Temporal nga Bahandi ug ang Gingharian sa Dios

Si Presidente Brigham Young usa ka tawo sa buhat kinsa dili usikan ug kinsa nagtrabaho gayud aron sa pagsangkap sa materyal nga panginahanglan sa iyang pamilya ug alang sa uban. Mitukod siya og mga balay, mga negosyo, ug mga umahan. Apan wala niya ibutang ang iyang kasingkasing sa kalibutanon nga mga butang, nagpasidaan nga ang “atong mga pagbati sa kasagaran gibutang diha sa walay hinungdan, madunot nga mga butang (DNW, 16 sa Hulyo 1856, 2). “Ako nasayud nga ang mga butang niini nga kalibutan, gikan sa sinugdanan hangtud sa katapusan, … naghimo og gamay ra o walay kalainan sa kalipay sa usa ka indibidwal” (DNW, 11 sa Ene. 1860, 1). Si Presidente Young mitudlo nga ang temporal nga bahandi kinahanglang ipahinungod sa pagtukod sa gingharian sa Dios.

Mga Pagtulun-an ni Brigham Young

Kinahanglan nga atong ipahiluna ang atong mga kasingkasing diha sa mga butang sa Dios kay sa kalibutanon nga mga butang.

Sa dihang akong gitan-aw ang mga lumulupyo sa yuta ug nakita ang kahuyang, ug ako mahimong moingon, ang kadako sa kabuang sa mga kasingkasing sa mga hari, mga tigmando, ug sa bantugan, ug niadtong kinsa kinahanglan nga maalamon ug buotan ug halangdon; sa dihang sila akong nakita nga nagbuhat og ngil-ad; naghandom, nangandoy, nagtinguha, nakigbisog alang sa mga butang niini nga kinabuhi, sa akong hunahuna, O buang nga mga tawo, sa pagpahiluna sa inyong mga kasingkasing diha sa mga butang niini nga kinabuhi! … Ang usa ka lalaki o usa ka babaye nga mopili sa bahandi niini nga kalibutan ug sa mga butang sa kalibutan batok sa mga butang sa Dios ug sa kaalam sa kahangturan, sila walay mga mata nga makakita, walay dunggan nga makadungog, walay kasingkasing nga makasabut ( DBY, 306–7).

Akong gitan-aw ang kalibutan sa katawhan ug nakakita kanila nga nagilogay, nag-away, ug ang matag usa naningkamot sa pagpauswag sa iyang kaugalingon, ug sa pagtuman sa iyang kaugalingong indibidwal nga mga katuyoan, wala manumbaling sa gipuy-an nga komunidad, ug dili maayong motagad sa iyang mga silingan—ang tanan naningkamot, nagplano, naglaraw sa ilang pagmata, ug kon matulog magdamgo, “Unsaon nako nga makabintaha sa akong silingan? Unsaon nako nga makapamintaha kaniya, aron ako mahimong bantugan?” Usa kini ka dakong sayop. … Ang tawo nga nangita og dungog ug himaya sa pagpamintaha sa iyang isig ka tawo dili takus sa katilingban nga may salabutan (DBY, 307).

Ang pag-angkon og bahandi lamang dili makahatag og kalipay, bisan og kini makahatag og kahayahay, kini ikabaylo alang sa mga kinahanglanon ug kaharuhay sa kinabuhi. Kon ang bahandi maangkon pinaagi sa pagpangawat, o sa bisan unsa nga dili makiangayon ug dili madungganon nga paagi, ang kahadlok nga masakpan ug masilotan mowagtang sa tanang tawhanong kalipay sa naghupot niini. Kon ang bahandi naangkon sa tawo sa madungganong paagi, sa gihapon ang pagpanag-iya niini mahimong mapait pinaagi sa paghunahuna nga ang kamatayon sa dili madugay mohikaw nila niini ug ang uban maoy manag-iya niini. Unsay ilang paglaum sa umaabut, human sila moagi niining masulub-ong kalibutan? Sila walay nahibaloan sa umaabut; sila walay nakita gawas sa kamatayon ug impyerno. Hingpit nga kahayahay ug walay sagol nga kalipay wala nila mailhi (DBY, 314).

