Pagsunod sa Pulong sa Kaalam

Alang ni Presidente Brigham Young ang ebanghelyo ni Jesukristo usa ka mapuslanon nga relihiyon. Sa usa ka sulat niadtong 1867 ngadto sa duha niya ka mga anak nga lalaki nga nag-alagad og mga misyon, si Presidente Young midayeg sa mga Santos sa Siyudad sa Salt Lake tungod sa pagsunod sa Pulong sa Kaalam: “Ang mga nanindahay sa Whiskey St. naglisud gayud sa pagbayad sa ilang inadlaw nga abangan. Ang mga katawhan mipakita sa pinakalig-on nga pagbuot nga sukad among nasaksihan aron sa pagtuman sa tambag nga gihatag kabahin sa Pulong sa Kaalam ug sa pagkamasulundon diha sa temporal ingon man sa espirituhanon nga mga butang. Walay pagpamugos nga gigamit, walay pakigsaad nga gikinahanglan. Ang baruganan gihan-ay na ug ang mga katawhan daw andam na nga modawat ug mobuhat niini. Ang kalinaw ug maayong panglawas mipatigbabaw sa tibuok Teritoryo” (LBY, 88). Iyang gitudlo nga ang Ginoo mipadayag sa Pulong sa Kaalam aron mapalambo ang kalidad sa atong mortal nga mga kinabuhi, aron kita mahimong mas epektibo nga mga mamumuo sa yutan-on nga gingharian sa Dios, ug aron matabangan kitang makatuman sa katuyoan sa atong pagkalalang.

Mga Pagtulun-an ni Brigham Young

Kita nagtuo nga ang Pulong sa Kaalam usa ka sugo gikan sa Dios.

Dihang ang tulunghaan sa mga propeta giinagurahan, usa sa nag-una nga mga pagpadayag nga gihatag sa Ginoo ngadto sa iyang sulugoon nga si Joseph mao ang Pulong sa Kaalam. Ang mga sakop niana nga tulunghaan diyutay ra sa sinugdanan, ug ang propeta misugod sa pagtudlo kanila sa doktrina aron pag-andam kanila nga molakaw sa kalibutan sa pagsangyaw sa ebanghelyo ngadto sa tanang katawhan. … Ang propeta nagsugod sa pagtudlo kanila kon unsaon sa pagkinabuhi, aron sila unta mas andam sa pagpahigayon sa talagsaong buluhaton diin sila gitawag sa pagbuhat (DNSW, 25 sa Peb. 1868, 2).

Mga Bishop, mga Elder sa Israel, mga High Priest, mga Seventy, ang Napulog duha ka mga Apostoles, ang First Presidency, ug tanang Balay ni Israel, paminaw kamo, O akong mga katawhan! sunda ang pulong sa Ginoo, sunda ang Pulong sa Kaalam, suportahi ang matag-usa, ipalahutay ang balay sa pagtuo (DBY, 183).

Nasayud ako nga ang uban moingon nga ang mga pagpadayag kabahin niining mga butanga wala gihatag pinaagi sa kasugoan. Maayo kana, apan kita gimandoan sa pagsunod sa matag pulong nga mogawas gikan sa ba-ba sa Dios (DBY, 182–83).

Ang Espiritu naghunghong kanako sa pagtawag sa mga Santos sa Ulahing mga Adlaw aron sa pagtuman sa Pulong sa Kaalam, sa pagbiya tsa, kape, ug tabako, ug sa paglikay sa pag-inom sa ilimnong makahubog. Mao kini ang gipasabut sa Espiritu pinaagi kanako. Kon ang Espiritu sa Dios mohunghong niini ngadto sa iyang mga katawhan pinaagi sa ilang pangulo, ug dili sila maminaw o mosunod, unsa ang mga sangputanan sa ilang pagkamasinupakon? Kangitngit ug kakulang sa kahayag sa hunahuna kalabut sa mga pulong sa Dios mao ang ilang padulngan; mohunong sila sa pagbaton sa espiritu sa pag-ampo, ug ang espiritu sa kalibutan motubo diha kanila tugbang sa ilang pagkamasinupakon hangtud sila hingpit nga mobiya sa Dios ug sa iyang mga pamaagi (DBY, 183).

Unsay anaa sa iyang pagkatawo kinahanglang maalimahan ug mahalon; ug sa matag higayon nga atong sudlan ang lawas aron mapugos ug mapalagsik kini lapas sa iyang kinaiyanhon nga kapasidad, makapamubo sa kinabuhi. Usa ako ka mananambal igo nga nasayud niana. … Kon sundon ninyo kini nga tambag, puno kamo sa kaabtik ug kahimsug, ug kamo motubo sa inyong salabutan, sa inyong kalipay, ug kahamugaway (DBY, 183).

