Pagtukod sa Zion

Ang tibuok kalag ni Presidente Brigham Young gipahinungod sa pagtukod sa Zion. Iyang gidumala ang pagpundok sa dul-an sa usa ka gatus ka libo ka mga Santos sa Ulahing mga Adlaw ngadto sa mga walog sa Rocky Mountains ug mipahimutang og panimuyo diha sa mga upat ka gatus ka mga siyudad ug mga lungsod. Nagtukod siya og mga templo ug mga tabernakulo, mitukod og mga stake ug mga ward sa tibuok kasadpang Estados Unidos, ug mipadala og mga misyonaryo ngadto sa hapit tanang dapit sa kalibutan. Walay usa nga mas nakasabut sa sakripisyo ug paningkamot nga gikinahanglan, apan, sama sa iyang giingon, “dili kita maghulat sa mga anghel, … atong tukuron ang [Zion nga kita mismo]” (DBY, 443).

Mga Pagtulun-an ni Brigham Young

Ang Zion mao ang putli og kasingkasing.

Tuguti akong mosulti og pipila ka mga pulong kalabut sa Zion. Kita miangkon nga Zion. Kon kita ang putli og kasingkasing nan kita mao, kay ang “Zion mao ang putli og kasingkasing” [tan-awa sa D&P 97:21] (DBY, 118). Asa man ang Zion? Kon asa ang organisasyon sa Simbahan sa Dios. Ug unta nagpuyo kini sa espirituhanong paagi diha sa matag kasingkasing; ug unta kita magpuyo sa ingon aron makabaton sa espiritu sa Zion kanunay! (DBY, 118).

Mao kini ang Ebanghelyo; mao kini ang plano sa kaluwasan; mao kini ang Gingharian sa Dios; mao kini ang Zion nga gipamulong ug gisulat sa tanang mga Propeta sukad sa sinugdanan sa kalibutan. Mao kini ang buhat sa Zion nga gisaad sa Ginoo nga ipadayag (DBY, 118).

Ang Zion mokaylap, sa katapusan, sa kinatibuk-an niini nga yuta. Wala nay suok o bahin sa yuta nga wala ang Zion. Kining tanan mahimong Zion (DBY, 120).

Ang katuyoan sa atong kinabuhi kinahanglan mao ang pagbalaan sa atong mga kaugalingon ug pagtukod sa Zion sa atong Dios.

Ang katuyoan sa atong kinabuhi kinahanglan mao ang pagtukod sa Zion sa atong Dios, ang pagpundok sa Balay ni Israel, pagdala sa kahingpitan sa mga Hentil, pagpahiuli ug pagpanalangin sa yuta sa atong gahum ug paghimo niini sama sa Tanaman sa Eden, pagtigum og mga bahandi sa kahibalo ug kaalam diha sa atong kaugalingong mga panabut, paglimpyo sa atong kaugalingong mga kasingkasing ug pag-andam sa usa ka katawhan sa pagsugat sa Ginoo kon siya moabut (DBY, 88).

Kita walay tuyo dinhi gawas sa pagtukod ug pagpahiluna sa Zion sa Dios. Kinahanglan kining buhaton sumala sa kabubut-on ug balaod sa Dios [tanawa sa D&P 105:5], subay nianang sumbanan ug kahusayan diin si Enoch mitukod ug mihingpit sa Zion sa unang mga adlaw, nga gidala ngadto sa langit, sa ingon nga ang panultihon miabut sa laing dapit nga ang Zion nawala [tan-awa sa Moises 7:69]. Sa dili madugay mobalik kini pag-usab, ug sama sa pag-andam ni Enoch sa iyang katawhan nga mahimong angayan nga mabalhin sa pagkahimaya, busa kita, pinaagi sa atong pagkamatinudanon, kinahanglang moandam sa atong mga kaugalingon sa pagsugat sa Zion gikan sa kahitas-an sa higayon nga mobalik kini nganhi sa yuta, ug sa paghulat sa kahayag ug himaya sa pag-abut niini (DBY, 443).