Ang pagpanag-iya sa tanang bulawan ug pilak sa kalibutan dili makatagbaw sa tinguha sa imortal nga kalag sa tawo. Ang gasa sa Balaan nga Espiritu nga gikan sa Ginoo lamang ang makahatag og maayo, maanindot, natagbaw nga hunahuna. Kay sa mangita og bulawan ug pilak, hangad sa kalangitan ug paningkamot sa pagkat-on og kaalam hangtud inyong mahan-ay ang mga elemento alang sa inyong kaayohan; dayon, ug dili hangtud niana, nga kamo magsugod sa pagpanag-iya sa tinuod nga mga katigayunan (DBY, 305).

Adunay daghan nga kabtangan, ug mga bulawan ug pilak ilawom sa yuta, ug sa ibabaw sa yuta, ug ang Ginoo naghatag nganha sa usa ngadto sa usa—sa mga dautan ingon man sa mga matarung—aron tan-awon unsay ilang buhaton niini, apan kining tanan gipanag-iya Niya. Siya mitugyan og igo nga gidaghanon ngadto niini nga mga katawhan, ug, pinaagi sa atong hugot nga pagtuo, pailub ug kakugi, kita nakahimo og maanindot, hayahay nga mga panimalay dinhi, ug adunay daghan nga datu kaayo. … Apan dili kini ato, ug ang tanan natong angay buhaton mao ang pagpaningkamot ug pagsuta kon unsay buot sa Ginoo nga atong buhaton sa mga butang nga ania kanato, ug dayon molihok ug mobuhat niini. Kon kita mobuhat og lain lapas niini, o ngadto sa tuo o ngadto sa wala, mitunob kita diha sa supak nga matang sa buluhaton. Ang atong makatarunganon nga buluhaton mao ang pagbuhat unsa ang buot sa Ginoo nga atong buhaton niana nga iyang gihatag kanato, ug gamiton kini sumala sa iyang gimando, kon ihatag ang tanan niini, ang ikanapulo, o ang sobra (DBY, 305).

Ang mga lalaki ug mga babaye nga maningkamot sa paghimo sa ilang mga kaugalingon nga malipayon sa pagpanag-iya og bahandi o gahum dili makaangkon niini, kay walay ikatandi sa Ebanghelyo sa Anak sa Dios nga makahimo sa mga lumulupyo sa yuta nga malipayon, ug makapaandam kanila nga makatagamtam sa langit dinhi ug sa umaabut (DBY, 315).

Ang gugma sa kwarta modangat ngadto sa kahigawad [disappointment] ug pagkawala sa Espiritu.

Wala ba kamo masayud nga ang pagpanag-iya sa inyong kabtangan sama sa usa ka anino, o sa yamog sa kabuntagon sa udtong tutok, nga kamo dili makabaton og kasiguroan sa pagpugong niini sa usa ka higayon! Mao kini ang dili makita nga kamot sa Makagagahum nga nagmando niini (DBY, 305–6).

Dili kita makasalig sa kasiguroan sa mortal nga mga kabtangan; lumalabay ra kini, ug ang pagsalig kanila moabut ngadto sa walay paglaum nga kahigawad sa tanan kinsa mosalig niini (DBY, 306).

Unsaon paglingaw sa Yawa ang tawo nga nagsimba sa ganansya! (DBY, 306).

Mas mahadlok ako sa pagkamasinahon sa atong mga Elder kay sa panonsa impyerno (DBY, 306).

Kadtong kinsa masinahon ug hakog, gustong moangkon sa tibuok kalibutan, sa tanang higayon dili mahimutang, ug sa kanunay naghimo sa ilang mga plano ug nangita og paagi unsaon sa pag-angkon niini, niana, ug sa uban (DBY, 306).

