Lesona 22 Anomea a le Faiaoga

Tausiaina o Fanau i le Amiotonu

“Ua i ai i matua se tiute paia e tausia a latou fanau i le … amiotonu” (“O Le Aiga: O Se Folafolaga i le Lalolagi,” ChurchofJesusChrist.org). O le a fesoasoani lenei lesona i tagata aoga ia malamalama i le mea e mafai ona latou fai e fesoasoani ai ia latou fanau ia aoao e uiga i le Faaola ma Lana talalelei. O le a vaili foi e tagata aoga le ala e fesoasoani ai i e pele e se ese mai le ala o le talalelei.

Fautuaga mo le Aoao Atu

Faaleleia o Lo Tatou Aoao Atu ma le Aoaoina

Faaaogaina o mataupu aoaoina. A o e saunia lesona taitasi, ia toeiloilo ma le agaga tatalo ia anomea a le faiaoga ma le anomea mo sauniuniga. A e faia, e mafai e le Agaga Paia ona fesoasoani ia te oe e fetuunai le lesona i manaoga o tagata aoga. E mafai ona e filifili e faaaoga ia fautuaga uma po o ni nai fautuaga faafaiaoga, pe e mafai foi ona e aoteleina ni nai vaega o le lesona ma faapipii ni mea e fautuaina mai e tusa ma manaoga ma tulaga o au tagata aoga.

Ua poloaiina matua e le Alii ia tausi a’e a latou fanau i le malamalama ma le upumoni.

Mafaufau e amata le lesona i le valaaulia o tagata aoga e tomanatu i tosinaga i o tatou taimi ia e faigata ai ona tausia fanau ia malolosi faaleagaga. Fai i ni nai tagata aoga e faasoa mai o latou mafaufauga.

Valaaulia tagata aoga e toeiloilo le Mataupu Faavae ma Feagaiga 68:25, 28 ma le 93:40 ma ia tusia se fuaiupu e aotele ai, ia latou lava upu mea ua faamoemoeina e le Tama Faalelagi mai matua. Valaaulia ni nai tagata aoga e faasoa mai mea na latou tusia. A uma ona faasoa mai e tagata aoga a latou aotelega, faaali le upumoni lea mai le folafolaga i le aiga: Ua i ai i matua se tiute paia e tausia a latou fanau i le amiotonu.

• Aisea e taua ai mo matua ona avea ma “uluai faiaoga o le talalelei ma faataitaiga” i a latou fanau? (Tad R. Callister, “O Matua: O Uluai Faiaoga o le Talalelei mo a Latou Fanau,” Liahona, Nov. 2014, 32). (Atonu e te manao e valaaulia tamaiti aoga e toe iloilo saunoaga a Peresitene Ted R. Callister ma Peresitene Joy D. Jones i le vaega 2 o anomea mo sauniuniga.)

• O a ni auala o taumafai ai Satani e faasalaveia matua mai lenei tiute paia? (Atonu e te manao e ta’ua nisi o auala o loo lisi atu i parakalafa mulimuli e lua o le vaega “O Osofaiga a le Fili i le Aiga” i le tusiga “The Sacred Responsibilities of Parenthood” saunia e Peresitene M. Russell Ballard o le Korama a Aposetolo e Toasefululua [Ensign, Mar. 2006, 26–33].)

• O a mea e mafai e aiga ona fai ia faamanuiaina ai i le faia pea lava o tatalo faaleaiga, suesue faaleaiga i tusitusiga paia, ma afiafi faaleaiga?

Toeiloilo faatasi le saunoaga a Sister Cheryl A. Esplin i le vaega 1 o anomea mo sauniuniga.

• E mafai faapefea e matua ona fesoasoani ia latou fanau “ia maua le aoaoga faavae i o latou loto i se ala e avea ai o se vaega o o latou lava tagata”? (“O Le Aoao Atu o a Tatou Fanau ia Malamalama,” Liahona, Me 2012, 10). E mafai faapefea e matua ona fesoasoani i a latou fanau ia lagona ma aoao mai le Agaga Paia? (I le avea ai o se vaega o lenei talanoaga, e mafai ona e fuafua e faaali ma talanoaina le vitio “O Le Musika o le Talalelei” [5:43], lea e aofia ai i le vaega o le “E te Fia Aoao Atili?” o le anomea mo sauniuniga.)

• Pe na faapefea e se matua po o se na avea ma ou matua, i upu po o faataitaiga, ona fesoasoani ia te oe ia e iloa ma mulimuli i le Faaola? (Fuafua e toeiloilo faatasi le 2 Nifae 25:26 ma saunoaga a Elder Neil L. Andersen ma Peresitene Joy D. Jones i le vaega 2 o le anomea mo sauniuniga.)