Nagpaabut kita sa adlaw nga ang Ginoo moandam alang sa pagtukod sa Bag-ong Jerusalem, agig pagpangandam sa Siyudad ni Enoch nga pagahiusahon uban niini sa higayon nga matukod na kini dinhi niini nga yuta [tanawa sa Moises 7:62–64]. Nagpaabut kita nga magmaya nianang adlawa, natulog man kita diha sa kamatayon sa wala pa kana, o dili. Kita nagpaabut, uban sa tanang pagpanagana ug pagsalig nga ang mga anak makaangkon diha sa usa ka ginikanan, nga kita maanaa didto kon si Jesus moabut; ug kon wala kita didto, moabut kita uban niya: sa bisan unsa nga paagi kita maanaa didto kon siya moabut (DBY, 120).

Ang katuyoan sa pagtukod sa Zion mao ang pagbalaan sa mga anak sa Dios pinaagi sa mga ordinansa sa kaluwasan.

Kita gipundok … alang sa pihong katuyoan sa paglimpyo sa atong mga kaugalingon, nga kita mahimong mga bato nga sinapsapan diha sa templo sa Dios. Ania kita dinhi alang sa katuyoan sa pagtukod sa Gingharian sa Dios dinhi sa yuta. Aron mahimong andam alang niini nga buhat gikinahanglan ang pagpundok kanato gikan sa mga nasyon ug mga nasud sa kalibutan [aron modawat] sa mga ordinansa sa balaang Priesthood sa Anak sa Dios, nga gikinahanglan alang sa kahingpitan sa mga Santos agig pagpangandam sa iyang pag-abut (DBY, 121).

Ang ordinansa sa pagbugkos kinahanglang mapahigayon dinhi [anak nga lalaki] ngadto sa [amahan], ug babaye ngadto sa lalaki, ug mga anak ngadto sa mga ginikanan, ubp., hangtud nga ang sumpay sa henerasyon mahimong hingpit diha sa mga ordinansa sa pagbugkos balik ngadto kang Amahang Adan; mao nga, kita gimandoan sa pagpundok sa atong mga kaugalingon nga, aron mogawas gikan sa Babelon [tan-awa sa D&P 133:5, 7, 14], ug sa pagbalaan sa atong mga kaugalingon, ug sa pagtukod sa Zion sa atong Dios, pinaagi sa pagtukod og mga siyudad ug mga templo, pag-ugmad sa mga nasud gikan sa kahimtang niini nga kamingawan, hangtud nga ang yuta mabalaan ug maandam nga kapuy-an sa Dios ug sa mga anghel (DBY, 407).

Ang Ginoo miandam og mga paagi alang sa mga Santos sa pagtukod sa Zion.

Nakaamgo ba kita nga kon kita gustong makapahiluna og usa ka Zion sa karon o sa kahangturan kinahanglan kitang mohimo niini alang sa atong mga kaugalingon? Nga ang tanan, kinsa adunay Zion diha sa kahangturan sa mga Dios, mitukod, mihimo, milig-on, ug mihingpit niini sa ilang kaugalingon, ug agig sangputanan mahimong takus nga makapahimulos niini? (DBY, 118).

Kon kita nakahukom sa paghimo og Zion ato kining himoon, ug kini nga buhat nagsugod diha sa kasingkasing sa matag tawo. Kon ang amahan sa usa ka pamilya nangandoy sa paghimo og Zion diha sa iyang kaugalingong balay, kinahanglan siyang mangulo niining maayo nga buhat, nga imposible nga iyang mahimo gawas kon siya mismo nakaangkon sa espiritu sa Zion. Sa dili pa siya makahimo sa buhat sa pagbalaan diha sa iyang pamilya, kinahanglan niyang balaanon ang iyang kaugalingon, ug pinaagi niini ang Dios motabang kaniya sa pagbalaan sa iyang pamilya (DBY, 118).

