Pagpangandam alang sa Mahangturong Pag-uswag

Si Presidente Brigham Young usa ka magtutuon. Nagsugod siya isip usa ka tighimo og muebles [furniture] ug sa kaulahian nakapalambo sa mga kahanas nga gikinahanglan nga mahimong usa ka misyonaryo, tigpahimutang og panimuyo, gobernador, ug propeta. Iyang nakita kini nga kinabuhi isip usa ka panahon sa hingpit nga pagpakabuhi, pagtubo, ug pagpangandam alang sa kahangturan, dili usa ka panahon sa pagpangandam aron mamatay. Iyang giawhag ang mga Santos nga moapil sa maayo nga mga kalihokan, sa pagpalambo ug pagpalantip sa ilang panabut, ug sa paghambin sa kamatuoran sa ilang pagkab-ot sa kahingpitan. Pinaagi sa pagbuhat sa ingon, sila sa katapusan makapadayon sa pagsulod sa kalibutan sa mga espiritu ug magpadayon diha sa mahimayaong agianan sa mahangturong pag-uswag.

Mga Pagtulun-an ni Brigham Young

Nangandam kita alang sa kinabuhing dayon pinaagi sa inadlaw-adlaw nga pagkat-on, paglambo, ug pagtukod sa gingharian sa Dios.

Unsa ang atong gianhi dinhi? Aron makakat-on sa paglipay pa, ug sa pagtubo diha sa kahibalo ug sa kasinatian (DBY, 87).

Ang katuyoan niini nga pagpakabuhi mao ang pagkat-on, nga ato lamang mabuhat sa hinayhinay (DBY, 87). Ang tibuok mortal nga pagpakabuhi sa tawo dili mosobra ni mominus kaysa usa ka kahimtang sa pagpangandam nga gihatag sa may kinutuban nga mga binuhat, usa ka panahon diin mahimo silang mopalambo sa ilang mga kaugalingon alang sa usa ka mas taas nga kahimtang sa pagkatawo (DBY, 87).

Ang unang mahinungdanong baruganan nga kinahanglang mahatagan sa pagtagad sa katawhan, nga kinahanglang masabtan sa bata ug sa hamtong, ug diin mao ang nag-unang hinungdan sa tanang lihok, makasabut man niini ang mga tawo o dili, mao ang baruganan sa pagpalambo. Ang baruganan sa pagtubo, sa kahimayaan, sa pagdugang ngadto sa unsay anaa na kanato, mao ang labing makapalihok nga baruganan ug hinungdan sa mga lihok sa mga tawo. Bisan unsa pa man ang ilang mga gitinguha, sa unsa nga nasud sila natawo, unsang mga tawo ang ilang nakauban, unsang relihiyon ang ilang giangkon, o unsang politika ang ilang gihuptan, mao kini ang nag-unang hinungdan sa mga lihok sa mga tawo, nag-apil sa tanang mga gahum nga gikinahanglan sa pagpahigayon sa mga katungdanan sa kinabuhi (DBY, 87).

Gibutang kita niini nga yuta aron sa pagpakita nga kita takus nga moadto sa celestial nga gingharian, sa terrestrial, o sa telestial o sa impyerno, o sa lain pa nga gingharian, o dapit, ug kita adunay igo sa kinabuhi nga gihatag ngari kanato aron sa pagbuhat niini (DBY, 87).

Kini usa ka kalibutan diin kinahanglan atong mapamatud-an ang atong mga kaugalingon. Ang tibuok kinabuhi sa tawo usa ka adlaw sa pagsulay, diin mahimo natong mapamatud-an ngadto sa Dios, diha sa atong kangitngit, diha sa atong mga kahuyang, ug diin ang kaaway naghari, nga kita mga higala sa atong Amahan, ug nga kita nakadawat og kahayag gikan kaniya ug takus nga mahimong mga pangulo sa atong mga anak––aron mahimong mga ginoo sa mga ginoo, ug mga hari sa mga hari––aron makabaton og hingpit nga kamandoan nianang bahin sa atong mga pamilya nga pagakoronahan didto sa celestial nga gingharian uban sa himaya, pagkaimortal, ug mahangturong mga kinabuhi (DBY, 87).

