Pagpili nga Maglakaw diha sa Pagkamasulundon

Si Presidente Brigham Young mimando sa paglalin sa liboan ka mga Santos ngadto sa Zion, sa kasagaran maghatag og instruksyon sa ingon nga ginagmayng mga detalye sama sa dili pagpapas-an og bug-at sa luya nga mga hayop uban sa dili mga luya. Hinoon, miawhag usab siya sa mga Santos sa pagpakita og malagsik nga pagpaningkamot sa kaugalingon ug sa paghimo og maalamong mga pagpili. Siya mitambag: “Hilabihan gayud kini ka kinahanglanon alang sa matag lalaki, babaye, ug bata kinsa midawat niini nga buhat ug mipundok ngadto sa Zion sa pagbuhat sa tanan nga iyang mahimo sa pagpadayon sa buhat sa Dios sa pagtukod sa Zion, ug sa pagtabang sa pagtubos sa ingon. … Ang atong kasibot niini nga paningkamot … adunay kalagmitan sa pagpalambo sa kalagsik ug pagpaningkamot sa kaugalingon diha sa mga Santos nga dili unta nila maangkon, kon wala pa sila mapugos sa pagsalig sa ilang kaugalingong mga kapanguhaan” (LL, 220–21). Si Presidente Young nagtudlo nga “ang tanang sakripisyo nga gipangayo sa Ginoo sa iyang mga katawhan mao ang higpit nga pagkamasulundon ngadto sa atong kaugalingong mga pakigsaad” (DBY, 225).

Mga Pagtulun-an ni Brigham Young

Kita adunay kabubut-on sa pagpili sa maayo o dautan, apan dili kita makapili sa mga sangputanan sa atong mga pagpili.

Ang tanang mabuot nga mga tawo adunay kabubut-on sa ilang mga kaugalingon; ug sumala sa ilang kaugalingon nga pagpili sila maluwas o masilutan (DBY, 62).

Makasabut ba ang mga tawo nga sa tinuoray gikinahanglan ang magkatugbang nga mga baruganan nga ibutang sa ilang atubangan, o kini nga kahimtang mahimo nga walay pagsulay, ug kita mahimo nga walay kahigayunan alang sa paggamit sa kabubut-on nga gihatag kanato? Makasabut ba sila nga dili kita makabaton og kinabuhing dayon gawas kon sa tinuoray kita nasayud ug nakasabut pinaagi sa atong kasinatian sa baruganan sa maayo ug sa baruganan sa dautan, sa kahayag ug sa kangitngit, kamatuoran, hiyas, ug kabalaan,–– usab sa bisyo, kadautan, ug kamalimbungon? (DBY, 66).

Ang tawo makahimo ug makapugong sa iyang kaugalingong mga lihok, apan dili siya makapugong sa mga resulta niini (DBY, 63).

Walay usa ka tawo dinhi sa yuta kinsa walay abilidad sulod sa iyang kaugalingon sa pagluwas o sa pagdaot sa iyang kaugalingon; ug ingon man sa kahimtang sa mga kanasuran (DBY, 67).

Adunay mga kinutuban sa kabubut-on, ug sa tanang mga butang ug sa tanang mga tawo, ug ang atong kabubut-on kinahanglang dili mosukwahi niana nga balaod. Ang tawo kinahanglang mopili sa kinabuhi o kamatayon [tan-awa sa Helaman 14:31], ug kon siya mopili sa kamatayon iyang gibutangan og kinutuban ang iyang kaugalingon, ug nga ang kabubut-on nga gihatag nganha kaniya hilabihan gayud ka pinugngan nga dili siya makagamit niini sa pagsupak sa balaod, nga dili maghimo sa iyang kaugalingon nga may tulubagon aron matul-id ug silutan sa Labawng Makagagahum (DBY, 63).

