Pagbalaan sa Adlaw nga Igpapahulay ug sa Sakrament

Sa adlaw human sila miabut sa Salt Lake Valley, si Presidente Brigham Young mihimo og mubo nga pakigpulong ngadto sa kampo sa pioneer mahitungod sa pagbalaan sa adlaw nga Igpapahulay. Uban sa usa ka kamingawan nga paga-ugmaron, mga tanum nga igtatanum, ug uban pang mga dinalian nga buluhaton sa mao nga panahon, siya “mipahibalo sa mga kaigsoonan nga … kinahanglan dili gayud sila magtrabaho sa Dominggo, kon [sila motrabaho gayud] mawala kanila ang gidaghanon sa kalima pil-a kon pilay ilang kita pinaagi niini, ug kinahanglang dili sila mangisda o mangayam niana nga adlaw.” Miingon siya nga “kinahanglang adunay miting sa matag adlaw nga Igpapahulay niini nga dapit o bisan asa kita mahimutang” (WWJ, 25 sa Hulyo 1847). Si Presidente Young padayong nagpahimangno sa mga Santos sa pagbalaan sa Adlaw nga Igpapahulay agig paghinumdom sa atong Dios ug sa atong balaan nga relihiyon” (DBY, 165).

Mga Pagtulun-an ni Brigham Young

Ang Pagbalaan sa Adlaw nga Igpapahulay magdala sa temporal ug espirituhanon nga mga panalangin.

Dalha kini nga basahon (ang basahon nga Doktrina ug mga Pakigsaad) ug inyong mabasa dinhi nga ang mga Santos kinahanglang magtigum sa panahon sa Adlaw nga Igpapahulay [tan-awa sa D&P 59:9–16]. … Kini nga mga tawo nga gitawag og mga Santos sa Ulahing mga Adlaw, gipahimangnoan pinaagi sa mga pagpadayag nga gihatag sa Ginoo, sa pagpundok sa ilang kaugalingon niini nga adlaw. Niini nga sugo kita gipahimangnoan sa pagpundok ug paghinulsol sa atong mga sala ug pagkumpisal sa atong mga sala ug pag-ambit sa [sakrament] aron sa paghinumdom sa kamatayon ug mga pag-antus sa atong Ginoo ug Manluluwas (DBY, 164).

Kon ang mga tawo mapundok sa pagsimba kinahanglan nilang kalimtan ang ilang kalibutanon nga mga kabalaka diin sila nahisakop, niana ang ilang mga hunahuna mahimutang sa maayo nga kondisyon sa pagsimba sa Ginoo, sa pagtawag kaniya diha sa pangalan ni Jesus, ug sa pag-angkon sa iyang Espiritu Santo, aron sila makadungog ug makasabut sa mga butang sama nga sila anaa sa kahangturan, ug makahibalo unsaon sa pagtugkad sa mga kalooy sa atong Dios. Mao kini ang panahon nga ang ilang mga hunahuna maablihan, sa pagtan-aw sa dili makita nga kinaiya sa Dios, nga iyang ipadayag pinaagi sa iyang Espiritu (DBY, 167).

Ang tanan kinahanglang hilum kon managpundok kita dinhi sa pagsimba sa Dios. Hinumdumi ug sulayi ang hingpit nga kahilum, ug ayaw paghagawhaw, pagsulti, o ibagnos ang inyong mga tiil (DBY, 167–68).

Pinaagi sa pagbiya sa atong mga umahan sa makadiyot, sa pagpundok aron sa pagsimba sa atong Dios, akong ipaniguro kaninyo nga ang atong mga tanum mas mamaayo pa kay sa atong igahin ang tanan natong panahon diha sa atong mga umahan. Mamu-bo kita ug mananom ug maghago, apan dili gayud nato hikalimtan nga ang Dios maoy mihatag sa tubo, ug pinaagi sa panagpundok, ang atong panglawas ug espiritu mas mamaayo pa, mas nindot kita nga tan-awon, ug ang mga butang niini nga kalibutan modaghan pa nga maglibut kanato, ug mas labaw pa kitang makakat-on kon unsaon sa pagpahimulos niini (DBY, 167).