Paminawa kini, kamong tanan nga mga Santos sa Ulahing mga Adlaw! Inyo bang igahin ang panahon sa inyong pagsulay sa walay hinungdan, ug usikan ang inyong pagpakabuhi ug pagkatawo? Kamo gihimo, ug gidala ngadto sa pagkatawo, alang sa katuyoan sa paglahutay hangtud sa kahangturan, kon inyong tumanon ang katuyoan sa inyong pagkalalang, mopadayon sa tarung nga dalan, mosunod sa mga kinahanglanon sa celestial nga balaod, ug motuman sa mga sugo sa atong Dios (DBY, 87).

Ang mga tawo gilauman sa ilang Tiglalang nga aktibong mopahigayon sa pagbuhat og maayo kada adlaw sa ilang mga kinabuhi, diha sa pagpalambo sa ilang kaugalingong mental ug pisikal nga kondisyon o nianang sa ilang mga silingan (DBY, 88).

Ania kita aron sa pagpakabuhi, aron sa pagpakanap sa salabutan ug kahibalo diha sa mga tawo. Ania ako dinhi aron sa pagtudlo sa akong mga kaigsoonan, sa pagtudlo sa akong pamilya sa pamaagi sa kinabuhi, sa pagpasanay sa akong kaliwatan, ug sa pagpakabuhi, kon diha sa akong gahum, hangtud nga ang sala, kadautan, pagkamalimbungon, impyerno, ug ang Yawa, ug ang tanang mga matang ug mga ang-ang sa mga kangil-ad mapapha gikan sa yuta. Mao kana ang akong relihiyon ug ang katuyoan sa akong pagpakabuhi. Wala kita moanhi aron lamang mangandam sa pagkamatay, ug dayon mamatay; apan ania kita dinhi aron sa pagpakabuhi ug sa pagtukod sa Gingharian sa Dios sa yuta––sa pagpauswag sa Priesthood, pagbuntog sa mga gahum ni Satanas, ug pagtudlo sa mga katawhan sa katuyoan sa ilang pagkalalang––nga diha kanila natipigan ang tinubdan sa tanang salabutan. Dinhi ang sinugdanang punto––ang pundasyon nga gipabarug diha sa paghimo sa tawo alang sa pagdawat og kahingpitan sa mahangturong kahibalo ug himaya. Kinahanglan ba kitang moadto una sa sunod kinabuhi aron sa pagkab-ot niini? Dili; kinahanglan kitang mopauswag niini dinhi sa yuta (DBY, 88).

Ang mga Santos sa Ulahing mga Adlaw sa tibuok nga mga walog niini nga kabukiran ug sa tibuok kalibutan kinahanglan nga makakat-on kon unsay ilang katuyoan dinhi sa yuta. Ania sila dinhi aron molambo ug mosanay, modaghan, mopundok sa Balay ni Israel, motubos sa Zion, motukod sa Zion sa atong Dios, ug mopauswag nianang mahangturong salabutan nga anaa sa mga Dios, ug mosugod sa pagtanum niini dinhi sa yuta, ug mopagamut niini og maayo ug mamunga paingon ngadto sa himaya sa Dios, hangtud nga ang matag mangil-ad nga baruganan diha sa mga kasingkasing sa mga tawo maguba, ug ang yuta mobalik ngadto sa paraisohanong kahimtang niini, ug ang Ginoo moabut ug mopuyo uban niining mga tawo, ug makiglakaw ug makig-istorya uban kanila sama sa iyang gibuhat kang Amahang Adan. Mao kana ang atong tuyo, ug dili motugot nga ang tanan natong mga kusog maggahin lamang sa pagpangandam sa pagkamatay (DBY, 89).

Ang katuyoan sa atong kinabuhi kinahanglan mao ang pagtukod sa Zion sa atong Dios, sa pagpundok sa Balay ni Israel, pagdala sa kahingpitan sa mga Hentil, pagpahiuli pag-usab ug pagpanalangin sa yuta sa atong abilidad ug mohimo niini sama sa Tanaman sa Eden, magtigum og mga katigayunan sa kahibalo ug kaalam diha sa atong kaugalingong mga panabut, molimpyo sa atong kaugalingong mga kasingkasing ug moandam sa katawhan sa pagsugat sa Ginoo kon siya moabut (DBY, 88).

Makahimo kita sa pag-uswag samtang magtubo kita diha sa kahibalo ug kasinatian.

Kini nga buhat usa ka mauswagong buhat, kini nga doktrina nga gitudlo sa mga Santos sa Ulahing mga Adlaw sa kinaiya niini makapahimaya, makapalambo, makapakanap ug makapalugway og maayo hangtud nga kita makahibalo sama sa kita nailhan, makakita sama nga kita nakit-an (DBY, 90).

