Ang Saksi ni Presidente Brigham Young kabahin ni Propeta Joseph Smith

Sa usa sa daghang mga sermon ngadto sa mga Santos mahitungod sa buhat ug misyon ni Joseph, si Presidente Brigham Young mipamatuod: “Akong gibati nga kasinggiton og Hallelujah, sa tanang higayon, kon ako maghunahuna nga ako nakaila ni Joseph Smith, ang Propeta nga gipasanay sa Ginoo ug gi-ordinahan, ug gihatagan og mga yawe ug gahum sa pagtukod sa Gingharian sa Dios dinhi sa yuta ug sa pagpadayon niini” (DBY, 458). Sa iyang tibuok kinabuhi isip usa ka lider sa Simbahan, siya mipadayag og gugma ug pagdayeg alang ni Propeta Joseph Smith: “Ako sa tinud-anay makasulti, nga walay kausaban ang akong nakit-an kaniya nga ang tanan nga pangitaon ni bisan kinsa nga tawo sa usa ka tinuod nga propeta anaa kaniya, ug nga ang mas maayo nga tawo dili mahimo, bisan og siya adunay iyang mga kahuyang; ug kinsa nga tawo nga sukad nabuhi dinhi sa yuta ang wala?” (Brigham Young ngadto ni David P. Smith, 1 Hunyo 1853, BYP). Ang kang Presidente Young nga tibuok kinabuhi nga lig-on nga pagtuo sa Manalagna ug sa iyang buhat napamatud-an sa himatyon na siya sa katapusan nga pahayag sa pag-ila ug paghinangop: “Joseph, Joseph, Joseph” (LSBY, 362).

Mga Pagtulun-an ni Brigham Young

Si Propeta Joseph Smith mipahimutang sa pundasyon sa Simbahn ni Jesukristo niini nga dispensasyon.

Gitakda kini sa konseho sa kahangturan, dugay na sa wala pa ipahimutang ang mga pundasyon sa yuta, nga siya, si Joseph Smith, mao ang tawo, sa katapusang dispensasyon niini nga kalibutan, sa pagdala sa pulong sa Dios ngadto sa mga katawhan, ug sa pagdawat sa kahingpitan sa mga yawe ug gahum sa Priesthood sa Anak sa Dios. Ang Ginoo nag-obserbar kaniya, ug sa iyang amahan, ug sa amahan sa iyang amahan, ug sa ilang mga katigulangan balik ngadto ni Abraham, ug gikan ni Abraham ngadto sa lunop, gikan sa lunop ngadto ni Enoch, ug gikan ni Enoch ngadto ni Abraham. Siya nagbantay niana nga pamilya ug kana nga dugo nga nagdagan gikan sa tuburan niini ngadto sa pagkatawo niana nga tawo. Siya gi-orden nang daan sa kahangturan sa pagdumala niining katapusan nga dispensasyon (DBY, 108).

[Ang Ginoo] mitawag sa iyang sulugoon nga si Joseph Smith, Jr., sa dihang batan-on pa siya, sa pagpahimutang sa pundasyon sa iyang Gingharian sa katapusang higayon. Nganong gitawag man niya si Joseph Smith sa pagbuhat niini? Tungod kay siya gigamit sa pagbuhat niini. Si Joseph Smith lamang ba ang bugtong tawo sa yuta nga makahimo niini nga buhat? Walay pagduhaduha nga daghan pa kinsa, ubos sa pagmando sa Ginoo, makahimo sa buhat, apan ang Ginoo mipili sa tawo nga makapahimuot kaniya, ug kana igo na (DBY, 460).

