Paghinulsol ug Bunyag

Sa mabugnaw, daghang snow nga adlaw niadtong Abril 1832, si Brigham Young gibunyagan sa tubig nga adunay ice sa iyang kaugalingong suba nga may ligid nga galingan [millstream] pinaagi ni Eleazer Miller, upat ka bulan nga kinabig sa Simbahan. Niini siya miingon, “Gibati nako ang mapainubsanon, may espiritu sama sa bata, nga nagsaksi ngari kanako nga ang akong mga sala gipasaylo” (MHBY-1, 2–3). Mitudlo siya nga ang tubig mismo walay “bisan unsa nga hiyas nga makahugas sa sala” (DBY, 159) apan nga ang bunyag epektibo sa paglimpyo kanato gikan sa sala kon gipangalagad niadtong adunay awtoridad niadtong kinsa may tulubagon ug kon giunhan sa paghinulsol ug gisundan sa kinasingkasing nga paningkamot sa pagtuman sa mga pakigsaad sa bunyag.

Mga Pagtulun-an ni Brigham Young

Samtang ang atong pagsabut nagtubo, mao usab ang atong pagkamay-tulubagon ug responsibilidad.

Ang sala naglangkob sa pagbuhat og sayop sa panahon nga kita nakahibalo ug makabuhat og mas maayo, ug kini pagasilotan sa makiangayon nga silot, sa tukma nga panahon sa Ginoo (DBY, 156).

Bisan pa og buhaton nato ang labing maayo nga atong nahibaloan niining higayuna, wala bay kalamboan nga nahimo sa atong mga kinabuhi? Aduna. Kon kita makabuhat og sayop nga wala makahibalo, sa panahon nga kita makahibalo nga kini sayop, niana kini atong katungdanan sa paghunong sa pagbuhat niana nga sayop dihadiha dayon ug sa kahangturan (DBY, 156).

Kita makahimo sa Pag-ula nga epektibo sa atong mga kinabuhi pinaagi sa kinasingkasing nga paghinulsol.

Kon ako nakapasakit ni bisan kinsa nga tawo, kinahanglan akong mokumpisal ngadto niana nga tawo ug himoong husto kon unsay sayop nga akong nahimo (DBY, 158).

Ako nagtuo kabahin sa pag-atubang ug magpakayano ug magpakamatinuoron niana nga kinahanglang ipakita sa publiko, ug sa pagtago sa inyong kaugalingon niana nga kinahanglang tagoon. … Isulti sa publiko kana nga iya sa publiko. Kon kamo nakasala batok sa katawhan, kumpisal ngadto kanila. Kon kamo nakasala batok sa usa ka pamilya, o sa usa ka silingan, duola sila ug kumpisal ngadto kanila. … Kon kamo nakasala batok sa usa ka indibidwal, duola kanang tawhana ug kumpisal ngadto kaniya (DBY, 158).

Kon ang mga tawo tinud-anay ug kinasingkasing nga maghinulsol, ug mopakita sa kalangitan nga ang ilang paghinulsol tinud-anay pinaagi sa pagsunod sa mga panginahanglan nga gitudlo nganha kanila pinaagi sa mga balaod sa Ebanghelyo, niana sila may katungod nga pangalagaran sa kaluwasan, ug walay gahum nga makapugong sa maayong espiritu gikan kanila (DBY, 156).

Ang pipila sa atong karaang mga tradisyon nagtudlo kanato nga ang usa ka tawo nga nakahimo og dautan kaayo ug mga buhat sa pagpatay mahimong maghinulsol aron maluwas kon anaa na sa bitayanan; ug inig silot na sa kamatayon madungog ang panultihon, “Bulahan ang Dios! Atua na siya sa langit, aron koronahan sa himaya, pinaagi sa tanang matubsanong kalooy ni Kristo ang Ginoo.” Kining tanan binuang. Ang mao nga tawo dili gayud makakita og langit. Ang uban mag-ampo, “O nga ako molabang na ngadto sa sunod kinabuhi sa gabii sa akong pagkakabig!” Kini nagpamatuod og bakak nga mga ideya ug kawang nga mga pagtuo nga gihuptan sa Kristohanong kalibutan (DBY, 157).

Ang bunyag usa ka importante nga ordinansa alang sa atong kaluwasan.