Ang tawo mahimong mohatag sa iyang kabubut-on o sa iyang katungod sa pagkapanganay [birthright], sama sa gihimo ni Esau sa karaan, apan kon mahatag na, dili na kini niya maangkon pag-usab; tungod niini, gikinahanglan kini alang kanato nga mahimong mabinantayon, ug dili mobaliwala niana nga kabubut-on nga gihatag ngari kanato. Ang kalainan tali sa matarung ug makasasala, kinabuhing dayon o kamatayon, kalipay o kaalaot, mao kini, niadtong kinsa nahimaya walay mga kinutuban o mga limitasyon sa ilang mga pribilehiyo, ang ilang mga panalangin adunay pagpadayon, ug ang ilang mga gingharian, mga trono, ug kamandoan, mga kayutaan, ug mga kagamhanan walay katapusan, gani sila naglambo sa tanang kahangturan; apan, kadtong kinsa misalikway sa tanyag, kinsa mitamay sa gitanyag nga mga kalooy sa Ginoo, ug miandam sa ilang mga kaugalingon nga mahanaw gikan sa iyang presensya, ug mahimong mga kauban sa mga yawa, mipahimo sa ilang kabubut-on nga malimitahan dayon, ug ang mga kinutuban ug mga limitasyon gipahamtang kanila (DBY, 63–64).

Ang Ginoo dili mopugos ni bisan kinsa nga tawo sa pagdawat sa Ebanghelyo, ug ako wala maghunahuna nga siya mopugos kanila sa pagsunod niini human nila kini madawat (DBY, 64).

Siya mihatag kanila sa pribilehiyo sa pagpili alang sa ilang mga kaugalingon, mamaayo man kini o dautan; apan ang resulta sa atong pagpili anaa gihapon sa iyang kamot (DBY, 62).

Ang mahangturong mga balaod diin siya ug ang tanan nagpuyo sa mga kahangturan sa mga Dios nagmando nga ang pagtugot sa nilalang kinahanglan gayud nga maangkon sa dili pa hingpit nga modumala ang Tiglalang (DBY, 65).

Dili ako mopugos sa usa ka lalaki o babaye ngadto sa langit. Daghan ang naghunahuna nga makahimo sila sa pagpugos sa mga tawo ngadto sa langit, apan dili gayud kini mahimo, kay ang salabutan nga ania kanato ingon ka gawasnon sama sa mga Dios. Ang mga tawo dili angayan nga pugson ug dili kamo makapasulod sa tanang mga kalag sa mga tawo diha sa hilabihan ka gamay nga dapit nga gipugos ngadto sa langit pinaagi sa pagsangyaw kabahin sa kangilngig sa mahangturong silot sama sa kalayo sa impyerno (DBY, 64).

Mahimo kamong masayud kon gigiyahan ba kamo sa husto o sa sayop, sama nga kamo makahibalo sa dalan pauli; kay ang matag baruganan nga gipadayag sa Dios nagdala sa kaugalingon niining lig-on nga pagtuo sa iyang kamatuoran ngadto sa hunahuna sa tawo, ug walay pagtawag sa Dios sa tawo dinhi sa yuta gawas nga kini nagdala uban sa ebidensya sa pagkatinuod niini (DBY, 65).

Makatarunganon ba nga ang usa ka tawo gihikawan sa iyang mga katungod, tungod kay mipili siya diha sa iyang kasingkasing sa pagbuhat sa kabubut-on sa Dios? Kinahanglan ba nga ang tawo mamalikas aron sa pagmatuod nga siya adunay kabubut-on? Akong barugan nga wala kana kinahanglana, ni sa pagpangawat ni sa pagbuhat og bisan unsa nga sayop. Akong mapakita sa kalangitan ug sa mga lumulupyo sa yuta nga ako natawo nga gawasnon, ug nakabaton sa akong kagawasan sa atubangan sa Dios, mga anghel ug sa mga tawo, kon ako moluhod aron mag-ampo, nga ingon usab ka tinuod kon ako mogawas ug mamalikas. Ako adunay katungod sa pagtawag sa akong pamilya nga magpundok sa pihong mga oras alang sa pag-ampo, ug ako nagtuo nga kini nga paagi mopamatuod nga ako usa ka gawasnon nga tinugyanan, sama usab kon ako mangawat, mamalikas, mamakak ug maghubog (DBY, 65).