Kasagaran gisulti ngadto sa mga Elder, kon atua sa layo nagsangyaw, nga si Joseph Smith, ang nagpasiugda sa ilang Simbahan ug relihiyon, usa lamang ka pobre walay kabangkaagan nga batan-on. Kana mao ang kanunay ipahayag nga usa sa labing lig-on nga katarungan nga makuha batok sa doktrina sa kaluwasan, sa maalamon ug makinaadmanon niini nga kalibutan, bisan og kini dili kinahanglan nga lalison. Ipadayag unta sa Ginoo ang iyang kaugalingon ngadto sa uban nga makinaadmanon nga mga pari o mga tawo nga adunay talento nianang panahona, miingon sila, kinsa makahimo og kaayohan ug magmadaugon ang ebanghelyo pinaagi sa ilang impluwensya ug kahibalo, ug dili ngadto sa usa ka pobre, walay kahibalo, walay edukasyon nga batan-on. Dili daghang maalamon, dili daghang gamhanan, dili daghang hamili, mamulong subay sa pamaagi sa tawo, ang gitawag; apan gipili sa Dios binuang nga mga butang sa kalibutan aron sa pagpakaulaw sa mga maalamon, gipili sa ginapakahuyang sa kalibutan aron sa pagpakaulaw sa mga kusgan; gipili sa Dios ang timawa ug tinamay sa kalibutan, bisan ang mga butang nga wala magalungtad aron sa pagwagtang sa mga butang nga nagalungtad, aron nga sa ingon niana walay tawo nga makapasigarbo diha sa atubangan sa Dios [tan-awa sa 1 Mga Taga-Corinto 1:26–29] (DBY, 321–22).

Akong gibati nga niadtong mga adlawa [sa wala pa magpasakop sa Simbahan], nga akong makita ang nawong sa usa ka propeta; sama sa nagpuyo sa yuta sa kanhiay nga panahon, usa ka tawo nga adunay mga pagpadayag, diin giablihan ang kalangitan, kinsa nakaila sa Dios ug sa iyang kinaiya, gawasnon akong molakaw libut sa yuta diha sa akong mga kamot ug mga tuhod; nagtuo ako nga walay kalisud nga dili nako maagian, kon akong makita ang usa ka tawo nga nakaila unsa ang Dios ug hain siya, unsa ang iyang kinaiya, ug unsa ang kahangturan (DNW, 8 sa Okt. 1856, 3).

Unsa nga matang ug kaanindot ang misyon ni Joseph? … Sa una nakong pagkadungog kaniya, iyang gidala og dungan ang langit ug yuta (DBY,458).

Gipahimutang ni Joseph Smith ang pundasyon sa gingharian sa Dios sa katapusang mga adlaw; ang uban motukod sa ubang bahin niini (DBY, 458).

Wala gayud ako makakita og usa ka propeta, hangtud akong nahimamat si Joseph Smith, kinsa makasulti kanako og bisan unsa mahitungod sa kinaiya, pagkatawo ug pinuy-anan sa Dios, o bisan unsa nga makatagbaw mahitungod sa mga anghel, o ang relasyon sa tawo ngadto sa iyang Magbubuhat. Apan ako nagmakugihon sama ni bisan kinsa nga tawo nga maningkamot ug pagsusi niining mga butanga (DBY, 458).

Siya mikuha sa langit, ingnon ta, ug midala niini dinhi sa yuta; ug iyang gikuha ang yuta, gidala sa itaas, ug giablihan kini, sa kayano ug sa kamapainubsanon, ang mga butang sa Dios; ug mao kana ang kaanindot sa iyang misyon. Ako adunay pagpamatuod, dugay na, nga siya usa ka Propeta sa Ginoo, ug kana makalipay. Dili ba mao kini ang gibuhat usab ni Joseph aron kamo makasabut? Dili ba siya mokuha sa mga Kasulatan ug mohimo niini nga yano ug sayon aron ang tanan makasabut? Ang matag tawo moingon, “Oo, dalaygon kini; mihiusa kini sa mga langit ug yuta,” ug sa panahon, wala kini, gawas sa pagtudlo kanato unsaon sa pagpuyo sa kahangturan (DBY, 458–59).

Akong gipasidunggan ug gitahud ang pangalan ni Joseph Smith. Malipay akong makadungog niini; gihigugma ko kini. Gihigugma ko ang iyang doktrina (DBY, 458).

Unsay akong nadawat gikan sa Ginoo, akong nadawat pinaagi ni Joseph Smith, siya ang instrumento nga gigamit. Kon mohunong ako sa pagtuo kaniya, mohunong ako sa pagtuo niini nga mga baruganan, kini wala ipadayag, ipahayag, o ipasabut ni bisan kinsa nga laing tawo sukad sa panahon sa mga Apostoles. Kon ako dili motuo sa Basahon ni Mormon, kinahanglang akong ilimud nga si Joseph usa ka Propeta, ug kon dili nako gamiton ang doktrina ug mohunong sa pagsangyaw sa pagpundok sa Israel ug sa pagtukod sa Zion, kinahanglan dili na ako motuo sa Biblia; ug, agig sangputanan, maayo pa nga mopauli na lang ako ug mosangyaw sa ebanghelyo nga wala kining tulo ka mga butang (DBY, 458).

