Hugna 30: Pagpalambo og Sama kang Kristo nga Kinaiya ngadto sa Uban

Hugna 30

Pagpalambo og Sama kang Kristo nga Kinaiya ngadto sa Uban

Nakita ni Presidente Brigham Young ang panginahanglan sa gugma nga putli, “ang gugma nga putli ni Kristo,” aron sa paghapsay sa dalan sa kinabuhi. Ang iyang mga gibuhat ngadto ni Lucy Groves maoy mga ehemplo sa iyang pagkamabination ug pagpangalagad ngadto sa uban: Padulong sa kasadpan nga panaw, si Lucy nahulog ilawom sa ligid sa ilang karomata sa pamilya, nabali ang iyang bitiis ug daghang mga gusok. Si Presidente Young mitarung sa nabali nga bitiis ug mihatag kaniya og panalangin. Pipila ka adlaw sa wala madugay ang anak nga babaye ni Lucy napandol ngadto sa iyang bali nga bitiis ug nabali kini sa ikaduhang higayon. Sa kasakit nga gibati sa matag lakang sa baka, si Lucy mihangyo sa iyang bana nga manaog sila sa karomata ug mopadayon ang uban nga wala sila. Gipahayag ni Presidente Young nga dili siya mobiya kanila sa daplin sa karsada diha sa kuyaw nga teritoryo. Gimandoan niya ang daghang mga kalalakin-an nga putlon ang tiil sa higdaanan ni Lucy ug ibitay ang higdaanan diha sa mga kilid nga haligi sa karomata aron ang kutson ug ang mga alambre nga mainat-inat [spring] sayon nga motabyog, sama sa usa ka duyan. Si Presidente Young mibag-o sa iyang panalangin ngadto kang Lucy ug misakay dapit sa iyang kiliran sulod sa pipila ka mga adlaw pagsiguro nga wala na siyay problema. “Uban sa malumong pagkamabination nga kinaiya,” misulat ang apo nga lalaki ni Lucy, “iyang naangkon sa kahangturan ang gugma ni Lucy ug sa iyang mga kaliwatan” (HRF, 157–58).

Mga Pagtulun-an ni Brigham Young

Sul-ubi ang inyong mga kaugalingon uban sa bugkos nga gugmang putli.

Wala kita dinhi malayo ug mag-inusara, lain-lain nga pagkaporma ug gilangkuban sa lain-laing materyal gikan sa ubang mga tawhanong kaliwat. Kita nahisakop ug kabahin niini nga pamilya, sa lintunganay kita anaa ubos sa obligasyon ngadto sa usag usa (DBY, 271).

Ang mga Santos sa Ulahing mga Adlaw kinahanglang makakat-on nga ang tinguha sa ilang mga kaigsoonan ila nga kaugalingong tinguha, o sila dili gayud maluwas ngadto sa celestial nga gingharian sa Dios (DBY, 271).

Ang Ginoo mopanalangin niana nga mga katawhan nga puno sa gugma nga putli, pagkamabination ug maayo nga mga buhat (DBY, 280).

Gugma nga putli. Adunay usa ka hiyas, kinaiya, o baruganan, diin, kon mahalon ug gamiton sa mga Santos, mopamatuod sa kaluwasan sa mga kaliboan ug dugang pa nga mga kaliboan. Ako mopaila sa gugma nga putli, o gugma, diin maggikan ang pagpasaylo, pagkamainantuson, pagkamabination, ug pagpailub (DNW, 11 sa Ene. 1860, 1).

Kinahanglan kita adunay gugma nga putli; kinahanglang buhaton nato ang kutob sa mahimo aron angkunon pag-usab ang mga nangawalang mga anak ni Adan ug ni Eva, ug dad-on sila pagbalik aron maluwas sa presensya sa atong Amahan ug Dios. Kon ato kini nga buhaton, ang atong gugma nga putli molugway ngadto sa labing kinatas-an nga bahin nga gidesinyo alang sa gugma nga putli sa Dios nga ilugway sa taliwala niini nga mga katawhan (DBY, 273).

