Lesona 12 Anomea a le Faiaoga: Faafaileleina o le Sootaga o le Faaipoipoga
“Lesona 12 Anomea a le Faiaoga: Faafaileleina o le Sootaga o le Faaipoipoga,” Anomea a le Faiaoga O Le Aiga e Faavavau (2022)
“Lesona 12 Anomea a le Faiaoga,” Anomea a le Faiaoga O Le Aiga e Faavavau
Lesona 12 Anomea a le Faiaoga
Faafaileleina o le Sootaga o le Faaipoipoga
E finagalo le Alii e fesoasoani ia i tatou e fausia ni faaipoipoga fiafia, ma faavavau. O le faaaogaina o fautuaga faaperofeta ma aoaoga ma faataitaiga a Iesu Keriso, o le a iloa ai e tamaiti aoga auala e mafai ona latou faafaileleina ai a latou faaipoipoga i le taimi nei po o le lumanai. O le a valaaulia foi tamaiti aoga e filimaoti ni auala e pipii atu ai ma le faamaoni i o latou taitoalua.
Fautuaga mo le Aoao Atu
E mafai ona tatou faafaileleina a tatou faaipoipoga e ala i le ola ai i le talalelei a Iesu Keriso.
Faaleleia o Lo Tatou Aoao Atu ma le Aoaoina Mai
Faamoemoeina o tamaiti aoga e faataunuu la latou matafaioi o ni tagata aoao. “O se lagona o le faamoemoega o loo i ai i se vasega lea e faamoemoe ai faiaoga i tamaiti aoga e faataunuu la latou matafaioi o ni tagata aoao ma fesoasoani ia i latou i le faia o lea mea ma le mea e faatuatuaina ai tamaiti aoga e saofaga i ni auala taua” (Aoao Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitiuti o Mataupu Faalelotu [2012],15).
Valaaulia se tagata aoga e faitau leotele le saunoaga a Elder Jeffrey R. Holland i le vaega 1 o le anomea mo le sauniuniga. Ona valaaulia lea o ni nai tamaiti aoga e faasoa mai ni faataitaiga o ulugalii latou te iloa o loo i ai ni faaipoipoga fiafia.
Faatulaga tamaiti aoga i ni vaega toalaiti, ma atofa se taitai mo vaega taitasi. Tuu atu i vaega taitasi se kopi o le tufaaga lenei, faitau faatasi ia faatonuga, ona tuu atu lea ia lava se taimi i tagata aoga e faamaea ai le gaoioiga. (Afai e i ai se taimi, e mafai foi ona e valaaulia vaega e fatu a latou lautusi i le initoneti po o le vitio i le taimi o le gaoioiga ma saunia e faasoa atu i le vasega.)
O Mataupu Faavae Autu i le Faafaileleina o se Faaipoipoga Fiafia ma le Faavavau
Anomea a le Faiaoga O Le Aiga e Faavavau—Lesona 12
Manatu faapea o le a tusia e lau vaega se faamatalaga i le initoneti pe fatu se vitio e ta‘ua “O Mataupu Faavae Autu i le Faafaileleina o se Faaipoipoga Fiafia ma Faavavau.” O mataupu faavae mo lautusi i le initoneti po o le vitio e tatau ona tusia mai le vaega 1 ma le 2 o anomea mo sauniuniga pe mai tusitusiga paia. Talu ai e le mafai ona e aoaoina vaega taua uma i lautusi i le initoneti po o le vitio, filifili po o fea o auala e lima e sili ona taua e faauma ai le mataupu faavae lenei: E mafai e tane ma ava ona faafaileleina se faaipoipoga fiafia ma faavavau e ala i le …
Faataitaiga:
E mafai e tane ma ava ona faafaileleina se faaipoipoga fiafia ma faavavau e ala i le mulimuli i le faataitaiga a le Faaola o le alofa ma le taulaga amiotonu (tagai Efeso 5:25, 28–31).
O fesili nei e mafai ona fesoasoani ia te oe e filifili ai po o fea o mataupu faavae e aofia ai:
Aisea e tatau ai ona faaaofia lenei mataupu faavae i la tatou lautusi i le initoneti po o le vitio? E faapefea ona saofaga le ola ai i lenei mataupu faavae i se faaipoipoga fiafia ma tumau?
Pe na ta‘ua e ulugalii faaipoipo fiafia sa matou talanoa i ai e sauniuni ai mo le vasega lenei mataupu faavae? Afai na fai, o le a se mea na latou faasoaina mai?
A uma ua lava se taimi o vaega e faailoa ma faamaumau ai mataupu faavae e lima, fai atu ia i latou e tusi a latou mataupu faavae pito i luga e tolu i luga o le laupapa (pe faasoa mai a latou faamatalaga po o vitio i le initoneti). A uma ona faailoa mai mataupu faavae, valaaulia tamaiti aoga e faasoa mai mea na latou aoaoina mai lenei aafiaga. A o latou faasoa mai, mafaufau e fai atu fesili e talitutusa ma fesili nei e fesoasoani ai i tamaiti aoga ia faia faatinoga mataalia ma amiotonu.
O anafea na e vaai ai o faatino lenei mataupu faavae? O le a se mea na e matauina?
E mafai faapefea e le soifuaga ma le faataitaiga a le Faaola ona faalolotoina lou malamalama i lenei mataupu faavae?