Sa pagpakita niana nga higpit nga pagkamasulundon, gihimo ba kitang mga ulipon? Wala, mao lamang kini ang bugtong paagi dinhi sa yuta alang kaninyo ug kanako nga mahimong gawasnon. … Karon ang pag-ingon nga wala ako makagamit sa gawasnong pagpadayag sa akong kaugalingong kabubut-on kon ako mag-ampo kaysa akong pagpamalikas, usa ka sayop nga baruganan. … Ang tawo kinsa mohatag og higpit nga pagkamasulundon ngadto sa mga kinahanglanon sa Langit, nagbuhat diha sa gawasnong pagpadayag sa iyang kaugalingong kabubut-on ug naggamit sa iyang kagawasan kaysa iyang pagpaulipon ngadto sa pagbati. … Ang tanang gipangayo sa Ginoo kanato mao ang higpit nga pagkamasulundon ngadto sa mga balaod sa kinabuhi. Ang tanang sakripisyo nga gipangayo sa Ginoo sa iyang katawhan mao ang higpit nga pagkamasulundon ngadto sa atong kaugalingong mga pakigsaad nga atong gihimo uban sa atong Dios, ug mao kana ang pagserbisyo kaniya sa tibuok natong kasingkasing (DBY, 225).

Ang pagkamasulundon ngadto sa kamatuoran mopahimo kanato nga makapuyo sa presensya sa Labawng Makagagahum.

Ang pagkamasulundon mao ang usa sa pinakayano, pinakasagad ug pinakamapuslan nga mga baruganan nga sukad inyong nahunahunaan o nasayran nga butang (DBY, 220).

Bulahan sila kinsa mosunod kon ang Ginoo mohatag og usa ka direkta nga sugo, apan mas bulahan sila kinsa mosunod nga walay usa ka direkta nga sugo (DBY, 220).

Kon maminaw kita sa tambag, mahimo kitang pinakamaayo nga mga tawo sa kalibutan; mahimo kitang sama sa usa ka siga nga kahayag nga gibutang sa usa ka bungtod, nga dili mahimong itago, o pareho sa usa ka kandila nga gibutang sa usa ka ugbukanan sa kandila (DBY, 219).

Kon nagtinguha kamo sa pagdawat ug pagpahimulos sa kalooy sa atong Langitnong Amahan, buhata ang iyang kabubut-on (DBY, 223).

Kon ang atong mga kasingkasing mapuno sa Espiritu sa Kamatuoran, sa Espiritu sa Ginoo, dili igsapayan kon unsa ang tinuod nga mga pulong gikan sa langit, kon ang Dios mamulong, ang tanan niyang mga ginsakupan kinahanglang mosinggit og, “Aleluya! dayga ang Dios! Andam kami nga modawat niadto nga mga pulong, kay kini mga tinuod” (DBY, 219).

Ako nangandoy nga makita ang kaigsoonan, nga sa higayon nga madungog nila ang mga pulong sa kamatuoran nga gibu-bu diha kanila, andam nga modawat niadto nga mga pulong tungod kay kini hingpit nga nagkauyon ngadto sa ilang mga pagbati, ug ang matag kalag motuaw, “Kadto nga mga pulong mao ang kinaiya sa Espiritu nga ania kanako; kini ang akong kalipay, akong pagkaon, ug akong imnunon; kini ang mga sapa sa kinabuhing dayon. Pagkahaum niini, imbis nga mosukwahi kini ngari sa akong mga pagbati” (DBY, 219).

Kon kamo kanunay nga mohunong ug moingon, ako walay tambag alang kaninyo, ako walay tubag alang kaninyo kabahin niini nga hilisgutan, tungod kay ako walay pagpabati sa Espiritu, ug andam sa pagpahibalo sa tanan sa kalibutan nga kamo walay kahibalo kon kamo ingon man gani, mahimo kamong maalamon sa mas dali nga paagi kaysa mohatag og tambag diha sa inyong kaugalingong paghukom, nga wala ang Espiritu sa pagpadayag (DBY, 219).

Ang matag tawo sa Gingharian sa Dios mohatag sa samang tambag ngadto sa kada hilisgutan, kon siya mohulat hangtud nga maangkon niya ang hunahuna ni Kristo mahitungod niini. Niana ang tanan makaangkon og usa ka pulong ug hunahuna, ug ang tanang tawo hingpit nga magkasinabtanay (DBY, 219).

Kini nga mga tawo kinahanglan nga mahimong usa sa kasingkasing ug usa sa hunahuna. Kinahanglan silang masayud sa kabubut-on sa Dios ug mobuhat niini, kay ang pagkasayud sa kabubut-on sa Dios usa ka butang, ug ang pagdala sa atong mga kabubut-on, sa atong mga taras, sa pagpaubos ngadto nianang atong nasabtan nga mao ang kabubut-on sa Dios lain usab nga butang (DBY, 221).

