Lesona 25 Anomea a le Faiaoga

Salamo ma le Faamagaloga i le Olaga Faaleaiga

E mafai ona tatou valaaulia le mana o le Alii e faamalolo ma faamalosia a tatou sootaga faaleaiga e ala i le faaaogaina o mataupu faavae o le salamo ma le faamagaloga. O lenei lesona o le a fesoasoani i tagata aoga ia malamalama ai i le ala e mafai ai e lo latou salamo ona faaleleia sootaga faaleaiga. O le a mafaufau foi tagata aoga pe faapefea ona latou maua le fesoasoani a le Alii e faamagalo ai tagata o le aiga o e atonu na faatausuai pe faatiga ia i latou.

Manatua: O nisi taimi o le tiga na faia e tagata o le aiga o se ituaiga o sauaga. O le faamalologa mai sauaga o le a talanoaina i le lesona e sosoo ai.

Fautuaga mo le Aoao Atu

Faaleleia o Lo Tatou Aoao Atu ma le Aoaoina

Taulai atu i mea e tatau ona oo i ai se tagata aoga ina ia atili ai ona liua loloto. E aoao tagata aoga ao latou auai ma le naunautai i le faagasologa o le aoaoina ma ola ai i le talalelei. A o e aoao atu, taulai atu i mea e manaomia ona oo i ai ma faia e au tagata aoga e valaaulia ai faaaliga patino ma faalolotoina ai le liuaina. A o faateleina lo latou malamalama i le talalelei ma ola e tusa ai ma mea ua latou iloa, o le a sili atu ona liua tagata aoga i le Faaola ma Lana talalelei.

O lo tatou salamo patino e mafai ona faaleleia ai sootaga faaleaiga.

Faaali atu faamatalaga nei i luga o le laupapa (mafaufau e fetuunai nei faamatalaga ina ia fetaui lelei ma manaoga o au tagata aoga):

1. E taua le taulai atu ia mautinoa e salamo soo isi tagata o le aiga.

2. Afai e sili atu ona sese se tagata o le aiga nai lo i tatou, e tatau ona tatou faatali mo lena tagata o le aiga e faatoese ma suia ae tatou te lei faia.

3. E faigofie lava i taimi uma ona salamo i auala tatou te ono faamanualia ai tagata o le aiga.

4. E le afaina le agaleaga i tagata o lo tatou aiga pe afai o loo latou taumafai e faatiga ia i tatou.

Amata le lesona e ala i le valaaulia o se tagata aoga e faitau leotele faamatalaga o i luga o le laupapa. Fai i le vasega e mafaufau le leoa pe moni pe sese ia faamatalaga taitasi (aua nei fai atu i tagata aoga e faasoa mai a latou tali). A uma ua lava se taimi, faamalamalama atu e sese faamatalaga uma.

• E faapefea ona e faasa‘oina nei faamatalaga taitasi ina ia moni?

• Aisea e mafai ai ona faigata ona salamo pe a tatou faatiga i tagata o le aiga? E mafai faapefea ona fesoasoani le Alii ia i tatou ia tatou taumafaiga e salamo?

E mafai ona e faaali atu se tasi o ata o le faataoto i le atalii faamaumau oa mai anomea mo sauniuniga ma fai i se tagata aoga e aotele mai le faataoto. Mafaufau e iloilo le Luka 15:17–24 ma fesili i le vasega po o a mataupu faavae na latou maua mai i lenei faataoto e uiga i le salamo i le olaga faaleaiga.

• O le a se mea e mafai ona tatou aoaoina e uiga i le Tama Faalelagi mai le tama i lenei faataoto? E mafai faapefea e lenei malamalama ona tosinaina le ala tatou te vaai atu ai i le salamo?

• O anafea na e vaaia ai se faaipoipoga po o se aiga ua faamanuiaina ona o le salamo o se tasi o ona tagata? (Faamanatu i tagata aoga ia aua nei faasoa maia ni mea e patino tele pe le faalauaiteleina.)

E mafai ona fesoasoani le Alii ia i tatou e faamagalo tagata o le aiga o e na faatiga pe faamanualia i tatou.

Valaaulia tagata aoga e mafaufau e uiga i se taimi atonu na faatausuaiina ai pe faatiga ai se tagata o le aiga ia i latou. E mafai foi ona e fai atu ia i latou e mafaufau loloto pe o le a le lelei na mafai ai ona latou faamagalo atu i lena tagata.

• Aisea e mafai ai i nisi taimi ona faigata ona faamagalo tagata o le aiga o e na faia ni mea sese ia i tatou?

Toe iloilo faatasi le Mataupu Faavae ma Feagaiga 64:8–11, ma fesili atu i le vasega po o a upumoni ua latou aoaoina mai aoaoga a le Alii e uiga i le faamagaloga. Faatasi ai ma upumoni ua faailoa mai e tagata aoga atonu o se tasi e pei o lenei: E manaomia e le Alii i tatou e faamagalo atu i tagata uma.

E mafai ona e valaaulia tagata aoga e filifili ni nai parakalafa po o faamatalaga mai taitai o le Ekalesia i le vaega 2 o anomea mo sauniuniga e iloilo puupuu. Ona fesili atu lea:

• E mafai faapefea e nei aoaoga ona fesoasoani i se tasi e faamagalo se tagata o le aiga na faia se mea sese ia te ia?

I le avea ai ma se vaega o le talanoaga, mafaufau e faaali atu le saunoaga a Elder Massimo De Feo mai le vaega 2 o anomea mo sauniuniga ma faitau faatasi i ai ma tagata aoga. E mafai ona e tuu atu i le vasega ni nai minute e mafaufau loloto ai i mea na faia e le Faaola mo i latou.