Kita, ang mga Santos sa Ulahing mga Adlaw, nagtuo sa pagbunyag pinaagi sa pagpaunlod alang sa kapasayloan sa mga sala, sumala sa pagpamatuod sa mga tinun-an ni Jesus ug sa mga pagpadayag sa Ginoo nga gihatag niining katapusan nga mga adlaw. Ang mga bata putli, sila walay kasubo sa kasingkasing, ni mga sala nga hinulsulan ug talikdan, ug sa ingon dili angay nga bunyagan alang sa kapasayloan sa sala. Kon kita nakasala, kinahanglan nasayud kita sa maayo ug dautan; ug ang batang masuso wala makahibalo niini, dili makahibalo niini; kini wala moabut ngadto sa ideya sa pagpamalandong sa maayo ug dautan; kini walay kasarang sa pagpaminaw sa ginikanan o sa magtutudlo o sa pari kon sila mosulti unsay matarung o sayop o kon unsay makapasakit; ug hangtud kining mga butanga masabtan ang usa ka tawo walay tulubagon ug sa ingon dili mabunyagan alang sa kapasayloan sa sala [tan-awa sa Moroni 8] (DBY, 158–59).

Walay ordinansa nga gihatag sa Dios pinaagi sa iyang kaugalingong tingog, pinaagi sa iyang Anak nga si Jesukristo, o pinaagi sa mga ba-ba ni bisan kinsa nga iyang mga Propeta, mga Apostoles o Ebanghelista, nga walay kapuslanan. Ang matag ordinansa, matag kasugoan ug kinahanglanon gikinahanglan alang sa kaluwasan sa tawhanong pamilya (DBY, 152).

Kon kamo matarung gikan sa inyong pagkatawo, ug wala gayud makabuhat og nahibaloan nga mga sala ug mga kalapasan, pagpabunyag aron sa pagtuman sa tanang pagkamatarung, sama ni Jesus kaniadto. Kon kamo makasulti nga kamo walay mga sala nga hinulsulan, biya-i ang inyong sayop nga mga pagtuo, ug higugmaa ug serbisyohi ang Dios sa tibuok nga kasingkasing (DBY, 159).

Ang tanang mga Santos sa Ulahing mga Adlaw mosulod sa bag-o ug walay katapusan nga pakigsaad kon sila magpasakop niini nga Simbahan. Sila nakigsaad sa pagpahunong sa pag-uyon, pagduso ug paghangup sa gingharian sa Yawa ug sa mga gingharian niini nga kalibutan. Sila mosulod sa bag-o ug walay katapusan nga pakigsaad aron sa pagpaluyo sa gingharian sa Dios ug walay laing gingharian. Sila naghimo og panaad sa labing ligdong nga paagi, sa atubangan sa kalangitan ug sa yuta, ug kana, usab, sa bili sa ilang kaugalingong kaluwasan, nga sila mohupot sa kamatuoran ug pagkamatarung kay sa pagkadautan ug bakak, ug sa pagtukod sa Gingharian sa Dios, kay sa gingharian niini nga kalibutan (DBY, 160).

Bisan unsa pa ka dako ang atong pagpatuo nga mituo kita sa Dios ug sa iyang kawsa kita walay katungod sa mga panalangin ug mga pribilehiyo sa iyang Gingharian hangtud nga kita mahimong mga lumulupyo niini. “Unsaon man nato kini sa pagbuhat? Pinaagi sa paghinulsol sa atong mga sala, ug pagsunod sa mga kinahanglanon sa Ebanghelyo sa Anak sa Dios nga gitugyan ngari kanato. Gatusan ug liboan ka mga tawo ang nagtuo ni Ginoong Jesukristo ug naghinulsol sa ilang mga sala, ug ang Balaan nga Espiritu misaksi ngadto kanila nga ang Dios mao ang gugma, nga sila nahigugma kaniya ug nga siya nahigugma kanila, ug bisan niana sila wala diha sa iyang Gingharian. Sila wala makatuman sa gikinahanglan nga mga kinahanglanon, wala sila makasulod sa pultahan (DBY, 152–53).

Kamo walay gahum sa pagbunyag sa inyong mga kaugalingon, ni kamo adunay gahum sa pagbanhaw sa inyong mga kaugalingon; ug dili kamo legal nga makabunyag sa ikaduhang tawo alang sa kapasayloan sa mga sala hangtud adunay tawo nga unang mibunyag kaninyo ug mi-orden kaninyo ngadto niini nga awtoridad (DBY, 160).

