Inisitituti
Lesona 19 Anomea mo le Sauniuniga o le Vasega: O Tiutetauave Paia o Tina

“Lesona 19 Anomea mo le Sauniuniga o le Vasega: O Tiutetauave Paia o Tina,” Anomea a le Faiaoga O Le Aiga e Faavavau (2022)

“Lesona 19 Anomea mo le Sauniuniga o le Vasega,” Anomea a le Faiaoga O Le Aiga e Faavavau

Ata
o se tina o loo fusi lana pepe

Lesona 19 Anomea mo Sauniuniga o le Vasega

O Tiutetauave Paia o Tina

Na matauina e Peresitene Russell M. Nelson: “O le a le mafai ona fua le faatosinaga a tamaitai [tausi feagaiga], e le gata i aiga ae faapea i le Ekalesia a le Alii, o ni ava, tina, ma tinamatutua; o ni tuafafine ma ni uso o tina po o tuafafine o tama; o ni faiaoga ma taitai; aemaise ai o ni faataitaiga aupito silisili ma ē puipuia ma le faamaoni le faatuatuaga” (“O Se Talosaga i O’u Tuafafine,” Liahona, Nov. 2015, 95–96). Aʻo e suesueina lenei anomea, mafaufau e uiga i le tosinaga a tamaitai amiotonu i lou olaga.

Vaega 1

E faapefea ona faatatau le matafaioi o le tulaga faatinā i tamaitai uma lava?

O le tulaga faatinā e faavavau lona natura. I le lalolagi, o le tulaga faatina sa ogatasi ma le tulaga faatamaitai talu mai le foafoaina o Eva: “Sa faaigoa e Atamu lana ava o Eva, aua o ia o le tinā o tagata ola uma; ona sa faapea ona faaigoa e Aʼu, o le Alii le Atua, le uluai fafine o fafine uma, e toatele” (Mose 4:26).

Mafaufau pe faapefea ona faatatau le tulaga faatina i tamaitai uma a o e faitau i le saunoaga lenei a Sister Sheri L. Dew, o se sa avea ma fesoasoani i le Au Peresitene Aoao o le Aualofa:

Ata
Sister Sheri L. Dew

A o tatou tau mafaufau e faauiga le tulaga faatina i le na o le fanauina o fanau, ae i le gagana a le Alii, o le upu tina e tele atufola o faauigaga. Mai upu uma sa mafai ona latou filifilia e faauiga ai lana matafaioi ma lona taua, na taufai faaigoa e le Atua le Tama ma Atamu o Eva “o le tina o tagata ola uma” [Mose 4:26]---ma sa la faia a o lei fanauina e ia se fanau. … O le tulaga faatina o se mea e sili atu nai le fanauina o fanau, e ui o le na lava. O le fatu lea o le avea ai o i tatou o ni tamaitai. O loo faamalamalama mai ai lo tatou faasinomaga moni, lo tatou tulaga ma le natura paia, ma uiga fa’a-natura ma uiga tulaga ese na tuuina mai e lo tatou Tama ia i tatou. …

I le avea ai o ni afafine o lo tatou Tama Faalelagi, ma le avea ai ma ni tama teine a Eva, o i tatou uma lava o ni tina ma ua leva ona avea i tatou ma tina. (“Are We Not All Mothers?,” Ensign, Nov. 2001, 96, 97)

Ata
o se tamaitai o loo ataata
Ata
aikona, mafaufau loloto

Mafaufau Loloto i Tapenaga mo le Vasega

Na aoao mai Peresitene Nelson e faapea o tamaitai “uma o se tina e ala i le mana o lona taunuuga e faavavau” (“Auai o Tuafafine i le Faapotopotoina o Isaraelu,” Liahona, Nov. 2018, 68). Mafaufau loloto pe o le a le uiga o lenei faamatalaga mo oe ma tamaitai i lou olaga.

Vaega 2

E faapefea ona fesoasoani le Tama Faalelagi i tamaitai e faataunuu lo latou tiutetauave paia e faafailele?

Na tofia e lo tatou Tama Faalelagi ia tina ia “muai nafa ma le faafaileleina o a latou fanau“ (“O Le Aiga: O Se Folafolaga i le Lalolagi,” ChurchofJesusChrist.org). Na faamalamalama mai e Peresitene Susan W. Tanner, o le sa avea ma Peresitene Aoao o Tamaitai Talavou le uiga o le faafailele:

Ata
Peresitene Susan W. Tanner

O le faafailele o le aoao atu lea, o le uunaia o le atinaega, o le faalauiloa o le tuputupu ae, o le fafaga, ma faapelepele. O ai se o le a le alaga i le olioli i le tuuina i ai o sea matafaioi faamanuiaina? (“E Fiafia Lo’u Loto i Mea a le Alii,” Liahona, Me 2008, 82)

Ua faamanuiaina e le Tama Faalelagi Ona afafine ʼi se mana i totonu e alolofa ai ma faafailele,ʼ lea e mafai ona fesoasoani i tamaitai e faataunuu lenei tiutetauave faatosina ma le paia (O Afafine i Lo’u Malo: O Le Talafaasolopito ma le Galuega a le Aualofa [2011], 171).

