Lesona 20 Anomea mo le Sauniuniga o le Vasega: O Tiutetauave Paia o Tama
“Lesona 20 Anomea mo le Sauniuniga o le Vasega: O Tiutetauave Paia o Tama,” Anomea a le Faiaoga O Le Aiga e Faavavau (2022)
“Lesona 20 Anomea mo le Sauniuniga o le Vasega,” Anomea a le Faiaoga O Le Aiga e Faavavau
Ata
o se tamā ma lona faletua ma atalii
Lesona 20 Anomea mo le Sauniuniga o le Vasega
O Tiutetauave Paia o Tama
Ua to mai e le Tama Faalelagi i Ona atalii ia tiutetauave “e pulefaamalumalu i o latou aiga i le alofa ma le amiotonu ma … tuuina atu mea e manaomia o le olaga ma le puipuiga mo o latou aiga” (“O Le Aiga: O Se Folafolaga i le Lalolagi,” ChurchofJesusChrist.org). A o e suesueina lenei lesona, mafaufau pe na faapefea ona faamanuiaina oe e tamā ma isi alii ua saili e faataunuu nei tiutetauave paia.
Manatua I le lesona lenei, o le a tatou taulai i le tiutetauave e puipui. O autu o le pulefaamalumalu ma le saunia ma tuuina atu sa talanoaina i lesona ua mavae.
Vaega 1
E mafai faapefea e alii ona mamanu a latou taumafaiga o ni tamā, e pei o le Tama Faalelagi ma Iesu Keriso?
A o auauna ai i le Au Peresitene aoao o le Aualofa, sa saunoa ai Peresitene Linda K. Burton e uiga i nisi o luitau e feagai ma alii:
Ata
Peresitene Linda K. Burton
Ai se faigata, i le tulaga sili, mo alii o le feagaiga ona ola i se lalolagi e le gata ina le faatauaina o latou matafaioi paia ma tiutetauave ae o loo auina atu ai foi ni savali sese e uiga i le avea ai ma se “alii moni.” O se tasi savali sese o le “O mea uma e faatatau ia te a’u.” I le isi itu, o loo i ai ni savali faamaasiasi ma faatauemu faapea e le o toe manaomia ni tane ma ni tama. Ou te aioi atu ia te outou e aua nei faalogo i pepelo a Satani! Ua uma ona ia aveesea lona avanoa paia o le avea ma se tane po o se tama. Talu ai e lotoleaga o ia ia i latou o e ua maua matafaioi paia na te le mafai ona ausia, ua ia naunau ai ina ia “pagatia tagata uma e pei o ia lava” [2 Nifae 2:27]! (“O Le A Tatou O Ae Faatasi i Luga,” Liahona, Me 2015, 30)
E mafai ona tatou tatalia feau sese e uiga i le tulaga faatama e ala i le vaavaai atu i le Tama Faalelagi o le faataitaiga atoatoa o se tama amiotonu. Na aoao mai Elder D. Todd Christofferson o le Korama a Aposetolo e Toasefululua:
Ata
Elder D. Todd Christofferson
O le faataitaiga sili ma paia o le tulaga faatamā o lo tatou Tama Faalelagi lea. O Ona uiga taua e aofia ai le agalelei ma le alofa atoatoa. O Lana galuega ma le mamalu o le atinaeina, fiafia, ma le ola e faavavau o Ana fanau [tagai i le Mose 1:39]. E leai se mea i lenei lalolagi pau e mafai e tamā ona maua e faatusatusa i le Mamalu o i Luga, ae o le mea sili o loo latou taumafai e faataitai ia te Ia, ma galulue i Lana galuega. Ua faamamaluina i latou i se talitonuga ofoofogia ma le faamaoni. (“Tama,” Liahona, Me 2016, 94)
Ua tatou aoaoina foi ia mataupu faavae o tama amiotonu mai le faataitaiga a Iesu Keriso. Pe a tatou toefanauina faaleagaga, e avea o Ia ma Tama o lo tatou ola fou (tagai i le Mosaea 5:7; Eteru 3:14; Mataupu Faavae ma Feagaiga 25:1).