• E mafai faapefea e le manatuaina o le taulaga a le Faaola ona fesoasoani ia i tatou e faamagalo atu i isi?

Mafaufau e faaaoga le tala ia Iakopo ma Esau e fesoasoani ai i tagata aoga ia loloto lo latou malamalama i le faamagaloga i le olaga faaleaiga, pe fatu sau oe lava tulaga faataitai e mafai ona fesoasoani ai i tagata aoga e mafaufau i lagona, popolega, ma filifiliga e fesootai ma le faaleleiga ma se tagata o le aiga sa tatou faatausuai i ai pe na faatiga ia i tatou.

Afai e mafai, faaali atu le ata lenei:

O Le Tofi o Esau, saunia e Glen S. Hopkinson

Fai atu i tagata aoga e faamatala mai mea ua latou iloa e uiga i lenei tala ia Iakopo ma Esau ma le mea na aafia ai le sootaga i le va o nei uso. Pe a manaomia, e mafai ona e faaopoopo atu i le malamalama o tagata aoga e ala i le faasoa mai o nisi o faamatalaga nei:

Sa fanaua e Isaako ma Repeka le masaga o Esau ma Iakopo. O Esau o le ulumatua ma o lea sa i ai i se tulaga e avea ai ma atalii o le tofi ulumatua. O lona uiga o le a ia mautofi i le laueleele o lona tama, “faaluaina meatotino a lona tama,” ma le pule e pulefaamalumalu ai o se taitai faaleagaga o le aiga i le mavae ai o le maliu o lona tama (Bible Dictionary, “Firstborn”; tagai foi Bible Dictionary, “Birthright”).

Peitai, sa faatau atu e Esau le tofi ulumatua ia Iakopo mo sina meaai (o se ipu supo po o se sikiū). Mulimuli ane, ina ua manao Isaako e faaee atu le faamanuiaga o le tofi ulumatua, sa taumafai Esau e maua e ui lava sa ia foaia ese atu. Sa faasalavei Repeka, ma sa maua e Iakopo le faamanuiaga. O le taunuuga, sa ita Esau ia Iakopo ma tautino atu e fasioti o ia. Sa auina atu e Repeka ma Isaako ia Iakopo e nonofo ma le uso o lona tama o Lapana. Sa faaipoipo Iakopo ma maua ai ni fanau. Ina ua mavae le 20 tausaga, sa faatonuina e le Alii ia Iakopo e toe foi atu i lona nuu moni. Sa fefe Iakopo i le mea e ono fai e Esau ia te ia ma lona aiga ina ua ia iloa ua o mai Esau ma ni alii e 400 e faafetaiai ia i latou. Sa faatonuina e Iakopo ana auauna e vaevae se aofaiga tele o ana manu i ni vaega eseese ma ofo atu na mea o ni meaalofa ia Esau a o latalata atu o ia. (Tagai i le Kenese 25–32.)

Mafaufau e vaevae le vasega taitoalua po o ni vaega toalaiti. Valaaulia tagata aoga e faitau le leoa le Kenese 33:1–11, ma vaavaai po o le a le mea na tupu ina ua feiloai Iakopo ma Esau. Fai atu i tagata aoga taitasi e filifili le vaaiga a le o Iakopo po o Esau ma vaai faalemafaufau i mea na tutupu o loo tusia i nei fuaiupu mai lena vaaiga.

A uma ua lava se taimi, fai atu i tagata aoga e talanoaina fesili nei ma a latou paga po o vaega, e faaaoga ai mea sa latou aoaoina a o mafaufauina lenei toefaatasiga mai le vaaiga a le o Iakopo po o Esau:

• O a ni ou mafaufauga po o ni lagona atonu na i ai a o e latalata atu ma talanoa ma lou uso?

• O le a le mea na e faia e toe faalelei ai ma lou uso? O le a se mataupu faavae e mafai ona e aoaoina mai lenei mea?

A uma loa ona fai e tagata aoga lenei gaoioiga, mafaufau e talanoaina faatasi o se vasega nisi o fesili nei:

• O a mataupu faavae ua e vaaia i faataitaiga a Iakopo ma Esau? O a ni auala e te vaaia ai le aao o le Alii i lenei tala?

• Na faapefea ona fesoasoani le Atua ia te oe e amatamea i le foia o se feteenaiga po o le faamagalo atu o se tasi i lou aiga? (Faamanatu i ai e aua nei faasoa maia ni mea e patino a’ia’i.)

Valaaulia tagata aoga e mafaufau le leoa pe faapefea ona finagalo le Tama Faalelagi ia i latou e faaaoga mataupu faavae o le salamo po o le faamagaloga i a latou sootaga faaleaiga i lenei taimi. Fautuaina i latou e faatino ia uunaiga latou te maua. E mafai ona e tuu atu i tagata aoga se taimi e molimau atu ai i le taua o le salamo ma le faamagaloga i totonu o le aiga.

Mo Le Isi Taimi

Faamalamalama atu o nisi tagata, i se tulaga faanoanoa, ua filifili e sauaina isi. Fautuaina le vasega e suesue ma le faaeteete i anomea mo sauniuniga mo le lesona e sosoo ai. Valaaulia i latou e mafaufau pe faapefea, faatasi ai ma le fesoasoani a le Faaola, ona latou faamaloloina pe fesoasoani i isi ia faamaloloina mai aafiaga o le sauaina.