Ang Ginoo nakahimo na sa iyang bahin sa buhat; iya kitang gilibutan sa mga elemento nga naglangkob sa trigo, karne, lino, delana, sida, prutas, ug sa tanan nga magamit sa pagtukod, pagpanindot ug paghimaya sa Zion sa katapusang mga adlaw, ug mao kini ang atong tuyo sa pagpahiangay niini nga mga elemento ngari sa atong mga gusto ug mga panginahanglan, sumala sa kahibalo nga ato karong naangkon ug sa kaalam nga atong mabatunan gikan sa kalangitan pinaagi sa atong pagkamatinud-anon. Niining paagiha ang Ginoo mopabalik pag-usab sa Zion dinhi sa yuta, ug walay lain pang paagi (DBY, 294).

Walay bisan usa ka butang nga kulang diha sa tanang mga buhat sa mga kamot sa Dios sa paghimo og Zion dinhi sa yuta kon ang mga tawo nakahukom sa paghimo niini. Makahimo kita og Zion sa Dios dinhi sa yuta kon kita buot, diha sa samang baruganan nga kita makahimo sa pagpatubo og usa ka umahan sa trigo, o makatukod og balay ug magpuyo niini. Walay panahon sukad nga ang kagamitan wala dinhi diin naggikan ang pagpamunga og mais, trigo, ubp., ug pinaagi sa makiangayong pagdumala ug paghan-ay niining kanunay nga kagamitan ang Zion sa Dios kanunay nga matukod dinhi sa yuta (DBY, 118).

Ang pagtukod sa Zion nagkinahanglan og sakripisyo ug dakong paningkamot.

Buot namo nga ang tanang mga Santos sa Ulahing mga Adlaw makasabut kon unsaon sa pagtukod og Zion. Ang Siyudad sa Zion, sa katahum ug kaanindot, molabaw pa sa bisan unsang butang nga nailhan karon dinhi sa yuta. Ang tunglo pagakuhaon gikan sa yuta ug ang sala ug pagkamalimbungon pagatangtangon gikan sa nawong niini. Kinsa ang mohimo niining mahinungdanong buhat? Ang Ginoo modani ba sa mga tawo nga siya motubos sa sentro sa Stake sa Zion, mopanindot niini ug dayon mobutang kanila didto nga walay kahago diha sa ilang bahin? Dili. Siya dili moanhi dinhi aron sa pagtukod og Templo, Tabernakulo, Dangpanan, o sa pagpatubo og mga kahoy nga mamunga og prutas, mohimo og mga mga tapis nga mga dahon sa igos o mga kupo gikan sa panit sa hayop, o magbuhat diha sa tumbaga ug puthaw, kay nasayud na kita kon unsaon sa pagbuhat niini nga mga butang. … Kinahanglan kitang motukod sa Zion, kon atong buhaton ang atong katungdanan (DBY, 120).

Nakakita ako og mga lalaki ug mga babaye dinhi niini nga kongregasyon––pipila lamang kanila––kinsa gipalayas gikan sa sentro nga Stake sa Zion [sa Jackson County, Missouri; tan-awa sa D&P 57:2–3]. Pangutan-a sila kon sila aduna bay bisan unsa nga kasubo o kalisdanan; dayon patan-awa sila sa matahum nga yuta nga ihatag unta sa Ginoo kon ang tanan nagmatinud-anon sa pagtuman sa iyang mga sugo, ug naglakaw diha sa iyang atubangan sama sa kinahanglan nilang buhaton; ug dayon pangutan-a sila kalabut sa mga panalangin nga ila untang madawat. Kon sila mosulti kaninyo sa mga sentimento sa ilang mga hunahuna, sila mosulti kaninyo nga ang yugo ni Jesus sayon unta ug ang iyang gipas-an gaan unta, ug nga nindot unta kadto nga buluhaton nga maglakaw diha sa pagkamasulundon sa iyang mga sugo ug mahimong usa sa kasingkasing ug usa sa hunahuna; apan pinaagi sa kahakog sa uban, nga mao ang pagsimba og dios-dios, pinaagi sa ilang pagkamasinahon, nga sama ra, ug sa maibugon nga tinguha sa ilang mga hunahuna, sila gipapahawa ug gipalayas gikan sa ilang mga panimalay (DBY, 113–14).