Walay usa niana ka tawo nga sukad nakabaton og kahigayunan nga makadungog sa pamaagi sa kinabuhi ug sa kaluwasan diha sa iyang atubangan sumala sa gisulat sa bag-ong Tugon, ug diha sa Basahon ni Mormon, ug diha sa basahon sa Doktrina ug mga Pakigsaad, pinaagi sa usa ka Santos sa Ulahing mga Adlaw, nga makasulti nga si Jesus buhi, nga ang iyang Ebanghelyo tinuod, ug sa samang higayon moingon nga si Joseph Smith dili usa ka Propeta sa Dios. Lig-on kana nga pagpamatuod, apan tinuod kana. Walay tawo nga makasulti nga kini nga libro (naggunit sa Biblia) tinuod, mao ang pulong sa Ginoo, mao ang paagi, mao ang giya sa dalan, ug ang paagi diin kita makahibalo sa kabubut-on sa Dios; ug sa samang higayon moingon, nga ang Basahon ni Mormon dili tinuod; kon siya nakabaton og kahigayunan sa pagbasa niini o sa pagpaminaw niini, ug sa pagkaton sa mga doktrina niini. Wala kana nga tawo dinhi sa ibabaw sa yuta kinsa adunay kahigayunan sa pagkat-on sa Ebanghelyo ni Jesukristo gikan niining duha ka mga libro, nga moingon nga ang usa tinuod, ug ang lain dili tinuod. Walay Santos sa Ulahing mga Adlaw, walay lalaki o babaye, nga makasulti nga ang Basahon ni Mormon tinuod, ug sa samang higayon moingon nga ang Biblia dili tinuod. Kon ang usa tinuod, ang duha tinuod; ug kon ang usa dili tinuod, ang duha dili tinuod. Kon si Jesus buhi, ug mao ang Manluluwas sa kalibutan, si Joseph Smith usa ka Propeta sa Dios, ug anaa sa dughan sa iyang amahan nga si Abraham. Bisan og sila mipatay sa iyang lawas, apan siya buhi ug nagtan-aw sa nawong sa iyang Amahan sa Langit; ug ang iyang mga garment putli sama sa mga anghel nga naglibut sa trono sa Dios; ug walay tawo sa yuta nga makasulti nga si Jesus buhi, ug molimud, sa samang higayon, sa akong pamahayag mahitungod ni Propeta Joseph. Mao kini ang akong pagpamatuod, ug kini lig-on (DBY, 459).

Ang Ginoo mitudlo sa Iyang sulugoon nga si Joseph Smith pinaagi sa pagpadayag, “kamatuoran ngadto sa laing kamatuoran.”

Gikan sa panahon nga naangkon ni Joseph ang mga palid, ug sa wala pa kanang panahona, ang Ginoo naggiya kaniya. Iyang gigiyahan siya kada adlaw ug kada oras (DBY, 461).

Nagpadayon si Joseph sa pagdawat og pagpadayag ngadto sa laing pagpadayag, ordinansa ngadto sa laing ordinansa, kamatuoran ngadto sa laing kamatuoran, hangtud iyang maangkon ang tanan nga gikinahanglan alang sa kaluwasan sa tawhanong pamilya (DBY, 461).

Ang tanang mga lumulupyo sa yuta gitawag sa Dios; gitawag sila sa paghinulsol ug pagpabunyag alang sa kapasayloan sa mga sala (DBY, 461).