Kinahanglan natong balaanon ang [Adlaw nga Igpapahulay] alang sa atong kaugalingong temporal ug espiritwal nga kaayohan. Kon makita nato ang mag-uuma nga nagdali, nga siya kinahanglan moadto sa iyang anihunon, ug sa pagkumpay, pagkoral, o sa pagpundok sa iyang mga kabakahan sa panahon sa Adlaw nga Igpapahulay, kutob sa ako adunay labut, matawag nako siya nga huyang sa pagtuo. Nawala kaniya ang espiritu sa iyang relihiyon, kapin o kulang. Ang unom ka adlaw igo na kaayo alang kanato sa pagtrabaho [tan-awa sa Exodo 20:9–11], ug kon gusto kita nga magdula, magdula sulod sa unom ka adlaw; kon naghunahuna kita nga moadto og excursion, gamita ang usa nianang unom ka adlaw, apan sa ikapito nga adlaw, lakaw ngadto sa dapit nga simbahanan (DBY, 165).

Kay sa motugot sa mga buluhaton nga mogamit sa Adlaw nga Igpapahulay, … kinahanglang mas minus ang atong buhaton kutob sa mahimo; kon gikinahanglan nga magluto, buhata kini; apan kon kini mahimong likayan, kini mas maayo. Sa pagbalaan sa Adlaw nga Igpapahulay sigun sa balaod ni Moises, sa pagkatinuod, ako wala mohimo niini, kay kini mahimong molapas sa akong gahum. Sa gihapon, ubos sa bag-o nga pakigsaad, kinahanglang hinumduman nato ang paghupot nga balaan sa usa ka adlaw sa semana isip adlaw aron sa pagpahulay—agi og handumanan sa pagpahulay sa Ginoo ug sa uban pang mga Santos; ingon man alang sa atong temporal nga kaayohan, kay kini gihimo alang sa tino nga katuyoan sa paghatag og kaayohan sa tawo. Nahisulat dinhi sa basahon (sa Biblia), nga ang Adlaw nga Igpapahulay gihimo alang sa tawo. Usa kini ka panalangin kaniya. Gamay lamang gayud kaayo kon mahimo ang angay trabahoon nianang adlawa; igahin gayud kini nga usa ka adlaw sa pagpahulay, sa pagpundok diha sa gipili nga dapit, sumala sa pagpadayag [tan-awa sa D&P 59:10–12], pagkumpisal sa atong mga sala, pagdala sa atong mga ikapulo ug mga halad, ug pagdala sa atong mga kaugalingon atubangan sa Ginoo (DBY, 164).

Karon, hinumdumi, akong mga kaigsoonan, kinsa kadtong mag-skating, magsakay-sakay og tartanilya o mouban og mga excursion sa Adlaw nga Igpapahulay—ug adunay daghang naghimo niini nga buhat—mga huyang og pagtuo. Sa hinay-hinay, sa ginagmay, anam-anam, ang espiritu sa ilang relihiyon mawagtang gawas sa ilang kasingkasing ug sa ilang mga pagbati, ug sa dili madugay magsugod sila og pangita sa mga sayop sa ilang mga kaigsoonan, sayop sa mga doktrina sa Simbahan, sayop sa organisasyon, ug sa katapusan ilang talikdan ang Gingharian sa Dios ug moadto sa kalaglagan. Manghinaut gayud ako nga kamo makahinumdom niini, ug mosulti niini ngadto sa inyong mga silingan (DBY, 165).

Kabus man kita o datu, kon taligam-an nato ang pag-ampo ug ang atong mga sakrament miting, atong gitaligam-an ang Espiritu sa Ginoo, ug ang espiritu sa kangitngit mopatigbabaw kanato (DBY, 170).