Kini nga Pulong sa Kaalam nga gituhoan nga karaan na, ug wala na ipatuman, sama sa tanang mga tambag sa Dios, nga gipatuman pa gihapon bisan karon ingon man sukad kaniadto. Adunay kinabuhi, kinabuhing dayon niini—ang kinabuhi nga mao karon ug sa kinabuhi nga umaabut (DBY, 184).

Ang Pulong sa Kaalam usa ka dinasig nga pamalaod sa panglawas.

Kini nga Pulong sa Kaalam nagdili sa paggamit og makapainit nga mga ilimnon ug pagtabako. Nakadungog ako nga gilalisan nga ang tsa ug kape wala maapil niini; tinuod kaayo kana; apan unsa may giinom sa katawhan nga naanad sa pag-inom og makapainit nga mga ilimnon sa dihang gihatag kini nga pagpadayag? Tsa ug kape. Dili nato kinaiya ang pag-inom og tubig nga init kaayo, hinoon tsa ug kape—ang ilimnon nga kasagarang gigamit (DBY, 182).

Kay sa himoon ang duha ka adlaw nga trabaho og usa ka adlaw, ang kaalam nagtudlo sa [mga Santos], nga kon sila nagtinguha og taas nga kinabuhi ug maayo nga panglawas, kinahanglan gayud sila, human sa igo nga trabaho, mopapahulay sa lawas sa dili pa kini masubrahan sa kahago. Kon hago na kaayo, ang uban molalis nga gikinahanglan nila ang makapalagsik sama sa tsa, kape, ilimnon nga may alkohol, tabako,o uban niadtong mga narkotiko nga kasagarang imnon aron maaghat ang nagkaluya nga mga kusog ngadto sa mas labaw nga pangusog. Apan kaysa niining mga klaseha sa pangpalagsik kinahanglan silang maulian pinaagi sa pahulay. Motrabaho og minus, dili kaayo magpaluya, minus ang kaonon, ug kita dako og kahigayunan nga mahimong mas maalamon, mas himsog, ug mas adunahan nga mga katawhan kay sa gihimo nato karon. Lisud ang pagpangita og butang nga mas maayo nga imnon kay sa bugnaw nga tubig, sama sa nag-agas nga tubig gikan sa mga tuburan ug snow gikan sa atong mga kabungturan. Mao kini ang ilimnon nga angay nato nga imnon. Kinahanglan nga kini mao ang atong ilimnon sa tanang higayon. … Kini mahimong ingon nga ang ubang tawo nga palainom ug hinabako mga himsog, apan ako molalis nga sila mas himsog pa kon sila wala mogamit niini, ug niana angay sila sa mga panalangin nga gisaad niadtong kinsa mituman sa mga tambag nga gihatag diha sa “Pulong sa Kaalam” (DBY, 187).

Sa dihang mibiyahe kami ngadto sa pamuy-anan ug mihunong sa mga balay sa mga kaigsoonan, mao kini ang ilang gipahayag, “Brother Brigham, tuguti kaming mopakita sa among mga pagbati diha kanimo ug sa imong mga kaubanan.” Giingnan ko sila nga sige, apan tagai lamang ako og usa ka pan nga hinimo sa mais; mas ganahan ako niana kay sa ilang mga pie ug mga matam-is nga mga pagkaon. Hatagi ako niana nga moabag sa kinaiyahan ug mohimo sa akong tiyan ug tibuok kalawasan nga limpyo alang sa pagdawat sa Espiritu sa Ginoo ug mahilayo sa sakit sa ulo ug sa bisan unsa nga matang sa sakit (DBY, 189).

Ang mga Amerikano, isip usa ka nasud, nagpatay sa ilang mga kaugalingon pinaagi sa ilang mga bisyo ug dinato nga matang sa pagpuyo. Ang tawo nga mokaon sulod sa tunga sa oras ilang humnon sulod sa tulo ka minutos, naglamoy sa ilang mga pagkaon sama sa [iro] sa ilawom sa lamesa, diin, kon usa ka hiwa sa karne ilabay kanila molamoy niini nga dili ka pa makasulti og “kaduha.” Kon kamo gusto og kausaban, sunda ang mga tambag nga bag-o lamang nakong gihatag kaninyo. Biyai ang inyong nagkalainlain nga mga pagkaon, ug, salig niini, makahimo kamo og dako nga malikay ang inyong mga pamilya gikan sa mga sakit, kagaw ug kamatayon (DBY, 189).