Kita miagi gikan sa usa ka butang ngadto sa lain, ug ako moingon nga gikan sa usa ka ang-ang sa kahibalo ngadto sa lain. Sa dihang si Joseph unang nakadawat sa kahibalo sa mga palid nga didto sa bungtod sa Cumorah, wala dayon siya makadawat sa mga yawe sa Aaronic Prietshood, nadawat lamang niya ang kahibalo nga ang mga palid atua didto, ug nga ang Ginoo modala niini. … Iyang nadawat ang kahibalo nga [ang unang mga lumulupyo sa Amerika] kaniadto nakaangkon sa Ebanghelyo, ug gikan nianang higayona siya mipadayon, hinay-hinay, hangtud iyang naangkon ang mga palid, ug ang Urim ug Thummin ug nakaangkon sa gahum sa paghubad niini. Kini wala makapahimo kaniya nga usa ka Apopstol, kini wala makahatag kaniya sa mga yawe sa Gingharian, ni nakapahimo kaniya nga Elder sa Israel. Siya usa ka Propeta, ug adunay espiritu sa panagna, ug nakadawat niining tanan sa wala pa siya ordinahe sa Ginoo. Ug sa diha nga ang Ginoo, pinaagi sa pagpadayag, misulti kaniya sa pag-adto sa Pennsylvania, iya kining gihimo, ug mihuman sa hubad sa Basahon ni Mormon; ug sa dihang ang Ginoo, sa lain nga pagpadayag, misulti kaniya sa pagbalik, ngadto sa Estado sa New York, ug moadto sa tigulang nga Amahan sa mga Whitmer, kinsa nagpuyo sa lugar nga atbang sa Waterloo, ug didto mohunong, iya kining gihimo, ug dihay mga miting, ug mipundok og pipila kinsa mituo sa iyang pagpamatuod [tan-awa sa HC, 1:48–51]. Iyang nadawat ang Aaronic Priesthood, ug dayon iyang nadawat ang mga yawe sa Melchizedek Priesthood, ug mitukod sa Simbahan [tan-awa sa D&P 13; 20; 128:20]. Una niyang nadawat ang gahum sa pagbunyag, ug sa gihapon wala masayud nga siya makadawat pa og dugang hangtud ang Ginoo misulti kaniya nga aduna pay alang kaniya. Dayon iyang nadawat ang mga yawe sa Melchizedek Priesthood, ug adunay gahum sa pagkumpirma human siya mabunyagi, nga wala kaniya kaniadto. Siya unta magpabilin nga magbarug sama ni Juan Bautista, kon wala pa ipadala sa Ginoo ang iyang laing mga mensahero nga sila si Pedro, Santiago ug Juan, aron iorden si Joseph ngadto sa Melchizedek Priesthood. … Ug dayon [kami] nakadawat og laing mga ordinansa (DBY, 461–62).

Niining higayona [1840] miabut ang pagpadayag nga kita mahimong mabunyagan alang sa atong patay nga mga higala, apan sa sinugdanan wala kini ipadayag nga adunay usa ka rekord nga nagkinahanglan niadtong kinsa gibunyagan; apan sa dihang siya nakadawat og dugang pagpadayag alang niana nga katuyoan, niana usa ka rekord nga gitipigan (DBY, 462).

Si Propeta Joseph Smith yanong mitudlo sa kamatuoran sa ebanghelyo.

Ang tanan nga gihimo ni Joseph Smith mao ang pagsangyaw sa kamatuoran— ang Ebanghelyo ingon nga ang Ginoo mipadayag niini ngadto kaniya—ug misulti sa mga katawhan unsaon nga maluwas, ug ang matinuoron sa kasingkasing nagdungan sa pagpanagan ug pagpundok libut kaniya ug nagmahal kaniya sama sa ilang kaugalingong mga kinabuhi. Wala siyay labaw nga mahimo kay sa pagsangyaw sa tinuod nga mga baruganan, ug kana mopundok sa mga Santos sa katapusan nga mga adlaw, gani ang matinuoron og kasingkasing. Ang tanan kinsa mituo ug misunod sa Ebanghelyo ni Jesukristo mao ang iyang mga saksi sa kamatuoran niini nga mga pamahayag (DBY, 463).