Anaa kita sa tulunghaan ug nagpadayon sa pagkat-on, ug wala kita magpaabut nga mohunong sa pagkat-on samtang nagpuyo kita dinhi sa yuta; ug kon kita mamatay, makapaabut kita sa pagpadayon sa pagkat-on ug paglambo sa atong pundo sa kasayuran. Kana tingali mahimong usa ka kahibudngan nga ideya ngadto sa uban; apan alang kini sa dayag ug yano nga katarungan nga kita dili makahimo sa pagdawat sa tanang kahibalo sa usa lamang ka higayon. Busa kinahanglan kitang modawat og gamay diri ug gamay didto (DBY, 91).

Mohatag siya og gamay ngadto sa iyang mapainubsanong mga sumusunod karon, ug kon sila molambo ngadto niini, ugma mohatag siya og dugang gamay, ug sa sunod adlaw dugang gamay. Dili siya modugang ngadto nianang wala nila palamboa, apan sila gimandoan nga padayong mopalambo sa kahibalo nga ila nang naangkon, ug sa ingon makabaton og usa ka pundohanan sa kaalam (DBY, 90).

Sa yanong paagi ang pag-agi sa dalan nga gipasabut diha sa Ebanghelyo pinaagi niadtong kinsa mihatag kanato sa plano sa kaluwasan, mao ang pag-agi nianang dalan nga padulong sa kinabuhi, ngadto sa mahangturong paglambo; kini ang pagpadayon niana nga dalan diin dili ug dili gayud mawala kanato ang unsay atong naangkon, apan padayon sa pagkolekta, sa pagtingub og pundok, sa paglambo, sa pagpakanap sa laing dapit, ug sa pagpadako ngadto na sa walay kinutubang gidugayon. Kadtong mga tawo kinsa naninguha nga makaangkon og kinabuhing dayon, makaangkon nianang unsay makahimo sa pagpalambo sa unsay makatagbaw sa ilang mga kasingkasing. Walay laing butang gawas sa pribilehiyo sa mahangturong paglambo, sa tibuok kahulugan niini, ang makatagbaw sa imortal nga espiritu (DBY, 93).

Makahimo gihapon kita sa pagpalambo, gihimo kita alang niana nga katuyoan, ang atong mga kasarang gihan-ay sa pagpadako hangtud nga kita makadawat ngadto sa atong panabut sa celestial nga kahibalo ug kaalam, ug sa pagpadayon, sa mga kalibutang walay katapusan (DBY, 90).

Magpadayon ba kita sa pagkat-on ug dili gayud moabut ngadto sa kahibalo kabahin sa kamatuoran? [Tan-awa sa 2 Timoteo 3:7.] Dili, ako moingon nga kita dili; apan kita moabut ngadto sa kahibalo kabahin sa kamatuoran. Mao kini ang akong pangandoy ug gilauman, ug kini mao ang akong hingpit nga kalipay (DBY, 90–91). Aduna kita sa baruganan sulod kanato, ug mao usab ang matag binuhat dinhi niini nga yuta, sa pagtubo ug sa pagpadayon sa pagtubo, sa pagkaylap ug sa pagdawat ug paghambin sa kamatuoran, hangtud nga mahimo kitang hingpit (DBY, 91).

Kita giandam alang sa pipila ka mga butang, ug kita makadawat ingon ka kusog sa atong pag-andam sa atong mga kaugalingon (DBY, 95).

Kay sa mangaliyupo sa Ginoo aron sa paghatag og daghan pa nganha kaninyo, pangaliyupo sa inyong mga kaugalingon aron makabaton og pagsalig diha sa inyong mga kaugalingon, aron makabaton og kaligdong diha sa inyong mga kaugalingon, ug masayud kon kanus-a mosulti ug unsay isulti, unsay ipadayag, ug unsaon sa pagdala sa inyong mga kaugalingon ug sa paglakaw diha sa atubangan sa Ginoo. Ug ingon ka kusog sa inyong pagmatuod ngadto kaniya nga inyong itago ang tanang mga sekreto nga kinahanglan ninyong tagoan––nga ihatag ngadto sa inyong mga silingan ang tanan nga kinahanglan ninyong ihatag, ug wala nay lain, ug magkat-on kon unsaon sa pagbahin-bahin sa inyong kahibalo ngadto sa inyong mga pamilya, mga higala, mga silingan, ug mga kaigsoonan, ang Ginoo motugyan nganha kaninyo, ug mohatag kaninyo, ug motugyan nganha kaninyo, hangtud nga sa katapusan moingon siya kaninyo, “Dili gayud kamo mapukan; ang inyong kaluwasan gisilyo na diha kaninyo; gisilyo na kamo ngadto sa kinabuhing dayon ug sa kaluwasan, tungod sa inyong kaligdong” (DBY, 93).