Anaa kita ubos sa panginahanglan nga magpundok dinhi gikan sa Adlaw nga Igpapahulay ngadto sa laing Adlaw nga Igpapahulay, ug diha sa mga miting sa Ward, … sa pagtudlo, pagsulti, pag-ampo, pagkanta, ug pagawhag. Sa unsang hinungdan? Aron kita mahinumdom sa atong Dios ug sa atong balaan nga relihiyon. Kini nga batasan gikinahanglan ba? Oo; tungod kay kita may kalagmitan nga makalimot—may kalagmitan nga mahisalaag, mao nga gikinahanglan nato ang Ebanghelyo nga mosulti sa atong mga dunggan labaw pa kay sa kausa, kaduha, o katulo sa usa ka semana, o, tanawa, mobalik na usab kita sa atong mga sayop nga binuhatan sa kalibutan (DBY, 165).

Ang Ginoo mitanum ngari kanato og pagkadiosnon; ug kana nga diosnong imortal nga espiritu kinahanglan nga pakan-on. Ang kalibutanong pagkaon ba makatubag niana nga katuyoan? Dili; mohimo lamang kini sa lawas nga buhi kutob nga ang espiritu nag-uban niini, diin naghatag kanato og kahigayunan sa pagbuhat og maayo. Kana nga pagkadiosnon sulod kanato nagkinahanglan og pagkaon gikan sa Tuburan diin kini migula. Dili kini sa yuta, dili kini yutan-on, apan gikan sa langit. Ang baruganan sa kinabuhing dayon, sa Dios ug sa pagkadiosnon, mao lamang ang makapakaon sa imortal nga kapasidad sa tawo ug mohatag sa tinuod nga katagbawan (DBY, 165).

Ang pag-anhi niini nga Tabernakulo sa pagbalaan ug pagbuhat sa kabubuton sa Dios usa ka adlaw sa semana, ug pagsunod sa kaugalingon natong gusto ug pagbuhat sa atong kaugalingong kabubut-on sa tanang lain nga panahon, usa ka binuang, kini walay kapuslanan, ug usa ka hingpit nga pagbugal-bugal diha sa pagserbisyo sa Dios. Kinahanglan kita nga mobuhat sa kabubut-on sa Dios, ug mogahin sa tanan natong panahon alang sa katumanan sa iyang mga katuyoan, maanaa man kita sa Tabernakulo o bisan asa (DBY, 166).

Lunes, Martes, Miyerkules, Huwebes, Biyernes, ug Sabado kinahanglang igahin alang sa kahimayaan sa Dios, sama sa Dominggo, o kita mapakyas sa tumong sa atong paningkamot [tan-awa sa D&P 59:11] (DBY, 166).

Magpundok kita aron sa paglig-on ug aron malig-on.

Karon [sa Adlaw nga Igpapahulay] nagkapundok kita aron magkaistoryahanay, aron malig-on ug makabuhat og maayo sa usag usa (DBY, 167).

Samtang kita adunay kahigayunan sa pag-istoryahanay sa usag usa, atong litukon ang mga pulong nga makahupay ug makalipay. Kon kamo anaa sa impluwensya sa Espiritu sa kabalaan ug kaputli, ipadan-ag ang inyong kahayag; apan kon kamo gisulayan ug gitintal ug anaa sa paghampak ni Satanas, itago kana nga hunahuna diha sa inyong kaugalingon—takuma ang inyong ba-ba; kay ang pagsulti makaani og bunga, sa maayo o dautan nga kinaiya (DBY, 166).

Kon ang usa ka [tawo] mobukas o motapos sa usa ka miting pinaagi sa pag-ampo, ang matag lalaki, babaye, ug bata sa kongregasyon kinsa mipahayag nga usa siya ka Santos kinahanglang walay tinguha o mga pulong diha sa ilang kasingkasing ug mga ba-ba gawas hinoon sa ipamulong sa [tawo] nga maoy gihalad alang sa tanan nga kongregasyon (DBY, 170).

