Tulumanon sa Templo

Sa dihang gipahinungod ang Templo sa St. George niadtong Abril 1877, si Presidente Brigham Young nalipay nga ang mga Santos sa katapusan makasugod sa pagpahigayon sa mga endowment sa templo alang sa mga patay. Siya mireport nga ang mga Santos kinsa nagsugod sa pagtrabaho didto “adunay malipayon nga panahon, panahon nga walay laing mga tawo sa yuta nga nakatagamtam sulod sa daghang mga siglo, nga atong nahibaloan” (DBY, 419). “Sukad nahuman ang templo sa St. George,” misulat siya sa iyang anak nga si Lorenzo, “ang espiritu sa pag-atiman sa mga patay ug sa pagpahigayon alang kanila, ug usab sa paghimo sa gikinahanglan nga mga ordinansa alang sa mga buhi, nahimong kabahin sa matinud-anong mga miyembro sa Simbahan niining tibuok mga walog. Ang mga Satnos tingali wala sukad mobati sa maong tinguha niini nga mga hilisgutan sukad sa pagkatukod sa Simbahan sama sa ilang gibati karon. Kini pagahimoon uban sa maayong mga resulta, ug samtang magpadayon ang pagtukod sa templo, kini nga espiritu mabati uban sa hilabihan nga gahum ngadto sa tanang mga branch sa Simbahan” (LBY, 288–89).

Mga Pagtulun-an ni Brigham Young

Ang Dios mohatag og kahigayunan niadtong nangamatay sa pagpahimulos sa mga panalangin sa templo.

Ang akong amahan namatay sa wala pa ihatag ang mga endowment. Walay usa sa iyang mga anak ang nabugkos ngadto kaniya. Kon makahinumdom kamo, kamo nga didto sa Nauvoo, nagdali-dali kita sa gamay kaayong panahon nga atong gigahin human matukod ang templo. Ang manggugubot nga panon andam sa pagpatay kanato; andam na silang mosunog sa atong mga balay, gibuhat kini nila sa dugay nang panahon; apan atong nahuman ang templo sumala sa kamandoan nga gihatag ngadto ni Joseph, ug dayon mibiya kita. Ang atong panahon, niana, gamay ra ug kita walay panahon sa paghimo niini. Ang sangputanan, ang mga anak sa akong amahan, wala mabugkos ngadto kaniya. Tingali ang iyang tanang mga anak nga lalaki moadto sa kahangturan, ngadto sa kalibutan sa espiritu, sa dili pa kini mapahigayon; apan kini dili maghimo og kalainan; ang mgamanununod sa pamilya mopahigayon niini bisan og usa ka gatus pa ka tuig ang molabay (DBY, 401).

Gatusan ka milyon ka mga tawo ang matawo, magpakabuhi sa ilang mubo nga kinabuhi sa yuta, ug mamatay, walay kahibalo sa ilang mga kaugalingon ug sa plano sa kaluwasan nga gihatag alang kanila. Hinoon nakahatag kini og dakong kahupayan, nga makahibalo nga kining mahimayaong plano nga gihimo sa Langit mosunod kanila ngadto sa sunod nga kinabuhi, nagtanyag alang sa ilang pagdawat sa kinabuhing dayon ug kahimayaan ngadto sa mga trono, kaharian, mga kamandoan, ug mga gahum diha sa presensya sa ilang Amahan ug Dios, pinaagi ni Jesukristo, iyang Anak (DBY, 404).

Gisangyaw nato ngadto kanila ang Ebanghelyo sa Kaluwasan—ngadto sa mga patay—pinaagi niadtong kinsa nabuhi niini nga dispensasyon [tanawa sa D&P 138:57] (DBY, 397).

