Mga Ordinansa sa Templo

Sa dihang nagkadaghan na ang pagpanggukod ug ang panginahanglan sa pagbiya sa Nauvoo naghatag og kalisud sa mga Santos, si Presidente Brigham Young nagtrabaho didto sa templo aron sa pagpanalangin sa mga Santos sa sagrado nga mga ordinansa sa dili pa ang ilang pagbiya. Iyang na-rekord nga sa usa ka adlaw, “usa ka gatus ug kwarenta y tres ka mga tawo ang nakadawat sa ilang mga endowment diha sa Templo. … Kini mao ang tinguha nga gipakita sa mga Santos nga makadawat sa mga ordinansa [sa Templo] , ug mao ang among tinguha sa pagpangalagad ngadto kanila; nga akong gigahin ang akong kaugalingon sa hingpit ngadto sa buhat sa Ginoo diha sa Templo gabii ug adlaw, nga dili gani matulog sobra sa upat ka oras, sa kasagaran, matag adlaw, ug mopauli makausa sa usa ka semana” (HC, 7,567). Sa dihang miabut kami sa kasadpan, si Presidente Young mipili dayon og luna alang sa bag-ong templo. Siya ang naggiya sa pagtukod sa upat ka mga templo sa Utah—sa Siyudad sa Salt Lake, St. George, Manti, ug Logan; hinoon, ang Templo lamang sa St. George ang nakompleto sa iyang tibuok kinabuhi. Niadtong 1 sa Enero 1877, nga ang mga tiil walay kusog nga siya alsahon ngadto sa kwarto ginamit ang lingkuranan, siya namulong sa kongregasyon nga nagmiting aron sa pagpahinungod sa ubos nga andana sa Templo sa St. George, namahayag: “Atong natagamtaman ang mga pribilehiyo nga walay lain nga nakatagamtam sa ibabaw sa yuta… Sa dihang ako naghunahuna niini nga hilisgutan, ako gusto sa pinulongan sa pito ka mga dugdog aron sa pagpukaw sa mga katawhan” (DNSW, 16 sa Ene. 1877, 1).

Mga Pagtulun-an ni Brigham Young

Ang mga templo mao ang mga balay sa Ginoo diin ang sagrado nga mga ordinansa gipangalagad aron sa pag-andam sa mga Santos alang sa kahimayaan.

Tingali adunay mangutana ngano nga kita motukod og mga templo. Kita motukod og mga templo tungod kay walay balay sa ibabaw sa tibuok yuta nga gipahinungod ngadto sa pangalan sa Ginoo diin sa bisan unsa nga paagi makatandi sa iyang kinaiya, ug nga iyang matawag kanunay nga iyang balay. Adunay mga dapit sa yuta diin ang Ginoo makaadto ug makapuyo, kon buot niya. Kini makita sa ibabaw sa taas nga mga bukid, o sa ubang mga langub o mga dapit diin ang makasasala nga tawo wala makatunob niini sa iyang hugaw nga mga tiil (DBY, 393–94).

Iyang gisugo ang iyang mga sulugoon sa pagtukod og balay alang kaniya nga iyang kaadtoan ug diin iyang ikapahibalo ang iyang kabubut-on (DBY, 394).

“Gikinahanglan ba sa Ginoo nga kita motukod og templo?” Ako moingon nga iya kining gikinahanglan ingon nga iyang gikinahanglan nga motukod usab sa laing dapit. Kon kamo mangutana, “Brother Brigham, nakahibalo ka ba mahitungod niini, nakadawat ba ikaw og pagpadayag gikan sa langit kabahin niini?” Makatubag ako niini sa tinud-anay, kini diha sa akong hunahuna kanunay (DBY, 411).

Kita motukod gayud og mga templo. Kini nga balaod gihatag ngadto sa mga katawhan (DBY, 393).