Higugmaa ang inyong silingan sama sa inyong kaugalingon [tan-awa sa Mateo 22:39]; buhata ngadto sa uban kon unsa ang gusto ninyo nga buhaton sa uban diha kaninyo [tan-awa sa Mateo 6:12] (DNW, 20 sa Mar. 1852, 3).

Kini binuang nga dako kaayo sa mga tawo nga moingon nga gihigugma nila ang Dios; nga sila wala mahigugma sa ilang mga kaigsoonan [tan-awa sa 1 Juan 4:20] (DBY, 271).

Kinahanglan gayud natong sugdan ang atong paghago sa gugma ug pagkamabination diha sa pamilya diin kita nahisakop; ug unya ilugway kini ngadto sa uban (DBY, 271).

Pagmakanunayon, kanunay nga magpabilin sa kamatuoran. Ayaw gayud pagdasig og malisya o kalagot diha sa inyong mga kasingkasing; kana dili angay sa mga Santos (DBY, 273).

Moingon ba ako, Higugmaa ang inyong mga kaaway? Oo, diha sa piho nga mga baruganan. Apan wala kamo kinahanglana sa paghigugma sa ilang kadautan; gikinahanglan lamang kamo nga mohigugma kanila kutob sa mga tinguha ug paningkamot sa pagpausab kanila gikan sa dautan nilang mga binuhatan, nga sila unta maluwas pinaagi sa pagkamasulundon sa Ebanghelyo (DBY, 272).

Ang inyo bang mga silingan nagbuhat og sayop? Oo. Ang mga tawo mianhi dinhi gikan sa lain-lain nga dapit sa yuta, aron himoon kini nga ilang sinagop nga nasud, ug ang karaan nga mga lumulupyo nagpaabut kanila nga monunot ug mosagop dayon sa mga kinaiya, batasan, ug mga tradisyon, o maghunahuna sila nga ang mga bag-ong namuyo dili angay sa ilang pakighigala. Sa laing pagkasulti, “kon ang matag lalaki, babaye, ug bata wala magbuhat, maghunahuna, ug makakita sama sa akong gihimo, mga makasasala sila.” Gikinahanglan gayud kaayo nga kita adunay gugma nga putli nga motabon sa kapid-an nga mga sala (DNW, 11 sa Ene. 1860, 1).

Kinahanglan nga kini usa ka makatagbaw nga ebidensya nga kamo anaa sa dalan sa kinabuhi, kon kamo nahigugma sa Dios ug sa inyong mga kaigsoonan sa tibuok ninyong kasingkasing (DBY, 271).

Paghan-ay og dalan nga inyong sundon nga makaangkon og kinabuhing dayon, ug pagdala og daghan uban kaninyo kutob sa mahimo. Dad-a sila kon unsa sila, sabta sila kon unsa sila, ug pakig-uban kanila kon unsa sila, tan-awa sila sama sa pagtan-aw sa Dios kanila (DBY, 274).

Pagkamabination. Pagmabination ngadto sa tanan ingon nga ang atong Amahan sa Langit mabination. Iyang gibu-bo ang ulan ngadto sa mga matarung ug sa mga dili matarung; ug gipasidlak ang adlaw ngadto sa mga dautan ug sa mga maayo [tan-awa sa Mateo 5:45]. Mao nga tuguti nga ang kamaayo modangat ngadto sa tanang binuhat sa iyang mga kamot, diin aduna kitay mahimo; apan ayaw pagtugyan ngadto sa espiritu ug impluwensya sa dautan (DBY, 272).

Palayo gikan sa ginagmay nga kangil-ad, ug ipakita ang pagkamabination ngadto sa tanan. Pantuna, kon ang pagpanton maoy pinakamaayo nga tubag; apan sulayi ang pagmaymay sa dili pa ninyo sulayan ang bunal (DBY, 277).

Kon kamo gitawag diha sa pagpanton og usa ka tawo, ayaw gayud pasubrahi og panton nga dili na hinoon kini matarung [tan-awa sa D&P 121:43] (DBY, 278).