Ang mga tawo hakog sa kawang nga mga butang niini nga kalibutan. Sa ilang mga kasingkasing sila masinahon. Tinuod nga ang mga butang sa kalibutan gihimo aron sa paghimo kanato nga komportable, ug kini molipay sa mga katawhan dinhi, apan ang mga katigayunan dili gayud makapalipay sa mga Santos sa Ulahing mga Adlaw. Ang mga katigayunan dili makahatag og permanente nga kalipay, ang Espiritu lamang nga moabut gikan sa kahitas-an ang makahimo niana (DBY, 306).

Ang mga Santos sa Ulahing mga Adlaw kinsa mobalhin sa ilang pagtagad ngadto sa pagpangita og kwarta sa dili madugay mawad-an og gana sa mga ordinansa sa balay sa Dios. Ilang ibaliwala ang ilang mga pag-ampo, dili na andam mobayad og bisan unsa nga donasyon; ang balaod sa ikapulo mahimong bug-at kaayo nga buluhaton alang kanila; ug sila sa katapusan mosalikway sa ilang Dios, ug ang mga panalangin sa langit ingon og gisiradan ngadto kanila—agi og sangputanan niining kaibug sa mga butang niini nga kalibutan, nga sa pagkatinuod mahanaw sa paggamit, ug sa paggamit niini molubad ug mawala gikan kanato (DBY, 315).

Mapailubon nga pagtrabaho makahatag og temporal nga mga kabtangan ug mahangturon nga mga katigayunan.

Ang pag-angkon sa mga butang sa kalibutan dili sa tinud-anay bahandi, dili katigayunan, kini kapin kon kulang walay hinungdan diin yano sa tanang mga tawo, ngadto sa makiangayon ug sa dili makiangayon, ngadto sa mga Santos ug ngadto sa makasasala. Ang adlaw mosubang ngadto sa dautan ug sa matarung; ang Ginoo mopadala og ulan diha sa makiangayon ug sa dili makiangayon [tan-awa sa Mateo 5:45]; makita kini sa atong mga mata, ug sa atong inadlaw nga kasinatian. Ang Tigulang nga si Haring Solomon, ang maalamon nga tawo, nag-ingon, ang lumba dili ngadto sa abtik, ni ang gubat ngadto sa kusgan, ni ang mga katigayunan ngadto sa mga tawo nga maalamon [tan-awa sa Ecclesiastes 9:11]. Ang kamatuoran niini nga panultihon nagagikan sa atong inadlaw nga obserbasyon. … Ang huyang, nagkurog, ug walay umoy mao ang kasagaran nga modaog sa gubat; ug ang walay kahibalo, buang, ug dili maalamon makahimo og dakong kasaypanan sa katigayunan (DBY, 308).

Ang tinuod nga bahandi naglangkob sa kahanas sa pag-angkon og mga kaharuhay ug kahayahay gikan sa mga elemento. Ang tanang gahum ug kaligdong nga ikahatag sa bahandi usa lamang ka anino, ang unod makita sa kusog ug sa paghago sa minilyon nga nanagtrabaho. Ang maayo nga pagkagiya nga trabaho mao ang tinuod nga gahum nga makahatag sa atong mga panginahanglan. Makahatag kini og harianong kahalangdon sa mga tigmando, edukasyon ug mga sangkap ngadto sa mga relihiyoso ug politikal nga mga ministro, ug mohatag sa mga panginahanglan sa liboan ka milyon ka mga anak sa yuta (DBY, 309).

Ikatulo o ikaupat nga bahin sa panahon nga gigahin sa pagpanginabuhi igo na, kon ang inyong pagtrabaho nagiyahan sa husto. Ang mga tawo naghunahuna nga sila madatu pinaagi sa pagtrabaho pag-ayo—pinaagi sa pagtrabaho og disesais ka mga oras sa baynte kwatro ka oras; apan dili kini mao. Daghan kaayo sa atong mga kaigsoonan ang maglisud sa pagtambong og miting. Unom ka mga adlaw sobra na nga panahon kay sa atong gikinahanglan nga pagtrabaho (DBY, 311).