Adunay kahigayunan alang sa mga lalaki kinsa atua sa espiritu sa pagdawat sa Ebanghelyo. Si Jesus, samtang ang iyang lawas diha sa lubnganan sa duha ka gabii ug usa ka adlaw, miadto sa kalibutan sa mga espiritu aron sa pagpakita sa kaigsoonan kon unsaon nila sa pagtukod sa gingharian, ug dad-on ang mga espiritu ngadto sa kahibalo sa kamatuoran diha sa kalibutan sa espiritu; miadto siya aron sa pagpakita kanila sa sumbanan, sama sa iyang gibuhat dinhi sa yuta.

Mao nga kamo nakasabut nga didto, ang mga espiritu adunay kahigayunan sa pagdawat sa kamatuoran. Mangutana kamo kon sila bunyagan ba didto? Dili. Pandungan ba sila sa mga kamot alang sa gasa sa Espiritu Santo? Dili. Walay dayag nga mga ordinansa kabahin sa tawo ang ipangalagad didto, apan ang kahayag, himaya, ug gahum sa Espiritu Santo matagamtaman sama dinhi sa yuta; ug adunay mga balaod nga nagdumala ug nagmando sa kalibutan sa espiritu, ug diin sila mga sakop (DBY, 397).

Aduna ba kitay mabuhat alang kanila? Oo. Alang sa unsa ang atong paningkamot sa pagtukod og templo? Ug dili lamang kita motukod og templo dinhi, kon kita magmalampuson, ug mapanalanginan ug mapatunhay apan, kita tingali motukod pa og duha o tulo, ug magpadayon kon gikinahanglan sa buhat, alang sa piho nga katuyoan sa pagtubos sa atong mga patay. Sa higayon nga ako makadawat og pagpadayag nga ang uban nakong mga kaliwat nabuhi ug namatay nga walay mga panalangin sa Ebanghelyo, o bisan gani nakadungog nga kini gisangyaw, apan matinuoron sama kanako, matarung sama kanako, o bisan kinsang lalaki o babaye sa ibabaw sa yuta; sama ka matarung, sumala sa ilang kahibalo kon unsaon, sama ni bisan kinsa nga Apostol o Propeta nga sukad nagpakabuhi, ako moadto ug magpabunyag, magpakumpirma, magpahugas, ug magpadihog, ug moagi sa tanang mga ordinansa ug mga endowment alang kanila, aron ang ilang mga agianan mabuksan ngadto sa celestial nga gingharian (DBY, 403).

Kining doktrina sa bunyag alang sa mga patay usa ka importante nga doktrina, usa sa labing mahimayaon nga mga doktrina nga gipadayag ngadto sa tawhanong pamilya; ug adunay kahayag, gahum, himaya, dungog ug pagka-imortal niini (DBY, 399).

Daghang mga tawo nga akong nailhan, kinsa nahikatulog na [namatay], kita nagbunyag alang kanila, sukad natukod ang Simbahan—buotan, matinuoron, madungganong mga tawo, maloloy-on sa tanan, nagpuyo og maayo, mahiyason nga mga kinabuhi. Dili kita makatugot nga sila moadto sa impyerno; ang Dios dili buot. Ang plano sa kaluwasan igo kaayo sa pagdala kanilang tanan ug ibutang sila diin sila makapahimulos sa tanan nga ilang mapaabut (DBY, 403).

Miagi sila sa kalisud [sa mortalidad], ug walay mahimo sila sa personal nga makapahigayon alang sa kapasayloan sa ilang mga sala ug alang sa ilang kahimayaan, ang sangputanan sila ubos sa panginahanglan sa pagsalig sa ilang mga higala, sa ilang mga anak ug sa mga anak sa ilang mga anak sa pagpahigayon alang kanila, aron sila madala ngadto sa celestial nga gingharian sa Dios (DBY, 406).