Wala gayud kini makausab sa akong mga pagbati ngadto sa mga tawo, isip mga lalaki o mga babaye, bisan kon sila motuo sama sa akong gibuhat o dili. Kamo ba makapuyo isip mga managsilingan uban kanako? Ako makahimo uban kaninyo, ug dili kini usa ka dako nga butang alang kanako kon kamo motuo ba kanako o dili (DBY, 278–79).

Sa atong [pakig-uban] sa mga dili miyembro—ayaw sila tawaga og mga Hentil—himoa nga ang atong ehemplo usa nga angay nga pagasundon; unya ang matag usa diha kanila nga matinuuron moingon, “Nagtuo ako nga husto kamo, Siguro tingali ako ug makig-uban kaninyo” (DBY, 279).

Ang pagkalumo ug ang pagkamabination, ang pagkamatarung ug pagkamatinuuron, ang pagkapuno sa hugot nga pagtuo ug kaligdong, ang dili paghimo og sayop iya sa Dios; ang pagkamaayo mohatag og dan-ag sa pagkamahigugmaon ngadto sa libut sa matag tawo nga aduna niini, naghimo sa ilang mga panagway nga mosanag uban sa kahayag, ug ang ilang pundok gitinguha tungod sa ilang kahalangdon. Sila gihigugma sa Dios, sa balaan nga mga anghel, ug sa tanan nga maayo sa yuta, samtang sila gikayugtan, gikasinahan, gidayeg ug gikahadlokan sa mga dautan (DBY, 280).

Maayo nga mga Buhat. Ang pinaka-importante sa atong relihiyon mao ang pagbaton og kalooy sa tanan, paghimo og maayo sa tanan, kutob nga sila motugot nga kita mohimo og kaayohan ngadto kanila (DBY, 272).

Himoa nga kita adunay pagkamanggiloy-on diha sa matag-usa, ug tuguti nga ang lig-on nga mabination nga moamuma sa huyang ngadto sa pagkaligon, ug himoa nga kadtong makakita mogiya sa buta hangtud nga sila makakita sa agianan sa ilang mga kaugalingon (DBY, 271).

Pag-ampo kanunay alang sa tanan nga makab-ot sa kalooy (DBY, 279).

Kon kamo makakita og usa ka silingan nga nagsugod sa pagkahisalaag, i-ampo siya nga unta siya makaangkon sa Espiritu sa Ebanghelyo nga iya na nga naangkon sa una. Ug kon inyong gibati ang Espiritu diha sa inyong mga kaugalingon, pag-ampo alang sa dugang niana nga kahayag nga inyong nadawat sa una ninyong pagdawat sa Ebanghelyo, ug inyong maluwas ang inyong kaugalingon ug ang inyong panimalay (DBY, 272).

Ibutang nato nga niini nga komunidad adunay napulo ka mga makililimos nga magpakilimos sa matag balay alang sa pagkaon, ug ang siyam kanila malimbongong mga impostor nga nagpakilimos lamang aron paglikay sa trabaho, ug kini inubanan nianang dautan nga buhat sa ilang kasingkasing ngadto sa mga manggihatagon ug masinabuton, ug nianang napulo nga mibisita kaninyo usa ra ang angayan sa inyong tabang; unsa ang labing maayo, hatagan og pagkaon ang napulo, aron pagsiguro nga natabangan ang tinud-anay nga nagkinahanglan, o balibaran ang napulo tungod kay wala kamo masayud hain kanila ang usa nga angay? Kamong tanan moingon, ipangalagad ang gasa sa putling gugma ngadto sa napulo, kay sa inyong talikdan ang nag-inusarang takus ug tinud-anay nga nanginahanglan nga tawo uban kanila. Kon dili ninyo himoon kini, kini wala makahimo og kalainan sa inyong mga panalangin, bisan kon kamo nangalagad ngadto sa angayan o sa dili angay nga mga tawo, tungod kay kamo mihatag og limos uban sa bug-os nga tinguha sa pagtabang sa tinuod nga nanginahanglan (DBY, 274).

