Lesona 10 Anomea mo le Sauniuniga o le Vasega: O Le Feagaiga Fou ma Faavavau o le Faaipoipoga
“Lesona 10 Anomea mo le Sauniuniga o le Vasega: O Le Feagaiga Fou ma Faavavau o le Faaipoipoga,” Anomea a le Faiaoga O Le Aiga e Faavavau (2022)
“Lesona 10 Anomea mo le Sauniuniga o le Vasega,” Anomea a le Faiaoga o le Aiga e Faavavau
Ata
o se ulugalii faaipoipo i fafo o le Malumalu o Manila Filipaina
Lesona 10 Anomea mo le Sauniuniga o le Vasega
O le Feagaiga Fou ma le Faavavau o le Faaipoipoga
I le lesona 6, sa tatou aoao ai o le faaipoipoga ua faauuina e le Atua. Na aoao mai Peresitene Russell M. Nelson e faapea o le faaipoipoga faaselesitila o “le ituaiga faaipoipoga aupito maualuga ma sili ona tumau lea e mafai e lo tatou Foafoa ona ofo atu i Ana fanau,” e aumaia ai “avanoa sili atu mo le fiafia nai lo se isi lava sootaga” (“Faaipoipoga Faaselesitila,” Ensign po o le Liahona, Nov. 2008, 92, 93). A o e suesue i lenei anomea, mafaufau i ou lava lagona e uiga i le faaipoipoga e faavavau ma mea e mafai ona e faia e ola agavaa ai.
Vaega 1
Aisea e tatau ai ona ou taumafai ia maua se faaipoipoga e faavavau?
A o e mafaufau e uiga i faaipoipoga a tagata e te iloa, atonu e te mafaufau pe faapefea ona ese le faaipoipoga i le malumalu mai faaipoipoga faalemalo.
Tatou te talitonu “o le fuafuaga paia o le fiafia ua mafai ai ona faaauau fegalegaleaiga faaleaiga i tala atu o le tuugamau” (“O Le Aiga: O Se Folafolaga i le Lalolagi,” ChurchofJesusChrist.org). O sootaga faaleaiga e faavavau ua mafai ona o Iesu Keriso. Na aoao mai Peresitene Nelson, “O le Togiola a Iesu Keriso … ua faia ai le toetutu o se mea moni mo tagata uma ma ua mafai ai ona maua le ola e faavavau mo i latou o e salamo ia latou agasala ma maua ma tausia sauniga ma feagaiga e tatau ai” (“Mauaina o le Mana o Iesu Keriso i o Tatou Olaga,” Ensign po o le Liahona, Me 2017, 40). I aso e gata ai, ua toefuatai mai ai e le Alii le pule, sauniga, ma feagaiga ia e mafai ai ona faavaeina faaipoipoga e faavavau.
Ata
aikona, suesue
Suesue e Sauniuni ai mo le Vasega
Faitau le Mataupu Faavae ma Feagaiga 131:1–4, ma vaavaai mo le mea na aoao mai e Iosefa Samita e uiga i le feagaiga o le faaipoipoga e faavavau. (Manatua: O le tikeri aupito maualuga o le malo selesitila o le ola e faavavau, po o le faaeaga.)
E pei ona faaaogaina i le fuaiupu 2, o le upu fou o lona uiga o le feagaiga ua fou ona toefuatai mai i lo tatou tisipenisione. O le feagaiga foi e tumau faavavau ona e faavavau ma sa i ai talu “i luma atu o le faavaega o le lalolagi” (Mataupu Faavae ma Feagaiga 132:5). O se vaega o le feagaiga na osia e le Atua ma Aperaamo ma lana avā o Sara i se taimi ua leva.
Ua tatou aoao mai le Lomifefiloi o le Tusi Paia e faapea “na muai maua e Aperaamo le talalelei e ala i le papatisoga (o le feagaiga lea o le faaolataga). Ona faaee atu lea ia te ia o le perisitua maualuga, ma sa ia ulu atu ai i le faaipoipoga faaselesitila (o le feagaiga lea o le faaeaga), ma maua ai le faamautinoaga o le maua ai o lona faatelega e faavavau [augatupulaga e le mafaitaulia]” (Lomifefiloi o le Tusi Paia, “Aperaamo, feagaiga a”).