Ata
aikona, suesue
Suesue e Sauniuni ai mo le Vasega
I le taimi o Lana misiona i le olaga nei, sa aoao atu ai e le Faaola Ona soo e uiga i Lana matafaioi o le Leoleo Mamoe Lelei. Faitau le Ioane 10:11–15, ma mafaufau pe mafai faapefea e le faataitaitaiga a le Faaola o le Leoleo Mamoe Lelei ona faatusatusa i taumafaiga a se tama amiotonu i se aiga.
Saili mo se mau po o se tala o loo aoao mai ai mataupu faavae o se tama amiotonu mai le faataitaiga a le Tama Faalelagi po o Iesu Keriso. Tusifaamaumau ia mataupu faavae e te mauaina, ma tusi pe mafai faapefea e alii ona faaaoga nei mataupu faavae i o tatou taimi. Ia saunia e faasoa atu ou mafaufauga i le vasega.
Vaega 2
E mafai faapefea e le alofa ma le i ai atoa ona fesoasoani i tama e puipuia o latou aiga?
Na aoao mai Peresitene M. Russell Ballard o le Korama a Aposetolo e Toasefululua e faapea, o le tiutetauave o se tama e puipuia lona aiga e aofia ai le puipuiga faaletino ma le faaleagaga.
Ata
Peresitene M. Russell Ballard
Ua faamoemoeina tama e le Atua ma Ana perofeta e le gata ina saunia mea mo o latou aiga ae ia puipuia foi i latou. Ua anoanoai mea matautia o ituaiga eseese i le lalolagi o loo tatou ola ai nei. E taua le puipuiga faaletino mai mala matautia faalenatura po o mea e fai e tagata. O loo siomia foi i tatou e mea matautia mo le tauleleia, e faafetaiaia ai a tatou fanau i o latou muai tausaga. E i ai le matafaioi taua a tama i le puipuia o fanau mai na mailei. (“The Sacred Responsibilities of Parenthood,” Ensign, Mar. 2006, 30)
E faaopoopo i auala e mafai e tama ona puipuia ai a latou fanau, na aoao mai Peresitene Howard W. Hunter:
Ata
Peresitene Howard W. Hunter
O se tama amiotonu e puipuia lana fanau i lona taimi ma le i ai i a latou gaoioiga ma tiutetauave faaleagafesootai, faaleaoaoga, ma faaleagaga. O le faailoa atu ma le agalelei o le alofa ma le faamemelo i le fanau, o le tiutetauave o le tama faapei foi o le tina. Ta’u atu i lau fanau e te alofa ia te i latou. (“Being a Righteous Husband and Father,” Ensign, Nov. 1994, 51)
Matamata le vitio o le “Father’s Day” (2:30), ma mafaufau pe faapefea e se tama ona puipui lana fanau e ala i le faia o mea o loo faaalia i le vitio.
O le avea o se tama e alofa ma i ai atoatoa e manaomia ai se taumafaiga ma le loto ma le faifai pea. Mafaufau i mea e mafai ona e aoao mai le faataitaiga lenei a Peresitene Russell M. Nelson:
Ata
Peresitene Russell M. Nelson
O la’u galuega o le lagolago o lo’u toalua ma la’u fanau, ae le o le faafeagai. ’ A e i ai i le fale, e te i ai i le fale. Tuu ai pea gaosa o le aso latou. Avatu ia i latou le 100 pasene o lau gauai pe a e i ai iina. E masani ona ou fai ifo ia te au lava, “Aua lava ne’i e savali atu i totonu o lena fale, Russell, sei vagana ua mafai ona e faamanuiaina olaga o lau fanau ma lou toalua.” (I le Vivian S. Lee, “Elder Russell M. Nelson, M.D., ’47,” Good Notes (blog), University of Utah Health, Sept. 12, 2014, uofuhealth.utah.edu/notes)
O se tosinaga lelei a se tama i lana fanau, e mafai ona i ai ni aafiaga ofoofogia i lo latou atinaega. Mo se faataitaiga ua faaalia i sailiiliga e faapea o se tama alofa ma le auai e mafai ona:
Faaosofia le atinaega o le faaaloalo ia te oe lava, amio pulea, onosaia le popolevale, ma lagona o itupa (o i, ua faauigaina, o le itupa faapaiolosi na fanau mai ai) i le lotoifale o ona atalii ma afafine.