Ayaw panghimaraut; hukom sa matarung nga paghukom.

Ayaw kamo paghukom sa uban, aron kamo dili pagahukman [tan-awa sa Mateo 7:1]. Himoa nga walay mohukom sa iyang isig ka tawo, gawas kon siya nasayud nga siya adunay panghunahuna ni Kristo nga anaa kaniya [tanawa sa Moroni 7:16–18] Angay natong palandungon og maayo kini nga punto; kanunay kini nga giingon—“Kana nga tawo nakahimo og sayop, ug dili siya mamahimo nga usa ka Santos, o dili siya mohimo niana.” Giunsa ninyo sa pagkasayud? … Ayaw hukmi ang mao nga mga tawo, kay kamo wala masayud sa plano sa Ginoo kabahin kanila; busa, ayaw pag-ingon nga sila dili mga Santos. … Ang usa ka tawo nga mosulti og sukwahi dili usa ka Santos sa Ulahing mga Adlaw, kay ang pipila ka mga dili importante nga mga kalihokan sa kinabuhi sa tawo nagmatuod nga siya wala makaangkon sa Espiritu sa Dios. Hunahunaa kini, mga kaigsoonan; isulat kini, aron matin–aw ang inyong mga panumduman uban niini; dad-a kini kaninyo ug tan-awa kini kanunay. Kon ako mohukom sa akong mga kaigsoonan, gawas kon gihukman nako sila pinaagi sa mga pagpadayag ni Jesukristo, wala kanako ang Espiritu ni Kristo; kay kon ako aduna pa, dili gayud ako mohukom og tawo (DBY, 277–8).

Kini molunop sa akong kasingkasing sa kasubo nga makita ang daghan kaayo nga mga Elder sa Israel kinsa nangandoy nga ang tanan mosubay sa ilang sumbanan ug pagasukdon pinaagi sa ilang sukod. Ang matag tawo mohukom sa uban ug maghunahuna nga ang uban nga wala mohaum sa ilang mga sumbanan [tan-awa sa Isaias 28:20], kinahanglan nga pugson sa pagsunod niadtong mga sumbanan (DBY, 279).

Kon sila makakita og usa ka igsoon nga lalaki o babaye nga nasayop, kinsang buhat wala mahiuyon sa ilang mga hunahuna nianang mga butanga, sila mohukom dayon nga siya dili mamahimong usa ka Santos, ug bakwion ang ilang panaghigalaay, naghukon nga, kon sila anaa sa dalan sa kamatuoran, sila mahimo sa tukma ingon nga sila mao (DBY, 279).

Magmapailubon kita sa usag usa. Sa kinatibuk-an wala ako magtan-aw sa mga butang sama sa inyong gihimo. Ang akong paghukom sa tanang butang dili sama sa inyo, o ang inyo sama sa ako. Kon kamo mohukom og lalaki o babaye, hukmi ang katuyoan sa kasingkasing. Dili pinaagi sa mga pulong; labi na, ni pinaagi sa mga lihok, nga ang tawo pagahukman panahon sa mahinungdanon nga adlaw sa Ginoo; apan, kalabut sa mga pulong ug mga buhat, ang mga pagbati ug mga tinguha sa kasingkasing ang pagatanawon, ug pinaagi niini ang mga tawo pagahukman [tan-awa sa D&P 137:9] (DBY, 273–74).

Himoa nga ang tanang mga Santos sa Ulahing mga Adlaw makakat-on nga ang mga kahuyang sa ilang mga kaigsoonan dili mga sala. Kon ang usa ka lalaki o babaye sa dili tinuyo makahimo og sayop, ayaw kana itumbok kanila nga usa ka sala. Magkat-on kita sa pagkamanggiloy-on sa usag usa; himoa nga ang kalooy ug pagkamabination mohumok sa matag kasuko ug sa masuk-anon nga pagbati, nga unta kita mahimong mainantuson ug mapuslanon sa tanan natong pakigbinayloay sa usag usa (DBY, 273).

