Hugot nga Pagtuo diha ni Ginoong Jesukristo

Ang hugot nga pagtuo kang Jesukristo mao ang gamhanang makapadasig nga kusog diha sa kinabuhi ni Presidente Brigham Young. Ang iyang hugot nga pagtuo sa Manluluwas ug sa gipahiuli nga ebanghelyo ni Jesukristo maoy nakapalahutay kaniya sa mapait nga mga kalisud ug mga pagsulay. Pinaagi niining hugot nga pagtuo, mihimo siya og daghang mga misyon; milahutay siya sa kalisud sa Kampo sa Zion; nagpabilin siya nga makanunayon ug matinud-anon sa ebanghelyo ug ngadto ni Propeta Joseph Smith atol sa malisud nga mga panahon sa Kirtland sa dihang daghang mga Santos ang mibiya sa Simbahan. Pinaagi niini nga hugot nga pagtuo, iyang gigiyahan ang mga Santos ngadto sa Salt Lake Valley ug mitukod sa gingharian sa Dios didto. Siya miingon: “Ang matag tawo kinsa ania niini nga Simbahan kinahanglan gayud nga magmatinud-anon. Dili sila mahimong magpakabuhi pinaagi lamang sa pisikal nga mga pagbati apan kinahanglan gayud nga magpakita og hugot nga pagtuo diha kang Jesukristo, aron makapahimulos sa kahayag sa Espiritu Santo. Kon sila mobaliwala niini ang espiritu sa kalibutan moangkon kanila, ug sila mahimong bugnaw ug dili mabungahon, ug mahulog ngadto sa kangitngit, ug espirituhanong kamatayon” (DNW, 25 sa Abr. 1855, 2).

Mga Pagtulun-an ni Brigham Young

Ang hugot nga pagtuo kang Jesukristo mao ang unang baruganan sa ebanghelyo ug mahimong masabtan lamang pinaagi sa gahum sa Espiritu Santo.

Ang ebanghelyo nga atong gisangyaw mao ang gahum sa Dios ngadto sa kaluwasan; ug ang unang baruganan niana nga Ebanghelyo mao ang … hugot nga pagtuo diha sa Dios, ug hugot nga pagtuo diha ni Jesukristo nga iyang Anak, ang atong Manunubos. Kinahanglan gayud nga kita motuo nga siya mao ang tawo nga gihulagway diha sa Balaan nga mga Kasulatan. … Kita kinahanglan gayud nga motuo nga kining mao nga Jesus gilansang alang sa mga sala sa kalibutan (DBY, 153).

Mahimong mosulti kamo nga ang Ginoo ug ang iyang Ebanghelyo dili angay sa pagtagad, o kamo modawat kanila (DBY, 153).

Sa pagsabut sa unang mga baruganan sa Ebanghelyo—aron makasabut niini sa husto, ang tawo kinahanglang adunay kaalam nga moabut gikan sa kahitas-an, kinahanglang nalamdagan siya sa Espiritu Santo; … kinahanglang mapahimuslan niya mismo ang mga panalangin sa kaluwasan, aron makapaambit niini ngadto sa uban (DBY, 152).

Ang matag tipik sa kamatuoran nga nadawat sa matag tawo usa ka gasa gikan sa Dios. Atong madawat kini nga mga kamatuoran, ug magpadayon sa pagdawat gikan sa usa ka himaya ngadto sa lain nga himaya, … makaangkon og kahibalo sa tanang mga butang, ug mahimong mga Dios, gani mga Anak sa Dios. Kini mao ang celestial nga mga tawo. Kini mao sila kinsa gipili sa Ginoo tungod sa ilang pagkamasulundon. Wala nila isalikway ang kamatuoran, sa dihang nakadungog sila niini. Kini mao sila nga wala mosalikway sa Ebanghelyo, apan miila ni Jesus ug sa Dios diha sa ilang tinuod nga kinaiya; nga miila sa mga anghel sa ilang tinuod nga kinaiya. Mao kini sila ang naningkamot sa kaluwasan sa tawhanong pamilya (DBY, 152).

Ang hugot nga pagtuo diha kang Kristo usa ka gasa sa Dios nga naangkon pinaagi sa pagtuo, pagkamasulundon, ug matarung nga mga buhat.

Kon kamo motuo sa mga baruganan sa Ebanghelyo ug makakab-ot pinaagi sa hugot nga pagtuo, nga mao ang gasa sa Dios, siya modugang og hugot nga pagtuo, magdugang sa hugot nga pagtuo ngadto sa hugot nga pagtuo. Iyang gihatag ang hugot nga pagtuo sa iyang mga nilalang isip usa ka gasa, apan ang iyang mga nilalang adunay kaugalingong kahigayunan sa pagtuo sa Ebanghelyo kon tinuod ba o dili (DBY, 154).

