Ang Priesthood

Si Presidente Brigham Young gi-ordinahan isip usa sa orihinal nga Napulog Duha ka mga Apostoles niini nga dispensasyon. Isip bahin sa panalangin nga gihatag ngadto kaniya sa iyang ordinasyon, gisultihan siya nga “ang Balaang Priesthood [gi] tugyan ngadto kaniya, aron nga mahimo siyang mobuhat og mga katingalahan pinaagi sa pangalan ni Jesus; nga mahimo siyang mohingilin sa mga yawa, moayo sa masakiton, mobuhi sa patay, mohimo sa buta nga makadawat sa ilang panan-aw, moadto sa lugar ngadto sa laing lugar ug motabok sa dagat ngadto sa laing dagat” (HC, 2:188–89). Namahayag siya nga ang priesthood nga gihatag ngadto kaniya usa ka “hingpit nga sistema sa pagdumala, kabahin sa mga balaod ug mga ordinansa,” nga, “kon nasabtan sa husto,” mohatag og gahum sa matarung nga sila “sa tinuod mahimong makaabli sa panudlanan sa Ginoo” (DBY, 130, 131).

Mga Pagtulun-an ni Brigham Young

Ang Ginoo midumala sa Iyang buhat didto sa langit ug dinhi sa yuta pinaagi sa priesthood.

Kon adunay tawo nga gustong masayud kon unsa ang Priesthood sa Anak sa Dios, mao kini ang balaod diin ang mga kalibutan nahimo karon, nahimo kaniadto, ug mopadayon hangtud sa kahangturan. Mao kana ang sistema nga nagdala sa mga kalibutan ngadto sa pagkabutang niini ug nagbutang og mga tawo niini, mihatag niini sa ilang mga paglibut––sa ilang mga adlaw, mga semana, mga bulan, mga tuig, sa ilang mga panahon ug mga oras ug pinaagi niini sila nalukot ingon sa usa ka papel, sama sa nahitabo kaniadto, ug moadto sa usa ka mas taas nga kahimtang sa pagkabutang (DBY, 130).

Ang Priesthood sa Anak sa Dios, nga anaa taliwala kanato, usa ka hingpit nga han-ay ug sistema sa pamunoan, ug kini lamang ang makaluwas sa tawhanong pamilya gikan sa tanang mga kadautan nga misakit karon sa mga sakop niini, ug makasiguro kanila og kalipay ug kabulahan human dinhi (DBY, 130).

Kini nga Priesthood dinhi na sa yuta sa nagkalainlaing mga panahon. Si Adan aduna niini, si Seth aduna niini, si Enoch aduna niini, si Noe aduna niini, sila si Abraham ug Lot aduna niini, ug gipasa kini ngadto sa kapanahonan sa mga Propeta, dugay na human sa kapanahonan sa karaang mga tawo. Kini nga Labaw nga Priesthood nagmando, naggiya, nagdumala, ug nagdumala sa tanang mga Priesthood, tungod kay mao kini ang pinakalabaw sa tanan (DBY, 131).

Kon maghisgot kita kabahin sa celestial nga balaod nga gipadayag gikan sa langit, nga mao, ang Priesthood, naghisgot kita mahitungod sa baruganan sa kaluwasan, usa ka hingpit nga sistema sa pamunoan, kabahin sa mga balaod ug mga ordinansa, diin kita mahimong maandam sa pag-agi sa usa ka ganghaan ngadto sa lain, ug sa usa ka gwardiya ngadto sa lain, hangtud nga makaadto kita sa presensya sa atong Amahan ug Dios (DBY, 130).

Dili kini tungod sa pagtawag kanako nga usa ka Quaker, usa ka Methodist o usa ka “Mormon” nga mao ang tinuod nga hinungdan sa panagbingkil tali niining duha ka dagkong mga gahum––Kristo ug Bilyal [ang dautan]; apan kini tungod sa kamatuoran nga ang Dios mitukod sa iyang Gingharian dinhi sa yuta ug mipahiuli sa balaang Priesthood nga naghatag sa mga kalalakin-an og katungod ug gahum sa pagpangalagad diha sa iyang pangalan (DBY, 76).

Ang Ebanghelyo midala ngari kanato sa Balaang Priesthood, nga gipahiuli pag-usab ngadto sa mga katawhan. Ang mga yawe niana nga Priesthood ania dinhi; aduna kita niini kanato; mahimo kitang motangtang, ug mahimo kitang mosilyo. Makaangkon kita og kaluwasan, ug makahimo kita sa pagpangalagad niini (DBY, 130–31).

Kon kamo natagbaw, diha sa inyong sensitibo nga mga gahum ug mga galamhan, nga ang Dios mipadayag sa balaang Priesthood, mitukod sa iyang Gingharian dinhi sa yuta, mipahiuli sa kahingpitan sa Ebanghelyo, ug mipahimutang sa iyang kamot aron sa pagpundok sa Balay ni Israel, motubag kini sa inyong katuyoan sama usab nga kamo miadto sa langit aron makita ninyo mismo sa inyong mga kaugalingon (DBY, 429).

Kini nga balaod dili kanunay nga ania dinhi sa yuta; ug sa pagkawala niini, ang ubang mga balaod mao ang gihatag ngadto sa mga katawhan alang sa ilang pag-uswag, alang sa ilang edukasyon, alang sa ilang pamunoan, ug pagsulay kanila kon unsay ilang buhaton kon sila ang magdumala sa ilang mga kaugalingon; ug unsay ato karong gitawag nga tradisyon ang mitubo gikan niini nga mga kahimtang (DBY, 130).

