Ang Ebanghelyo Gipasabut

Ang kalibutan nakahibalo nga si Presidente Brigham Young usa ka bantugang tigpahimutang og panimuyo kinsa migiya sa pagkausab sa usa ka disyerto ngadto sa usa ka maanindot nga kapuy-an. Ang mas importante, siya mao ang talagsaong magtutudlo sa gipahiuli nga ebanghelyo ni Jesukristo kinsa midasig sa unang mga Santos sa pagsunod sa maayong pagkasaysay nga doktrina sa usa ka relihiyon nga nagpasalig sa tanan og oportunidad sa pagbalik ngadto sa presensya sa Dios.

Mga Pagtulun-an ni Brigham Young

Ang ebanghelyo ni Jesukristo naglakip og usa ka sistema sa mga balaod ug mga ordinansa nga modangat ngadto sa kaluwasan.

Ang atong relihiyon dili labaw o minus kay sa tinuod nga lagda sa langit— ang sistema sa mga balaod diin ang mga dios ug ang mga anghel gidumala. Gidumala ba sila sa balaod? Tinuod. Walay binuhat sa tanang mga kahangturan gawas siya gidumala sa balaod (DBY, 1).

Ang Ebanghelyo sa Anak sa Dios nga gipadayag mao ang usa ka plano o sistema sa mga balaod ug mga ordinansa, pinaagi sa higpit nga pagsunod diin ang mga tawo nga mipuyo niini nga yuta gipasalig nga sila makabalik pag-usab ngadto sa presensya sa Amahan ug sa Anak. Ang mga balaod sa Ebanghelyo dili labaw o minus kay sa pipila ka mga baruganan sa kahangturan nga gipadayag ngadto sa mga tawo, diin sila makabalik ngadto sa langit diin sila gikan (DBY, 1).

Kon maghisgot kita sa celestial nga balaod nga gipadayag gikan sa langit, nga mao, ang Priesthood, naghisgot kita sa mga baruganan sa kaluwasan, usa ka hingpit nga sistema sa panggobyerno, sa mga balaod ug mga ordinansa, diin kita makaandam nga moagi gikan sa usa ka ganghaan ngadto sa lain, ug gikan sa usa ka sentinel ngadto sa lain, hangtud moabut kita sa presensya sa atong Amahan ug Dios (DBY, 130).

Kita mahimong makadawat sa kamatuoran, ug makahibalo, pinaagi sa matag bahin sa kalag, nga ang Ebanghelyo mao ang gahum sa Dios ngadto sa kaluwasan; nga kini mao ang paagi ngadto sa kinabuhing dayon (DBY, 90).

Ang atong relihiyon, nga angay sa tanan diin ang Dios mao ang Tigpasiugda, usa ka sistema sa balaod ug lagda. Siya mibuhat sa mga balaod ug mga ordinansa alang sa panggobyerno ug kaayohan sa mga katawhan, aron makita kon mosunod ba sila niini ug makapakita sa ilang mga kaugalingon nga takus sa kinabuhing dayon pinaagi sa balaod sa celestial nga mga kalibutan (DBY, 1).

Ang Ginoo wala mohimo og mga balaod diin ako pugson nga ang akong mga sapatos himoon pinasubay sa unsay uso. Wala gayud siya mohatag og balaod sa pagdeterminar kon ako maghimo og kwadradog tumoy nga botas o talinis nga botas; kon ako aduna bay kupo nga ang hawakan ubos sa akong mga bukton, ug sayal nga sangkad sa akong mga kiting, o kon aduna bay kupo nga sama sa akong gisul-ob. Ang kaalam, sa pipila ka bahin, gihatag sa Santos ug sa makasasala, aron gamiton sa kaugalingon, sila aduna may balaod sa Priesthood o wala, nakadungog man sila niini o wala (DBY, 63).

Nasayud kamo nga usa kini ka kalainan sa atong hugot nga pagtuo ug relihiyon nga dili gayud mohangyo sa Ginoo sa pagbuhat og butang nga dili kita andam nga motabang kaniya sa tanan nga atong mahimo; ug dayon ang Ginoo mobuhat sa uban. Dili ako mohangyo sa Ginoo sa pagbuhat unsay dili nako andam nga buhaton (DBY, 43).

Ang ebanghelyo ni Jesukristo naglangkob sa tanang kamatuoran.