Kon kita maghisgot og hugot nga pagtuo sa kinatibuk-an, mao kini ang gahum sa Dios diin gilalang ang mga kalibutan ug usa ka gasa sa Dios niadto kinsa motuo ug mosunod sa iyang mga kasugoan. Sa laing bahin, walay buhi, may salabutan nga binuhat, nagserbisyo man sa Dios o wala, nga naglihok nga walay pagtuo. Mas maayo pa nga magpakabuhi siya nga dili moginhawa kay sa magpakabuhi nga walay baruganan sa pagtuo. Apan siya kinahanglan gayud nga motuo sa kamatuoran, mosunod sa kamatuoran, ug mogamit sa kamatuoran, aron sa pag-angkon sa gahum sa Dios nga gitawag og hugot nga pagtuo (DBY, 153).

Ubos kita sa obligasyon sa pagsalig sa atong Dios; ug mao kini ang pundasyon sa tanan nga atong mabuhat sa atong mga kaugalingon (DBY, 154).

Kon inyong basahon ang mga pagpadayag, o kon kamo makadungog sa kabubut-on sa Ginoo mahitungod kaninyo, alang sa inyong kaugalingong kaayohan ayaw gayud kana og dawata uban sa maduhaduhaon nga kasingkasing (DBY, 155).

Ang atong Langitnong Amahan dili mopadayag kanunay ngadto sa iyang mga anak sa tinago nga mga buhat sa iyang mga pag-alima, ni siya mopakita kanila sa katapusan gikan sa sinugdanan, kay sila kinahanglan nga makakat-on sa pagsalig kaniya kinsa misaad nga makig-away sa atong mga gubat, ug mokorona kanato og kadaugan, kon kita matinud-anon sama kang Abraham (DBY, 156).

Kon ang mga tawo naanad sa pagpangatarungan sa matag punto, nagsalig lamang sa unsay atong gitawag og tawhanong katarungan, hayan kanunay silang masayop. Apan ibutang ang tawo sa usa ka sitwasyon diin siya obligado o mapugos, aron mapatunhay ang iyang kaugalingon, sa pagbaton og hugot nga pagtuo diha sa pangalan ni Jesukristo, ug kini modala kaniya ngadto sa punto diin siya makahibalo sa iyang kaugalingon; ug malipayon kadtong miagi og mga pagsulay, kon sila magpadayon sa ilang kaligdong ug sa ilang hugot nga pagtuo diha sa ilang calling (DBY, 154).

Ang matarung nga mga binuhatan nagpakita ug naglig-on sa hugot nga pagtuo.

Sa pagpasabut kon unsa ka dako sa pagsalig nga atong gikinahanglan diha sa Dios, kon mogamit ako og termino nga mobagay sa akong kaugalingon, ako moingon nga pagsalig nga walay pagduhaduha. Ako adunay hugot nga pagtuo sa Dios, ug kana nga hugot nga pagtuo mitakdo sa buhat nga akong gihimo. Ako walay pagsalig sa hugot nga pagtuo nga walay buhat (DBY, 155).

Kon ang mga tawo puno lamang unta sa maayong mga buhat, ako makasiguro nga sila makabaton og hugot nga pagtuo sa panahon sa panginahanglan (DBY, 154).

Kon ang hugot nga pagtuo mosulod sa kasingkasing, ang maayong mga buhat mosunod, ug ang maayong buhat modugang nianang lunsay nga hugot nga pagtuo nga anaa kanila (DBY, 156).

Ang akong hugot nga pagtuo mao, kon kita nakahimo sa tanan nga atong mahimo, niana ang Ginoo adunay obligasyon, ug dili mopahigawad sa matinud-anon; siya ang mobuhat sa uban (DBY, 155).

Kon ang tawo anaa sa kahimtang nga dili siya makahimo sa pag-angkon og usa ka tipik sa bisan unsa aron sa pagpatunhay sa kinabuhi, niana kini iya ang pribilehiyo sa pagpakita og hugot nga pagtuo ngadto sa Dios sa pagpakaon kaniya, kinsa mahimong mosugo og uwak sa pagkuha og binuwad nga karne gikan sa dapit diin adunay daghan, ug ihulog kini sa gigutom nga tawo. Kon ako dili na makapakaon sa akong kaugalingon pinaagi sa pamaagi nga gibutang sa Dios diha sa akong gahum, niana igo na nga panahon alang kaniya sa paggamit sa iyang pag-alima sa dili kasagaran nga paagi sa pagpangalagad sa akong mga panginahanglan. Apan samtang makatabang pa kita sa atong mga kaugalingon, atong katungdanan ang pagbuhat sa ingon (DBY, 155).

Daghan kaayong maayong mga tawo, kinsa aduna sa Espiritu sa Ginoo nga kasagaran moabut nga magduhaduha, gamay ra kaayo og pagpaningkamot sa kaugalingon nga sila usahay magduhaduha kon sila mga Santos ba sa kamatuoran o dili. Sa kasagaran sila magduhaduha nga dili unta angay. Kutob nga sila naglakaw nga mapainubsanon sa atubangan sa Dios, nagsunod sa iyang mga sugo, ug nagtuman sa iyang mga ordinansa, mibati nga andam sa paghatag sa tanan alang ni Kristo, ug nagbuhat sa tanan nga mopalambo sa iyang gingharian, dili sila kinahanglan nga magduhaduha, kay ang Espiritu mopamatuod ngadto kanila kon sila iya ba sa Dios o dili (DBY, 155).

