Lesona 23 Anomea mo le Sauniuniga o le Vasega: Pe a Faatuai Faamanuiaga o Faaipoipoga e Faavavau po o Fanau
“Lesona 23 Anomea mo le Sauniuniga o le Vasega: Pe a Faatuai Faamanuiaga o Faaipoipoga e Faavavau po o Fanau,” Anomea a le Faiaoga O Le Aiga e Faavavau (2022)
“Lesona 23 Anomea mo le Sauniuniga o le Vasega,” Anomea a le Faiaoga O Le Aiga e Faavavau
Ata
o se talavou matua o loo tilotilo atu i le malumalu
Lesona 23 Anomea mo le Sauniuniga o le Vasega
Pe a Faatuai Faamanuiaga o le Faaipoipoga e Faavavau po o Fanau
E toatele tagata e oo i le faatuai i le mauaina o o latou manaoga amiotonu mo le faaipoipoga po o le fanau, ma o nei faatuai e mafai ona aumaia ai le lotovaivai, popole, po o le lototiga. A o e suesue i lenei anomea, mafaufau pe aisea e mafai ai ona tatou talitonu o le a faataunuu e le Alii Ana faamanuiaga folafolaina mo o tatou aiga e faavavau pe afai tatou te faamaoni ia te Ia. Mafaufau foi pe aisea e manaomia uma ai i tatou i le Ekalesia a le Faaola ma i le fuafuaga a le Atua, po o a lava tulaga o o tatou aiga.
Vaega 1
Ae faapefea pe afai e le tutusa o‘u tulaga ma tulaga o loo faamatalaina i le folafolaga i le aiga?
E aoao atu e taitai o le Ekalesia ia mataupu faavae o le olaga faaleaiga. Latou te iloaina foi e le o maua e tagata uma nei tulaga lelei. Mo se faataitaiga, i le folafolaga i le aiga, ua aoao mai perofeta e faapea o nisi o “tulaga e ono manaomia ai fetuunaiga faaletagata lava ia” i le faataunuuina o tiutetauave paia faaleaiga (“O Le Aiga: O Se Folafolaga i le Lalolagi,” ChurchofJesusChrist.org).
Na faailoa mai e Elder Neil L. Andersen o le Korama a Aposetolo e Toasefululua e faapea, o tagata faamaoni o le Ekalesia e oo i ni tulaga eseese faaleaiga:
Ata
Elder Neil L. Andersen
O loo i ai le toatele o tagata, talavou ma matutua, o ē lotonuu ma faamaoni i le talalelei a Iesu Keriso, e ui e le fetaui lelei o latou aafiaga o i ai i le taimi nei ma le folafolaga i le aiga: o fanau ua fesouā’ina olaga ona o le tete’a o matua; … o tamaitai ma alii ua tetea ua matuā faamanualia ona o le lē faamaoni o se toalua; o tane ma avā ua lē mafai ona maua ni fanau; … o tamaitai ma alii nofofua o ē, mo ni mafuaaga e tele, ua lē mafai ai ona faaipoipo. (“O Le Mata o le Faatuatua,” Liahona, Me 2019, 36)
Na aoao mai Peresitene M. Russell Ballard o le Korama a Aposetolo e Toasefululua:
Ata
Peresitene M. Russell Ballard
E silia ma le afa o tagata matutua i le Ekalesia i le taimi nei o fafine ua oti a latou tane, o e ua tatala faaipoipoga, pe e le’i faaipoipo lava. O loo taumanatunatu nisi e uiga i avanoa ma tulaga i le fuafuaga a le Atua ma i le Ekalesia. E tatau ona tatou malamalama o le ola e faavavau e le na o se fesili o le tulaga faalefaaipoipoga o i ai nei ae o le avea ma soo ma le “totoa i le molimau ia Iesu” [Mataupu Faavae ma Feagaiga 76:79; tagai foi Mataupu Faavae ma Feagaiga 121:29]. …
… O i latou uma e talia le meaalofa a le Faaola o le salamo ma ola ai i Ana poloaiga, o le a maua le ola faavavau, e ui ina latou te lei ausia ona uiga uma ma le atoatoaga i le olaga nei. (“Faamoemoe ia Keriso,” Liahona, Me 2021, 55)
Atonu e taumanatunatu nisi tagata pe aisea e faaauau ai pea e taitai o le Ekalesia ona aoao atu e uiga i tulaga lelei o le olaga faaleaiga ae o le toatele o tagata o le Ekalesia e le oo i nei tulaga matagofie.