Ang mga Santos sa Ulahing mga Adlaw kinsa mopatalinghug ngadto sa mga pulong sa Ginoo, nga gihatag ngadto kanila kalabut sa ilang politikal, sosyal, ug pinansyal nga mga kabalaka, ako moingon, ug moingon niini sa walay kahadlok nga paagi, nga sila makabaton og kaalam nga labaw pa sa kaalam sa mga anak sa kangitngit, o sa mga anak niini nga kalibutan. Nasayud ako niini pinaagi sa mga pinadayag ni Ginoong Jesukristo, ug pinaagi sa mga resulta sa akong kaugalingong mga binuhatan. Sila kinsa mipatalinghug ngadto sa mga tambag nga gihatag ngadto kanila sa temporal nga mga butang, nakapaarang-arang sa ilang kahimtang sa nagkalainlaing paagi sa temporal ug sa espirituhanong paagi (DBY, 219–20).

Ang tanan kinsa makadawat sa kinabuhing dayon ug kaluwasan makadawat niini sa walay laing mga kondisyon nga mao ang pagtuo diha sa Anak sa Dios ug sa pagsunod sa mga baruganan nga iyang gihatag. Makahimo ba kita og laing mga paagi ug plano sa kaluwasan? Kita dili makahimo (DBY, 223–24).

Ang pinakamasangputon nga paagi sa pagtukod sa relihiyon sa Langit mao ang pagpuyo niini, kaysa pagpakamatay alang niini: sa akong hunahuna luwas ako sa pag-ingon nga adunay daghang mga Santos sa Ulahing mga Adlaw kinsa mas andam nga magpakamatay alang sa ilang relihiyon kaysa magpuyo niini sa matinud-anong paagi. Walay laing ebidensya nga mahimong mapakita ngadto sa Dios, mga anghel, ug sa mga tawo, nga ang mga katawhan matinud-anong nagpuyo sa ilang relihiyon, kaysa nga sila naghinulsol sa tinuoray sa ilang mga sala, mosunod sa balaod sa bunyag alang sa kapasayloan sa mga sala, ug niana mopadayon sa paghimo sa mga buhat sa pagkamatarung sa adlaw-adlaw (DBY, 221).

Naghunahuna ba kamo nga ang mga tawo mosunod sa kamatuoran tungod kay kini tinuod, gawas kon ila kining gimahal? Dili, dili gayud sila. Ang kamatuoran sundon kon kini gimahal. Ang higpit nga pagkamasulundon ngadto sa kamatuoran mao lamang ang makapahimo sa mga katawhan sa pagpuyo diha sa presensya sa Labawng Makagagahum (DBY, 220).

Aduna bay piho nga kahanas sa paghimo niini nga mga tawo nga magmasulundon? Adunay usa lamang. Kon kamo, mga Elder sa Israel, makabaton sa kahanas sa pagsangyaw sa Espiritu Santo ngadto sa mga kasingkasing sa mga katawhan, makabaton kamo og masulundon nga mga katawhan. Mao lamang kini ang bugtong nga kahanas nga gikinahanglan. Tudloi ang mga katawhan sa kamatuoran, tudloi sila sa husto nga mga baruganan; ipakita kanila kon unsay alang sa ilang pinakadakong kaayohan ug sa inyong hunahuna dili ba sila mosunod niana nga dalan? Mosunod sila (DBY, 226).

Makakat-on kita sa pagsunod sa andam nga paagi ug modawat sa mga pagpanton kon kita modawat sa Espiritu sa Kamatuoran.

Ang mga Santos kinsa nagsunod sa ilang relihiyon pagahimayaon, kay sila dili gayud molimud sa bisan unsa nga pagpadayag nga gihatag sa Ginoo o mahimong ihatag, bisan tuod, kon adunay usa ka doktrina nga moabut kanila nga wala nila masabti sa hingpit, mahimo silang makita nga magingon, “Ang Ginoo mipadala niini ngari kanako, ug ako nag-ampo nga iya akong luwason ug ipalayo gikan sa paglimud sa bisan unsa nga nagagikan kaniya, ug mohatag kanako og pailub sa paghulat hangtud nga ako makasabut niini sa akong kaugalingon” (DBY, 224).