Ang tanang kamatuoran alang sa kaluwasan sa mga katawhan—alang sa kaayohan ug pagkat-on—alang sa ilang pagtubo sa diha kahibalo sa balaan nga mga baruganan, ug ang balaan nga kahibalo mao ang bisan unsang butang nga tinuod—kamatuoran; ug ang tanang kamatuoran kalabut sa pagkabalaan (DBY, 11).

Andam sa pagdawat sa kamatuoran, bisan diin kini gikan, walay kalainan, bisan gamay. Dili igsapayan diin nimo madawat ang Ebanghelyo naggikan man ni Joseph Smith o kang Pedro, kinsa nagpuyo sa panahon ni Jesus. Nadawat man kini gikan sa usa ka tawo o sa lain. Kon ang Dios mitawag og indibidwal ug mipadala kaniya sa pagsangyaw sa Ebanghelyo igo na kana alang kanako nga mahibalo, dili igsapayan diin kini gikan, ang gusto nako mao nga makahibalo sa kamatuoran (DBY, 11).

“Ang Mormonismo,” nga maoy tawag sa mga tawo, naglangkob sa matag baruganan kalabut sa kinabuhi ug kaluwasan, alang karon ug sa kahangturan. Dili igsapayan kinsa ang naghupot niini. Kon ang walay relihiyon nakaangkon og kamatuoran anaa kini sa “Mormonismo.” Ang kamatuoran ug ang tinuod nga doktrina nga gipanag-iya sa tinuohan sa kalibutan, ug sila adunay daghan niini, tanan iya niini nga Simbahan. Mahitungod sa ilang pamatasan, kadaghanan kanila mga maayog pamatasan, sama kamaayo kanato. Ang tanan nga maayo, matahum, ug dalaygon iya niini nga Simbahan ug Gingharian. Ang “Mormonismo” naglakip sa tanang kamatuoran. Walay kamatuoran nga dili iya sa Ebanghelyo. Kini kinabuhi, kinabuhing dayon; kini kabulahanan, kini ang kahingpitan sa tanang mga butang diha sa mga dios ug diha sa mga kahangturan sa mga dios (DBY, 3).

Sa laing pagkasulti, kon ang “Mormonismo” dili akong kinabuhi, wala ako masayud kon aduna ba ako. Ako wala nay masabtan og bisan unsa, kay naglangkob kini sa tanan nga moabut kutob sa masabtan sa tawo. Kon kini wala maglakip sa tanang butang nga tua sa langit ug dinhi sa yuta, kini dili mao kon unsay giangkon niini (DBY, 2).

Gusto akong mosulti ngadto sa akong mga higala nga kita nagtuo sa tanang maayo. Kon kamo makakita og kamatuoran didto sa langit, sa yuta o sa impyerno, kini iya sa atong doktrina. Nagtuo kita niini, ato kini, giangkon nato kini (DBY, 2).

[Ang ebanghelyo] naglakip sa tanang pamatasan, tanang hiyas, tanang kahayag, tanang kaalam, tanang gahum, ug sa tanang kaayo. Nagtudlo kini og sistema sa mga balaod ug mga ordinansa (DBY, 3).

Ang mao nga plano naglangkob sa matag sistema sa tinuod nga doktrina dinhi sa yuta, bisan kon ma-eklesiastikanhon, pamatasan, pangatarungan, o sibil; kini naglangkob sa tanang maayong balaod nga gihimo gikan sa mga adlaw ni Adan hangtud karon; lakip niini ang mga balaod sa mga nasud, kay kini milabaw kanila sa tanan nga kahibalo ug kaputli, lakip niini ang mga doktrina karon, ug kini naggikan bisan asa, ug dad-on ang tanang kamatuoran ngadto sa usa ka sistema, ug ibilin ang walay hinungdan dinhi ug didto (DBY, 3–4).

Kini atong katungdanan ug calling, isip mga ministro sa samang kaluwasan ug Ebanghelyo, sa pagpundok sa tanang butang sa kamatuoran ug isalikway ang sayop. Bisan ang kamatuoran makaplagan diha sa mga tawo nga dayag wala motuo sa Dios, o sa mga Universalist, o sa Simbahan sa Roma, o sa mga Methodist, sa Simbahan sa England, sa mga Presbyterian, sa mga Baptist, sa mga Quaker, sa mga Shaker, o sa bisan haing uban ug daghan nga lain-laing mga sekta ug mga pundok, ang tanan kinsa adunay kapin kon kulang nga mga kamatuoran, katungdanan kini sa mga Elder niini nga Simbahan (si Jesus, ilang Magulang nga Igsoon; nga ilang pangulo) sa pagpundok sa tanang mga kamatuoran sa kalibutan kalabut sa kinabuhi ug kaluwasan, sa Ebanghelyo nga atong gisangyaw, … ngadto sa mga siyensya, ug sa pilosopiya, makita man kini sa matag nasud, kaliwatan, pinulongan, ug katawhan ug dad-on kini ngadto sa Zion (DBY, 248).