Mao kini ang tambag nga akong ihatag karon sa mga Santos sa Ulahing mga Adlaw. Hunong, ayaw pagdali. Dili ako makasiguro nga makakita ako og usa ka tawo sa atong komunidad nga dili maghandom og bahandi, nga gustong makaangkon sa tanan nga makahatag kaniya og kahayahay ug kaharuhay. Nakahibalo ba kamo unsaon sa pagkuha niini? “Nan,” tubag sa usa, “kon wala ako makahibalo, naghandom ako nga makahibalo unta; apan tingali gayud ako walay swerte—ang maayong palad dili alang kanako.” Sultihan ko kamo sa katarungan niini—kamo kanunay nga nagdalidali; dili kamo moadto sa miting, dili kaayo kamo mag-ampo, dili kaayo kamo mobasa sa mga Kasulatan, dili kaayo kamo mamalandong, kanunay kamong nagkapuliki, ug nagdalidali nga kamo wala masayud unsay unang buhaton. Dili kini ang paagi aron madatu. Gigamit lamang nako ang pulong nga “datu” aron magiyahan ang hunahuna, hangtud kita makaangkon og mahangturong mga katigayunan sa celestial nga gingharian sa Dios. Dinhi kita daw nangandoy sa katigayunan didto, gusto kita sa kahayahay sa kinabuhi. Kon kita nagtinguha niini atong subayon ang dalan nga padulong niini. Usbon ko kini sa yanong pagkasulti—sa usa sa labing yano ug kabahin sa panimalay nga pulong—“Andama ang inyong mga pinggan,” nga kon ang linugaw moabut, mapuno ang inyong pinggan (DBY, 310).

Kon ang [mga indibidwal] mosunod sa mga baruganan nga makapasiguro kanila sa mahangturong kaluwasan, sila makasiguro nga makaangkon sa tanang tinguha sa ilang kasingkasing, sa madugay o madali; kon kini dili moabut karon, tingali kini moabut ugma; kon kini dili moabut niining higayuna, kini moabut sa sunod (DBY, 309).

Kinahanglan kita nga maningkamot sa kaugalingon ug makigbahin sa atong mga kapanguhaan ngadto sa pobre.

Ang pobre mao ang katawhan sa Dios, ug sila makapanunod sa yuta (DBY, 316).

Ang tawo nga gigutom ug timawa adunay sama nga katungod sa akong pagkaon sama ni bisan kinsang lain nga tawo, ug ako kinahanglang mobati nga malipayon sa pagpakig-uban kaniya, kon siya adunay maayong kasingkasing, sama niadtong anaa sa kabuhong, o uban sa mga prinsipe sa yuta. Silang tanan akong gitamud, dili sumala sa bahandi ug posisyon nga ilang gihuptan, apan sumala sa ilang mga kinaiya (DBY, 317).

Ang mga pobre sa Ginoo dili makalimot sa ilang mga pakigsaad, samtang ang mga pobre sa Yawa dili manumbaling sa ilang mga saad (DBY, 317).

Himoa nga ang mga pobre magmatinuoron, himoa nga ang mga datu magmanggihatagon, ug mopakita sa ilang mga plano sa pagtabang sa pobre, sa pagtukod sa Gingharian sa Dios, ug sa samang higayon magpalambo sa ilang mga kaugalingon, kay kana mao ang paagi sa pagtukod sa Gingharian sa Dios (DBY, 317).

Kon ang pobre makaangkon sa tanang sobra nga kabtangan sa datu kadaghanan kanila mag-usik-usik niini tungod sa mga pangibug sa lawas, ug molaglag sa mga kaugalingon sa paggamit niini. Tungod niini nga katarungan ang Ginoo wala magkinahanglan sa datu nga mohatag sa ilang tanang butang ngadto sa pobre. Kini tinuod nga sa dihang ang batan-ong lalaki miduol ni Jesus aron makahibalo unsay iyang buhaton aron maluwas, siya giingnan niya, sa katapusan, “ibaligya ang tanan nimong kabtangan ug ang halin ipanghatag sa mga pobre, ug makabaton ikaw og bahandi didto sa langit; ug unya umanhi ka ug sumunod kanako;” ug daghan kaayo ang naghunahuna nga iyang giingnan ang batan-ong lalaki sa paghatag sa tanan nga iyang gipanag-iya, apan si Jesus wala mosugo niana, ni siya miingon sa mao, apan sa yano, “i-apud-apod ngadto sa pobre” [tan-awa sa Lucas 18:18–23] (DBY, 317–18).