Afai e te nofofua, o a nisi o auala e mafai ona e faataitaia ai lenei mataupu faavae e fesoasoani e saunia ai oe mo se faaipoipoga fiafia?
Afai ua e faaipoipo, e mafai faapefea e le faaaogaina o lenei mataupu faavae i lau faaipoipoga ona taitai atu ai i le fiafia sili atu?
A mavae se taimi mo se talanoaga anoa, valaaulia tagata aoga e tusifaamaumau se faatinoga patino o le a latou faia a le o le saunia mo se faaipoipoga fiafia pe faafaileleina lelei ai a latou faaipoipoga.
E ao i tane ma ava ona pipii atu le tasi i le isi.
Afai e mafai, faaali atu le vitio lenei o le ata vitio o Peresitene Russell M. Nelson o faasoa mai se aafiaga sa ia matauina ai se ulugalii faaipoipo i luga o se vaalele (faaali mai le taimi 0:24 i le 1:50). O lenei ata puupuu e mai le lauga “Faafaileleina o Faaipoipoga” (Ensign po o le Liahona, Me 2006, 36).
Afai e le o maua le vitio po o le puega o leo, faitau faatasi le faamatalaga lenei:
Ata
Peresitene Russell M. Nelson
A o matou femalagaa‘i o se Usoga i le lalolagi, o nisi taimi matou te vaaia ai ni vaaiga faapopoleina. I se faigamalaga talu ai nei, sa ou nofo ai i tua o se tane ma se ava. Sa manino lava lona [ava] alofa i lona toalua. A o ia milimilia le tua o lona ua sa mafai ona ou iloa atu lana mama faaipoipo. E faalatalata atu ia te ia ma tuu lona ulu i luga o lona tauau, e saili lana mafuta ane.
I se isi itu, sa foliga mai sa ia [tane] matuai le iloa lava lona [ava] i ai. Sa taulai atoa atu o ia i se taaloga faaeletonika. I le taimi atoa o le faigamalaga, sa tamau lona mafaufau i luga o lena masini. E lei i ai se taimi e tasi na tilotilo atu ai ia te ia, talanoa atu ia te ia, pe faailoa atu lona naunau mo le alofa.
O lona le gauai atu na ou lagona ai le fia alaga atu: “Pupula ou mata, sole! E te le iloaina? Ia gauai atu! E alofa lau ava ia te oe! Na te manaomia oe!”
Ou te le iloa se isi mea e uiga ia i la’ua. Ou te lei toe vaai i ai la’ua talu mai lena taimi. Atonu sa ou soona popole lava. Ma atonu foi, afai e iloa e lenei alii lo‘u popole mo i la’ua, atonu o le a ia lagona le popole alofa mo a’u i le le iloaina pe faapefea ona faaaoga sea meataalo manaia. (“Faafaileleina o Faaipoipoga,” 36)
O le a le faaletonu i le amio a le tane i lenei tulaga?
O a mea e mafai ona faalavefau i taitoalua e fesootai ai le tasi i le isi ma faafaileleina a latou faaipoipoga?
Valaaulia se tagata aoga e faitau leotele le Mataupu Faavae ma Feagaiga 42:22 . Faamamafa atu o tane ma ava e tatau ona alolofa le tasi i le isi ma o latou loto atoa ma pipii atu i le tasi ma le isi. Mafaufau e valaaulia tamaiti aoga e tali se tasi pe sili atu o fesili nei e fesoasoani ai ia i latou e faalolotoina lo latou malamalama i lenei mataupu faavae.
O a ni auala eseese e mafai ona luitauina ai le faamaoni i le faaipoipoga (faamaoni i lou toalua)? E mafai faapefea e taitoalua ona puipuia i latou lava mai soo se ituaiga o lē faamaoni i le faaipoipoga? (Mafaufau e valaaulia tagata aoga e toe faamanatu saunoaga a Elder L. Whitney Clayton ma Peresitene Nelson i le vaega 3 o anomea mo sauniuniga.)
E mafai faapefea e se ulugalii ua faaipoipo ona faapaleniina ma fatuina se avanoa mo mea e fiafia i ai le tagata lava ia a o faafaileleina ma faatumauina le tuuto atoatoa i le la faaipoipoga?
Tuu atu i tagata aoga se taimi e tusi ai a latou tali i le fesili lenei, lea na valaaulia i latou e mafaufau loloto i ai i le vaega 3 o le anomea o sauniuniga:
O a ni fetuunaiga e manaomia ona e faia i le taimi nei ina ia saunia lelei ai e pipii atu i lou toalua i le lumanai po o le pipii atoatoa atu i lou toalua pe afai ua e faaipoipo?
Faaiu le lesona i le molimau atu i le finagalo ma le tomai o le Alii e lagolagoina i tatou i le fausiaina o faaipoipoga fiafia, e faavavau a o tatou tuuina atu a tatou taumafaiga silisili.
Mo Le Isi Taimi
Valaaulia tagata aoga e suesue ma le agaga tatalo anomea mo sauniuniga mo le lesona e sosoo ai, lea e faatatau i le meaalofa suamalie ma paia o le sootaga vavalalata faalefeusuaiga. Fautuaina tagata aoga e o mai saunia i le vasega e talanoa ma le faamaoni ma le faaaloalo e uiga i lenei meaalofa ma pe faapefea ona puipuia.