Na folafola atu e le Alii ia Aperaamo, “Ou te matua faatoateleina lava lau fanau e pei o fetu o le lagi, e pei o le oneone foi i le matafaga” (Kenese 22:17).). O le faaipoipoga faaselesitila e aofia ai le faamanuiaga o le “maua[o ni] fanau i le … mamalu selesitila” (Joseph Smith, i le History, 1838–1856 [Manuscript History of the Church], volume D-1, 1551 [[josephsmithpapers.org]]).
Sa toe folafola atu e le Alii ia Aperaamo o nei faamanuiaga uma o le a ofoina atu i ana fanau faaletino (tagai i le Mataupu Faavae ma Feagaiga 132:29–31; Aperaamo 2:6–11). O le vaega o le feagaiga faa-Aperaamo e faatatau i le faaipoipoga e faavavau ma le faateleina e faavavau ua faafouina faatasi ma tagata taitoatasi o e ulu atu i “le feagaiga fou ma tumau-faavavau o le faaipoipoga” (Mataupu Faavae ma Feagaiga 131:2). I se isi faaupuga, e ala i le sauniga o le faamauga o le faaipoipoga, ua folafola mai ai ia i tatou faamanuiaga lava e tasi e pei o Aperaamo.
A faamauina se alii ma se tamaitai i le malumalu, la te osia feagaiga paia ma le Atua ma le tasi ma le isi. E aofia ai feagaiga ina ia tumau faamaoni i le tasi ma le isi ma i le Atua, ia ola i ala faaKeriso, ia faamamaluina feagaiga uma o le talalelei ua latou osia, ma ia fanafanau ma uluuluola i le lalolagi.
Mafaufau i le uiga o lenei faatusa e faatatau i le feagaiga o le faaipoipoga e faavavau. E faatatau i lea sootaga o le feagaiga, na aoao mai Elder David A. Bednar o le Korama a Aposetolo e Toasefululua e faapea:
Ata
Elder David A. Bednar
O le Alii o Iesu Keriso o le vaega aupito taua i se sootaga o le feagaiga i le faaipoipoga. Faamolemole ia matau le Faaola o loo tuu i le tumutumu o lenei tafatolu, ma se tamaitai i le faavae o se tasi tulimanu ma se alii i le faavae o le isi tulimanu. Manatu la i le mea e tupu i le va o le sootaga i le va o le tane ma le fafine ao taitasi i laua ma tutumau ona “o mai ia Keriso” ma taumafai ina ia “faaatoatoaina ia te Ia” (Moronae 10:32). Ona o le, ma e ala mai foi i le Togiola, e vavalalata ai le o mai faatasi o le tane ma le fafine. (“E Taua le Faaipoipoga i Lana Fuafuaga Faavavau,” Ensign, Iuni 2006, 86)
Afai e mafai, talanoaina fesili nei ma se tasi ua faamauina i lona toalua i le malumalu, e pei o se matua, matua o matua, taitai o le Ekalesia, po o se uo. Afai ua e faaipoipo, atonu e te faia lenei talanoaga ma lou toalua. Sau sauni i le vasega e faasoa mai se mea sa e aoaoina.
Na faape‘i mo oe le faamauina i le malumalu?
Na faapefea ona faamanuiaina oe ma lou toalua e oo mai i lenei taimi i le ulu atu i le feagaiga fou ma le faavavau o le faaipoipoga?
Na faapefea ona fesoasoani au lava taumafaiga e ola latalata atili atu i le Atua ia te oe ma lou toalua ia ola latalata atili atu ai i le tasi ma le isi?
Vaega 2
O a filifiliga e tatau ona ou faia mo la‘u faaipoipoga ina ia faavavau?
Sa faaali mai e le Alii e faapea afai e le faaipoipo se alii ma se tamaitai e tusa ai ma Lana tulafono (ulu atu i le feagaiga fou ma tumau faavavau o le faaipoipoga) ma i Lana pule, o lona uiga o le la faaipoipoga e “lē aoga … pe a oti i laua” (Mataupu Faavae ma Feagaiga 132:15). Peitai, o le na o le faamauina i le malumalu, e le o se faamaoniga foi lea o se faaipoipoga e faavavau.