Kini makauulaw sa matag lalaki ug babaye nga adunay kabuot sa pagpakabuhi, nga dili moatiman sa ilang kaugalingong mga kadugo, sa ilang kaugalingong mga pobre, ug magplano alang kanila ug butang nga trabahoon nga makahimo sila (DBY, 318).

Kinahanglan nga atong ihalad ang atong temporal nga bahandi sa pagtukod sa gingharian sa Dios.

Alang sa unsa ang mga katigayunan? Alang sa mga panalangin, sa pagbuhat og maayo. Dayon atong ipaambit kanang gihatag sa Ginoo kanato sa labing maayong mahimo nga paggamit sa pagtukod sa iyang Gingharian, alang sa pagsangyaw sa kamatuoran sa yuta, aron kita makakita ug makapahimulos sa mga panalangin sa Zion sa Dios dinhi niini nga yuta (DBY, 307).

Kon, pinaagi sa mga kinaiya sa kakugi ug matarung nga pagtagad, kamo makaangkon og liboan o minilyon, gamay o daghan, kini inyo ang katungdanan sa paggamit sa tanan nga gihatag kaninyo, ingon ka mabination sama sa inyong nahibaloan, sa pagtukod sa Gingharian sa Dios dinhi sa yuta (DBY, 313–14).

Kon kita adunay minilyon ka mga sensilyo ug ihalad kana nga kwarta sa pagtukod sa Gingharian sa Dios ug sa pagbuhat og maayo sa iyang mga nilalang, uban sa bug-os nga tinguha ngadto sa iyang himaya kita mas mapanalanginan ug adunay katungod ngadto sa kaluwasan kay sa pobre nga makalilimos nga nagpakilimos sa kabalayan; ang matinud-anon nga datu nga tawo adunay katungod sa mga pagpadayag ni Jesukristo sama sa matinud-anong pobre nga tawo (DBY, 314).

Kinahanglan nga kita magbantay ug mag-ampo, ug mohunahuna gayud sa atong inadlaw ug matang sa kinabuhi, ug magpuyo duol sa atong Dios, nga ang gugma niini nga kalibutan dili molumos sa bililhon nga liso sa kamatuoran, ug mobati nga andam, kon gikinahanglan, sa paghalad sa tanang mga butang, bisan ang kinabuhi mismo, alang sa Gingharian sa Langit (DBY, 314).

Pagbantay, kamong mga tawo sa Israel, ug pagbantay nga kamo dili mahigugma sa kalibutan o sa mga butang sa kalibutan sa ilang kahimtang karon, ug sa inyong pagkamapahitas-on ug garbo, makalimot sa Ginoo nga inyong Dios. Kinahanglan nga dili na kita maghandom sa pilak ug sa bulawan, ug sa kabtangan nga gitinguha pag-ayo sa dautan nga kalibutan, kay sa yuta o sa bato nga atong gilaktan (DBY, 314).

Bisan og ako adunay minilyon nga kwarta ug kabtangan, kana dili makapalingkawas kanako sa sa paghimo sa akong trabaho nga maoy akong buluhaton nga pagahimoon, kutob nga aduna pa akoy kusog ug abilidad, bisan kinsa pa nga pinakapobre nga tawo sa komunidad makalingkawas. Kon labaw kitang napanalanginan og bahandi, mas labaw kitang gipanalanginan og responsibilidad; kon labaw kitang napanalanginan og kaalam ug abilidad, mas labaw kitang gibutang ubos sa panginahanglan sa paggamit niana nga kaalam ug abilidad sa pagsangyaw sa pagkamatarung, sa pagbuntog sa sala ug kaalaot, ug sa pagpauswag sa kahimtang sa tawo. Ang tawo nga adunay usa lamang ka talento ug ang tawo nga adunay lima ka mga talento adunay responsibilidad sumala niini [tan-awa sa Mateo 25:14–30]. Kon kita adunay kalibutan sa mga bahandi, kita adunay responsibilidad sa kalibutan (DBY, 315).