Unsa sa inyong pagtuo ang isulti sa mga amahan kon sila mamulong gikan sa mga patay. Dili ba sila moingon, “Ania kami gibutang dinhi sulod sa liboan ka mga tuig, dinhi niining bilanggoan nga balay, naghulat niini nga dispensasyon nga moabut?” … Unsa ang ilang ihung-hong sa atong mga dunggan? Ngano, kon sila aduna pay gahum ang mga dugdug sa langit mosulod sa atong mga dunggan, kon kita makaamgo sa kaimportante sa buhat nga atong gibuhat. Ang tanang mga anghel sa langit nagtan-aw niining pipila ka mga katawhan, ug nag-awhag kanila sa kaluwasan sa tawhanong pamilya. Mao usab ang mga yawa sa impyerno nagtan-aw usab, niini nga mga katawhan, ug naningkamot sa pagbuntog kanato, ug ang mga katawhan nakiglamano gihapon sa mga sulugoon sa yawa, kay sa mobalaan sa ilang mga kaugalingon ug motawag sa Ginoo ug mohimo sa buhat nga iyang gisugo kanato ug gibutang sa atong mga kamot aron buhaton (DBY, 403–4).

Ang Langitnong Amahan mopanalangin kanato sa pagbuhat sa pagsiksik sa family history alang sa kaluwasan sa atong mga katigulangan.

Sa akong pagtuo adunay trabaho nga himoonon [sa Milenyum] nga ang tibuok kalibutan ingon og nakahukom nga dili nato buhaton. Unsa kini? Sa pagtukod og mga templo. Wala pa gayud kita makasugod sa pagpahimutang sa pundasyon sa usa ka templo apan unsa na kadaghan ang anaa sa pagpakigbatok kanato. … Unsay atong buhaton niini nga mga templo? Aduna bay buhaton didto? Oo, ug kita dili mohulat sa Milenyum ug sa kahingpitan sa himaya sa Dios dinhi sa yuta; magsugod kita dayon kon kita aduna nay templo, ug motrabaho alang sa kaluwasan sa atong mga katigulangan; atong kuhaon ang ilang mga kagikanan kutob sa atong mahimo. Sa hinay-hinay mahingpit nato kini. Niini nga mga templo atong ipahigayon ang mga ordinansa sa Ebanghelyo ni Jesukristo alang sa atong mga kahigalaan (DBY, 402).

Kita karon nagbunyag alang sa mga patay … Alang sa atong mga amahan, mga inahan, mga apohang lalaki, mga apohang babaye, mga uyoan, mga iyaan, mga kabanay ug dugay nang mga kaila. … Ang Ginoo nag-awhag sa mga kasingkasing sa kadaghanan …, ug adunay hingpit nga kadasig sa uban sa pagsubay sa ilang mga kagikanan ug sa pagpaimprinta sa ilang mga rekord sa ilang mga katigulangan. Wala sila makahibalo alang sa unsa ang ilang gibuhat, apan ang Ginoo nag-awhag kanila; ug kini magpadayon ug magagikan sa amahan ngadto sa amahan, amahan ngadto sa amahan, hangtud nga ilang makuha ang kagikanan sa ilang mga katigulangan kutob sa ilang mahimo (DBY, 406).

Sa higayon nga ang iyang gingharian matukod sa yuta, ug ang Zion matukod, ang Ginoo mopadala sa iyang mga sulugoon isip mga manluluwas sa Bukid sa Zion [tan-awa sa Obadias 1:21]. Ang mga sulugoon sa Dios kinsa nakapuyo sa yuta sa milabay nga panahon mopadayag diin magpuyo ang lain-laing mga tawo kinsa namatay nga walay Ebanghelyo, mohatag sa ilang mga pangalan, ug moingon, “Karon lakaw, kamo nga mga sulugoon sa Dios, ug gamita ang inyong mga katungod ug mga pribilehiyo; lakaw ug ipahigayon ang mga ordinansa sa balay sa Dios alang niadtong kinsa nakaagi sa ilang pagsulay nga wala ang Ebanghelyo, ug alang sa tanan kinsa makadawat og bisan unsa nga matang sa kaluwasan; dad-a sila ngadto sa celestial, terrestrial, ug telestial nga mga gingharian,” … Kay ang matag tawo makadawat sumala sa iyang kasarang ug sumala sa mga binuhatan nga gihimo sa lawas, maayo ba o dautan, gamay o dagko (DBY, 407).