Kon adunay usa kaninyo nga mobati nga ang miting walay kinabuhi, sigun sa akong mabatian usahay gikan sa ubang kaigsoonan, niana ang inyong katungdanan mao ang pag-adto ug pagbutang og kinabuhi niana nga miting, ug pagbuhat sa inyong bahin nga makamugna og dugang nga Espiritu ug gahum sa Dios diha sa mga miting sa inyong dapit (DBY, 170).

Akong gamiton ang higayon sa pagsugyot ngadto sa atong mga kaigsoonan nga mamulong sa kongregasyon nga ang atong mga sermon kinahanglan nga mubo, ug kon wala man gani kini kinabuhi ug espiritu pamub-a pa gayud kini, kay kita walay panahon niini nga Komperensya nga tugutan ang mga Elder kinsa namulong sa paghatag og taas nga sermon, apan kita adunay panahon sa paghatag og pipila ka mga pulong sa paghatag sa atong pagpamatuod, sa paghatag og pipila ka mga pulong sa pagtambag aron pagdasig sa mga Santos, sa paglig-on sa mga huyang, sa pagpaningkamot nga matabangan kadtong nagduhaduha, ug aron magpadayon sa unahan ang Gingharian sa Dios (DBY, 167).

Mga kaigsoonan, ako adunay usa ka hangyo kaninyo. Kon kamo mamulong, sulti gayud aron kami makadungog ug makasabut kaninyo. … Kon kamo walay ikasulti, dawata ang akong tambag, ug lingkod sa inyong lingkuranan. Kon kamo adunay ikasulti, isulti kini, ug inig ka human nimo, undang na. Tuguti nga ang inyong mga pagbati pagadumalahon ug pagapugngan pinaagi sa mga baruganan sa kinabuhing dayon, nga kinahanglan sa mga anak sa Dios, maglipay sa kamatuoran ug pagkamatarung (DBY, 167).

Ang pinakadako nakong tinguha ngadto sa akong Amahan ug Dios mao nga unta ako mamulong nga ang akong mga pulong iyang dawaton ug makaayo niadtong mga makadungog kanako (DBY, 168).

Kon ako nagtinguha sa pagpakigpulong sa usa ka kongregasyon, ako … mangayo ngadto sa Dios nga akong Langitnong Amahan diha, sa pangalan ni Jesukristo, nga hatagan ako sa iyang Espiritu, ug mobutang sulod sa akong kasingkasing sa mga butang nga gusto niya nga akong ipamulong (DBY, 168).

Gikinahanglan nako ang atensyon sa kongregasyon ug ang hugot nga pagtuo niadtong adunay hugot nga pagtuo; gikinahanglan nako ang kaalam sa Dios ug ang iyang Espiritu sulod sa akong kasingkasing aron ako makapamulong alang sa kaayohan sa mga katawhan. Bisan og ako usa ka tigpamulong sa publiko sulod sa trayntay siyete ka tuig na, tagsa ra kaayo akong mobarug atubangan sa kongregasyon nga dili nako bation ang sama sa usa ka bata nga kamaulawon; kon ako mabuhi sama sa edad ni Methuselah dili ako makahibalo kon mabuntog ko kini. Aduna kini mga rason nga akong nasabtan. Kon ako motan-aw sa nawong sa adunay kahibalo nga mga tawo akong gitan-aw ang imahen sa usa ka Dios nga akong gialagaran. Wala kay makita kon dili ang piho nga bahin sa pagkadiosnon nga anaa sulod kanila; ug bisan kita gisul-oban og mga lawas nga may imahen sa atong Dios, sa gihapon kini nga mortalidad matago niana nga bahin sa pagkadiosnon nga atong napanunod gikan sa atong Amahan. Mao kini ang hinungdan sa akong kamaulawon (DBY, 168).