Atong bansayon ang atong mga hunahuna hangtud nga kita magmaya sa unsay maayo, maanindot ug balaan, padayong magtinguha nianang salabutan nga mohimo natong epektibong makatukod sa Zion, nga naglangkob sa pagtukod og mga balay, mga tabernakulo, mga templo, mga dalan, ug matag kahamugaway ug panginahanglan sa pagpaanyag ug pagpanindot, magtinguha sa pagbuhat sa kabubut-on sa Ginoo sa tanang mga adlaw sa atong mga kinabuhi, magpalambo sa atong mga hunahuna sa tanang siyentipikanhon ug mekanikal nga kahibalo, makugihong magtinguha sa pagsabut sa mahinungdanong katuyoan ug plano sa tanang gilalang nga mga butang, nga kita mahimong masayud kon unsay buhaton sa atong mga kinabuhi ug unsaon sa pagpalambo sa mga pasilidad nga atong makab-ot (DBY, 247).

Mianhi kita dinhi aron sa pagtukod sa Zion. Unsaon man nato kini sa paghimo? … Kinahanglan kitang magkahiusa diha sa atong mga paningkamot. Kinahanglan kitang moadto sa trabaho uban sa hiniusang pagtuo sama sa kasingkasing sa usa ka tawo; ug bisan unsa ang atong buhaton kinahanglang ipahigayon diha sa pangalan sa Ginoo, ug dayon kita mapanalanginan ug mouswag sa tanan natong buhaton. Kita adunay buhat nga himoonon kansang kabug-aton lisud nga masulti (DBY, 284).

Daghang mga Santos sa Ulahing mga Adlaw ang naghunahuna nga kon sila nakatuman sa Ebanghelyo, nakahimo og sakripisyo sa pagbiya sa ilang mga panimalay, tingali sa ilang mga ginikanan, mga bana, mga asawa, mga anak, mga umahan, mga yutang natawhan, o uban pang mga butang nga ilang giisip nga bililhon, nga ang buhat human na; apan bag-o pa lamang kining nagsugod. Ang buhat sa paglimpyo sa atong mga kaugalingon ug pag-andam sa pagtukod sa Zion sa Dios … mao pa lamang ang pagsugod diha kanato kon kutob pa lamang niana ang atong nabuhat (DBY, 444).

Ang tanan nga may kalabutan sa pagtukod sa Zion nagkinahanglan og tinuod, grabe kaayo nga paghago. Walay bili ang paghisgot kabahin sa pagtukod og bisan unsa nga gingharian gawas kon pinaagi kini sa paghago; nagkinahanglan kini sa paghago sa matag bahin sa atong organisasyon, mental, pisikal, o espiritwal man kini, ug mao kana ang bugtong paagi sa pagtukod sa Gingharian sa Dios (DBY, 291).

Kon kita magtukod sa Gingharian sa Dios, o magpahimutang sa Zion dinhi sa yuta, kinahanglan kitang maghago gamit ang atong mga kamot, magplano gamit ang atong mga hunahuna, ug mangita og mga paagi ug mga pamaagi nga matuman kanang butanga (DBY, 291).

Anaa kanunay sa akong panan-aw ang Zion. Dili kita maghulat sa mga anghel, o ni Enoch ug sa iyang mga kaubanan nga moanhi ug magtukod sa Zion, kita ang motukod niini. Kita ang mopatubo sa atong trigo, motukod sa atong mga balay, mokural sa atong mga umahan, motanum sa atong mga umahan ug prutasan, ug mohimo sa tanan nga makapahimo sa atong mga lawas nga komportable ug malipayon, ug niining paagiha kita nagtinguha sa pagtukod sa Zion dinhi sa yuta ug sa paglimpyo niini ug sa paghinlo niini sa tanang mga mahugaw. Himoa nga adunay usa ka balaan nga impluwensya nga mogiya kanato sa tanang mga butang nga kita adunay gahum; ibabaw sa yuta nga atong gitikad, ibabaw sa mga balay nga atong gitukod, ug ibabaw sa tanan nga atong gipanag-iya; ug kon kita mohunong sa pagpakigdait nianang unsay dautan ug magpahimutang sa Zion sa Dios diha sa atong mga kasingkasing, diha sa atong kaugalingong mga balay, diha sa atong mga siyudad, ug sa tibuok natong nasud, kita sa katapusan makabuntog sa yuta, kay kita ang mga ginoo sa yuta; ug, kaysa mga tunok ug mga sampinit, matag mapuslanong tanum nga maayo alang sa pagkaon sa tawo ug sa pagpanindot ug sa pagdayan-dayan magagikan sa sabakan niini (DBY, 443–44).