Mga Sugyot alang sa Pagtuon

Kinahanglan nga atong ipahiluna ang atong mga kasingkasing diha sa mga butang sa Dios kay sa kalibutanon nga mga butang.

Ngano nga binuang ang pagpahiluna sa atong mga kasingkasing diha sa mga butang niini nga kalibutan? Unsaon nato sa pagpahiluna sa atong mga kasingkasing diha sa mga butang sa Dios?
Sumala ni Presidente Young, ngano nga ang uban gipanalanginan og mga katigayunan? Unsa nga mga kakuyaw ang naghulat niadtong kinsa mapakyas sa “pagbuhat unsay buot sa Ginoo nga [ilang] buhaton nianang iyang gihatag [kanila]”? Unsaon ninyo pagkahibalo kon kamo nagsunod ba sa “dili maayong padagan sa patigayon”? Unsa nga mga kasinatian ang inyong nasinati sa pagpakigbahin sa inyong temporal nga mga kabtangan samtang kamo naningkamot sa pagtuman sa ebanghelyo?

Ang gugma sa kwarta modangat ngadto sa kahigawad ug pagkawala sa Espiritu.

Ngano nga ang pagsalig sa materyal nga bahandi modangat ngadto sa kahigawad? Unsa nga ebidensya ang inyong nakita nga kita kinahanglan moapil sa kabalaka ni Presidente Young mahitungod sa pagkamasinahon sa mga kasingkasing sa mga katawhan? Unsaon nato sa paglikay sa mao nga mga problema?
Unsa ang mahitabo niadtong kinsa “mobalhin sa ilang pagtagad ngadto sa pagpangita og kwarta”? Sa unsa nga paagi nga ang sayop nga paghigugma sa kwarta makapalayo sa mga tawo gikan sa templo, pag-ampo, ug ikapulo?

Mapailubon nga pagtrabaho makahatag og temporal nga mga kabtangan ug mahangturong mga katigayunan.

Unsa ang “tinuod nga bahandi”? (Tan-awa usab sa D&P 6:7.)
Unsa ang gitambag ni Presidente Young ngadto niadtong kinsa mogahin og daghang panahon sa pagpaningkamot nga makaangkon og yutanong mga kabtangan?
Unsay kinahanglan gayud natong buhaton aron makaangkon og “mahangturong mga katigayunan diha sa celestial nga gingharian sa Dios”?
Si Presidente Brigham Young miingon: “Ayaw pagdali-dali. … Dili kini ang paagi aron madatu.” Unsa sa inyong pagtuo ang iyang buot ipasabut? Unsaon ninyo paggamit kini nga mga tambag sa inyong kinabuhi?

Kinahanglan kita nga maningkamot sa kaugalingon ug makigbahin sa atong mga kapanguhaan ngadto sa pobre.

Unsa ang atong kinaiya mahitungod sa pagtabang sa pobre? Unsa ang gikinahanglan sa Ginoo gikan sa pobre? gikan sa datu? (Tan-awa usab sa Mosiah 4:16–28.)
Ngano nga ang kinaiya mas labaw ka importante kay sa temporal nga bahandi?
Unsa ang atong responsibilidad ngadto sa mga miyembro sa pamilya kinsa anaa sa panginahanglan?

Kinahanglan nga atong ihalad ang atong temporal nga bahandi sa pagtukod sa gingharian sa Dios.

Unsa ang mga responsibilidad niadtong kinsa makadawat og temporal nga bahandi?
Sa unsa nga paagi nga ang datu ug ang pobre makahatag og ubay-ubay ngadto sa pagtukod sa gingharian? Unsa nga mga panalangin ang giandam alang niadtong mobuhat sa ingon?