Dili kita … makapagalagad sa dugang mga ordinansa sa Dios, sa hingpit, sa legal nga paagi ngadto sa mga katawhan … hangtud makatukod kita og templo alang niana nga katuyoan (DBY, 394–95).

Ang uban moingon “dili ako buot nga mobuhat niana, kay wala kita sukad makatukod og templo nga walay pagpakigbatok nga mahitabo.” Gusto akong makigbatok sila pag-usab (DBY, 410).

Atong nahuman ang templo sa Kirtland ug sa Nauvoo, ug wala bay pagpanggukod sa tanang panahon nga kini atong gitukod? Gibuhat kini nila, matag semana ug matag adlaw (DBY, 410).

Ako nakahukom, pinaagi sa tabang sa Ginoo ug niini nga mga katawhan, sa pagtukod og balay alang kaniya. Kamo mangutana, “Mopuyo ba siya niini?” Buhaton niya sa iyang gusto, dili nako katungdanan ang pagmando sa Ginoo. Apan motukod kita og balay alang kaniya, nga, kon gusto niya nga mobisita kanato, siya adunay dapit nga kaadtoan, o kon siya mopadala ni bisan kinsa nga iyang sulugoon, kita adunay angay nga lugar alang kanila. Ako nagtukod og balay sa akong kaugalingon, ug ang kadaghanan kaninyo maoy gibuhat, ug karon, dili ba kita motukod og balay sa Ginoo? (DBY, 411).

Nagkinahanglan ba kita og templo? Nagkinahanglan kita, aron sa pagandam kanato sa pag-agi sa ganghaan ngadto sa siyudad diin ang mga Santos makapahulay. Ang mga ordinansa nga gikinahanglan niini … dili [mapangalagad] kon walay angay nga dapit. Gusto kita og templo, dili alang sa pang-publiko nga kongregasyon, apang alang sa Priesthood, diin ipahimutang ug ihan-ay sa hingpit ang Priesthood sa iyang kapunongan ug mga ang-ang [Aaronic ug Melchizedek], sa pagpangalagad sa ordinansa sa Priesthood ngadto sa mga Santos alang sa ilang kahimayaan (DBY, 394).

Ang templo alang sa mga endowment—alang sa paghan-ay ug panudlo sa Priesthood (DBY, 412).

Nakapahimulos kita sa kahigayunan sa pagsulod ngadto sa templo, nga gitukod ngadto sa pangalan sa Dios, ug sa pagdawat sa mga ordinansa sa iyang balay, uban sa tanang mga yawe ug mga panalangin nga giandam sa pagsulod ngadto sa mga “kinabuhi” [tan-awa sa D&P 132:22]; nakapahimulos usab kita sa kahigayunan sa pagpangalagad alang sa atong mga amahan ug mga inahan, atong mga apohan nga lalaki ug mga babaye, alang niadtong kinsa namatay nga wala makadungog sa Ebanghelyo (DBY, 394).

Kadto lamang kinsa miapil uban kanato diha sa mga ordinansa sa templo ang nakahibalo sa ilang mga kaugalingon sa katagbawan nga makaamgo nga kita katambayayong sa Ginoo ug Manluluwas, nga kita kabahin sa mahinungdanon nga buhat sa kaluwasan; nga kita adunay kahigayunan sa pagdawat ug pagsunod sa kamatuoran, ug sa pagsiguro sa atong mga kaugalingon niana nga kalipay nga ikahatag lamang sa Ebanghelyo; ug dili lamang sa pagpahigayon niini nga mga ordinansa alang sa atong mga kaugalingon, apan sa pagbuhat sa gikinahanglan nga buhat alang sa atong mga ginikanan ug mga katigulangan kinsa namatay nga walay Ebanghelyo, aron sila usab makaambit sa mga tubig sa kinabuhi, ug pagahukman sumala sa tawo dinhi sa unod [tan-awa sa 1 Pedro 4:6]. Kini usa ka kahigayunan, usa ka panalangin, nga walay usa nga makamatikod gawas kon siya anaa niini. Malipayon kita nga makahibalo nga pinaagi sa atong hugot nga pagtuo ug mga pagbati pinaagi sa pagpadayag nga ania kanato nga ang atong mga trabaho; gidawat sa Ginoo. Kita nalipay pag-ayo sa atong mga kaugalingon sa katilingban sa usag usa sa tigulang, sa hamtong ug sa batan-on nalipay ug nagmaya niining mahimayaon nga buhat (DBY, 419–20).

