Mga Pagtulon-an sa mga Presidente
Pasiuna


Pasiuna

Si propeta Brigham Young mitudlo sa gipahiuli nga ebanghelyo ni Jesukristo sa sayon, praktikal nga paagi nga makahatag og inspirasyon ug paglaum sa mga Santos nga nanlimbasug sa pagtukod og panimalay diha sa kamingawan. Bisan og sobra sa usa ka siglo na karon ang nakalabay, ang iyang mga pulong lab-as gihapon ug angay kanato karon samtang kita mopadayon sa buhat sa pagtukod sa gingharian sa Dios.

Si Presidente Young mipahayag nga isip mga miyembro sa Ang Simbahan ni Jesukristo sa mga Santos sa Ulahing mga Adlaw ania kanato ang “doktrina sa kinabuhi ug kaluwasan alang sa tanang matinuoron sa kasingkasing” (DBY, 7). Misaad siya nga kadtong modawat sa ebanghelyo sa ilang mga kasingkasing makapahigmata “sa ilang kaugalingon og usa ka tinguha nga makahibalo ug makasabut sa tanang mga butang sa Dios labaw kay sa ilang nahimo kaniadto sa ilang mga kinabuhi” ug mosugod sa “pagpangutana, pagbasa ug pagsiksik ug kon sila moduol sa ilang Amahan diha sa pangalan ni Jesus siya dili mobiya kanila nga dili makaangkon og pagsaksi” (DBY, 450).

Kini nga libro nagpakita sa tinguha sa Unang Kapangulohan ug sa Korum sa Napulog Duha ka mga Apostoles nga mas malawom ang pagsabut sa mga miyembro sa Simbahan sa doktrina ug sa pagpukaw diha kanila og labaw nga tinguha nga makahibalo sa mga butang sa Dios. Makapadasig ug makapaaghat kini sa mga indibidwal, sa mga korum sa priesthood, ug sa mga klase sa Relief Society sa pagpangutana, pagbasa, pagsiksik, ug dayon sa pagduol sa ilang Amahan sa Langit alang sa usa ka pagsaksi sa kamatuoran niini nga mga pagtulun-an.

Ang matag hugna adunay duha ka mga seksyon—“Mga Pagtulun-an ni Brigham Young” ug “Mga Sugyot alang sa Pagtuon.” Ang unang seksyon naglangkob sa mga kinuha gikan sa mga sermon ni Brigham Young ngadto sa unang mga Santos. Ang matag pamahayag adunay mga pakisayran, ug ang orihinal nga spelling ug punctuation gipreserbar; hinoon, ang mga tinubdan nga gisulti dili pa magamit sa kasagarang mga miyembro. Kini nga orihinal nga mga tinubdan dili na kinahanglan aron epektibong makatuon o makatudlo gikan niini nga libro. Ang mga miyembro dili kinahanglan nga mopalit og dugang mga pakisayran ug mga komentaryo sa pagtuon o pagtudlo niini nga mga hugna. Ang teksto nga ania niini nga libro, inubanan sa mga kasulatan, igo na alang sa panudlo. Kinahanglang magmainampoon ang mga miyembro sa pagbasa ug sa pagtuon sa mga pagtulun-an ni Presidente Young aron makabaton og bag-ong mga panabut sa mga baruganan sa ebanghelyo ug makahibalo unsaon sa paggamit niini nga mga baruganan sa ilang inadlaw nga mga kinabuhi. Pinaagi sa matinud-anon ug mainampoon nga pagtuon niini nga mga seleksyon, ang mga Santos sa Ulahing mga Adlaw makabaton og mas labaw nga pagsabut sa mga baruganan sa ebanghelyo ug mas hingpit nga magpasalamat sa tulukibon ug dinasig nga mga pagtulun-an niining gamhanan nga propeta.

Ang ikaduhang seksyon sa matag hugna nagtanyag og sunod-sunod nga mga pangutana nga makapaawhag og pamalandong, personal nga paggamit, ug panaghisgot sa mga pagtulun-an ni Presidente Young. Ang mga miyembro kinahanglan nga mogamit ug mainampingon nga mobasa pag-usab sa iyang mga pulong mahitungod sa baruganan nga gihisgutan. Lawom ug mainampoong pagtuon niining mga pagtulun-an makapadasig sa mga miyembro ngadto sa mas dako nga personal nga pasalig ug makatabang kanila nga motinguha sa pagsunod sa mga pagtulun-an sa Manluluwas, si Jesukristo.

Kon ang mga indibidwal ug mga pamilya mainampoong mosunod sa mga baruganan niini nga basahon, sila mapanalanginan ug madasig ngadto sa mas dako nga pagpahinungod ug pagka-espirituhanon, sama sa unang mga Santos nga nakadungog niini nga mga pulong gikan gayud sa mga ngabil sa “Leon sa Ginoo” (HC, 7:434)—ang propeta, manalagna, ug tigpadayag, si Presidente Brigham Young.

Mga Instruksyon ngadto sa mga Magtutudlo

Ang pagtudlo niini nga mga leksyon nagkinahanglan og mabinantayong pagbasa og una, pagtuon, ug mainampoong pagpangandam. Himoa nga makasinati pag-ayo ug makaplano og lain-laing mga paagi sa pagpresentar ug pagtudlo niining mga baruganan diha sa klase. Ang mga leksyon kinahanglang makatabang sa mga miyembro sa klase sa pag-ila sa unsa nga paagi nga ang mga baruganan sa ebanghelyo magamit sa inadlaw nga pagpuyo. Pag-awhag og panaghisgutan kabahin sa unsa nga paagi nga kini nga mga baruganan makaimpluwensya sa atong mga pagbati mahitungod sa atong Amahan sa Langit, ni Jesukristo, sa atong mga kaugalingon, sa atong mga pamilya, ug sa atong mga silingan. Dapita ang mga partisipante sa pagpuyo sumala sa mga baruganan nga gitudlo.

Paapila ang daghang mga tawo kutob sa mahimo sa panahon sa pagtudlo pinaagi sa pag-imbitar kanila sa pagbasa og kusog, pagtubag sa mga pangutana, o pagpakigbahin og mga kasinatian. Kamo makahimo og linain nga mga buluhaton kon mag-andam og mga leksyon, magmahimong sensitibo sa pagkaandam sa mga miyembro sa klase nga moapil. Pagmainampingon sa paglikay sa kontrobersiya. Salig diha sa mga kasulatan alang sa suporta ug pagsabut. Tinguhaa sa mapainubsanon nga paagi ang Espiritu sa Ginoo, ug ang mga kaigsoonan nga inyong gitudloan mapanalanginan. Sama sa gisaad sa Ginoo, “Busa, siya nga nagsangyaw ug siya nga nakadawat, nakasabut sa usag usa, ug ang duha makadawat og kaayohan ug maglipay nga maghiusa” (D&P 50:22).

  • Alang sa pagpahayag sa mga minubo [abbreviation] nga gigamit niini nga libro sa pagpakita sa mga tinubdan diin gikuha ang mga pamahayag ni Presidente Brigham Young, tanawa sa “Ginganlan nga mga Trabaho ug mga Minubo nga Gigamit” sa pahina 413.