Ang Ginoo mipanalangin kanako; kanunay siya nga mipanalangin kanako; gikan sa panahon nga ako nagsugod sa pagtukod sa Zion, ako hilabihan gayud nga napanalanginan. Makasaysay ako sa mga kahimtang kabahin sa talagsaon kaayo nga kinaiya kalabut sa mga kaalam sa Dios ngari kanako, nga ang akong mga kaigsoonan moingon diha sa ilang mga kasingkasing, “Maglisud ako sa pagtuo niini” (DBY, 452).

Ang akong espirituhanong kalipay kinahanglang makab-ot sa akong kaugalingong kinabuhi, gani kini modugang og dako nga kaharuhay sa komunidad, ug ngadto sa akong kalipay, ingon nga usa kanila, kon ang matag lalaki ug babaye mosunod sa ilang relihiyon, ug makatagamtam sa kahayag ug himaya sa Ebanghelyo alang sa ilang mga kaugalingon, mahimong mauyunon, mapainubsanon ug matinud-anon; padayong magmaya sa atubangan sa Ginoo, mobuhat sa katuyoan nga sila gitawag sa pagbuhat, ug maniguro nga dili gayud mohimo og bisan unsa nga sayop (DBY, 119).

Ang tanan dayon mahimong kalinaw, hingpit nga kalipay, ug kahilum, diha sa atong kadalanan ug diha sa atong kabalayan. Ang pagkinihaay mohunong, wala nay kalisdanan sa atubangan sa High Council ug mga Korte sa mga Bishop, ug ang mga korte, kagubot, ug panagbingkil mawala na (DBY, 119).

Dayon makabaton kita og Zion, kay ang tanan mahimong putli og kasingkasing (DBY, 119).

Ang akong kasingkasing gipahiluna ko diha sa pagbuhat sa kabubut-on sa Dios, sa pagtukod sa iyang Gingharian dinhi sa yuta, sa pagpahimutang sa Zion ug sa mga balaod niini, ug sa pagluwas sa mga tawo; ug ako makasulti, sa tinud-anay ug matinuorong paagi, nga ang paghunahuna wala gayud moabut sa akong hunahuna, sa tanan nakong mga paghago, kon unsa man ang akong mahimong ganti, o kon ang akong korona dako ba o gamay, o kon aduna ba gayud kahay korona, usa ka gamay nga kabtangan, usa ka dakong kabtangan, o walay kabtangan. Ako wala gayuy bisan unsa nga paghunahuna o mga pamalandong kabahin niini, o nagtagad kalabut niini. Ang tanang anaa sa akong hunahuna mao nga kadto akong katungdanan sa pagbuhat sa kabubut-on sa Dios, ug sa paghago sa pagtukod sa iyang Gingharian dinhi sa yuta … tungod kay ang mga baruganan nga gipadayag sa Dios alang sa kaluwasan sa mga lumulupyo sa yuta putli, balaan ug mahimaya ang ilang kinaiyahan. Diha kanila ang dungog ug mahangturong pagtubo, sila naggiya gikan sa kahayag ngadto sa laing kahayag, kaligon ngadto sa laing kalig-on, himaya ngadto sa laing himaya, kahibalo ngadto sa laing kahibalo, ug gahum ngadto sa laing gahum (DBY, 452).

Mga Sugyot alang sa Pagtuon

Ang Zion mao ang putli og kasingkasing.