Ang kahamili sa himaya sa kinaiya ni Brother Joseph Smith mao nga iyang mapasabut ang langitnong mga butang aron masabtan sa mga tawo nga adunay kinutuban ang pagsabut. Kon siya mosangyaw ngadto sa mga tawo—mopadayag sa mga butang sa Dios, sa kabubut-on sa Dios, sa plano sa kaluwasan, sa katuyoan ni Jehova, sa atong relasyon ngadto kaniya ug sa tanang mga langitnong mga binuhat, iyang gihimong sayon ang iyang mga pagtulun-an ngadto sa kapasidad sa matag lalaki, babaye, ug bata, mihimo niini nga yano sama sa maayo nga pagkahulagway nga dalan. Kini makapakita unta sa kamatuoran sa matag tawo nga sukad nakadungog kaniya sa iyang balaan nga awtoridad ug gahum, kay walay laing tawo ang makatudlo sama sa iyang pagtudlo, ug walay tawo ang makapadayag sa mga butang sa Dios, apan pinaagi sa mga pagpadayag ni Jesukristo (DBY, 463).

Walay tawo nga makit-an kinsa makatudlo sa paghinulsol ug bunyag alang sa kapasayloan sa mga sala, nga adunay awtoridad sa pagpangalagad sa mga ordinansa, hangtud ang Dios misugo ni Joseph Smith, ug mipadala kaniya uban sa iyang mga kasugoan ngadto sa mga katawhan. Sa wala pa kanang higayona, nangita ako sa tanan kalabut sa mga simabahan; nangita ako bisan asa aron sa pagsusi kon aduna bay putli nga relihiyon dinhi sa yuta; nangita ako sa tawo nga makasulti kanako og butang mahitungod sa Dios, sa langit, sa mga anghel ug sa kinabuhing dayon. Nagtuo ako sa Dios nga Amahan, ug ni Jesukristo, apan dili ako makatuo nga ang Simbahan ni Jesukristo ania sa yuta (DBY, 463).

Nagpadayon unta ako sa pagtuon sa Biblia ug sa tanang mga libro nga gisulat, ug kon wala ang pagpadayag sa Dios sama unta ako sa masaba nga agong o piyangpiyang nga nagatagingting, walay kahibalo sa Dios, sa tinuod nga relihiyon, sa katubsanan sa mga buhi o mga patay; nabuhi ug namatay unta ako sa pagkawalay kahibalo; ug kini mao ang kahimtang sa tanang mga lumulupyo sa yuta (DBY, 463).

Ang pangutana nga gipangutana sa daghang mga higayon mahitungod ni Joseph Smith, sa mga tawo kinsa makigkita kaniya ug sa iyang mga katawhan, “Giunsa nimo nga sayon man nimong mamandoan ang imong mga katawhan? Ingon og wala silay buhaton gawas sa unsay imong isulti; giunsa nimo nga sayon nimo sila sa pagdumala?” Miingon siya, “Wala gayud nako sila dumalaha. Ang Ginoo mipadayag og mga baruganan gikan sa langit nga maoy among sundon sa pagpuyo niining ulahing mga adlaw. Ang panahon nagkaduol na nga ang Ginoo mopundok sa iyang mga katawhan gikan sa dautan, ug iyang pamub-an ang buhat niya sa pagkamatarung, ug ang mga baruganan nga iyang gipadayag akong gitudlo ngadto sa mga katawhan ug sila naningkamot sa pagpuyo sumala niini, ug sila ang nagdumala sa ilang mga kaugalingon.”

Mga ginoo, mao kini ang dakong sekreto karon sa pagdumala niini nga mga katawhan. Gituohan nga ako ang nagdumala kanila, apan dili kana mao. Sama kini sa akong mabuhat sa akong kaugalingon ug sa pagtarung sa akong kaugalingon ug sa pagtudlo sa mga katawhan sa mga baruganan diin sila kinahanglan nga magpuyo (DBY, 470).

Nakahinumdom ako sa daghang mga higayon sa dihang si Brother Joseph, naghunahuna kon pila ang moduol sa gingharian sa Dios ug mogawas pag-usab, moingon, “Mga kaigsoonan ako wala pa mobiya sa kamatuoran, ug wala mobati nga mobuhat sa ingon.” Kadaghanan kaninyo, sa walay pagduhaduha, makahinumdom sa iyang mga pulong. Si Joseph nagampo sa tanang panahon, nagpakita og hugot nga pagtuo, nagsunod sa iyang relihiyon, ug nagpalambo sa iyang calling, aron makabaton sa mga pagpakita sa Ginoo, ug sa paghimo kaniya nga makanunayon diha sa hugot nga pagtuo (DBY, 469).