Sa faasoa mai e Sister Sharon Eubank o le Au Peresitene Aoao o le Aualofa nisi o ona aafiaga ma malamalamaaga i le avea ai ma se tagata matua nofofua:
Ata
Sister Sharon Eubank
I le avea ai ma se tagata nofofua, ou te malamalama lelei i ai. E leai sau soatau; o le nofo i le lotu e faigata; o pati e mafai ona faatiga; e lagona e tagata o le aiga e mafai ona latou faasoa mai o latou manatu pe a leai se tasi e tatau ona fai atu se upu. …
O le taumafai e auai i se Ekalesia e taulai atu i aiga e mafai foi ona luitauina. Ae o le mea moni lava, o le toatele o tagata o le Ekalesia e le o ola i ni tulaga atoatoa faaleaiga. Ou te le mautinoa lava pe o i ai se tagata i se na aiga lelei atoatoa. Aisea la e tausisi ai pea le faamamafa? Ona o le aiga o lo tatou taunuuga lea, ma ua tatou i ai i lenei lalolagi e aoao ai i tomai o sootaga malolosi faaleaiga, e tusa lava po o le a lo tatou tulaga o i ai. (“A Letter to a Single Sister,” Ensign, Oke. 2019, 40)
Ata
aikona, mafaufau loloto
Mafaufau Loloto e Sauniuni ai mo le Vasega
O a ni auala e mafai ai ona tatou faatinoina le faatuatua ia Iesu Keriso ma Ana aoaoga i le aiga tusa lava pe le lelei tulaga o o tatou aiga?
Vaega 2
E mafai faapefea ona ou agai i luma i le faatuatua pe a faatuai faamanuiaga manaomia?
Sa malamalama Aperaamo ma Sara i le i ai i le tulaga o le tolopoina o nisi o faamanuiaga sa mananao i ai ae o isi e le faataunuuina i lenei olaga. Ina ua 75 tausaga o Aperaamo, sa leai se la fanau ma Sara (tagai Kenese 11:29–30; 12:4). Ae na folafola atu e le Alii ia te ia, “Ou te faia foi lau fanau e pei o le efuefu o le eleele” (Kenese 13:16). Sa folafola atu foi e le Alii o Aperaamo ma ana fanau o le a tuu atu i ai le nuu o Kanana o se tofi (tagai Kenese 17:8). Mulimuli ane, ina ua 100 tausaga o Aperaamo ma sa 90 tausaga o Sara, sa folafola atu ia i laua o le a fanauina e Sara se atalii e faaigoa ia Isaako (tagai Kenese 17:17, 19). E ui ina sa faataunuuina lenei folafolaga ma nisi na folafola atu ia i laua, ae o folafolaga a le Alii o le a la maua fanau e le mafaitaulia ma maua le nuu folafolaina sa lei faataunuuina i le soifuaga o Aperaamo ma Sara.
I le tusi a Eperu, sa ta‘ua ai e le Aposetolo o Paulo nei folafolaga ia Aperaamo ma Sara.
Ata
aikona, suesue
Suesue e Sauniuni ai mo le Vasega
Faitau le Eperu 11:8, 11–13, ma mafaufau po o a mea e mafai ona e aoao mai le faataitaiga a Aperaamo ma Sara e uiga i le faatinoina o le faatuatua ia Iesu Keriso pe a faatuai pe le faataunuuina faamanuiaga manaomia i lenei olaga.
Sa faamalamalama mai e Peresitene Dallin H. Oaks o le Au Peresitene Sili, “O le faatuatua o lona uiga o le faalagolago—faalagolago i le finagalo o le Atua, faalagolago i Lana ala o le faia o mea, ma faalagolago i Lana taimi faatulagaina” (“Timing,” Ensign, Oct. 2003, 12).
