Lesona 21 Anomea a le Faiaoga

Tausiaina o Fanau i le Alofa

“Ua i ai i matua se tiute paia e tausia a latou fanau i le alofa ma le amiotonu” (“O Le Aiga: O Se Folafolaga i le Lalolagi,” ChurchofJesusChrist.org). I le lesona lenei o le a talanoaina ai e tagata aoga upu moni e mafai ona fesoasoani ia i latou e faataunuu lo latou tiute paia o ni matua ia alolofa ia latou fanau. (O le lesona e sosoo ai o le a taulai i le tausiaina o fanau i le amiotonu.) O le a valaaulia foi tagata aoga e filimaoti pe mafai faapefea ona latou alolofa ma auauna i o latou aiga i se ala sili faaKeriso.

Fautuaga mo le Aoao Atu

E tatau i matua ona tausia a latou fanau i le alofa.

Mafaufau e amata le vasega i le fesili i tagata aoga pe o a mea ua latou vaaia i o latou lava matua po o isi matua o fai latou te mananao e fai ina o tausia a latou lava fanau. A uma ona faasoa mai ni nai tagata aoga, ia fautuaina le vasega e vaavaai mo upumoni i lenei lesona ma le lesona e sosoo ai e mafai ona latou mulimuli ai a o avea ma matua.

Faaali le faamatalaga lea mai le folafolaga i le aiga: Ua i matua le matafaioi paia e tausia a latou fanau i le alofa.

E mafai ona e fesiligia nisi o fesili nei e fesoasoani i tagata aoga ina ia loloto lo latou malamalama i lenei upumoni:

• O a ni isi o auala e mafai ona e faaalia ai le alofa mo lau fanau? (Mafaufau e toe iloilo faamatalaga e uiga i taimi ma gaoioiga lelei faafiafia a taitai o le Ekalesia i le vaega 1 o anomea mo sauniuniga.)

• Na faapefea ona faamanuiaina oe e ala i le taimi e faaalu, galulue ai, ma punouai ai i gaoioiga lelei faafiafia ma ou matua?

Faamatala o le tausiaina o le fanau i le alofa e aofia ai le aoaiina faalelei o i latou pe a manaomia. Vaevae le vasega i ni vaega toalaiti, ma atofa se taitai mo vaega taitasi. Tuu atu i taitai o vaega kopi o le tufaaga lenei, ma faatonu i latou e mulimuli i faatonuga o loo tuuina atu ai. (Atonu e te manao e fetuunai ata faataitai ia atili talafeauga ma au tagata aoga.)

Aoaiina o Fanau i Ala a le Alii

Anomea a le Faiaoga O Le Aiga e Faavavau---Lesona 21

Valaaulia sui auai o vaega e mafaufau faapea o i latou o ni matua. Fai i ai e filifili se tasi o tulaga nei e talanoaina faatasi.

1. Pe a outou oo i le fale mai le faatauga ma lau fanau, ua e vaai i lou afafine e ono-tausaga-le-matua o ’ai se lole na ia gaoia mai le faleoloa.

2. O lou atalii e 14-tausaga-le-matua e tele ina soona faia lona uso e 9-tausaga-le-matua. E masani ona tupu lenei mea pe a e le o i ai. Ua sau le atalii lea sa soona fai ia te oe ma loimata ma ta’u atu ia te oe sa toe fai atu foi e lona uso ni mea e le lelei ia te ia.

3. Sa e faatalitali mo lou afafine e 17-tausaga-le-matua e toe foi mai mai le mea sa i ai ma ni uo. Ina ua iu ina sau, ua leva ona te’a le taimi o lana sa.

Fai i lau vaega e talanoaina fesili nei a o latou fesootai ai i le tulaga sa latou filifilia.

• E mafai faapefea ona e faaaogaina mea sa e aoaoina mai le vaega 2 o le anomea mo sauniuniga e taiala ai oe i le aoaiina o lau tama? (Afai e tatau ai, valaaulia tagata o lau vaega ia toeiloilo vave le vaega 2.)

• Mata o le a se foliga o la oulua talanoaga ma lau tama? O a ni taunuuga e te ono tuuina i faatinoga a lau tama?

• E faapefea e se aoaiga faalelei o se tamaitiiti ona avea o se faatinoga o le alofa? (Tagai i le Mataupu Faavae ma Feagaiga 95:1.)