Karon, ingon ka ngil-ad sa akong kaugalingon ug sa akong mga kaigsoonan, ug ingon ka layo gikan sa tumong, ug gikan sa mga kahigayunan nga unta among matagamtaman, kon si Joseph Smith, Jr., ang Propeta, nakakita pa sa mga katawhan sa iyang panahon nga andam mosunod sa iyang tingog, sama karon sa pagsunod sa tingog sa ilang Presidente, unta siya usa ka malipayon nga tawo. Siya nagpakabuhi, naghago, naningkamot, ug nagtrabaho; ang iyang kaisug sama sa kaisug sa usa ka anghel, ug ang iyang kabubut-on sama sa kabubut-on sa Makagagahum, ug siya naghago hangtud siya ilang gipatay (DBY, 464).

Si Propeta Joseph Smith misilyo sa iyang pagpamatuod sa iyang dugo.

Kadaghanan sa mga Propeta misilyo sa ilang pagpamatuod sa ilang dugo, aron ang ilang testamento adunay kalig-unan. … Sama sa karaang mga panahon, mao usab sa moderno nga mga panahon. Sa dihang si Joseph Smith misilyo sa iyang pagpamatuod sa iyang dugo, ang iyang testamento nianang higayona nahimong malig-on sa tibuok kalibutan, ug alaot niadtong kinsa makig-away batok niini (DBY, 467).

Sa dihang si [Joseph Smith] miadto sa Carthage siya miingon, “Ako moadto sa kamatayon; ako moadto sama sa usa ka karnero ngadto sa ihawan; ako modawat sa akong kapalaran” (DBY, 467).

Kinsa ang moluwas ni Joseph Smith gikan sa mga kamot sa iyang mga kaaway [hangtud] sa adlaw sa iyang kamatayon? Ang Dios; bisan og siya gidala ngadto sa ngilit sa kamatayon pagbalikbalik, ug, sumala sa nasabtan sa mga tawo, dili na maluwas, ug wala nay kahigayunan nga siya maluwas pa. Sa dihang napriso siya sa Missouri, ug walay tawo nga nagdahum nga siya makaikyas gikan sa ilang mga kamot, ako adunay hugot nga pagtuo sama kang Abraham, ug misulti sa kaigsoonan, “Ingon nga buhi ang Ginoong Dios, siya makalingkawas gikan sa ilang mga kamot.” Bisan og siya nanagna nga siya moabut og kwarenta anyos ang edad, apan kaming tanan naghambin og paglaum nga kana usa ka sayop nga panagna, ug amo siyang ipabilin uban kanamo sa kahangturan; naghunahuna kami nga ang among hugot nga pagtuo makapalugway niini, apan nasayop kami—siya sa katapusan namatay nga usa ka martir sa iyang relihiyon. Ako miingon, “Maayo ra ang tanan, karon ang pagpamatuod hingpit nga nalig-on; iyang gisilyohan sa iyang dugo” (DBY, 469–70).

Ang iyang katungdanan wala kuhaa gikan kaniya, miadto lamang siya aron motrabaho sa laing departamento sa palakaw sa Makagagahum. Usa gihapon siya ka Apostol, usa gihapon ka Propeta, ug naghimo sa buhat sa usa ka Apostol ug Propeta; siya nakauna og usa ka lakang kanato ug nakaangkon og kadaugan nga wala maangkon ninyo ug kanako (DBY, 468).

Ako nasayud nga si [Joseph Smith] gitawag sa Dios, ug nasayud ako niini pinaagi sa mga pagpadayag ni Jesukristo ngari kanako, ug pinaagi sa pagpamatuod sa Espiritu Santo. Kon wala pa ako makahibalo sa kamatuoran, dili unta ako mahimong unsay gitawag og “Mormon,” ni ako ania karon dinhi (DNW, 22 sa Okt. 1862, 2).

Mga Sugyot alang sa Pagtuon

Si Propeta Joseph Smith mipahimutang sa pundasyon sa Simbahn ni Jesukristo niini nga dispensasyon.