Pag-alagad sa Ginoo, ug paningkamuti nga dili mangita og sayop sa usag usa [tan-awa sa D&P 88:124]. Pagpuyo nga kamo dili makakita og sayop sa inyong mga kaugalingon, ayaw hunahunaa ang mga sayop sa inyong mga kaigsoonan, kay ang matag tawo adunay igong atubangonon sa iyang kaugalingon (DBY, 280).

Kamo mahimong makakita, o maghunahunang nakakita kamo, og liboan ka mga sayop diha sa inyong mga kaigsoonan; apan sila gihan-ay sama kaninyo; sila mga unod sa inyong unod, bukog sa inyong bukog; sila iya sa inyong Amahan kinsa anaa sa langit; kitang tanan Iyang mga anak, ug kinahanglang malipay sa usag usa kutob sa mahimo (DBY, 271).

Pagtinahuray sa usag usa, ayaw pagsulti og ngil-ad sa usag usa. Ang uban, kon sila mobati og gamay nga kalagot sa usa ka tawo, maghunahuna nga unta itambog siya sa impyerno, ingon nga siya dili takus og usa ka dapit dinhi sa yuta. O mga buang! nga wala makasabut nga kadtong ilang gipanghimaraut mga binuhat sa Dios, ingon man ang inyong mga kaugalingon! Ang Dios wala magtan-aw sa ilang mga kahuyang; ug kutob sila naghimo og maayo, sila angay nga dawaton sama kanato. Pasalamat sa Dios nga mas taas ang inyong nahibaloan, ug pagpakapuno sa kalooy ug pagkamabination (DBY, 274).

Ang Dios manalangin sa mapainubsanon ug sa mga matarung, ug unta Siya adunay kalooy nganhi kanato tungod sa kahuyang nga anaa sa atong pagkatawo. Ug sa paghunahuna sa dakong kahuyang ug ka walay kahibalo sa mga mortal, himoa nga aduna kitay kalooy diha sa usag usa (DBY, 272).

Ang manggiloy-on nga tawo makakaplag og kalooy [tan-awa sa Mateo 5:7] (DBY, 273).

Dako ang akong pasalamat nga dili atong katungdanan, dinhi sa atong kasamtangan nga kahimtang karon, ang paghukom sa kalibutan; kay kon ingon, atong maguba ang tanan. Wala kitay igo nga kaalam, ang atong hunahuna wala masudli sa kahibalo ug gahum sa Dios; ang espiritu kinahanglan nga makamando sa unod og dugang pa hangtud kini magmalampuson sa pagbuntog sa iyang mga pagbati, hangtud ang tibuok kalag madala ngadto sa hingpit nga panag-uyon sa hunahuna ug kabubut-on sa Dios. Ug kinahanglan usab nga kita makaangkon og kahait sa kalibutan nga gigamit sa Dios aron siya makakita sa mga umaabut, ug sa pagsiguro ug sa pagkahibalo sa mga resulta sa atong mga binuhatan ngadto unya sa umaabut, gani bisan sa kahangturan, sa dili pa kita makahimo sa paghukom (DBY, 278).

Lig-una ang pagtuo sa usag usa ug likayi ang panagbingkil.

Kon atong maangkon kanang hugot nga pagtuo ug pagsalig sa usag usa, ug sa atong Dios, nga kon kita mangayo og tabang, mahimo nato kini uban sa hingpit nga kasiguroan ug kahibalo nga kita makadawat, wala ba ninyo masabti nga kini mogiya kanato dayon sa pagbuhat ngadto sa uban unsay atong gusto nga ilang buhaton diri kanato, sa matag palakat ug kahimtang sa kinabuhi? Moaghat kini kanato sa pagbuhat, dili lamang unsay gihangyo, apan sobra pa. Kon ang imong igsoon nga lalaki mohangyo kanimo sa paguban kaniyag usa ka milya, ubani siyag duha ka milya; kon siya mangayo sa imong kamisola, ihatag pa usab kaniya ang imong kupo [tan-awa sa Mateo 5:40–41]. Kini nga baruganan nag-aghat kanato sa pagbuhat sa tanan natong mahimo aron mapalambo ang interes sa matag usa, ang kawsa sa Dios dinhi sa yuta, ug bisan unsa nga gitinguha sa Ginoo nga atong buhaton; naghimo kanato nga andam ug uyon sa pagbuhat (DBY, 275).