© 2022 Puletaofia e le Intellectual Reserve, Inc. Ua taofia aia tatau uma

Aoaiina o Fanau i Ala a le Alii

tufaaga a le faiaoga

A uma le gaoioiga a tagata aoao, valaaulia ni nai tagata e faasoa mai mea sa latou talanoaina ia latou vaega. I le avea ai o se vaega o lenei talanoaga, faamamafa le upumoni lenei: Ina ia mulimuli i le mamanu paia o le aoaga, e tatau ona faaosofia i le alofa (tagai i le saunoaga a Elder D. Todd Christofferson i le vaega 2 o le anomea mo sauniuniga).

Afai e manaomia, fesili i le vasega pe mafai faapefea e le ala o aoaiga a le Alii ona ese mai ala o le aoaiina o fanau ua talia i nisi aganuu po o aiga.

• O anafea na e vaaia ai se tasi o aoaiina se tamaitiiti i se ala agaalofa? O le a se mea na e aoaoina mai lena aafiaga?

Faaleleia o Le Aoao Atu ma le Aoaoina Mai

Valaaulia tagata o le vasega e manatunatu loloto. Manatunatu loloto o lona uiga o le mafaufau loloto e uiga i se mea. E mafai foi ona faalauteleina soo e ala i le tatalo. A o aoao tagata o le vasega e manatunatu loloto, o le a tele ina faailoa e le Agaga ia le mea moni ia i latou ma aoao i latou i mea latou te manaomia patino e aoao ai pe lagonaina.

Faaali atu faatonuga nei ma fesili, ma tuu atu i tagata aoga ni nai minute e mafaufau loloto ai (e mafai foi ona latou mananao e tusifaamaumau nisi o na mafaufauga):

• Mafauafu i taimi na faasa’o ai oe e le Alii pe na uunaia ai oe e le Agaga Paia ia fai sou suiga. O le a se mea e mafai ona e aoaoina e uiga i le aoaiina o fanau mai na aafiaga? O le a le taimi e mafai ona e manatua ai le faaalia e le Tama Faalelagi o Lona alofa mo oe i se taimi sa e manaomia ai?

Valaaulia ni nai tagata aoga e faasoa mai o latou manatu i le vasega.

E tatau i matua ona aoao a latou fanau e alolofa ma feauaunaa’i.

Valaaulia se tagata o le vasega e faitau leotele le Mosaea 4:14–15 .

• O a tiute paia o matua na faamamafa e le Tupu o Peniamina? (A uma ona tali mai tagata aoga, faaali atu le saunoaga lenei mai le folafolaga i le aiga: Ua i ai i matua se tiute paia e aoao a latou fanau ia alolofa ma feauauaunaa’i o le tasi i le isi.)

• Na faapefea ona aoao oe e ou matua e alofa ma auauna atu i ou tei po o isi tagata o le aiga?

Faamanatu i tagata aoga na valaaulia i latou e mafaufau i se taimi na auauna atu ai ma le alofa le Faaola i se tasi ona tusi lea e uiga i le ala e mafai ai ona latou alolofa ma auauna atu i se tagata o le aiga i le ala lenei po o se isi ala faaKeriso (tagai i le vaega 3 o le anomea mo sauniuniga). Valaaulia ni nai tagata aoga e faasoa mai mea na latou tusia. (Ia mafaufau foi e faasoa atu sau lava faataitaiga.)

Faaali atu fesili nei, ma valaaulia tamaiti aoga e tusifaamaumau o latou manatu e fesootai i fesili latou te manatu e sili ona talafeauga ia i latou:

• O le a faapefea ona e mulimuli i le faataitaiga ma aoaoga a le Tama Faalelagi i le tausiaina o au fanau i le taimi nei po o fanau i le lumanai i le alofa?

• O le a se auala e tasi faaKeriso e mafai ona e alofa ai ma auauna atu i se tei, ou matua, po o se isi tagata o le aiga i lenei vaiaso?

Mafaufau e faauma le vasega e ala i le valaaulia o se tagata aoga e faasoa mai lana molimau i le taua o le alofa i tagata o o tatou aiga po o le faasoaina o lau lava molimau i lenei mataupu faavae o le talalelei. Faamanatu i tagata aoga e tusa lava pe na faapefea ona tausia i latou, e mafai lava ona latou filifili e tausia a latou fanau i le alofa ma aoao i latou ia alolofa ma auauna atu i le tasi ma le isi.

Mo Le Isi Taimi

E mafai ona e fesili i tagata aoga i le faaiuga o le vasega pe o se savali mulimuli ane ia fesili nei, e mafaufau i ai a o latou sauniuni mo le vasega e sosoo ai:

• O a ni aafiaga faaleagaga na fesoasoani ou matua ia e mauaina a o e tuputupu ae? O a ni aafiaga faaleagaga o e faamoemoe ia i ai mo oe ma lau fanau i le lumanai?