Sa pagpamulong sa usa ka kongregasyon, bisan kon ang mamumulong dili makasulti og labaw sa tunga sa dosena ka mga pulong, ug kadtong mga kiwaw kaayo nga pagkasulti, kon ang iyang kasingkasing putli atubangan sa Dios, kadtong putol-putol nga pagkasulti mas dako pa og bili kay sa batid nga pagkapamulong nga walay Espiritu sa Ginoo ug mas labaw pa og bili diha sa panan-aw sa Dios, mga anghel, ug sa tanang maayo nga mga tawo. Sa pag-ampo, bisan kon ang mga pulong sa usa ka tawo diyutay ra ug kiwaw ang pagkasulti, kon ang kasingkasing putli atubangan sa Dios, kana nga pag-ampo mas daghan pa og madawat kay sa pagkabatid ni Cicero [usa ka batid nga mamulong nga taga-Roma niadtong unang siglo B.C.]. Unsa ang hunahuna sa Ginoo, nga Amahan natong tanan, kabahin sa atong pamaagi sa pagpahayag? Ang yano, matinud-anon nga kasingkasing mas hatagan og pagtagad sa Ginoo kay sa pasigarbo, kabantug, kangilngig, ug kabatid nga minugna sa tawo. Kon siya motan-aw sa usa ka kasingkasing nga puno sa sinseridad, kaligdong, ug sama sa bata nga ka yano, makita niya ang usa ka baruganan nga molahutay sa hangtud—“Mao kana ang espiritu sa akong kaugalingon nga gingharian—ang espiritu nga akong gihatag ngadto sa akong mga anak” (DBY, 169).

Ako nagtuo nga atong katungdanan ang pagsunod sa tanang butang nga maayo, matahum, dungganon ug dalaygon. Angay natong sundon ang maayong mga mamumulong, ug pagtuon aron sa paghatud sa atong mga ideya ngadto sa usag usa sa pinakamaayo ug maayong pagkapili nga pinulongan, ilabi na kon kita maghatag og mahinungdanon kaayong mga kamatuoran sa Ebanghelyo sa kalinaw ngadto sa mga katawhan. Kanunay ako nga mogamit sa pinakamaayo nga pinulongan nga akong magamit (DBY, 169).

[Hinoon,] nagtuo ako … nga kon anaa kanako ang tanang kahanas sa pinulongan nga naangkon sa makinaadmanon, ang akong espiritu labaw nga malipay sa usa ka pag-istoryahanay nga susama sa mga bata, ug kana usab, sa usa ka yano nga pinulongan, kay sa pinaka makinaadmanon nga estilong gigamit. Ang usa ka yano, tin-aw nga pamaagi sa pagpahayag og mga ideya mao ang labaw nga makalipay kanako (DBY, 169).

Ang adlaw sa puasa gihatag aron sa pagtabang sa mga nanginahanglan ug sa paglig-on sa ilang mga pagpamatuod.

Nasayud kamo nga ang una nga Huwebes sa matag bulan [karon una nga Dominggo] gihimo nato nga adlaw sa puasa. Pila sa ania dinhi ang nasayud sa sinugdanan niini nga adlaw? Kaniadto sa wala pa ang pagbayad og ikapulo, ang mga kabus gisuportahan pinaagi sa mga donasyon. Moadto sila kang Joseph ug mangayo og panabang, sa Kirtland, ug siya miingon nga kinahanglan gayud nga adunay adlaw sa puasa, diin kini nadesisyunan. Pagahimoon kini kausa sa usa ka bulan, sama karon, ug tanan nga unta kaonon nianang adlawa, ang harina, o karne, o mantikilya, o prutas, o bisan unsa, dad-on ngadto sa miting sa puasa ug ihatag ngadto sa tawo nga gipili sa tuyo nga mohipos niini ug sa pag-apud-apod niini ngadto sa mga kabus (DBY, 169).