Ang ingon nga mga tawo dili gayud molimud, apan motugot niadtong mga hilisgutan nga wala nila masabti, nga magpabilin hangtud nga ang mga panan-awon sa ilang mga hunahuna mahimong abli. Mao kini ang dalan nga ako gayung gipadayon nga walay pagsimang, ug kon adunay miabut nga wala nako masabti, mag-ampo ako hangtud nga ako kining masabtan (DBY, 224).

Ayaw isalikway ang bisan unsang butang tungod kay kini bag-o o kahibudngan, ug ayaw yam-iri ni tamaya ang unsay naggikan sa Ginoo, kay kon atong buhaton, atong gibutang sa peligro ang atong kaluwasan (DBY, 224).

Ako nagtuo nga usa kini ka impyerno nga dili maantus alang sa usa ka katawhan, usa ka pamilya o usa ka nag-inusara nga tawo, nga magtinguha sa pagkupot sa kamatuoran sa usa ka kamot, ug sa sayop sa laing kamot, sa pag-angkon nga maglakaw diha sa pagkamasulundon sa mga sugo sa Dios, ug, sa samang higayon, makig-uban sa mga pagbati ingon man usab sa binuhatan sa dautan (DBY, 223).

Ang Ginoo mipadala sa iyang mga balaod, mga sugo, ug mga ordinansa ngadto sa mga katawhan, ug nagkinahanglan nga kini higpit nga pagasundon, ug wala kita mangandoy nga molapas niadto nga mga balaod, apan sa pagtuman niini. Wala kita mangandoy sa pag-usab sa iyang mga ordinansa, apan sa pagsunod niini; wala kita mangandoy sa pagsupak sa walay katapusang pakigsaad, apan sa paghupot niini uban sa atong mga amahan, uban ni Jesus, uban sa atong Amahan sa Langit, uban sa balaang mga anghel, ug sa pagpakabuhi sumala niini (DBY, 220).

Unsaon man nato sa pagkasayud nga kita nagsunod kaniya? Adunay usa lamang ka pamaagi nga ato kining mahimong masayran, ug kana mao ang pinaagi sa inspirasyon sa Espiritu sa Ginoo nga nagsaksi ngari sa atong espiritu nga kita iyaha, nga ato siyang gihigugma, ug nga siya naghigugma kanato. Pinaagi kini sa espiritu sa pagpadayag nga nasayud kita niini. Kita walay saksi sa sulod sa atong mga kaugalingon, nga wala ang espiritu sa pagpadayag. Kita walay saksi sa gawas sa atong kaugalingon, gawas lamang pinaagi sa pagkamasulundon ngadto sa mga ordinansa (DBY, 224).

Bisan unsa nga dili putli kinahanglan gayud, sa madugay o sa madali malaglag; di igsapayan kon kini anaa ba sa relihiyon ug binuhatan sa usa ka indibidwal, lungsod, nasud, o gobyerno. Kana nga gingharian, kayutaan, gahum o tawo nga wala giyahi sa mga baruganan nga putli ug balaan kinahanglan gayud nga sa kadugayan mahanaw ug malaglag (DBY, 227).

Kon ang kaluwasan ipadala ngari kanako, mahimo nako kining isalikway o dawaton. Sa pagdawat niini, ako mohatag sa hingpit nga pagkamasulundon ug pagtugyan ngadto sa halangdong Tigpasiugda niini sa tibuok nakong kinabuhi, ug ngadto kang kinsa iyang gisugo aron sa pagtudlo kanako; sa pagsalikway niini, ako mosunod sa mga pagdiktar sa akong kaugalingong kabubut-on nga maoy gipalabi kaysa kabubut-on sa akong Tiglalang (DBY, 390).

Ang Dios mibutang og kabubut-on sulod kanato, ug kinahanglan kitang matagbaw nga kini pagagiyahan pinaagi sa kabubut-on sa Labawng Makagagahum (DBY, 264).

Kita ingon nga usa ka katawhan, pagapantunon hangtud nga kita hingpit nga motugyan sa atong mga kaugalingon ngadto sa Ginoo ug mahimong mga Santos sa tinuoray (DBY, 226).