Apan kon kulang kita og pagsalig sa usag usa, ug masina sa usag usa, ang atong kalinaw maguba. Kon atong ugmaron ang mga baruganan sa pagkadili matarug nga pagsalig sa usag usa, ang atong kalipay hingpit (DBY, 275).

Ang buluhaton diin kamo ug ako gitala mao ang pagpahiuli sa pagsalig diha sa mga hunahuna sa mga katawhan; ug kon ako makadungog sa mga kahimtang nga nahitabo diin ang mga kaigsoonan wala motuman sa ilang saad gitan-aw ko kini isip usa ka lama diha sa kinaiya niining mga tawhana. Kinahanglan nga tumanon nato ang atong mga pulong ngadto sa usag usa. Ug kon kita adunay kalisud o wala magkasinabut sa usag usa, sabuti kini, hisguti ang hilisgutan og maayo, ligdong, sa seryuso ug mainampingon nga paagi, ug atong makita nga ang tanang mga problema masulbad niini nga paagi nga mas dali kay sa uban; ug ato usab nga makita nga hapit sa matag problema nga moabut taliwala sa mga lumulupyo sa yuta, naggikan sa walay pagsinabtanay; ug kon ang sayop nga tinguha ug hunahuna anaa gayud, kon ang hitabo nahisgutan og maayo, ang tawo nga nakahimo sa sayop sa kasagaran makasabut ra (DBY, 276).

Kon adunay kalainan sa paghukom tali sa duha ka pundok, papundoka sila ug ipanulti ang ilang mga problema ngadto sa usag usa, ipaubos ang ilang mga kaugalingon, ug moingon, “Brother [o sister] gusto ko nga mobuhat og tarung; oo, mahimo gani nga magpasayop ako sa akong kaugalingon aron paghimo kanimo nga husto.” Wala ba ninyo mahunahuna nga ang usa ka lalaki o babaye, nga naghimo og ingon niana ngadto sa iyang silingan, mahatagan og katarungan pinaagi sa balaod sa pagkamatarung? Ang ilang mga paghukom magkahiusa, ug sila magkasinabut: Unya, agi og sangputanan, wala na kinahanglana ang pagtawag og ikatulo nga tawo aron pagsulbad sa problema. Human mahimo kini nga paagi, kon dili pa kamo magkasinabut, niana pagtawag og ikatulo nga tawo aron sa paghusay niini (DBY, 276–77).

Ang panagbingkil sa kasagaran mahitabo nga modangat ngadto sa paglinagyoay nga ang mga kaigsoonan nawad-an og pagsalig sa kamatinuoron ug kaligdong sa usag usa, nga tingali ang naglalis sa nasayop kabahin sa gamay, hakog, walay kahibalo, personal nga wala masabti, nagdala niini hangtud sa pagtinguha nga ang matag usa mapahimulag sa Simbahan. Sa kasagaran gayud ang ingon nga mga hitabo dad-on sa akong atubangan. Ang problema, ug mahibaloan nga kini nagsugod sa walay kapuslanan nga panagsumpaki kabahin sa gagmay nga mga butang; ang tanang kagubot miabut gikan sa usa ka walay pulos nga hinungdan. Likayi ang pag-amuma og dili pagsinabtanay nga mahimong problema (DBY, 277).

Kon ang inyong mga silingan maghisgut mahitungod kaninyo, ug kamo nagtuo nga sila nakahimo og sayop sa pagsulti og dautan kabahin kaninyo, ayaw ipahibalo nga kamo gayud nakadungog og pulong, ug ipakita ang inyong kaugalingon sama nga sila kanunay naghimo og matarung (DBY, 277).