Giunsa paghatag og kahulugan ni Presidente Young ang Zion? (Tan-awa usab sa D&P 97:21.)
Kinsa man ang may katungod nga mga lumulupyo sa Zion, ug asa man makit-an ang Zion? (Tan-awa usab sa Salmo 102:16; 4 Nephi 1:15–17; D&P 109:39.)

Ang katuyoan sa atong kinabuhi kinahanglan mao ang pagbalaan sa atong mga kaugalingon ug pagtukod sa Zion sa atong Dios.

Si Presidente Young nagtudlo, “Ang katuyoan sa atong kinabuhi kinahanglan nga mao ang pagtukod sa Zion sa atong Dios.” Isip usa ka Simbahan, unsa ang angayan natong buhaton aron sa pagtukod og Zion? Unsaon ninyo isip indibidwal sa pagtabang niini nga buhat?
Unsa man ang “sumbanan ug kahusayan” nga gigamit ni Enoch sa pagtukod ug paghingpit sa karaang Zion? (Tan-awa usab sa Moises 7:10–11, 17–21.) Unsaon man nato sa pagsunod nianang sama nga sumbanan diha sa atong mga pamilya ug mga ward o mga branch karon?
Unsaon man sa mga pamilya sa pagmugna og Zion diha sa ilang kaugalingong mga panimalay?

Ang katuyoan sa pagtukod sa Zion mao ang pagbalaan sa mga anak sa Dios pinaagi sa mga ordinansa sa kaluwasan.

Unsaon nato sa pagbalaan sa atong mga kaugalingon ug sa atong mga pamilya?
Ngano nga kita “gimandoan sa pagpundok sa atong mga kaugalingon, aron mogawas sa Babelon” ngadto paingon sa Zion? (Tan-awa usab sa D&P 44:4–6; 133:14.) Unsa ang espirituhanong Babelon ug unsaon man nato sa paggawas niini?
Unsa ang relasyon tali sa pagtukod og Zion ug sa mga ordinansa sa balaang priesthood?

Ang Ginoo miandam og mga paagi alang sa mga Santos sa pagtukod sa Zion.

Unsa ang giandam sa Ginoo alang kanato aron kita makatampo sa pagpahimutang og Zion?
Ang Zion nagsugod diha “sa kasingkasing sa matag tawo.” Unsa nga mga gasa o mga talento nga kamo anaa nga makatabang kaninyo sa pagtukod og Zion?

Ang pagtukod sa Zion nagkinahanglan og sakripisyo ug dakong paningkamot.

Sa unang mga adlaw sa Simbahan, ang nahimutangan sa sentro sa stake sa Zion gipadayag (tan-awa usab sa D&P 57:2–3). Sumala ni Presidente Young, unsa man ang nakapugong sa mga Santos sa pagsulod ngadto sa ilang yutang kabilin ug sa pagpahimutang sa Zion nianang panahona?
Unsaon sa Ginoo pagpahinabo sa pagpahimutang sa Zion? (Tan-awa usab sa D&P 105:5–6.)
Nganong importante nga atong “bansayon ang atong mga hunahuna” samtang naningkamot kita sa pagtukod sa Zion?
Si Presidente Young nagtudlo nga sa pagtukod sa Zion kinahanglan kitang maghiusa diha sa atong mga paningkamot. Unsaon nato sa pagkab-ot niini nga panaghiusa diha sa atong mga pamilya, mga korum, ug mga ward o mga branch?
Ngano nga ang Ginoo nagkinahanglan og “tinuod, grabe kaayo nga paghago” gikan kanato sa pagpahimutang sa Zion?
Si Presidente Young namahayag, “Ang Ginoo mipanalangin kanako; … gikan sa panahon nga ako nagsugod sa pagtukod sa Zion, ako hilabihan gayud nga napanalanginan.” Unsa nga mga panalangin ang giandam alang niadtong kinsa nagtuman sa ilang mga pakigsaad sa pagpahimutang sa Zion? (Tan-awa usab sa Isaias 51:11.)