Kita ang angay nga mobuhat sa mga butang nga gikinahanglan sa Ginoo gikan kanato, ug itugyan kaniya ang resulta. Atoa ang pagtrabaho uban sa malipayong maayong buot; ug kon kita motukod og templo nga adunay minilyong bili, ug kini nagkinahanglan sa atong tibuok panahon ug mga katigayunan, kinahanglang biyaan nato kini uban sa malipayong mga kasingkasing, kon ang Ginoo sa iyang kabubut-on mosulti kanato sa pagbuhat sa ingon. Kon ang Ginoo motugot sa atong mga kaaway sa pag-abug kanato gikan niini, ngano, kinahanglan nga atong biyaan kini uban sa malipayong kasingkasing sama sa atong kalipay sa usa ka panalangin. Kita walay labut unsa ang buhaton sa Ginoo, o kon unsaon niya pagpaigo ang trabaho sa iyang mga sulugoon. Apan kon siya momando, anaa sa mga katawhan ang pagsunod. Kinahanglang magmalipayon kita sa pagtukod niini nga templo, bissan kita nasayud daan nga kita kinahanglang dili gayud mosulod ngadto niini kon kini mahuman na, sama nga atong buhaton kon kita nasayud nga papuy-on dinhi sulod sa liboan ka mga tuig sa pagpahimulos niini (DBY, 411).

Kinahanglang buhaton ninyo, o kini dili gayud mabuhat. Dili kita gusto nga adunay magbagulbol mahitungod niini nga templo. Kon dili kamo makasugod nga malipayon, ug motrabaho sa tibuok bilding nga malipayon, sugdi ang California, ug mas dali mas maayo. Paghimo og imong bulawan nga baka, ug simbaha kini. Kon ang inyong pag-atiman alang sa mga ordinansa sa kaluwasan, alang sa inyong mga kaugalingon, sa inyong buhi, ug mga patay, dili ang una ug labing importante sa inyong mga kasingkasing, ug sa tanan nga inyong naangkon, lakaw! Bayri ang inyong mga utang, kon kamo aduna, ug lakaw nga malinawon, ug ipamatuod ngadto sa Dios ug sa iyang tanang mga Santos nga kamo mao gayud unsay inyong gisulti nga kamo mao, pinaagi sa inyong mga buhat (DBY, 417–18).

Kita … nagpahimulos og pribilehiyo nga kita wala mahibalo og bisan kinsa nga laing tawo nga nakapahimulos niini sukad sa mga adlaw ni Adan, nga mao, ang pagbaton og nahuman nga templo, diin ang tanang mga ordinansa sa balay sa Dios ikatugyan diha sa iyang mga katawhan. Mga kaigsoonan, nakasabut ba kamo niini? (DBY, 393).

Ang endowment makahimo kanato nga makabalik sa umaabot ngadto sa presensya sa Ginoo.

Ang igpangandam nga mga ordinansa … gipangalagad [sa Templo sa Kirtland], bisan og inubanan sa pagpangalagad sa mga anghel, ug sa presensya ni Ginoong Jesus, mao lamang ang gamay nga pagkasusama sa mga ordinansa sa balay sa Ginoo diha sa ilang kahingpitan; apan daghan, pinaagi sa hulhog sa Yawa, nagtuo nga sila nakadawat sa tanan, ug nasayud sama sa Dios, sila mibiya sa kamatuoran, ug naadto sa impyerno. Apan paniguro, mga kaigsoonan, adunay apan diyutay, diyutay kaayo nga mga Elder sa Israel, karon sa yuta, kinsa nakahibalo sa kahulugan sa pulong endowment. Aron makahibalo, sila kinahanglang makasinati; ug sa pagsinati, usa ka templo ang kinahanglan nga pagatukuron (DBY, 415–16).