Valaaulia tamaiti aoga e toeiloilo mea sa latou tusia e tali ai i le uunaiga i le “Tusifaamaumau Ou Mafaufauga” faamanatu o loo i le vaega 2 o le anomea mo le sauniuniga. Fesili i nai tagata aoga e lagonaina le to’alelei e faasoa mai ai mea sa latou tusia ina ia latou faia. Fautuaina tagata aoga e tusifamaumau soo se mafaufauga faaopoopo e fesootai i ai po o ni o latou uunaiga o i ai i le vasega.

E tatau ona tatou alolofa ma tatalo mo tagata o aiga ua tuua le ala o le talalelei.

Valaaulia tagata aoga e mafaufau pe o a ni o latou lagona pe afai e filifili se tasi o a latou fanau e tuua le ala o le talalelei. Afai e mafai, faaali le vitio o le Tusi a Mamona “Ua Valaaulia e Liae Lona Aiga ia Aai i le Fua o le Laau (1 Nifae 8:12--18)” (3:23). (Afai e le o mafai ona e faaalia le vitio, faali le ata o loo avatu faatasi ai ma faitau fatasi le 1 Nifae 8:12–18.) Valaaulia tagata aoga e mafaufau pe mata o a ni lagona o Liae e uiga i tali eseese a tagata o lona aiga i lana valaaulia e aai i le fua o le laau o le ola. Fai i ni nai tagata aoga e faasoa mai o latou mafaufauga.

O Liae ma le fua o le laau o le ola

• O a isi faataitaiga mai tusitusiga paia o matua amiotonu na se ese se tamaitiiti po o le fanau mai le ala o le talalelei? O le a se mea e mafai ona e aoao mai tali a nei matua e mafai ona taiala ai oe i le tali atu i tagata o le aiga atonu e se ese?

Toeiloilo faatasi le saunoaga a Elder Ulissess Soares i le vaega 3 o anomea mo sauniuniga.

• O le a se mea e mafai ona tatou aoao mai ia Elder Soares e uiga i le ala e tali atu ai pe a liliu ese se tagata o le aiga mai le ala o le talalelei? (E tatau ona faailoa mai e tagata aoga se mataupu faavae e talitutusa ma lenei: Afai e liliu ese se tagata o le aiga mai le ala o le talalelei, e tatau ona faaauau pea ona alolofa ma tatalo mo ia ma saili le fesoasoani a le Alii.)

• O anafea na e vaaia ai tagata o le aiga o faaaoga aoaoga a Elder Soares? O a aafiaga na i ai i a latou taga?

Mafaufau e faitau le saunoaga lenei a Peresitene Henry B. Eyring o le Au Peresitene Sili:

Peresitene Henry B. Eyring

Mo nisi, … o le olioli e faavavau e ono foliga mai o sina atagia tainane foi o se faamoemoega e galo atu. Atonu na fai e matua, fanau, uso, ma tuafafine ni filifiliga e foliga mai e faaleaoga ai i latou mo le ola e faavavau. …

Sa tuuina mai e se perofeta a le Atua ia te a’u le fautuaga ua aumai ai ia te a’u le toafilemu. Sa ou popole ona atonu o le a le mafai ai e lo matou aiga ona faatasia e faavavau ona o filifiliga a isi. Sa ia saunoa mai, “Ua e popole i le faafitauli sese. Tau lava o lou ola agavaa mo le malo selesitila, ma o le a sili atu le matagofie o le faatulagaga o le aiga nai lo le mea e mafai ona e manatu i ai.” (“The Hope of Eternal Family Love,” Ensign, Aug. 2016, 4, 5)

• E mafai faapefea e lenei aoaoga ona aumaia le faamoemoe ma le mafanafana ia i latou ua se ese a latou pele mai le ala o le talalelei?

Mafaufau e faaiu le lesona i le molimau atu e naunau le Alii e fesoasoani ia i tatou a o tatou taumafai malosi e tausia a tatou fanau i le amiotonu.

Mo Le Isi Taimi

Mafaufau e faaali le saunoaga lenei mai ia Elder Andersen:

Elder Neil L. Andersen

Ua matua toatele naua, le autalavou ma le aumatutua, o e lotonuu ma faamaoni i le talalelei a Iesu Keriso, e ui e le fetaui lelei o latou lava aafiaga i le taimi nei i totonu o le folafolaga i le aiga. (“O Le Mata o le Faatuatua,” Liahona, Me 2019, 36.)

Valaaulia tagata aoga, a o latou suesueina le anomea mo le lesona e sosoo ai, e vaavaai mo aoaoga e mafai ona manuia ai aiga po o tagata taitasi latou te iloa, o aafiaga o o latou aiga i le taimi nei atonu e le o le mea lea sa latou faamoemoe i ai.