Ang Ginoo miingon, akong gipadala ang mga yawe ni Elijah ang Propeta—akong gitudlo kana nga doktrina sa pagpabalik sa mga kasingkasing sa mga amahan ngadto sa mga anak, ug ang mga kasingkasing sa mga anak ngadto sa mga amahan [tan-awa sa D&P 2; 110:13–15]. Karon, kamong tanan nga mga anak, nagtan-aw ba kamo sa kaluwasan sa inyong mga amahan? Naningkamot ba kamo nga magmakugihon sa pagtubos niadtong namatay nga walay Ebanghelyo, tungod kay sila nagtinguha sa Ginoong Makagagahum sa pagkuha sa mga saad alang kaninyo? Kay ang atong mga amahan nakaangkon og mga saad nga ang ilang kaliwat kinahanglang dili makalimtan. O kamong mga anak sa mga amahan, tan-awa kining mga butang. Kamo kinahanglan nga mosulod sa mga templo sa Ginoo ug mopahigayon alang sa inyong mga amahan (DBY, 408).

Kita mahimong mga manluluwas sa Bukid sa Zion pinaagi sa pagpahigayon og mga ordinansa sa templo alang sa atong patay nga mga kaliwatan.

Kita gitawag, ingon nga kini gikasulti na kaninyo, sa pagtubos sa mga nasud sa yuta. Ang mga amahan dili mahimong hingpit kon wala kita; kita dili mahimong hingpit kon wala ang mga amahan. Kinahanglan nga anaa kining kadena sa balaan nga Priesthood; kinahanglan nga masumpay kini gikan sa ulahing henerasyon nga nagpuyo sa yuta balik ngadto ni Amahang Adan, sa pagdala pag-usab sa tanan nga maluwas ug ibutang diin sila makadawat og kaluwasan ug himaya sa ubang gingharian. Kini nga Priesthood kinahanglang mobuhat niini, kini nga Priesthood alang niini nga katuyoan (DBY, 407).

Ang mga doktrina sa Manluluwas nagpadayag ug nagbutang sa mga tumutuo sa pagbaton sa mga baruganan diin ang mga manluluwas moadto sa Bukid sa Zion aron sa pagluwas … ang tanan gawas niadtong nakasala batok sa Espiritu Santo. Ang mga lalaki ug mga babaye mosulod ngadto sa mga templo sa Dios, ug mahimong, kon itandi, mga haligi didto [tan-awa sa Pinadayag 3:12], ug mopahigayon matag tuig alang niadtong kinsa namatay na sulod sa liboan ka mga tuig (DBY, 407).

Sa pagtuman niini nga buhat dili lamang usa ka templo apan liboan niini, ug liboan ug napulo ka mga libo sa mga lalaki ug mga babaye moadto ngadto sa mga templo ug mopahigayon alang sa mga tawo kinsa nabuhi kutob sa ipadayag sa Ginoo (DBY, 394).

Mao kini ang atong buhaton alang sa mga lumulupyo sa yuta. Sa dihang gitan-aw na kini, dili ako buot nga mopahulay, apan magmakugihon sa tibuok adlaw, kay kon hunahunaon nato kini, kita kinahanglang dili magusik og panahon, kay may gidak-on gayud kini nga trabaho (DBY, 410).