Himoon nato sugod karon sa pagpuyo aron sa pagmugna og pagsalig diha sa tanang katawhan kang kinsa atong gikaatubang ug gikakita; ug mahala ang matag tipik sa pagsalig nga atong nadawat isip usa sa pinakabililhon nga kabtangan nga maangkon sa usa ka tawo. Kon pinaagi sa akong maayo nga mga buhat ako nakamugna og pagsalig sa akong silingan ngari kanako, ako nag-ampo nga unta ako dili gayud makahimo og butang nga makadaot niini (DBY, 276).

Mga Sugyot alang sa Pagtuon

Sul-ubi ang inyong mga kaugalingon uban sa bugkos nga gugmang putli.

Unsa nga “mga obligasyon ngadto sa usag usa” nga anaa kanato isip mga sakop sa tawhanong pamilya? Sa unsang paagi nga ang atong mga kinaiya ug mga binuhatan ngadto sa uban makaapekto sa atong kaugalingong kaluwasan? Unsaon nga ang gugma nga putli makatabang kanato aron “angkunon pag-usab ang nangawalang mga anak ni Adan ug ni Eva”?
Nganong kita dili sa tinud-anay makahigugma sa Dios kon dili kita mohigugma sa ubang tawo? Ngano nga mahinungdanon ang “pagtan-aw sa [uban] sama sa pagtan-aw sa Dios kanila”? Unsaon ninyo sa pagpatubo sa inyong abilidad sa paghimo niini?
Gugma nga putli, “ang gugma nga putli ni Kristo,” mapahayag pinaagi sa daghang mga paagi (tan-awa sa, alang sa sanglitanan, Moroni 7:45–47). Unsa ang uban nga mga pagpahayag sa gugma nga putli nga gipatigbabaw ni Presidente Young? Sa unsang mga paagi nga mas mapakita ninyo ang gugma nga putli ngadto niadtong inyong gikakita? Giunsa man sa pagpakita og gugma nga putli sa uban diha kaninyo?

Ayaw panghimaraut; hukmi sa matarung nga paghukom.

Unsa ang gitambag ni Presidente Young kabahin sa paghukom sa usag usa? Unsaon ninyo sa paggamit kini nga tambag kon makigsulti niadtong kinsa naghunahuna o lain og linihokan kay kaninyo?
Unsa ang mahimong mga sangputanan kon dili matarung ang atong paghukom ngadto sa atong isig ka tawo? Unsa ang makatabang kanato aron matarung ang atong paghukom kon anaa na kita sa kahigayunan nga mohukom og laing tawo? (Tan-awa usab sa Moroni 7:14–18.) Nganong importante man kanato ang pagpakita og kalooy ngadto sa matag usa?
Sa unsang paagi nga ang paghinumdom nga kitang tanan mga anak sa Dios makatabang kanato sa atong mga pakigrelasyon uban sa mga sakop sa atong pamilya, kahigalaan, ug mga kaila?

Lig-una ang pagtuo ug likayi ang panagbingkil.

Unsaon nato sa pagpalig-on ang atong hugot nga pagtuo ug pagsalig sa? Unsa ang mga sangputanan kon buhaton nato kini? Unsa ang mahitabo kon kita walay pagsalig sa usag usa?
Unsa ang uban nga mga tinubdan sa panagbingkil? (Tan-awa usab sa 2 Nephi 26:32–33.) Unsa ang panagbingkil ug unsaon nato sa paglikay niini? Unsa ang inyong nahimo sa nangagi aron malikayan ang panagbingkil? Giunsa sa pagtambag ni Presidente Young kanato nga atong pagabuhaton kon adunay panaglalis o panagbangi nga moabut?
Ngano sa inyong hunahuna nga si Presidente Young mihulagway sa pagsalig sa uban isip “usa sa pinakabililhon nga kabtangan nga maangkon sa usa ka tawo”? Unsang piho nga mga butang ang inyong mahimo aron ang pagpiyal ug pagsalig sa ubang mga tawo diha kaninyo madugangan?