie, leai se taimi e sili atu ona paia e pei o lena aso sili ona faapitoa o lau faaipoipoga. O le taimi lena ma o iina foi e te tepa ai i le olioli faaselesitila. Ia mataala; aua lava nei faatagaina tofotofoga e faoa lenei faamanuiaga mai ia te oe. (“Whom Shall I Marry?,” New Era, Oct. 2004, 6)
Aisea e ono aumaia ai e le aoaoga faavae e uiga i le faaipoipoga e faavavau ni lagona loloto o le olioli ma le alofa?
Mafaufau e fesili atu i soo se tagata aoga o e naunau e faailoa mai pe aisea ma pe o faapefea ona latou tauivi mo se faaipoipoga e faavavau.
O le faaipoipoga e mafai ona faavavau mo i latou o e faamaoni i a latou feagaiga.
Vaevae le vasega i ni vaega toalaiti. Tuu atu i vaega taitasi se kopi o le tufaaga o loo avatu i le lesona. Faatonu vaega e faitau faatasi le ata faataitai ma talanoaina faatasi ia fesili.
Faaipoipoga e Faavavau
Anomea a le Faiaoga O Le Aiga e Faavavau---Lesona 10
O oe o se faauo ma se ulugalii i lau uarota e lei auai mai i sauniga lotu. I le taimi o se talanoaga ma i laua, na fai mai ai le tane, “Aua e te popole ia i matou i le le o atu i le lotu i le taimi nei. Ua faamauina i ma‘ua i le malumalu, o loo lelei lava i maua. O le a matou faatasi e faavavau.”
Mafaufau i mea ua e aoaoina mai le vaega 2 o anomea mo sauniuniga, o le a se mea e le o malamalama ai lenei ulugalii e uiga i mea e manaomia mo le la faaipoipoga ina ia faavavau ai? (Atonu e te manao e iloilo puupuu le vaega 2.)
A lava le taimi, valaaulia ni nai tamaiti aoga e faasoa mai ni mea na latou aoaoina i talanoaga a a latou vaega. A o faasoa mai e tamaiti aoga a latou faamatalaga, atonu e te manao e lisi i luga o le laupapa nisi o upumoni o loo latou ta‘ua. O nei upumoni e ono aofia ai manatu e pei o nei: O a tatou faaipoipoga e na o le pau le ala e mafai ai ona faavavau pe afai e faatinoina i le pule a le Atua ma pe afai tatou te tumau i le feagaiga o le faaipoipoga. O le a molimau atu le Agaga Paia (le Agaga Paia o le Folafolaga) i le Tama i lo tatou faamaoni i a tatou feagaiga o le faaipoipoga. O le Faaola o le faataitaiga atoatoa lea o le tausiga o folafolaga ma feagaiga.
Molimau atu o loo i ai le faamoemoe mo tagata uma ina ia maua se faaipoipoga e faavavau. Ua faia e le Faaola ia mafai e i tatou uma ona salamo, ia faamagaloina, ma osia ma tausia feagaiga paia ma Ia. Faamanatu i tamaiti aoga e oo lava ia i latou e le maua le avanoa e faaipoipo ai i lenei olaga e mafai ona faamauina i se toalua mo le faavavau pe afai latou te faamaoni.
E mafai ona e faaali atu fesili nei ma valaaulia tagata aoga e filifili se tasi ma tusifaamaumau o latou lagona uunai e uiga i ai:
O le a lo‘u tuuto i le faaipoipo ai i le malumalu? O a filifiliga e mafai ona ou faia nei e lagolago ai lena tautinoga?
E mafai faapefea ona ou mulimuli atili i le faataitaiga a le Faaola i le tausia o a‘u feagaiga? E faapefea ona ou maua Lona mana e fesoasoani ai ia te au e osia ma tausia a‘u feagaiga?
Faaiu i le molimau atu i upumoni na talanoaina i le lesona lenei, ma fautuaina tagata aooga e faaaoga mea sa aoaoina.
O a ni auala o loo fesoasoani mai ai le Alii ia te au i au taumafaiga e saili se soa e faavavau (pe, mo i latou ua faaipoipo, e fausia se sootaga e faavavau)?
O a uiga auaumama faaKeriso e sili ona taua ia te a‘u i se toalua ma a’u lava ia?