Ang tubig ba, sa iyang kaugalingon, adunay hiyas nga makahugas sa sala? Sa tinuod lang wala apan ang Ginoo miingon, “Kon ang makasasala maghinulsol sa iyang mga sala, ug manaog ngadto sa tubig sa bunyag, ug diha ilubong sama nga ibutang diha sa yuta ug ilubong, ug usab haw-ason gikan sa tubig, sama sa pagkatawo—kon diha sa katim-os sa iyang kinasingkasing buhaton niya kini, ang iyang mga sala mahugasan.” [Tan-awa sa D&P 128:12–13.] Ang tubig ba sa iyang kaugalingon mohugas niini? Dili, apan ang pagsunod sa mga sugo sa Dios mohugas sa lama sa mga sala (DBY, 159).

Mga Sugyot alang sa Pagtuon

Samtang ang atong pagsabut nagtubo, mao usab ang atong pagkamay-tulubagon ug responsibilidad.

Giunsa sa pagpasabut ni Presidente Young ang sala? (Tan-awa usab sa Santiago 4:17.)
Unsa ang gitudlo ni Presidente Young mahitungod sa atong responsibilidad samtang nadugangan nato ang atong kahibalo sa matarung ug sayop? (Tan-awa usab sa 2 Nephi 9:25–27.)
Unsa ang kinahanglan natong kinaiya mahitungod sa pagpalambo sa atong mga kinabuhi? (Tan-awa usab sa Alma 34:33.) Unsa ang gitudlo niini kanato mahitungod sa kahibalo, pagkamay-tulubagon, ug responsibilidad?

Kita makahimo sa Pag-ula nga epektibo sa atong mga kinabuhi pinaagi sa kinasingkasing nga paghinulsol.

Unsa ang sangputanan sa tinuod nga paghinulsol? Ngano nga ang pagkamasulundon sa mga balaod sa ebanghelyo usa man ka kinahanglanon nga bahin sa paghinulsol?
Unsa ang gitudlo ni Presidente Young mahitungod sa paghinulsol sa himatyon?

Ang bunyag usa ka importante nga ordinansa alang sa atong kaluwasan.

Unsa nga bahin ang mahimo sa bunyag sa pagduol ngadto kang Kristo? (Tan-awa usab sa Moroni 8:25–26.)
Unsa ang gitudlo ni Presidente Young mahitungod kon kinsa ang bunyagan o dili? Ngano nga dili angay nga bunyagan kadtong kinsa walay tulubagon? (Tan-awa usab sa Moroni 8:9–14.) Unsa ang gisulti ni Presidente Young ngadto sa may tulubagon nga mga tawo kinsa moingon nga sila walay sala?
Mitudlo si Presidente Young nga ang tanang mga ordinansa sa ebanghelyo, lakip na ang bunyag, gikinahanglan alang sa atong kaluwasan. Sa unsa nga paagi nga ang mga ordinansa sa ebanghelyo nakapanalangin sa inyong kinabuhi?
Mitudlo si Presidente Young nga “ang tanang mga Santos sa Ulahing mga Adlaw mosulod sa bag-o ug walay katapusan nga pakigsaad kon sila magpasakop niini nga Simbahan.” Sa dihang gibunyagan kita, unsa ang atong gipakigsaad nga buhaton? Unsa ang atong gipakigsaad nga dili buhaton? (Tan-awa usab sa Mosiah 18:8–10.)
Ngano nga ang pagtuo diha ni Ginoong Jesukristo ug ang paghigugma Kaniya dili igo sa pagsulod sa pultahan sa Iyang gingharian?
Ngano nga ang usa ka tawo kinahanglan nga “i-orden … ngadto niini nga awtoridad” sa pagbunyag?
Sumala ni Presidente Young, unsa ang kahulugan ug simbolo sa bunyag? (Tan-awa usab sa Mga Taga-Roma 6:3–6, 11; Moises 6:58–60; 1 Juan 5:7–8.) Si Presidente Young mipasabut nga ang “tubig, sa iyang kaugalingon, [walay] hiyas nga makahugas sa sala.” Unsa ang makahugas kanato gikan sa sala?