Na aoao mai e Sister Neill F. Marriott, o le sa avea ma fesoasoani i le Au Peresitene Aoao o Tamaitai Talavou e faapea, o le a fesoasoani le Tama Faalelagi i Ona afafine i a latou taumafaiga e faafailele isi:

Ata
Sister Neill F. Marriott

Uso e, na tatou o mai uma i le lalolagi ma … meaalofa o le tuu atu o le ola, faafailele, faatinā aua o le fuafuaga lena a le Atua. …

A tatou fesili ia i tatou lava, “Se a se mea tatou te faia?” ia tatou mafaufau loloto i le fesili lenei: “O le a se mea o loo faia pea lava pea e le Faaola?” Na te faafailele. Na te foafoaina. Na te uunaia le tuputupu ae ma le lelei. …

… A tatou ole atu i le Tama i le Lagi ia faia i tatou ma e e fausiaina Lona malo, o le a tafe mai Lona mana i totonu o i tatou, ma o le a tatou iloa le ala e faafailele ai, ma iu ai ina avea e faapei o o tatou matua faalelagi. (“O Le A Se Mea a Matou Faia?,” Liahona, Me 2016, 11, 12)

Na aoao mai Peresitene Henry B. Eyring o le Au Peresitene Sili, e uiga i meaalofa faaopoopo ua tuuina mai e le Tama Faalelagi i tamaitai e fesoasoani ai ia te i latou e faataunuu lo latou valaauga paia o le faafailele:

Ata
Peresitene Henry B. Eyring

I le avea ai ma afafine o le Atua, ua ia te outou se malosiaga masani ma le maoae e lagona ai manaoga o isi ma alolofa atu ai. O lena mea, o le a sili atu ai ona e gauai atu i musumusuga a le Agaga. Ona mafai lea ona taialaina e le Agaga mea e te mafaufau i ai, mea e te tautala ai, ma mea e te faia e faafailele ai tagata ina ia mafai ai ona sasaa mai e le Alii le malamalama, upumoni, ma le lototoa i luga o i latou. (““O Tamaitai ma le Aoaoina o le Talalelei i le Aiga,” Liahona, Nov. 2018, 59)

Ata
o se tina o loo tatalo faatasi ma lana tama tama.

Atonu e popole nisi tamaitai e faapea, latou te le o lilifa atu i le faafailelega. E faapei o meaalofa uma a le Atua, o le faafailele e manaomia ai le faataitai ma le fesoasoani mai le lagi e atiae ai ma faaaoga tatau. O Iesu Keriso o le faataitaiga atoa o le faafailele. E faapei ona sa ia faaalia, o le faafailele e le tutusa pea i tulaga uma. E alofa mutimutivale ma mauai o Ia a o fesoasoani i isi ia tuputupu ae.

Ata
aikona, suesue

Suesue e Sauniuni ai mo le Vasega

Faatasi ai ma le fesoasoani a le Agaga Paia, e mafai e tamaitai (ma alii) ona aoao e faafailele e faapei ona faia e le Faaola. Filifili se tasi pe lua o fuaitau nei e maua ai faataitaiga o le faafaileleina mai le soifuaga o le Faaola. Vaavaai mo mea e mafai ona e aoao mai ia te Ia e uiga i le faafaileleina.

O a isi faataitaiga a le Faaola o le faafaileleina o isi e mafai ona e mafaufauina?

Ata
aikona, mafaufau loloto

Mafaufau Loloto i Tapenaga mo le Vasega

O anafea na avea ai oe ma se tasi e mauaina le faafailelega, musuia faaKeriso a se tamaitai? Mafaufau pe mafai faapefea ona e atiina ae lenei uiga faaKeriso i lou olaga.

Vaega 3

O le a se eseesega e faia e tina i le fuafuaga a le Tama Faalelagi?

O nisi tamaitai atonu e i ai lo latou faatuatuai e uiga i le faia o ni fanau. O lo latou faatuatuai e mafai ona faalolotoina e leo i sosaiete ia e taufaatauvaaina ai pe ulagia le taua o le tulaga faatina. Mafaufau pe faapefea e le malamalama i le taua o tina i le fuafuaga a le Tama Faalelagi ona fesoasoani ia te oe e teena nei uiga faaalia ma amioga e fesootai i ai.

Sa faamatala mai e Peresitene Nelson, “Outou tuafafine na filifilia a o lei faavaeina le lalolagi e fanauina ma tausia fanau a le Atua; o le faia o lena mea, tou te faamamaluina ai le Atua” (“What Will You Choose?,” Ensign, Jan. 2015, 31).