Tuguti ako nga mohatag og gamay nga kahulugan. Ang inyong endowment mao, ang pagdawat sa tanan niadtong mga ordinansa diha sa balay sa Ginoo, nga inyong gikinahanglan, human kamo mobiya niini nga kinabuhi, aron kamo makabalik ngadto sa presensya sa Amahan, moagi sa mga anghel kinsa nagbarug isip mga bantay (DBY, 416).

Kinsa ang nakadawat ug nakasabut sa mao nga endowment, niini nga pundok? … Ang mga yawe niini nga mga endowment anaa taliwala kaninyo, ug liboan ang nakadawat niini, aron nga ang Yawa, uban sa iyang mga sulugoon, kinahanglang dili magtuo nga siya makalaglag pag-usab sa balaan nga Priesthood gikan sa yuta, pinaagi sa pagpatay sa pipila, kay siya dili makahimo niini. Ang Dios mopahigayon sa iyang kamot, alang sa katapusang higayon, sa pagtubos sa iyang mga katawhan, sa matinuoron nga kasingkasing, ug si Lucifer dili makapugong kaniya (DBY, 416).

Gikinahanglan gayud nga ang mga Santos makadawat sa dugang mga ordinansa sa balay sa Dios sa dili pa kining mubo nga pagpakabuhi matapos, aron sila makaandam ug makahimo sa pag-agi sa mga bantay nga padulong ngadto sa celestial nga gingharian ug ngadto sa atubangan sa Dios (DBY, 395).

Ang mga ordinansa sa balay sa Dios alang sa kaluwasan sa tawhanong pamilya. Kita … naghupot sa mga yawe sa kaluwasan nga gihatag ngadto sa mga katawhan gikan sa kalangitan pinaagi sa Ginoong Makagagahum; ug sanglit nga adunay naghupot niini nga mga yawe, importante nga sila mogamit niini alang sa kaluwasan sa tawhanong pamilya. Ang pagtukod sa mga templo, mga dapit diin ang mga ordinansa sa kaluwasan gipangalagad, gikinahanglan nga tumanon ang plano sa katubsanan, ug kini usa ka mahimayaon nga hilisgutan diin ipamulong ngadto sa mga Santos (DBY, 396–97).

Usahay akong bation nga mowali sa mga lalaki ug mga babaye kinsa misulod ngadto sa mga pakigsaad nga wala makaamgo sa matang sa mga pakigsaad nga ilang himoon, ug kinsa mohimo og gamay o walay paningkamot sa pagtuman niini (DBY, 396).

Ang ubang mga Elder moadto sa mga nasud ug mosangyaw sa Ebanghelyo sa kinabuhi ug kaluwasan, ug mobalik nga wala gayud makasabut sa matang sa pakigsaad. Gisulat diha sa Biblia nga ang matag tawo kinahanglan mopahigayon sa iyang kaugalingon nga mga panumpa, bisan kon masakitan ang iyang kaugalingon [tan-awa sa Ecclesiastes 5:4–5]; niining paagiha inyong mapakita sa tanang nilalang ug ngadto sa Dios nga kamo puno sa kaligdong (DBY, 396).

Ang mga ordinansa sa sealing makasumpay sa matarung nga mga kaliwatan ni Adan sa kahangturan pinaagi sa awtoridad sa priesthood.