Sa atong mga miting sa adlaw sa puasa, ang mga Santos magpundok sa pagpahayag sa ilang mga pagbati ug sa paglig-on sa usag usa sa ilang pagtuo sa balaan nga Ebanghelyo (DBY, 169).

Wala ba kamo makadawat sa ingon ka daghan nga espiritu sa salabutan, sa espiritu sa kahibalo, ug sa makahupay nga mga impluwensya sa Espiritu Santo, nga mopabarug sa mga tawo ug mopamatuod sa mga butang sa Dios nga ilang nahibaloan, sa mga butang nga ilang nasinati sa kaugalingon? Wala ba kana modala sa tataw nga paagi nganha sa inyong mga hunahuna sa kamaayo sa Ginoo sa pagpadayag nganha kaninyo sa mga kamatuoran sa Ebanghelyo? Wala ba kana molig-on sa inyong hugot nga pagtuo, mohatag kaninyo og dugang pagsalig ug mosaksi diha kaninyo nga kamo mga anak sa Dios? Sa labing siguro kini nakahimo. Busa, kon adunay mopamatuod sa mga butang sa Dios, nagpalig-on kini sa ilang mga kaigsoonan, sama gayud sa karaan nga mga panahon dihang sila nagsunod sa tambag sa, “Pagpamulong kanunay ngadto sa usag usa,” “lig-una ang imong mga kaigsoonan,” ug daghan pa (DBY, 170).

Pinaagi sa pag-ambit sa sakrament, atong hinumduman ang Manluluwas ug bag-ohon ang atong mga pakigsaad sa atong Langitnong Amahan.

Moingon ako ngadto sa mga kaigsoonan, diha sa pangalan sa Ginoo, nga atong katungdanan ug gikinahanglan gikan kanato, sa atong Langitnong Amahan, pinaagi sa espiritu sa atong relihiyon, pinaagi sa atong mga pakigsaad sa Dios ug sa usag usa, nga kita mobuhat sa mga ordinansa sa balay sa Dios, ug ilabi na sa Adlaw nga Igpapahulay, sa pagtambong sa Sakrament sa Panihapon sa Ginoo. Dayon motambong sa mga miting sa Ward ug sa mga miting sa Korum (DBY, 171).

Sa ordinansa [sa sakrament] kita motambong niini aron …, atong mapakita sa Amahan nga kita nahinumdom ni Jesukristo, ang atong Magulang nga Igsoon; kita mopamatuod kaniya nga kita andam sa pagdala ngari kanato sa iyang pangalan. Kon kita naghimo niini, buot nako nga ang mga hunahuna ingon man ang atong lawas ania dinhi. Buot nako nga ang tibuok pagkatawo ania dinhi kon moanhi kamo sa miting (DBY, 171).

Ako moawhag sa mga kaigsoonang lalaki ug mga babaye sa pagdawat niini nga mga ordinansa matag Dominggo, kon [kamo] managpundok. … Mag-ampo ako alang kaninyo, mga kaigsoonan, sa hingpit nga pagpamalandong niini nga mga ordinansa ug pagtinguha sa Ginoo sa tibuok ninyong kasingkasing nga unta kamo makadawat sa gisaad nga mga panalangin pinaagi sa pagkamasulundon ngadto niini. Itudlo ngadto sa inyong mga anak ang pagbalaan niini; isilsil diha sa ilang mga hunahuna ang kaimportante niini. Ang pagbalaan niini sama ra usab ka kinahanglanon sa atong kaluwasan sama sa ubang mga ordinansa ug mga kasugoan nga gipasiugdahan aron ang mga katawhan mabalaan, nga si Jesus unta mopanalangin kanila ug mohatag kanila sa iyang espiritu, ug mogiya ug motudlo kanila nga sila unta sa ilang kaugalingon makaangkon og kinabuhing dayon. Isilsil ang kasagrado niining importante nga ordinansa diha sa mga hunahuna sa inyong mga anak (DBY, 171–72).