Na aoao mai e Elder D. Todd Christofferson o le Korama a Aposetolo e Toasefululua le ala e faalautele ai le fuafuaga a lo tatou Tama Faalelagi ona o le fanauina o fanau:

Ata
Elder D. Todd Christofferson

E sili atu le paia o le matafaioi a se tamaitai i le foafoaina o le ola. Ua tatou iloa ua i ai o tatou tino se afuaga paia [tagai i le Mose 2:27] ma e tatau ona tatou maua uma se aafiaga o le fanau mai faaletino ma le toe fanauina faaleagaga ina ia ausia ai le vaega aupito i maualuga i le malo selesitila a le Atua [tagai i le Mose 6:57–60]. E taua tele ai le vaega e faia e tamaitai (o nisi taimi i le lamatia ai o o latou lava soifua) i le galuega ma le mamalu o le Atua “ia aumaia le tino ola pea ma le ola faavavau o le tagata” [Mose 1:39]. (“O Le Malosiaga Amiotonu o Tamaitai,” Liahona, Nov. 2013, 30)

Ata
o se tina o loo kisi i lana pepe

E tusa ai ma auala e faamanuiaina ai e tamaitai ia olaga i le faataunuuina o a latou matafaioi o le avea ai ma tina, na aoao mai Elder Christofferson:

Ata
Elder D. Todd Christofferson

E mafai e se tina ona faaaoga se faatosinaga e le mafai ona faatusalia e se isi lava tagata i isi lava sootaga. E ala i le mana o ana faataitaiga ma aoaoga, na aoao ai lana fanau tama e faaaloalo i le tulaga faatamaitai ma ia faaaofia le amio pulea ma tulaga faatonuina maualuluga o amioga mama i o latou lava olaga. Ua aoao e lana fanau teine ia atiae lo latou lava mama ma ia tutu atu mo le mea sa’o, i taimi uma, po o le a lava le le lauiloa. O le alofa o se tina ma ona faamoemoega maualuluga e taitai atu ai lana fanau ia faatino ma le manatu tonu i ai e aunoa ma ni ‘alofaga, ia manatu mamafa i aoaoga ma atinaega patino, ma ia faia ni saofaga faifaipea i le manuia o tagata uma o siomiaina i latou. (“O Le Malosiaga Amiotonu o Tamaitai,” 30)

Na aoao mai foi Sister Marriott e uiga i le tosinaga mamana a tina:

Ata
Sister Neill F. Marriott

Ou te talitonu “o le fai ma tina” o lona uiga “o le tuu atu o le ola.” Mafaufau i le tele o auala e te tuuina atu ai le ola. E ono faauigaina o le tuuina atu o se ola faalelagona i se ua leai se faamoemoe po o le ola faaleagaga i se tagata masalosalo. Faatasi ai ma le fesoasoani a le Agaga Paia, e mafai ai ona tatou fatufatu ai se nofoaga o le faamalologa faalelagona mo e ua faailogalanu i ai, teena, ma se tagata ese. I nei auala agalelei ae malolosi, tatou te fausia ai le malo o le Atua. (“Se A Se Mea Matou Te Faia,” 11)

Ata
Fatu o le Faatuatua, saunia e Jay Bryant Ward
Ata
aikona, suesue

Suesue e Sauniuni ai mo le Vasega

O le tala a le Tusi a Mamona e uiga i le autau talavou o se faataitaiga lea o le tele o le aafiaga e mafai ona faia e tina amiotonu. Faitau le Alema 56:45–48; 57:21–26, vaavaai mo le eseesega e mafai ona faia e se tina ma lana fanau ia i latou lava, sosaiete, ma le lalolagi.

A o e faitauina le molimau lea na faasoa mai e Peresitene Julie B. Beck, o le sa avea ma peresitene Aoao o le Aualofa, mafaufau i le aafiaga o tamaitai e te iloa o e e faamamaluina la latou misiona paia ia faatinā:

Ata
Peresitene Julie B. Beck

E leai se tapulaa i mea e mafai e se tina e i ai se fatu o se tina ona ausia. O tamaitai amiotonu ua suia le kosi o le talafaasolopito ma o le a faaauau pea ona faia, ma o la latou tosinaga o le a salalau ma ola lauusiusi e oo i le faavavau. E ese lo‘u faafetai i le Alii mo tamaitai faatuatuaina ua i ai le misiona paia faatina. (“A ‘Mother Heart,’” Liahona, Me 2004, 77)

Ata
aikona, faatino

Faatino

Mafaufau e tusi ma auina atu se faamatalaga o le talisapaia i se tina po o se tasi na avea ma se tina, o lana tosinaga faafailele ua faamanuiaina ai lou olaga.