Ang priesthood gitugyan pag-usab sa Ginoo niadtong kinsa modawat niini, alang kini sa piho nga katuyoan sa pag-andam kanila nga mahimong maalamon sa mga baruganan kalabut sa balaod sa celestial nga gingharian. Kon mosunod kita niini nga balaod, mopatunhay niini, magpuyo sumala niini, kita makaandam sa pagpahimulos sa mga panalangin sa usa ka celestial nga gingharian. Ang uban ba usab? Oo, liboan ug minilyon ka mga lumulupyo sa yuta kinsa nakadawat ug misunod sa balaod nga atong gisangyaw, kon sila aduna niana nga pribilehiyo. Kon ibalik na pag-usab sa Ginoo ang Zion, ug ang magbalantay makakita, ug ang Zion matukod, ang mga manluluwas moadto sa Bukid sa Zion ug moluwas sa tanang mga anak nga lalaki ug mga babaye ni Adan nga mahimong luwason, pinaagi sa pagpangalagad ngadto kanila (DNW, 16 sa Mayo 1860, 1).

Ang mga amahan dili mahimong hingpit kon wala kita; kita dili mahimong hingpit kon wala sila. Nahimo na nila ang ilang buhat ug karon natulog na. Gitawag na kita karon sa pagbuhat sa atoa; nga mao ang labing mahinungdanong buhat nga sukad gipahigayon dinhi sa yuta. Minilyon sa atong isig ka nilalang nga nabuhi dinhi sa yuta ug namatay nga walay kahibalo sa Ebanghelyo kinahanglang pagatudloan aron sila makapanunod sa kinabuhing dayon (nga mao, ang tanan nga modawat sa Ebanghelyo). Ug kita gitawag sa pag-apil niini nga buhat (DBY, 406).

Kinsa ang manag-iya sa yuta ug sa kahingpitan niini? Dili ba kadtong gitagana sa Ginoo alang niini nga dungog? Ug sila moadto sa Bukid sa Zion isip mga manluluwas aron magtrabaho hangtud sa Milenyum sa pagluwas sa uban (DBY, 407–8).

Ang buhat sa Milenyum maglakip sa pagtukod og templo ug tulumanon sa templo.

Atong gipaningkamutan ang pagluwas sa mga buhi ug sa mga patay. Ang buhi makapili, ang patay dili. Minilyon kanila namatay nga walay Ebanghelyo, walay Priesthood, ug walay mga kahigayunan nga atong mapahimuslan. Mopadayon kita diha sa pangalan sa Dios sa Israel ug mopahigayon sa mga ordinansa alang kanila. Ug diha sa Milenyum, ang liboan ka mga tuig nga ang mga tawo mohigugma ug moserbisyo sa Dios, kita motukod og mga templo ug mopahigayon alang niadtong kinsa namatay sulod na sa gatusan ug liboan ka mga tuig—kadtong kinsa modawat unta sa kamatuoran kon sila aduna pay kahigayunan, ug kita modala kanila, ug moporma sa tibuok kadena, balik ngadto ni Adan (DBY, 404).

Kanunay akong misulti kaninyo, nga kini ang buhat sa Milenyum. Kini ang buhat nga ipahigayon sa kaliwat ni Abraham, ang pinili nga kaliwatan, ang halangdong kaliwatan, ang gipanalanginan sa Ginoo, kadtong gipakigsaaran sa Ginoo. Molihok sila, ug moluwas sa tanang anak nga lalaki ug mga babaye ni Adan kinsa modawat sa kaluwasan dinhi sa yuta; ug ang tanang mga espiritu didto sa kalibutan sa espiritu tudloan usab pakigsultihan, ug sa mga baruganan sa kaluwasan itudlo ngadto kanila, aron sila adunay mga kahigayunan sa pagdawat sa Ebanghelyo; ug sila adunay daghang mga anak dinhi sa yuta nga mopahigayon alang kanila niadtong mga ordinansa sa Ebanghelyo nga kalabut sa tawo (DBY, 403).