Kita [moambit sa sakrament] agi og paghinumdom sa pagkamatay sa atong Manluluwas; gikinahanglan kini gikan sa iyang mga disipulo hangtud sa iyang pagbalik, bisan unsa pa tingali kana kadugay nga moabut. Bisan unsa pa ka daghang mga henerasyon ang moabut ug molabay, ang mga tumutuo kaniya gikinahanglan nga mokaon sa pan ug moinom sa bino [o tubig sa karon] sa paghinumdom sa iyang pagkamatay ug mga pag-antus hangtud sa iyang pagbalik. Nganong gikinahanglan man nila nga mobuhat niini? Aron sa pagsaksi ngadto sa Amahan, ngadto ni Jesus ug ngadto sa mga anghel nga sila mga tumutuo ug nagtinguha sa pagsunod kaniya pinaagi sa pagpakatawo pag-usab, pagsunod sa iyang mga kasugoan, pagtukod sa iyang Gingharian, motahud sa iyang pangalan ug moalagad kaniya uban sa bug-os nga kasingkasing, nga unta sila mahimong angayan nga mokaon ug moinom uban kaniya sa Gingharian sa Amahan. Mao kini ang hinungdan nga ang mga Santos sa Ulahing mga Adlaw moambit sa ordinansa sa Katapusang Panihapon (DBY, 172).

Unsa nga mga kaayohan ang atong makuha gikan niini nga ordinansa? Kana mao ang pagsunod sa mga sugo sa Ginoo. Kon kita mosunod sa mga kasugoan sa atong Langitnong Amahan, kon kita adunay hustong panabut sa mga ordinansa sa balay sa Dios, atong madawat ang tanang mga saad nga gilambigit sa pagkamasulundon sa iyang mga kasugoan (DBY, 172).

Usa kini sa pinakadakong mga panalangin nga atong maangkon, ang pag-adto atubangan sa Ginoo, ug atubangan sa mga anghel, ug atubangan sa usag usa, sa pagsaksi nga kita nahinumdom nga si Ginoong Jesukristo namatay alang kanato. Kini nagpamatuod ngadto sa atong Amahan nga kita nahinumdom sa atong mga pakigsaad, nga kita nahigugma sa iyang Ebanghelyo, nga kita nahigugma sa pagsunod sa iyang mga kasugoan, ug sa pagtahud sa pangalan ni Ginoong Jesus dinhi sa yuta (DBY, 172).

Mga Sugyot alang sa Pagtuon

Ang Pagbalaan sa Adlaw nga Igpapahulay magdala sa temporal ug espirituhanon nga mga panalangin.

Unsa ang mga kinahanglanon nga giingon sa Ginoo alang sa pagbalaansa Adlaw nga Igpapahulay? Unsa ang mga kaayohan sa pagbalaan saAdlaw nga Igpapahulay? (Tan-awa usab sa D&p 59:9–16.)
Si Presidente Young namulong, “Anaa kita ubos sa panginahanglan nga magpundok … diha sa mga miting.” Unsa ang iyang giingon nga atong buhaton kon kita “magpundok aron sa pagsimba”? Unsa ang makabalda kanato sa pagpundok aron sa pagsimba sa Dios sa panahon sa Adlaw nga Igpapahulay?
Sumala ni Presidente Young, unsay mahitabo “sa hinay-hinay” kon kita dili mosunod sa sugo nga balaanon ang Adlaw nga Igpapahulay? Sa pagkutlo gikan sa mga pulong ni Presidente Young, unsa nga mga pangutana ang ikapangutana nato sa atong kaugalingon sa pagsuta sa mga butang nga angayng buhaton sa Adlaw nga Igpapahulay? (Sama pananglit): Ang kalihokan ba maoy alang sa atong espirituhanon nga kaayohan? Mialima ba kini sa atong pagtuo? Nakatabang ba kini kanato nga makapanalangin sa uban?)
Nganong kinahanglan man kita nga mosimba sa Ginoo matag adlaw ug dili lamang sa Adlaw nga Igpapahulay? (Tan-awa usab sa D&p 59:11.) Sa unsa nga paagi nga ang pagsimba panahon sa mga adlaw sa semana sama o lahi kay sa pagsimba sa Adlaw nga Igpapahulay? Unsaon man nato sa paggahin ang matag adlaw “alang sa himaya sa Dios”?