Ang tanang kahibalo ug kaalam ug matag maayo nga gitinguha sa kasingkasing sa tawo anaa sa hugot nga pagtuo nga atong gituohan (DBY, 446).

Naglakip kini sa matag kamatuoran nga atua sa mga kalangitan ug sa langit sa mga kalangitan—matag kamatuoran nga ania sa ibabaw sa yuta, sa mga kahiladman sa yuta, ug sa langit nga puno sa kabitoonan; sa katingbanan, kini naglakip sa tanang kamatuoran nga anaa sa tanang mga kahangturan sa mga Dios (DBY, 448).

Ang atong relihiyon mosukod, mohukom, ug molakip sa tanang kaalam sa kalibutan—sa tanan nga gipadayag sa Dios ngadto sa tawo. Ang Dios mipadayag sa tanang kamatuoran nga karon ania na sa kalibutan, masiyentipikanhon o sa ma-relihiyoso. Ang tibuok kalibutan adunay obligasyon ngadto kaniya sa unsay ilang nahibaloan ug napahimuslan; utangan sila ngadto kaniya alang niining tanan, ug ako moila kaniya sa tanang mga butang (DBY, 2).

Naglakip kini sa tanang tinuod nga siyensya nga nailhan sa tawo, mga anghel, ug mga dios. Adunay usa ka tinuod nga sistema ug siyensya sa kinabuhi; ang tanan mopaingon ngadto sa kamatayon. Kana nga sistema nagagikan sa Tuburan sa kinabuhi (DBY, 2).

Ang kamatuoran magpabilin kon ang sayop mahanaw. Ang kinabuhi magpabilin kon sila kinsa misalikway sa mga pulong sa kinabuhing dayon gilamoy sa kamatayon. Ako gusto sa kamatuoran tungod kay kini tinuod, tungod kay kini maanindot ug makalipay, tungod kay kini hilabihan ka mahimayaon diha sa iyang kinaiya, ug angay kaayo sa pagdayeg, hugot nga pagtuo ug paghunahuna sa tanang may salabutan nga mga binuhat sa langit o sa yuta (DBY, 9).

Nalipay ako niini, tungod kay ang kamatuoran gituyo sa pagpatunhay sa iyang kaugalingon; gipasikad sa mahangturon nga mga kamatuoran ug molungtad, samtang ang uban, sa madugay ug sa madali, mangahanaw (DBY, 11).

Ang matag indibidwal nga nagpuyo sumala sa mga balaod sa Ginoo nga gihatag ngadto sa iyang mga katawhan, ug nakadawat sa mga panalangin nga iyang giandam alang sa matinud-anon, kinahanglan makahibalo sa mga butang sa Dios gikan sa mga butang nga dili sa Dios, sa kahayag gikan sa kangitngit, kana nga nagagikan sa langit ug kana nga nagagikan sa laing dapit. Mao kini ang katagbawan ug kalipay nga matagamtaman sa mga Santos sa Ulahing mga Adlaw pinaagi sa pagsunod sa ilang relihiyon; mao kini ang kahibalo nga gipanag-iya sa tanan kinsa buhi (DBY, 35).

Pagkasayon nga magpuyo pinaagi sa kamatuoran. Nakahunahuna ba kamo niini, akong mga higala? Nakahunahuna ba kamo niini, akong mga kaigsoonan? Sa matag kahimtang sa kinabuhi, bisan kauban sa mga mapainubsanon o sa mga adunahan, ang kamatuoran sa kanunay mao ang labing siguro nga paagi ug ang labing sayon nga mogiya sa atong mga kinabuhi (DBY, 11).

Ang atong relihiyon yano ra nga mao ang kamatuoran. Ikasulti kining tanan niining usa ka panultihon—naglangkob kini sa tanang kamatuoran, bisan asa makita, diha sa tanang mga buhat sa Dios ug sa tawo nga makita o dili makita sa mortal nga mata (DBY, 2).

Pinaagi sa gahum sa priesthood, ang ebanghelyo mao ang paagi sa kaluwasan alang sa tanang mga anak sa Dios.