Nasayud ba kamo nga inyo kana nga kahigayunan sa pagpakabuhi nga ang inyong mga hunahuna unta sa tanan nga higayon anaa sa inyong hingpit nga pagkontrol? Tun-i ang pagpatunhay sa inyong mga lawas sa kaabtik ug kahimsug, ug kamo makahimo sa pagkontrol sa inyong mga hunahuna (DBY, 190).

Ang paghunahuna nga bahin mao ang imortal o dili makita nga bahin, ug kana mao ang nagpalihok sa trabaho; dayon ang tabernakulo, nga giporma ug gihan-ay alang nianang piho nga katuyoan, nagpahinabo o nagdala sa sangputanan nianang mental nga trabaho. Himoa nga ang lawas motrabaho uban sa hunahuna, ug himoa nga sila magtinabangay, ug, gawas sa pipila ka mga walay labut kamo makaangkon og usa ka maayo nga panghunahuna, lagsik nga indibidwal, kusgan sa pisikal ug sa mental nga paagi (DBY, 191).

Pagmainampingon sa inyong mga lawas; pagmabinantayon sa paggamit sa inyong mga kusog, kay kon kamo matigulang na inyong gikinahanglan ang kusog ug gahum nga inyo karong giusikan. Galma ang inyong mga kinabuhi. Hangtud nga inyo kining mahibaloan ug buhaton, dili kamo matawag sa hingpit nga maayong mga sundalo o maalamon nga mga tinugyanan (DBY, 193).

Unya dili nato usik-usikan ang atong misyon, pinaagi sa pagpasulabi og gamit sa makadaot nga mga substansya. Kini naghatag og pundasyon sa mga kagaw ug kamatayon diha sa kinabuhi sa tawo, ug ang samang substansya mapasa ngadto sa ilang mga anak, ug lain nga henerasyon sa huyang nga mga tawo ang madugang sa kalibutan. Ang ingon nga mga bata may kakulangan sa ilang mga bukog, ugat, kusog, ug sa iyang pagkatawo, ug gamay ang kapuslanan ngadto sa ilang mga kaugalingon, o sa ilang isig ka linalang; dili sila andam alang sa kinabuhi (DBY, 185–86).

Ang pagsunod sa Pulong sa Kaalam makatabang kanato nga makatuman sa atong katuyoan sa kinabuhi.

Usa kini ka tipik sa maayong tambag diin gitinguha sa Ginoo nga sundon sa Iyang mga katawhan, nga sila unta mopuyo niini nga yuta hangtud matuman ang katuyoan sa pagkalalang niini. Mao kini ang tuyo nga gitan-aw sa Ginoo sa paghatag niana nga Pulong sa Kaalam. Niadtong kinsa nagsunod niini siya mohatag og talagsaong kahibalo ug panabut, paglambo sa ilang panglawas, paghatag og kusog ug paglahutay sa tibuok galamhan sa ilang mga lawas ug mga hunahuna hangtud sila molungtad og dugay dinhi sa yuta. Kini mao ang ilang panalangin kon sila motuman sa iyang mga pulong uban sa maayo ug andam nga kasingkasing ug pagkamatinud-anon diha sa atubangan sa Dios (DBY,, 184).

Busa atong nahibaloan nga halos ang una gayud nga mga pagtulun-an nga nadawat sa unang mga Elder niini nga Simbahan mao ang unsay kaonon, unsay imnon, ug unsaon sa paghan-ay ang ilang natural nga mga kinabuhi nga sila magkahiusa sa espirituhanon ug sa temporal nga paagi. Mao kini ang dakong katuyoan nga gitan-aw sa Ginoo sa pagpadala dinhi sa kalibutan, pinaagi sa iyang mga sulugoon, sa Ebanghelyo sa kinabuhi ug kaluwasan (DBY,, 186).

Ang usa ka tawo nga nagpatuyang sa bisan unsang kinaiya nga makadaut sa kinatibuk-ang kaayohan pinaagi sa iyang ehemplo ug impluwensya, dili lamang kaaway sa iyang kaugalingon apan usab sa komunidad kutob diin ang iyang impluwensya niana nga kinaiya moabut. Ang tawo kinsa dili mosakripisyo sa usa ka makadaut nga kinaiya alang sa kaayohan nga mahimo niini sa komunidad mao, sa minus nga pagkasulti kabahin niini, dagaang lamang sa iyang mga tinguha ug mga pangandoy alang sa kadaghanan ug kinatibuk-ang kalamboan (DBY,, 186).