Ata
aikona, suesue
Suesue e Sauniuni ai mo le Vasega
Faitau le Mataupu Faavae ma Feagaiga 132:19–20, ma mafaufau e faailoga mea e manaomia i talaatu o se sauniga o le faamauga i le malumalu ina ia maua ai se faaipoipoga e faavavau.
Atonu na e matauina i le fuaiupu 19 o faaipoipoga i le malumalu e tatau ona “faamauina … e le Agaga Paia o le folafolaga” ina ia faavavau. Ua tatou aoao mai i Taiala i Tusitusiga Paia “o le Agaga Paia o le Agaga Paia o le Folafolaga (Galuega 2:33). Na te faamaonia le talia e le Atua o galuega, sauniga, ma feagaiga amiotonu e faia e tagata. O le Agaga Paia o le Folafolaga e molimau i le Tama faapea o sauniga faaola ua faia i le ala sao ma o feagaiga e faatatau i ai ua tausia” (“Agaga Paia o le Folafolaga,” scriptures.ChurchofJesusChrist.org).
Pe a “ola [taitoalua] i [le] feagaiga” (Mataupu Faavae ma Feagaiga 132:19) o le Agaga Paia, i Lana matafaioi o le Agaga Paia o Folafolaga, e faamautu atu i le Atua ua latou tausia a latou feagaiga, ma faapea ai ona faavavau a latou faaipoipoga. Ina ia “ola i [le] feagaiga,” e tatau i taitoalua uma ona faamamalu ma le faamaoni tuutuuga ma tulaga o a latou feagaiga o le faamauga. Na aoao mai Elder Robert D. Hales o le Korama a Aposetolo e Toasefululua e uiga i le taua o le faamamaluina o nei feagaiga:
Ata
Elder Robert D. Hales
E pei ona aoao mai i lenei mau [Mataupu Faavae ma Feagaiga 132:19], o se noataga e faavavau e le faafuasei ona tupu ona o se taunuuga o feagaiga o le faamauga tatou te osia i le malumalu. O le auala tatou te faatautaia ai i tatou lava i lenei olaga o le filimaoti ai le mea o le a tatou i ai i le faavavau atoa o le a oo mai. Ina ia maua faamanuiaga o le faamauga ua tuuina mai e lo tatou Tama Faalelagi ia i tatou, e tatau ona tatou tausia poloaiga ma faatautaia i tatou lava i se ala o le a mananao ai o tatou aiga e ola faatasi ma i tatou i le faavavau. (“The Eternal Family,” Ensign, Nov. 1996, 65)
I le taumafai ai e avea ma tagata sili ona lelei e mafai ona avea ai i tatou ma tausia a tatou feagaiga, e mafai ona tatou vaai atu i le faataitaiga a Iesu Keriso. E pei ona aoao mai Elder Ronald A. Rasband o le Korama a Aposetolo e Toasefululua:
Ata
Elder Ronald A. Rasband
O lo tatou Faaola o Iesu Keriso o lo tatou Faataitaiga sili lea pe a oo mai i le osia ma le tausia o folafolaga ma feagaiga. Na afio mai o Ia i le lalolagi ma le folafolaga e fai le finagalo o le Tama. Sa Ia aoao mai mataupu faavae o le talalelei i upu ma galuega. Na togiola e Ia a tatou agasala ina ia mafai ona tatou toe ola. Na Ia faamamaluina Ana folafolaga uma taitasi.
… O le tausiga o folafolaga e le o se mausa; ae o se uiga o le avea ai ma soo o Iesu Keriso. …
O la’u fesili i le asō e faapea, o tatou tumau i a tatou folafolaga ma feagaiga pe o nisi taimi ua na o ni tautinoga faa’afa’afa, e faia faasamasamanoa ma o lea e faigofie ai lava ona soli? (“Tutu Atu i a Tatou Feagaiga ma Folafolaga,” Ensign po o le Liahona, Nov. 2019, 53, 54)
Ata
aikona, mafaufau loloto
Mafaufau Loloto i Sauniuniga mo le Vasega
E mafai faapefea ona avea atili oe e pei o le Faaola i le tausia o feagaiga paia ma folafolaga ua e osia ma le Atua? O a nisi mea e mafai ona e faia e tausia ai pe saunia ai e tausia au feagaiga o le faamauga?