Unsa nga tahas ang nahimo sa mga katigulangan ni Joseph Smith sa pag-andam kaniya nga mahimong unang propeta niini nga dispensasyon? Sa unsa nga mga paagi nga ang hugot nga pagtuo sa inyong mga katigulangan nakaimpluwensya sa inyong kinabuhi? Unsay inyong mabuhat aron adunay matarung nga impluwensya sa inyong umaabut nga mga kaliwatan?
Unsa nga mga bintaha ang miabut sa pagtawag sa Ginoo sa usa lamang ka bata sa pagpahimutang sa pundasyon sa iyang gingharian niining katapusang mga adlaw? Sa unsa nga paagi kini nakatabang kaninyo nga makakita sa kamot sa Ginoo nga naglihok sa inyong kinabuhi?
Si Presidente Young miingon nga si Propeta Joseph Smith mipahimutang sa pundasyon sa ulahing mga adlaw nga Simbahan ni Jesukristo ug nga ang uban mopalambo sa dugang nga sukaranan. Unsa kana nga pundasyon? (Tan-awa usab sa D&P 5:9–10; 135:3.) Unsa ang dugang nga pundasyon sa bilding? Unsa nga ebidensya ang inyong nakita nga ang dugang pundasyon sa Simbahan gitukod? Sa unsa nga paagi kitang tanan makasalmot niini nga buhat?
Unsa ang gisugyot ni Presidente Young nga ang “matang ug kaanindot sa misyon ni Joseph”? Unsaon nato pagsunod sa pamaagi ni Propeta Joseph Smith sa pagtudlo sa atong mga anak ug sa uban?
Sa unsa nga paagi nga si Propeta Joseph Smith “mitudlo kanato unsaon sa pagpuyo sa kahangturan”? Sa unsa nga paagi nga kini nga mga pagtulunan magamit sa atong mga kinabuhi sa mortalidad?

Ang Ginoo mitudlo sa Iyang sulugoon nga si Joseph Smith pinaagi sa pagpadayag, “kamatuoran ug ngadto sa laing kamatuoran.”

Ngano sa inyong hunahuna gipadayag sa Ginoo ang Iyang mga kamatuoran “pagpadayag ngadto sa laing pagpadayag” kay sa itingub og hatag diha-diha? (Tan-awa usab sa D&P 93:11–14.) Sa unsa nga paagi kini nahimong tinuod sa kinabuhi ni Propeta Joseph Smith? Sa unsa nga paagi kini natinuod sa inyong kinabuhi?

Si Propeta Joseph Smith yanong mitudlo sa kamatuoran sa ebanghelyo.

Ngano nga si Propeta Joseph Smith gimahal pag-ayo ug makapaimpluwensya nga magtutudlo? Unsa ang iyang “dakong sektreto” sa pagdumala sa mga katawhan sa Ginoo? Unsaon nato sa paggamit kini nga baruganan sa atong mga responsibilidad sa panimalay, sa trabaho, ug sa Simbahan?
Sa unsa nga paagi nga si Propeta Joseph nakahimo sa “pagbaton sa mga pagpakita sa Ginoo, ug sa paghimo kaniya [sa kaugalingon] nga makanunayon diha sa hugot nga pagtuo”? Unsaon nato pagkahibalo sa kabubut-on sa Ginoo mahitungod sa atong mga kaugalingon? Ngano nga kinahanglan gayud nga magpadayon kita nga magmatinud-anon aron mapalungtad ang atong mga pagpamatuod sa ebanghelyo?

Si Propeta Joseph Smith misilyo sa iyang pagpamatuod sa iyang dugo.

Ngano nga gikinahanglan alang ni Joseph ug Hyrum Smith sa pagsilyo sa ilang mga pagpamatuod sa ilang dugo? (Tan-awa usab sa D&P 135; 136:39.)
Si Presidente Young namahayag, “Ako nasayud nga si [Joseph Smith] gitawag sa Dios, ug nasayud ako niini pinaagi sa mga pagpadayag ni Jesukristo ngari kanako.” Unsay inyong gibati mahitungod ni Propeta Joseph Smith? Sa unsa nga paagi kamo makapaambit sa inyong mga pagbati uban sa inyong pamilya, mga higala, ug mga kauban? Huna-hunaa ang pagrekord sa inyong mga pagbati mahitungod sa Propeta sa pipila ka paagi alang sa inyong umaabut nga kaliwat.