Misalig kita sa Dios. Ako nahinumdom nga siya makig-away sa atong mga gubat ug kita pagabunyagan alang sa tawhanong pamilya atol sa liboan ka mga tuig; ug kita makabaton og gatusan ka mga templo ug liboan ka mga lalaki ug mga babaye mopahigayon niini alang niadtong kinsa nangamatay, nga walay kahigayunan sa pagpaminaw ug pagsunod sa Ebanghelyo, nga sila madala ug makabaton og mahimayaon nga pagkabanhaw, ug makatagamtam sa gingharian nga giandam sa Dios alang kanila. Ang Yawa maningkamot pag-ayo sa pagbabag kanato, ug kita dili mosibug gawas sa pagsunod sa gahum, ug hugot nga pagtuo diha sa Ebanghelyo sa Anak sa Dios. Ang tibuok kalibutan supak niini nga doktrina. Apan aduna bay dautan diha niini? Kon sila makakita lamang niini sama sa pagtan-aw sa Ginoo, sila malipay niini, kay sa makig-away, sila modayeg sa Dios sa pagpadayag og mahimayaon kaayo nga doktrina (DBY, 401).

Mga Sugyot alang sa Pagtuon

Ang Dios mohatag og kahigayunan niadtong nangamatay sa pagpahimulos sa mga panalangin sa templo.

Ang “mahimayaon nga plano” alang sa pagtubos niadtong kinsa namatay nga wala makadawat og hingpit nga mga panalangin sa ebanghelyo usa ka “dakong kahupayan” ngadto ni Presidente Young. Ngano? Unsa ang kahulugan sa plano nganha kaninyo ug sa inyong mga minahal?
Giunsa ug kanus-a natukod ang pagsangyaw sa ebanghelyo didto sa kalibutan sa espiritu? Kinsa ang mipadayon niana nga trabaho karon? (Tanawa usab sa D&P 138:57.)
Unsa ang gipasabut sa pagtubos sa atong mga patay ug ablihan ngadto kanila ang celestial nga gingharian? (Tan-awa usab sa D&P 138:58.)
Ngano nga si Satanas naglihok batok sa buhat sa templo? Unsa nga ebidensya ang inyong nakita nga si Satanas dili makapugong nga matukod ang mga templo ni makahunong sa buhat sa makaluwas nga ordinansa sa paglambo?

Ang Langitnong Amahan mopanalangin kanato sa pagbuhat sa pagsiksik sa family history alang sa kaluwasan sa atong mga katigulangan.

Si Presidente Young namulong sa usa ka higayon nga atong mahingpit ang atong mga kagikanan o ang family history. Unsaon nato paghimo niini? Unsa ang inyong personal nga mahimo sa inyong family history?
Sumala ni Presidente Young, kinsa ang “nag-awhag sa mga kasingkasing sa kadaghanan” nga makaila sa ilang mga katigulangan? Unsa nga ebidensya ang inyong nakita nga kini tinuod karon?
Unsa “ang mga yawe ni Elijah ang Propeta”? (Tan-awa usab sa D&P 27:9; 110:13–15.)

Kita mahimong mga manluluwas sa Bukid sa Zion pinaagi sa pagpahigayon og mga ordinansa sa templo alang sa atong patay nga mga kaliwatan.

Unsaon nga kita mahimong manluluwas sa Bukid sa Zion?
Ngano nga imposible alang sa atong kaliwatan nga mga patay nga mahimong hingpit kon wala kita? Ngano nga imposible alang kanato nga mahimong hingpit kon wala sila?

Ang buhat sa Milenyum maglakip sa pagtukod og templo ug tulumanon sa templo.

Unsa ang “buhat sa Milenyum”? Kinsa ang mopahigayon niini?
Unsaon nato sa pagbuntog sa mga paningkamot ni Satanas sa pagbabag sa buhat? Sa unsa nga paagi nga ang “pagsunod sa gahum, ug hugot nga pagtuo diha, sa Ebanghelyo sa Anak sa Dios” makatabang kanato nga makaandam alang sa Milenyum?