Nasayud ako nga lisud dawaton ang pagpanton, kay walay pagpanton nga makalipay, apan masakit sa higayon nga kini gihatag [tan-awa sa Mga Hebreohanon 12:11]; apan kon ang usa ka tawo modawat og pagpanton ug mag-ampo alang sa Espiritu Santo nga moanha kaniya, nga siya unta makabaton sa Espiritu sa kamatuoran diha sa iyang kasingkasing, ug mounong ngadto niana nga makapahimuot sa Ginoo, ang Ginoo mohatag kaniya og panalangin nga makaagwanta sa pagpanton, ug siya motugyan ug modawat niini, nasayud nga kini alang sa iyang kaayohan (DBY, 227).

Mga Sugyot alang sa Pagtuon

Kita adunay kabubut-on sa pagpili sa maayo o dautan, apan dili kita makapili sa mga sangputanan sa atong mga pagpili.

Ngano nga kini sa “tinuoray gikinahanglan ang magkatugbang nga mga baruganan nga ibutang sa atubangan” sa mga anak sa Dios ug alang kanila nga makabaton og “kabubut-on sa ilang mga kaugalingon”?
Si Presidente Young nagtudlo nga “ang tawo makahimo ug makapugong sa iyang kaugalingong mga lihok, apan dili siya makapugong sa mga resulta niini.” (Tan-awa usab sa D&P 101:78.) Sa unsang mga paagi nga ang pipila ka mga tawo moangkon og kagawasan sa pagpili samtang mosulay sa paglikay sa mga sangputanan sa ilang mga pagpili?
Giunsa ni Presidente Young sa pagpasabut ang “kalainan tali sa matarung ug makasasala”? Sa unsang paagi nga tingali atong malimitahan ug mabutangan og kinutuban ang atong kabubut-on? Si Presidente Young nagtudlo nga ang “nahimaya” “walay mga kinutuban o mga limitasyon sa ilang mga pribilehiyo.” Sa unsa nga paagi nga ang higpit nga pagkamasulundon nakadugang gayud sa atong kagawasan?
Ngano nga ang Dios dili “mopugos ni bisan kinsa nga tawo sa pagdawat sa Ebanghelyo … [o] sa pagsunod niini human nila kini madawat”? (Tanawa usab sa D&P 88:22–25, 32.)
Nganong gipatigbabaw ni Presidente Young nga ang pagkamasulundon usa ka paggamit sa kabubut-on sama usab sa pagkadili masulundon? Ngano nga ang “higpit nga pagkamasulundon … mao lamang ang bugtong paagi dinhi sa yuta alang kaninyo ug kanako nga mahimong gawasnon”? (Tan-awa usab sa Mosiah 2:22–24.)

Ang pagkamasulundon ngadto sa kamatuoran mopahimo kanato nga makapuyo sa presensya sa Labawng Makagagahum.

Ngano nga ang pagkamasulundon mao ang “usa sa pinakayano, pinakasagad ug pinakamapuslan nga mga baruganan”? Ngano nga ang pagkamasulundon makapahimo kanato sa “pagdawat ug pagpahimulos sa pabor sa atong Langitnong Amahan”?
Unsa ang gipasabut sa mahimong “usa sa kasingkasing ug usa sa hunahuna”? Sa unsang paagi nga ang pagkamasulundon makatabang kanato sa pagbuhat niini?

Makakat-on kita sa pagsunod sa andam nga paagi ug modawat sa mga pagpanton kon kita modawat sa Espiritu sa Kamatuoran.

Sumala ni Presidente Young, unsa ang atong obligasyon kon wala kita makasabut sa usa ka doktrina o pinadayag? (Tan-awa usab sa Ecclesiastes 12:13; Juan 7:17; Ether 12:6; D&P 11:20.)
Unsaon nato sa pagkasayud kon kita masulundon ba sa kabubut-on sa Dios ug unsaon man nato sa pagtudlo og pagkamasulundon?
Sa unsang paagi nga ang pagkaandam sa pagtugyan sa atong kabubut-on ngadto sa kabubut-on sa Labawng Makagagahum makatabang kanato nga mahimong mas mahisama sa Manluluwas? Unsa ang gipasabut sa “hingpit nga motugyan sa atong mga kaugalingon ngadto sa Ginoo”?
Ang pagpanton mao ang pagkatarung ug ang paglimpyo. Nganong sa kasagaran lisud man dawaton ang pagpanton? (Tan-awa usab sa Mga Hebreohanon 12:11.) Unsa man ang gitudlo ni Presidente Young kabahin sa unsa nga paagi kita makaantus sa pagpanton? Unsa ang sangputanan sa pagpanton?