Kon ang mga Santos sa Ulahing mga Adlaw magpakabuhi nga takus sa ilang mga pribilehiyo, ug magpakita og hugot nga pagtuo diha sa pangalan ni Jesukristo, ug magpuyo nga makapahimulos sa kahingpitan sa Espiritu Santo sa kanunay sa matag adlaw, walay bisan unsa sa ibabaw sa yuta nga ilang pangayoon, nga dili ihatag ngadto kanila. Ang Ginoo naghulat nga magmanggihatagon gayud niini nga mga katawhan, ug sa pagbu-bu nganha kanila og mga katigayunan, dungog, himaya ug gahum, gani nga sila makapanag-iya sa tanang mga butang sumala sa mga saad nga iyang gihimo pinaagi sa iyang mga Apostoles ug mga Propeta (DBY, 156).

Mga Sugyot alang sa Pagtuon

Ang hugot nga pagtuo kang Jesukristo mao ang unang baruganan sa ebanghelyo ug mahimong masabtan lamang pinaagi sa gahum sa Espiritu Santo.

Ngano nga ang atong hugot nga pagtuo diha kang Ginoong Jesukristo makahatag kanato og paglaum?
Unsa nga piho nga mga butang ang gisulti ni Presidente Young nga kinahanglan atong tuohan aron makabaton og hugot nga pagtuo kang Jesukristo?
Ngano nga ang hugot nga pagtuo kang Jesukristo mao ang unang baruganan sa ebanghelyo? (Tan-awa usab sa Moroni 7:33–34; Mga Artikulo sa Hugot nga Pagtuo 1:4.) Sumala ni Presidente Young, sa unsa nga paagi kita modangat sa pagsabut nga ang hugot nga pagtuo diha kang Kristo mao ang unang baruganan sa ebanghelyo?
Kinsa ang “naningkamot sa kaluwasan sa tawhanong pamilya”?

Ang hugot nga pagtuo diha kang Kristo usa ka gasa sa Dios nga naangkon pinaagi sa pagtuo, pagkamasulundon, ug matarung nga mga buhat.

Unsaon nato sa pagpalambo og hugot nga pagtuo diha kang Kristo? Unsa ang gipasabut sa pagdugang og “hugot nga pagtuo ngadto sa hugot nga pagtuo”? (Tan-awa usab sa Alma 32:26–28.)
Ngano nga kinahanglan kitang motuo, mosunod, ug mobansay og kamatuoran aron makaangkon og hugot nga pagtuo? (Tan-awa usab sa Alma 32:21.)
Ngano nga si Presidente Young miingon nga “kita ubos sa obligasyon sa pagsalig sa atong Dios”? (Tan-awa usab sa Ether 12:6–7.) Unsaon nato sa pagpakita sa atong pagsalig sa Dios? (Tan-awa usab sa Ether 3:11–12.)
Sa unsa nga paagi nga ang pagduhaduha ug tawhanong katarungan makababag sa hugot nga pagtuo? Unsaon nato sa pagkahibalo sa atong mga kaugalingon kon unsa ang atong luna ngadto sa Dios? Sa unsa nga paagi nga ang atong hugot nga pagtuo kang Jesukristo moimpluwensya sa atong mga pagbati mahitungod sa atong mga kaugalingon?
Si Presidente Young miingon, “Magmalipayon kadtong miagi og mga pagsulay, kon sila magpadayon sa ilang kaligdong ug sa ilang hugot nga pagtuo diha sa ilang calling.” Sa unsa nga paagi nga mapadayon nato ang atong hugot nga pagtuo ug kaligdong atol sa malisud nga mga panahon? Sa unsa nga paagi nga ang inyong hugot nga pagtuo ug kaligdong makapahimo kaninyo sa pag-atubang sa kalisdanan sa malampusong paagi? (Tan-awa sa Alma 12:3; Alma 32:6.)

Ang matarung nga mga binuhatan nagpakita ug naglig-on sa hugot nga pagtuo.

Giunsa ni Presidente Young sa pagpasabut ang relasyon tali sa hugot nga pagtuo ug mga buhat?
Unsa ang gisulti ni Presidente Young nga kinahanglan natong buhaton aron matabangan sa Ginoo? Unsa ang gipaabut sa Ginoo niadtong kinsa mobati nga “andam sa paghatag sa tanan alang ni Kristo, ug nagbuhat sa tanan nga mopalambo sa iyang Gingharian”?
Unsa ang gisaad ni Presidente Young ngadto niadtong kinsa “magpakita og hugot nga pagtuo diha sa pangalan ni Jesukristo, ug magpuyo nga makapahimulos sa kahingpitan sa Espiritu Santo sa kanunay”? Kon ang atong mga pag-ampo inubanan sa hugot nga pagtuo ug inspirasyon, unsa man ang resulta? (Tan-awa usab sa D&P 46:30; Helaman 10:5.)