Adunay daghang mga ordinansa sa balay sa Dios nga kinahanglang ipahigayon sa templo nga gitukod gayud alang niana nga katuyoan. Adunay ubang mga ordinansa nga atong mapahigayon nga walay templo. Nakahibalo kamo nga adunay uban nga inyong nadawat—bunyag, pagpandong sa mga kamot alang sa gasa sa Espiritu Santo, … ug daghang mga panalangin nga gihatag diha sa mga katawhan, nga kita adunay pribilehiyo sa pagdawat nga walay templo. Adunay ubang mga panalangin, nga dili madawat, ug mga ordinansa nga dili mapahigayon sumala sa balaod nga gipadayag sa Ginoo, nga kini dili mapahigayon sa templo nga giandam alang niini nga katuyoan. … Kon kita mopahigayon sa … sa ordinansa sa sealing [alang sa mga patay], ang mga ordinansa kalabut sa balaan nga Priesthood, sa pagsumpay sa kadena sa Priesthood gikan ni Amahang Adan hangtud karon, pinaagi sa pagbugkos sa mga anak ngadto sa ilang mga ginikanan, nga nabugkos alang sa atong mga katigulangan, sa uban pa, kini dili mahimo kon wala ang templo. Kon ang mga ordinansa ipahigayon diha sa mga templo nga itukod, [ang mga bata] ibugkos ngadto sa ilang mga [ginikanan], ug kadtong kinsa namatay na, balik ngadto sa Amahang Adan. Kinahanglan kini nga buhaton, tungod sa kadena sa Priesthood nga nabugto dinhi sa yuta. Ang Priesthood mibiya sa mga katawhan, apan ang katawhan ang unang mibiya sa Priesthood. Sila milapas sa mga balaod, miusab sa ordinansa, ug misupak sa walay katapusan nga pakigsaad [tan-awa sa Isaias 24:5], ug ang Priesthood mibiya kanila; apan kini dili mahitabo hangtud sila mibiya sa Priesthood. Kini nga Priesthood gipahiuli na pag-usab, ug pinaagi sa awtoridad niini kita isumpay sa atong mga amahan, pinaagi sa ordinansa sa pagbugkos, hangtud nga kita makaporma og hingpit nga kadena gikan ni Amahang Adan hangtud sa katapusan [tan-awa D&P 128:18]. Kini nga ordinansa dili ipahigayon bisan asa apan diha lamang sa templo; ni ang mga anak mabugkos ngadto sa buhi nga mga ginikanan sa bisan asang lugar gawas sa templo. … Dayon ang mga ginikanan, human madawat ang ilang mga endowment ug nabugkos karon ug sa kahangturan, ug sila manganak; sila gipanganak ug natawo ubos sa pakigsaad ug sila mao ang adunay katungod nga manununod sa gingharian, naghupot sila sa mga yawe sa gingharian. Ang mga bata nga matawo ngadto sa mga ginikanan, sa dili pa ang naulahi mosulod ngadto sa kahingpitan sa pakigsaad, kinahanglang mabugkos ngadto kanila aron mahimong legal nga manununod sa Priesthood. Tinuod nga sila makadawat sa mga ordinansa, sila makadawat sa ilang mga endowment, ug mapanalanginan uban sa ilang mga ginikanan, apan sa gihapon ang mga ginikanan dili makaangkon kanila sa legal ug pinasubay sa balaod diha sa kahangturan gawas nga sila mabugkos ngadto kanila. Apan ang kadena dili mahuman nga wala gipahigayon kining ordinansa sa pagbugkos (DBY, 399–401).

Kon dili pa sa unsay gipadayag mahitungod sa mga ordinansa sa pagbugkos, ang mga bata nga natawo sa gawas sa pakigsaad dili mabugkos ngadto sa ilang mga ginikanan (DBY, 397).