Ang kinabuhing dayon mao ang abilidad sa pag-uswag ug pagtubo hangtud sa kahangturan.

Kini ang labing mahinungdanong gasa nga mahimong ihatag ngadto sa may salabutan nga mga binuhat, aron magpuyo hangtud sa kahangturan ug dili gayud malaglag (DBY, 96).

Nahisulat na nga ang labing mahinungdanong gasa nga mahatag sa Dios ngadto sa tawo mao ang gasa sa kinabuhing dayon. Ang kinadak-ang nakab-ot nga atong maangkon mao ang pagpatunhay sa atong pagkatawo ngadto sa usa ka mahangturong gidugayon taliwala sa langitnong mga panon. Aduna kita sa mga pulong sa kinabuhing dayon nga gihatag ngari kanato pinaagi sa Ebanghelyo, diin, kon atong sundon, masiguro nato kanang bililhong gasa (DBY, 96).

Nga ang salabutan nga ania kanako mawala maoy makalilisang nga panghunahuna; kini molahutay gayud. Kini nga salabutan kinahanglang mopadayon; kinahanglan kining mopuyo sa usa ka dapit. Kon mopili ako sa tarung nga dalan ug mopatunhay niini diha sa iyang pagkahan-ay, akong ipreserbar ngari sa akong kaugalingon ang kinabuhing dayon (DBY, 96).

Atong mabatunan ang Gingharian sa Dios sa kahingpitan niini, ug ang tanang mga gitas-on ug mga giladmon sa himaya, gahum, ug kahibalo; ug makabaton kita og mga amahan ug mga inahan, ug mga asawa ug mga anak (DBY, 97).

Hunahunaa nga posible kini nga makabaton kamo sa pribilehiyo sa pagsiguro sa inyong mga kaugalingon og kinabuhing dayon––sa pagpuyo ug pagtagamtam niini nga mga panalangin hangtud sa kahangturan; moingon kamo nga kini mao ang kinadak-ang panalangin nga mahimong ihatag nganha kaninyo. … Unsa nga panalangin ang makatugbang niini? Unsa nga panalangin ang makatugbang sa pagpadayon sa kinabuhi––sa pagpadayon sa atong pagkatawo? (DBY, 96).

Ang Ginoo mipanalangin kanato sa abilidad sa pagtagamtam og kinabuhing dayon uban sa mga Dios, ug gipahibalo kini nga mao ang labing mahinungdanong gasa sa Dios. Ang gasa sa kinabuhing dayon, walay kaliwatan, nga mahimong usa ka anghel, mao ang usa sa labing mahinungdanong mga gasa nga mahimong mahatag; apan ang Ginoo mihatag ngari kanato sa pribilehiyo nga mahimong mga amahan sa mga kinabuhi. Unsa ang amahan sa mga kinabuhi nga gihisgutan diha sa mga Kasulatan? Usa ka tawo kinsa adunay kaliwatan nga magpadayon ngadto sa kahangturan. Kana ang panalangin nga nadawat ni Abraham, ug hingpit kining mitagbaw sa iyang kalag. Iyang nabatunan ang saad nga siya kinahanglang mahimo nga amahan sa mga kinabuhi (DBY, 97).

Kon ang mga tawo matinud-anon, … sila ug ang ilang Tiglalang kanunay gayud nga usa, kanunay silang usa sa kasingkasing ug usa sa hunahuna, magtrabaho ug magbuhat og dungan; kay bisan unsay buhaton sa Amahan mao usab ang buhaton sa Anak, ug sa ingon sila magpadayon sa tanan nilang mga gipangbuhat sa kahangturan (DBY, 97).