Ang Ebanghelyo nga atong gisangyaw mao ang Ebanghelyo sa kinabuhi ug kaluwasan. Ang Simbahan nga atong girepresentar mao ang Simbahan ug Gingharian sa Dios, ug nanag-iya sa bugtong hugot nga pagtuo diin ang mga katawhan mahimong makabalik ngadto sa presensya sa atong Amahan ug Dios. Ang Ginoo mipahigayon diha sa iyang mga kamot sa pagpahiuli sa tanang mga butang sama sa sinugdan, ug pinaagi sa pagpangalagad sa iyang balaan nga Priesthood, miluwas sa tanan kinsa maluwas, nalimpyohan gikan sa mga sangputanan sa Pagkapukan sa kalibutan ug gihatag kini ngadto sa mga kamot sa iyang mga Santos (DBY, 4).

Ang Priesthood … usa ka hingpit nga kapunongan ug sistema sa panggobyerno, ug kini lamang makapanalipod sa tawhanong pamilya gikan sa tanang mga dautan nga karon misakit sa mga miyembro niini, ug mosiguro kanila og kalipay ug kalinaw human dinhi (DBY, 130).

Ang Ebanghelyo ug ang Priesthood mao ang paagi nga iyang gigamit sa pagluwas ug sa paghimaya sa iyang masulundon nga mga anak ngadto sa pagpanag-iya uban kaniya sa samang himaya ug gahum nga pagakoronahan sa mga korona sa himaya, pagka-imortal ug kinabuhing dayon (DBY, 5).

Ang tanang mga buhat nga atong gipahigayon kinahanglang dumalahon pinaagi sa paggiya sa Priesthood (DBY, 133).

Walay ordinansa nga gihatag sa Dios pinaagi sa iyang kaugalingong tingog, pinaagi sa iyang Anak nga si Jesukristo, o pinaagi sa mga ba-ba ni bisan kinsa sa iyang mga Propeta, mga Apostoles o Ebanghelista, nga walay kapuslanan. Ang matag ordinansa, matag sugo ug kinahanglanon gikinahanglan alang sa kaluwasan sa tawhanong pamilya (DBY, 152).

Kalabut sa mga ordinansa sa Dios, mahimo kitang mosulti nga kita mosunod niini tungod kay misugo siya niini, ug ang matag tipik sa iyang mga gikinahanglan adunay hustong pangatarungan uban niini. … Kana nga pangatarungan moabut ngadto sa tanang kahangturan, ug mao ang pangatarungan nga gituhoan sa mga Santos sa Ulahing mga Adlaw. Ang matag tipik sa kamatuoran nga nadawat sa matag tawo usa ka gasa gikan sa Dios. Madawat nato kini nga mga kamatuoran, ug magpadayon gikan sa himaya ngadto sa himaya, gikan sa kinabuhing dayon ngadto sa kinabuhing dayon, mag-angkon og kahibalo sa tanang mga butang, ug mahimong mga Dios, gani mga Anak sa Dios (DBY, 152).

Ang Ebanghelyo ni Jesukristo mao ang paagi nga giablihan—ang bukas nga ganghaan sa dalan o agianan gikan sa yuta ngadto sa langit, diin pinaagi niini magagikan ang pagpadayag ngadto sa mga katawhan sa ilang lainlaing mga kahimtang, sumala sa ilang mga calling ug pagkabutang sa katilingban nga ilang gipuy-an. Ang Ebanghelyo sa kaluwasan usa ka bahin sa balaod nga may kalabutan sa gingharian diin nagpuyo ang Dios, ug ang mga ordinansa kalabut sa balaan nga Priesthood mao ang mga paagi diin ang mga katawhan makakita og agianan sa kinabuhi, diin sila makapalugway sa ilang pagbiyahe hangtud sila mobalik ngadto sa presensya sa ilang Amahan ug Dios (DBY, 6).

Ang mga balaod ug mga ordinansa nga gipadayag sa Ginoo niining ulahing mga adlaw, gituyo sa pagluwas sa tanang mga anak ni Adan ug Eva (DBY, 1).

Gipahayag nato ngadto sa tanang mga lumulupyo sa yuta gikan sa walog sa ibabaw niining mga kabukiran nga kita mao ang Simbahan ni Jesukristo sa mga Santos sa Ulahing mga Adlaw … Ug kita adunay doktrina sa kinabuhi ug kaluwasan alang sa tanang matinuoron sa kasingkasing sa tibuok kalibutan (DBY, 7).

Mga Sugyot alang sa Pagtuon

Ang ebanghelyo ni Jesukristo naglakip og usa ka sistema sa mga balaod ug mga ordinansa nga modangat ngadto sa kaluwasan.