Magpundok kita aron sa paglig-on ug aron malig-on.

Nganong importante nga kita magpundok aron sa pagsimba sa Adlaw nga Igpapahulay? Unsa man diay ang angayan natong intensyon samtang kita makighimamat sa usag usa, mamulong, o magtudlo sa atong mga miting sa Adlaw nga Igpapahulay? (Tan-awa usab sa D&P 43:8–9.) Sa unsa nga paagi nga ang inyong pakig-uban sa mga Santos sa Ulahing mga Adlaw nakatabang kaninyo?
Unsa nga tambag ang gihatag ni Presidente Young niadtong gidapit sa pagpamulong sa mga miting sa Simbahan? Nganong ang impluwensya sa Espiritu Santo mas importante man kay sa paggamit og nindot kaayo nga mga pulong? Unsa ang gilauman ni Presidente Young sa mga miyembro sa kongregasyon? Unsaon kaha nato sa “pagbutang og kinabuhi” sa atong mga miting sa maayong paagi? (Tan-awa usab sa D&P 50:21–24.)

Ang adlaw sa puasa gihatag aron sa pagtabang sa mga nanginahanglan ug sa paglig-on sa ilang mga pagpamatuod.

Sumala ni Presidente Young, unsay hinungdan nga gihimo ang adlaw sa puasa?
Unsang impluwensya ang mahimo sa paghatag og ubay-ubay nga halad sa puasa ngadto sa naghatag?
Sa adlaw nga Dominggo nga tingpuasa kita adunay kahigayunan nga makapaambit sa pagpamatuod ngadto sa usag usa. Unsa may buot ipasabut sa paghatag og pagpamatuod? Nganong importante man kaayo ang paghatag og pagpamatuod ug makadungog sa uban nga mohimo niini? Giunsa man nato sa pag-impluwensya ang uban kon kita mopamatuod sa mga butang kalabut sa Dios? Sa unsang paagi kita napanalanginan niini nga pamaagi? Sa unsang paagi nga ang mga pagpamatuod sa uban nakalig-on sa inyong hugot nga pagtuo?

Pinaagi sa pag-ambit sa sakrament, atong hinumduman ang Manluluwas ug bag-ohon ang atong mga pakigsaad sa atong Langitnong Amahan.

Ang butang nga pinakamahuluganon sa atong mga miting sa Dominggo mao ang pag-ambit sa sakrament. Nganong gikinahanglan man sa Ginoo ang mahinuklugon nga partisipasyon sa sakrament? (Tan-awa usab sa D&p 27:2.)
Unsa ang atong mga pakigsaad kon kita moambit sa sakrament? (Tanawa sa mga pag-ampo alang sa sakrament diha sa D&p 20:75–79 o sa Moroni 4; 5.) Unsay gipasabut sa pagdala ngari kanato sa pangalan ni Kristo? Unsa ang gisaad sa Ginoo ngadto sa mga moambit sa sakrament uban sa hingpit nga katuyoan? Unsaon man nato sa pagkadawat niining gisaad nga mga panalangin?
Sa unsang paagi nga ang pag-ambit sa sakrament mopalig-on sa atong pasalig sa Manluluwas sa tanang adlaw sa tibuok semana? (Tan-awa usab sa D&P 59:9–12.)