Ang ordinansa sa pagbugkos kinahanglang mapahigayon dinhi … hangtud ang kadena sa henerasyon mahimong hingpit diha sa mga ordinansa sa pagbugkos balik ngadto ni Amahang Adan, busa, kita gimandoan sa pagpundok sa atong mga kaugalingon sa paggawas gikan sa Babelon [tan-awa sa D&P 133, 14], ug sa pagbalaan sa atong mga kaugalingon, ug sa pagtukod sa Zion sa Dios, pinaagi sa pagtukod og mga siyudad ug mga templo, magtubos sa mga nasud gikan sa kaawaaw nga kinaiyahan, hangtud nga ang yuta mabalaan ug maandam nga kapuy-an sa Dios ug sa mga anghel (DBY, 407).

Mga Sugyot alang sa Pagtuon

Ang mga templo mao ang mga balay sa Ginoo diin ang sagrado nga mga ordinansa gipangalagad aron sa pag-andam sa mga Santos alang sa kahimayaan.

Ngano nga kita motukod og mga templo? Ngano nga ang pagtukod og mga templo maoy hinungdan nga “adunay pagpakigbatok … nga mahitabo”? Ngano nga si Presidente Young miingon, “Gusto akong makigbatok sila pag-usab”?
Sa unsa nga mga paagi nga ang tulumanon sa templo makapahimo kanato nga “katambayayong sa atong Ginoo ug Manluluwas”? Unsaon nato sa pagkahibalo nga ang atong “mga trabaho gidawat sa Ginoo”?
Si Presidente Young miingon, “Dili kita gusto nga adunay magbagulbol mahitungod [sa] templo.” Ngano nga ang “malipayong maayong buot” ug pagkaandam sa pagsunod gikinahanglan alang sa pagtukod og mga templo ug alang sa pagsimba sa templo? Unsa ang inyong nahimo nga nakatabang kaninyo nga dili magbagulbol mahitungod sa pagtukod og mga templo ug pagsimba sa mga templo? Ngano nga ang mga ordinansa sa kaluwasan mao ang “una ug labing importante” diha sa atong mga kasingkasing ug mga lihok?

Ang endowment makahimo kanato sa pagbalik pipila ka adlaw ngadto sa presensya sa Ginoo.

Unsa ang gitudlo ni Presidente Young mahitungod sa katuyoan sa endowment sa templo?
Unsa ang mga kakuyaw sa paghimo og mga pakigsaad nga dili makahibalo sa sagrado nga kahimtang niini? Sa unsa nga paagi kita makasabut sa matang sa mga pakigsaad ug sa “pagpaningkamot sa pagtuman niini”? Unsaon nato sa pagtabang ang atong mga anak nga makasabut sa sagrado nga matang sa mga pakigsaad nga gihimo sa templo?

Ang mga ordinansa sa pagbugkos makapasumpay sa matarung nga mga kaliwatan ni Adan sa kahangturan pinaagi sa awtoridad sa priesthood.

Unsay buot ipasabut sa pagporma og “hingpit nga kadena gikan ni Amahang Adan hangtud sa katapusan”? Unsa ang atong responsibilidad sa pagporma niini nga kadena? (Tan-awa usab sa D&P 128:18.) Sa unsa nga paagi nga ang paghimo sa mao nga mga koneksyon makapanalangin kanato ug sa atong mga pamilya karon ug sa umaabut?
Sa unsa nga paagi nga ang ordinansa sa pagbugkos makatabang kanato sa “paggawas gikan sa Babelon, ug pagbalaan sa atong mga kaugalingon, ug pagtukod sa Zion sa atong Dios”?
Unsa ang inyong mabuhat sa paghimo sa ordinansa sa pagbugkos diha sa templo nga hingpit nga epektibo sa inyong kinabuhi? Unsa ang inyong bation kon kamo makahibalo nga kamo makahimo og panagsumpay sa mahangturong pamilya sa inyong mga katigulangan, sa inyong kaliwatan, ug sa inyong duol nga pamilya? Sa unsa nga paagi nga kini nga kahibalo makaimpluwensya unsay inyong bation mahitungod sa pagsunod sa ebanghelyo matag adlaw?