Sumala ni Presidente Young, ang ebanghelyo ni Jesukristo mao ang “gahum sa Dios ngadto sa kaluwasan.” Sa unsa nga paagi nga ang iyang pamahayag ikatandi sa gipasabut sa Manluluwas kabahin sa ebanghelyo diha sa 3 Nephi 27:13–14?
Unsa ang mabuhat sa ebanghelyo ni Jesukristo sa pagpahinabo sa pagkaimortal ug kinabuhing dayon sa tawo? (Tan-awa usab sa Moises 1:39; Abraham 3:25.) Ngano nga nagkinahanglan kita og sistema sa mga balaod ug mga ordinansa sa pagbalik ngadto sa atubangan sa Dios? Sa unsa nga paagi nga ang mga balaod ug mga ordinansa sa Dios makahatag og “kaayohan [ngadto] sa mga katawhan”? (Tan-awa usab sa 2 Nephi 2:13, 16.)
Si Presidente Young mitudlo nga ang Dios “gidumala og balaod.” Sa unsa nga paagi nga ang pagkahibalo nga ang Dios gidumala og balaod makatabang kanato? (Tan-awa usab sa D&P 82:10.)
Si Presidente Young mihulagway sa ebanghelyo nga husay nga sistema. Sa unsa nga mga butang nga ang Dios buot nga kita mogamit sa atong kaugalingong paghukom? (Tan-awa usab sa D&P 58:26–29.)

“Ang ebanghelyo ni Jesukristo naglangkob sa tanang kamatuoran.

Si Presidente Young mihagit sa mga Santos sa Ulahing mga Adlaw nga mahimong mga tigpangita sa kamatuoran. Ngano nga kinahanglang makasabut kita nga ang ebanghelyo ni Jesukristo naglakip sa tanang kamatuoran? Ngano nga kita kinahanglang modawat sa kamatuoran bisan asa kini gikan? Unsa ang atong makat-unan gikan sa pamahayag ni Presidente Young nga ang “tanang kamatuoran may kalabutan sa pagkabalaan”?
Unsa ang gitudlo sa pamahayag ni Presidente Young mahitungod sa pagdawat ug paghigugma sa mga tawo sa laing mga tinuohan?
Unsaon nato nga makaila tali sa kamatuoran ug sa sayop? (Tan-awa sa 1 Mga Taga-Corinto 2:11, 14; Moroni 7:12–17.) Ngano nga ang abilidad sa “pagpundok sa matag butang sa kamatuoran ug pagsalikway sa matag sayop” importante kaayo sa ulahing mga adlaw?
Sa unsa nga paagi nga ang pagkahibalo sa mga kamatuoran sa ebanghelyo makaapekto kon giunsa nato pagdala ang atong mga kinabuhi? Ngano nga ang kamatuoran sa kanunay mao “ang labing siguro nga paagi ug labing sayon nga mogiya sa atong mga kinabuhi”? Sa unsa nga paagi nga ang atong mga kinabuhi maapektuhan kon kita magpuyo pinaagi sa pamakak ug pangilad? (Tan-awa usab sa D&P 88:86.)

Pinaagi sa gahum sa priesthood, ang ebanghelyo mao ang paagi sa kaluwasan alang sa tanang mga anak sa Dios.

Unsa ang relasyon tali sa priesthood ug sa ebanghelyo ni Jesukristo? Ngano nga ang mga ordinansa sa priesthood mahinungdanon sa plano sa ebanghelyo?
Unsa ang buluhaton sa lokal nga mga korum sa priesthood, mga grupo, ug mga komite isip mga ministro sa ebanghelyo? Unsa ang dapit sa Relief Society sa pagtudlo sa kamatuoran ug sa pag-ugmad og hugot nga pagtuo diha sa ebanghelyo ni Jesukristo? Unsay inyong nasinati sa paghatag og Kristohanong pagserbisyo ngadto sa tawo? Sa unsa nga paagi nga ang mao nga kasinatian nakaimpluwensya kaninyo?
Si Presidente Young mitudlo nga ang ebanghelyo mao “ang bukas nga ganghaan diha sa dalan o ang agianan gikan sa yuta ngadto sa langit.” Unsa nga responsibilidad ang gihatag niadtong modawat sa gipahiuli nga ebanghelyo sa pagsabwag sa ilang pagsaksi sa mga balaod niini, mga ordinansa, ug kamatuoran? (Tan-awa usab sa Mateo 28:19–20; Mga Proverbio 22:6.)