Ang Ginoo ganahan nga makita kita nga moagi sa dalan nga padulong ngadto sa higpit nga ganghaan, nga aron kita makoronahan nga mga anak nga lalaki ug mga anak nga babaye sa Dios, kay ang ingon mao lamang ang mga binuhat didto sa langit kinsa mosanay ug molambo. … Ang uban adto sa ubos nga gingharian, diin kini nga pribilehiyo ihikaw kanila. … Kita ang mopili kon mahimo ba kitang mga anak nga lalaki ug mga anak nga babaye, isig ka manununod uban ni Jesukristo, o modawat ba kita sa ubos nga himaya (DNSW, 8 sa Ago. 1876, 1).

Mga Sugyot alang sa Pagtuon

Nangandam kita alang sa kinabuhing dayon pinaagi sa inadlaw-adlaw nga pagkat-on, paglambo, ug pagtukod sa gingharian sa Dios.

Unsa nga mga kamatuoran ang atong nakat-unan gikan sa mga pagsulay niini nga kinabuhi nga makatabang kanato nga mouswag sa kahangturan? (Tan-awa usab sa D&P 122:7–8.) Unsa ang gisulti ni Presidente Young kabahin sa baruganan sa “paglahutay hangtud sa kahangturan”? (Tan-awa usab sa D&P 121:7–8; 3 Nephi 15:9.)
Sa unsang paagi nga ang “aktibong mopahigayon sa pagbuhat og maayo kada adlaw” makatukod og usa ka pundasyon “alang sa pagdawat og kahingpitan sa mahangturong kahibalo ug himaya”? (Tan-awa usab sa Alma 5:41; 26:22; D&P 58:26–29.)
Sumala ni Presidente Young, usa sa atong dako kaayo nga mga katuyoan sa kinabuhi mao ang pagkat-on. Unsa ang makapugong kanato gikan sa pagkat-on? Unsaon man nato sa pagkat-on og dugang gikan sa atong pagtuon sa ebanghelyo? Sa unsang paagi kita makakat-on gikan sa atong mga kasinatian? Unsa nga pihong kamatuoran ang inyong nakat-unan pinaagi sa kasinatian ug impluwensya sa Espiritu?
Si Presidente Young mihisgot og pipila ka mga katuyoan sa pagkaanaa dinhi sa yuta. Unsaon man nato nga mas maayong makatuman niini nga mga katuyoan? (Tan-awa usab sa D&P 81:5.)
Unsa ang daghang mga paagi sa pagtabang nga “moandam sa katawhan sa pagsugat sa Ginoo”? Unsaon ninyo sa pihong paagi nga makatabang sa pagbuhat niini?

Makahimo kita sa pag-uswag samtang magtubo kita diha sa kahibalo ug kasinatian.

Si Presidente Young miingon nga kita makadawat og kahibalo “gamay diri ug gamay didto.” Sa unsang paagi nga kini nga proseso maggamit sa atong panabut sa ebanghelyo, sa atong pagkaginikanan, ug sa atong pagserbisyo diha sa Simbahan? (Tan-awa usab sa 2 Nephi 28:30; D&P 130:18–19.)
Unsa ang gitudlo ni Presidente Young kalabut sa mahangturong paglambo? (Tan-awa usab sa D&p 93:12–14.)
Si Presidente Young miingon nga “aduna kita sa baruganan sulod kanato … sa pagtubo ug sa pagpadayon sa pagtubo, sa pagkaylap ug sa pagdawat ug paghambin sa kamatuoran, hangtud nga mahimo kitang hingpit.” Sa unsang paagi nga ang atong mga paningkamot aron makaangkon og kahibalo makatabang kanato alang sa kahimayaan? (Tan-awa usab sa D&P 50:40; 93:24, 26–30; 130:18-19.)

Ang kinabuhing dayon mao ang abilidad sa pag-uswag ug pagtubo hangtud sa kahangturan.

Si Presidente Young miingon nga “ang labing mahinungdanong gasa nga mahimong ihatag ngadto sa may salabutan nga mga binuhat [mao] ang magpuyo hangtud sa kahangturan ug dili gayud malaglag.” Unsay iyang gisulti nga mao ang “kinadak-ang nakab-ot,” ug unsaon man nato kini sa pagpatunhay? (Tan-awa usab sa D&P 14:7; 130:20–21.)
Unsay buot ipasabut sa mahimong “isig ka manununod uban kang Jesukristo”? (Tan-awa usab sa Mga Taga-Roma 8:17.) Unsa nga mga panalangin ang maila lamang niadtong “kinoronahan nga mga anak nga lalaki ug mga anak nga babaye sa Dios”?