Ang pagkaandam nga mamatay dili maoy awhag niini nga Simbahan ug Gingharian; apan ang pag-andam nga mosunod sa awhag kanato, ug pagpalambo kutob sa mahimo sa atong kinabuhi human dinhi, diin kita mahimong magpahimulos sa usa ka mas mahimayaon nga kahimtang sa salabutan, kaalam, kahayag, kahibalo, gahum, himaya, ug paghimaya. Dayon tinguhaon nato ang paglugway sa atong kinabuhi ngadto sa kinatasan, pinaagi sa pagsunod sa matag balaod sa panglawas, ug pinaagi sa husto nga pagbalanse sa trabaho, pagtuon, pagpahulay, ug paglingaw-lingaw, ug sa ingon maandam alang sa mas maayo nga kinabuhi. Itudlo nato kini nga mga baruganan ngadto sa atong mga anak, nga, sa sayong bahin sa ilang kinabuhi, sila mahimong matudloan sa pagpahimutang sa pundasyon sa panglawas ug kalig-on ug sa pagkatawo ug sa gahum sa kinabuhi diha sa ilang mga lawas (DBY, 186).

Mga Sugyot alang sa Pagtuon

Kita nagtuo nga ang Pulong sa Kaalam usa ka sugo gikan sa Dios.

Sa unsang paagi nga ang Pulong sa Kaalam mas makaandam kanato sa paghimo sa buluhaton sa Ginoo?
Si Presidente Young miingon nga “kita gimandoan sa pagsunod sa matag pulong nga mogawas gikan sa ba-ba sa Dios, lakip ang Pulong sa Kaalam. (Tan-awa usab sa D&P 89–2.) Sa unsang paagi nga ang pagkahibalo nga ang Pulong sa Kaalam usa ka kasugoan ug dili lamang usa ka maayo nga tambag nakatabang kaninyo sa pagsunod sumala sa mga baruganan niini? Unsa ang giingon ni Presidente Young nga maoy mga sangputanan sa pagsupak sa Pulong sa Kaalam?
Sa imong hunahuna unsay buot ipasabut ni Presidente Young sa dihang siya miingon nga, “Adunay kinabuhi, kinabuhi nga dayon diha sa” Pulong sa Kaalam?

Ang Pulong sa Kaalam usa ka dinasig nga pamalaod sa panglawas.

Sumala ni Presidente Young, unsa ang katuyoan sa Pulong sa Kaalam? (Tan-awa usab sa 1 Mga Taga-Corinto 3:16–17; D&P 89; 93:35.)
Unsa ang tambag ni Presidente Young mahitungod sa paglikay sa sobrang kaluya? Unsaon ninyo sa paggamit ang mga baruganan nga nag-dumala sa iyang tambag sa inyong kinabuhi?
Unsaon nga ang pagsunod sa pagtuman sa Pulong sa Kaalam “mohimo nga ang lawas motrabaho uban sa hunahuna”? Unsaon ninyo sa pagkakuha og kaayohan gumikan sa paghimo niini? Unsaon nga ang Pulong sa Kaalam makaandam kanatong modawat sa Espiritu?
Si Presidente Young miingon, “Dili nato usik-usikan ang atong misyon, pinaagi sa pagpasulabi og gamit sa makadaot nga mga substansya. Sa unsang paagi kana nga mga substansya makapugong sa atong misyon?

Ang pagsunod sa Pulong sa Kaalam makatabang kanato nga makatuman sa atong katuyoan sa kinabuhi.

Sa unsang paagi nga ang pagkinabuhi nga nagsubay sa Pulong sa Kaalam mitabang sa pagtuman sa katuyoan sa atong pagkalalang, sa tinagsa ug isip usa ka Simbahan?
Sa unsang paagi nga ang pagtuman sa Pulong sa Kaalam makapalamblo sa atong pagkaespirituhanon? Sa unsang paagi nga ang pagsupak sa Pulong sa Kaalam makadaot sa atong kalag?
Ngano nga kita nakahimo sa pag-alagad nga mas epektibo kon kita motuman sa Pulong sa Kaalam?
Unsaon ninyo sa pagsunod ang tambag ni Presidente Young sa “paglugway sa atong kinabuhi karon ngadto sa kinatas-an, pinaagi sa pagsunod sa matag balaod sa panglawas, ug pinaagi sa husto nga pagbalanse sa trabaho, pagtuon, pagpahulay, ug paglingaw-lingaw”? Sa unsang paagi nga ang pagsunod sa Pulong sa Kaalam motabang kanato nga magpuyo sa labaw ka hingpit?