O le faatalitali i le Alii mo faamanuiaga tatou te mananao i ai e mafai ona tofotofoina ai lo tatou onosai ma le usiusitai. A o auauna ai o se Fitugafulu, sa aoao mai e Elder Spencer J. Condie:
Ata
Elder Spencer J. Condie
O nisi taimi, ona o lo tatou le onosai faalelalolagi, e mafai ai ona aluese la tatou vaai mai folafolaga taua a le Alii ma motusia ai lo tatou usiusitai mai le faataunuuina o nei folafolaga. (“Ia Maua Folafolaga Silisili Ese ma le Aoga,” Liahona, Nov. 2007, 17)
Na faapena foi ona aoao mai e Peresitene Ballard le mea lenei e uiga i le faatalitali i le Alii:
Ata
Peresitene M. Russell Ballard
O le faatalitali atu i le Alii e aofia ai le usiusitai faifaipea ma le agaigai i luma faaleagaga ia te Ia. O le faatalitali i le Alii e le aofia ai le faatalitali e aunoa ma se mea e fai. E le tatau lava ona e lagona faapei o la e te i totonu o se potu faatalitali . …
O le tuputupu ae patino e mafai e se tagata ona ausia i le taimi nei a o faatalitali ai i le Alii ma Ana folafolaga, o se elemene taua tele, ma le paia o Lana fuafuaga mo i tatou taitoatasi. … E faamamaluina e le Alii i latou o e auauna atu ma faatalitali ia te Ia i le onosai ma le faatuatua [tagai Isaia 64:4; Mataupu Faavae ma Feagaiga 133:45]. (”Faamoemoe ia Keriso,” 55)
Ata
aikona, tusi faamaumau
Faamaumau Ou Manatu
Tusifaamaumau aafiaga po o aoaoga ua mamanuina ai lou talitonuga o le a faataunuuina e le Alii Ana folafolaga e tusa lava pe faatuai faamanuiaga.
Vaega 3
E mafai faapefea ona ou saofaga i le Ekalesia a le Alii tusa lava po o a tulaga o lo‘u aiga?
O nisi tagata o le Ekalesia o o latou tulaga faaleaiga e le tutusa i le taimi nei ma tulaga o loo faamatalaina i le folafolaga i le aiga atonu e taumanatunatu ai pe faapefea ona latou ofi i le Ekalesia. Sa faatusatusa e le Aposetolo o Paulo le Ekalesia a Iesu Keriso i le tino faaletino e aoao ai i tatou pe aisea e manaomia ai tagata taitoatasi o le Ekalesia.
O o tatou tulaga tulagaese e mafai ona aumaia ai le taua ma le poto masani i o tatou aiga faaleuarota po o paranesi. Sa faamamafa mai e Peresitene Ballard:
Ata
Peresitene M. Russell Ballard
Aua lava nei galo o oe o se atalii/afafine o le Atua, lo tatou Tama Faavavau, nei ma le faavavau. E alofa o Ia ia te oe, ma e manao le Ekalesia ia te oe ma e manaomia oe. Ioe, matou te manaomia outou! Matou te manaomia o outou leo, taleni, agalelei, ma le amiotonu. (“Faamoemoe ia Keriso,” 55)
Sa aoao mai foi Elder Robert D. Hales o le Korama a Aposetolo e Toasefululua:
Ata
Elder Robert D. Hales
E mafai e soo se tasi o i tatou ona faaesea i tatou lava mai lenei aiga faaleuarota ona o o tatou eseesega. … Nai lo lena, ia tatou fetufaai ma isi a tatou meaalofa ma taleni ma aumaia ai le faamoemoe atoatoa lelei ia i latou, ma i le faia o lea mea o le a siitia ai o tatou lava agaga. (“Belonging to a Ward Family,” Ensign, Mar. 1996, 16)
Ata
aikona, mafaufau loloto
Mafaufau Loloto e Sauniuni ai mo le Vasega
O le a se mea e mafai ona ou faia ia malamalama atili ai i isi tagata o la‘u uarota po o le paranesi ma fesoasoani ia latou lagona le faatauaina ma le faaaofiaina? Afai ou te lagona e pei ou te le auai i le Ekalesia, o le a se mea e mafai ona ou faia e faataga ai le Faaola e fesoasoani ia ou lagona lo’u taua ma [i ai lo‘u] tulaga i Lana Ekalesia?