Faateleina avanoa o lana fanau e malupuipuia ai faalelagona ma le talitonu mautinoa ma fatuina sootaga sili atu ona lelei ma isi.
Faaitiitia le tulai mai o le mativa o le tamaitiiti, solitulafono, ma le faaaoga sese o fualaau oona. (Tagai i le James E. Faust, “Fathers, Mothers, Marriage,” Ensign, Aug. 2004, 3–7; Sarah Keenan, “Elephants, Fathers, and Families,” Ensign, Sept. 2018, 54–58; tagai foi i mau faasino o loo ta’ua i nei tala.)
O le tosinaga puipui a se tama o se faamalo mamana lea i le tosinaga taua a se tina. I le avea ai o se paaga tutusa i le faaipoipoga, e fefaasoaai e ava ma tina i le tiutetauave e puipuia o latou aiga. E mafai ona galulue tane ma ava ma fefautuaai faatasi a o latou faataunuuina lenei tiute paia.
O le matafaioi ma le tiutetauave paia o le avea ma tama e puipui, e faatatau i atalii uma o le Tama Faalelagi i le mana o lo latou natura ma le taunuuga paia e faavavau. E ui ina muai faataunuu e alii lenei tiutetauave i totonu o o latou aiga patino, e mafai foi ona latou faataunuuina lenei tiutetauave i isi nofoaga. Mafaufau i faataitaiga a Ietero ma lona atalii faaletulafono o Mose (tagai i le Esoto 18) ma Helamana ma le autau talavou (tagai i le Alema 56–57). O a isi faataitaiga faatusipaia e mafai ona e mafaufau i ai?
Ata
aikona, mafaufau loloto
Mafaufau Loloto i Tapenaga mo le Vasega
O a ni auala ua faamanuiaina ai oe ma puipuia e le alofa ma le auai ai o se tama amiotonu po o se ua avea ma tama i lou olaga?
Vaega 3
E mafai faapefea ona fesoasoani faaaliga paia ma le mana o le perisitua i tama e puipuia o latou aiga?
Mai se aafiaga o Iosefa i Nasareta, e mafai ona aoao mai ai se mataupu faavae taua e uiga i le ala e puipuia ai o tatou aiga.
Ata
aikona, suesue
Suesue e Sauniuni ai mo le Vasega
Faitau le Mataio 2:13–15, ma vaavaai po o le a le mea na fesoasoani ia Iosefa e puipuia ai le tamaitiiti o Keriso ma Maria mai tulaga matautia.
E mafai foi faapena ona fesoasoani faaaliga i tama i o tatou taimi e puipuia ma faamanuia o latou aiga. E pei ona sa fautua mai Peresitene Ballard, “E ao i tama ona saili e le aunoa mo le taitaiga mai le Agaga Paia ina ia latou iloa ai le mea e fai, le mea e tautala atu ai, ma iloa foi le mea e aua nei faia ma le mea e aua nei tautala atu ai” (“O Tiutetauave Paia o le Avea ma Matua,” 30).
O alii o ē o ni soo tausi feagaiga o Iesu Keriso, ua i ai se isi meaalofa paia e mafai ona latou faaaogaina e puipuia ai o latou aiga. I le talanoa ai i alii, na aoao atu ai e Peresitene Boyd K. Packer o le Korama a Aposetolo e Toasefululua e uiga i lenei meaalofa:
Ata
Peresitene Boyd K. Packer
Ua ia te oe le mana o le perisitua ua tuusao mai le Alii e puipui ai lou aiga. O le a i ai taimi e na o le pau lava le mea e tulai atu e fai ma talipupuni i le va o lou aiga ma mea faalavefau a le fili, o le mana lena. (“O Le Mana o le Perisitua,” Liahona, Me 2010, 9)
Na aoao atu e Peresitene Nelson ia alii i le ala e mafai ona latou faateleina le mana o lo latou perisitua e puipuia ai o latou aiga:
Ata
Peresitene Russell M. Nelson
Ia i ai lou taulaiga i le salamo i aso taitasi ia matuā taua i lou olaga lea e mafai ona e faaaogaina ai le perisitua i le mana sili atu nai lo se isi lava taimi muamua. Ua na o le pau lava lenei o le auala o le a e tausia ai oe lava ia ma lou aiga ia saogalemu faaleagaga i aso luitauina o i luma atu. (“E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 69).