Walay buhat sa usa ka Santos sa Ulahing mga Adlaw––walay katungdanan nga gikinahanglan––walay panahon nga gihatag, nga eksklusibo ug independente sa Priesthood. Ang tanan ubos niini, sa pagsangyaw, negosyo, o bisan unsang buhat nga may kalabutan sa husto nga pagpatunhay niini nga kinabuhi (DBY, 133).

Ang Ginoo nga Labawng Makagagahum dili motugot sa iyang Priesthood nga mapapahawa pag-usab gikan sa yuta (DBY, 131).

Kon ang matinud-anon nga mga Elder, nga naghupot niini nga Priesthood, moadto sa kalibutan sa mga espiritu ilang dad-on uban kanila ang samang gahum ug Priesthood nga anaa kanila samtang dinhi pa sa mortal nga lawas (DBY, 132).

Daghan na ang gipamulong kabahin sa gahum sa mga Santos sa Ulahing mga Adlaw. Ang mga tawo ba nga gitawag og mga Santos sa Ulahing mga Adlaw ang aduna niini nga gahum, o ang Priesthood? Ang Priesthood; ug kon sila magpakabuhi sumala ngadto niana nga Priesthood, makasugod sila sa ilang buhat dinhi ug makaangkon og daghang mga kadaugan, ug mahimong andam nga modawat sa himaya, pagka-imortal, ug kinabuhing dayon, nga kon moadto sila sa kalibutan sa mga espiritu, ang ilang buhat mas molabaw pa kay ni bisan kinsang tawo o nilalang nga wala mapanalangini sa mga yawe sa Priesthood dinhi (DBY, 131–32).

Ang mga yawe sa priesthood “makaabli sa panudlanan sa Ginoo.”

Ang Priesthood gihatag ngadto sa mga tawo ug ang mga yawe niini, ug, kon masabtan og maayo, sila sa tinuod makaabli sa panudlanan sa Ginoo, ug makadawat ngadto sa ilang labing hingpit nga katagbawan. Apan tungod sa atong kaugalingon nga mga kahuyang, tungod sa kaluya sa tawhanong kinaiyahan, dili kita makahimo sa ingon (DBY, 131).

Ila ba kining nawagtang sa dihang ilang gikutlo ang kinabuhi ni Joseph? Wala. Ang “Mormonismo” ania dinhi, ang Priesthood ania dinhi, ang mga yawe sa Gingharian ania dinhi sa yuta; ug sa pagpanaw ni Joseph, wala kini mouban. Ug kon ang dautan molampus sa pagkutlo sa akong kinabuhi, ang mga yawe sa Gingharian magpabilin diha sa Simbahan (DBY, 134).

Ang mga ordinansa sa balay sa Dios maoy alang sa kaluwasan sa tawhanong pamilya. Kita lamang ang bugtong mga binuhat dinhi sa yuta sa karong panahona, nga atong nahibaloan, kinsa naghupot sa mga yawe sa kaluwasan nga gisalig ngadto sa mga katawhan gikan sa kalangitan sa Ginoong Labaw nga Makagagahum; ug kay anaa man kadtong kinsa naghupot niini nga mga yawe, importante nga kini kinahanglang gamiton alang sa kaluwasan sa tawhanong pamilya. Ang pagtukod og mga templo, mga dapit diin ang mga ordinansa sa kaluwasan gipangalagad, gikinahanglan aron sa pagpahinabo sa plano sa katubsanan, ug usa kini ka mahimayaong hilisgutan nga angayang ipamulong ngadto sa mga Santos (DBY, 396–97).

Nagsulti kami sa kamatuoran ug wala mamakak, bisan kinsa nga nagtuo nga si Joseph Smith, Junior, usa ka Propeta nga gipadala sa Dios, ug giordinahan niya nga makadawat ug maghupot sa mga yawe sa balaang Priesthood, nga sunod sa kapunongan sa Anak sa Dios, ug gahum sa pagtukod sa Gingharian sa Dios dinhi sa yuta, aron sa pagpundok sa Balay ni Israel, sa paggiya sa tanan kinsa nagtuo ug nagtuman ngadto sa katubsanan, sa pagpahiuli nianang nawala tungod sa kalapasan––bisan kinsa nga nagtuo niini, nagtuo sa Ginoo, ug nagtuman sa iyang mga sugo ngadto sa katapusan sa ilang mga kinabuhi, ang ilang mga pangalan dili pagatangtangon gikan sa basahon sa kinabuhi sa Kordero, ug makadawat sila og mga korona sa himaya, pagka-imortal, ug kinabuhing dayon (DBY, 5).

Ang pagdawat ug paggamit sa gahum sa priesthood nagkinahanglan og personal nga pagkamatarung.

Ang indibidwal kinsa adunay Priesthood, ug nagpadayon nga matinudanon sa iyang calling, kinsa nagmaya sa iyang kaugalingon sa kanunay nga pagbuhat sa mga butang sa Dios nga gikinahanglan sa iyang mga kamot, ug nagpadayon sa tibuok kinabuhi diha sa pagpahigayon sa matag katungdanan mosiguro nganha sa iyang kaugalingon dili lamang sa pribilehiyo sa pagdawat, apan sa kahibalo kon unsaon sa pagdawat sa mga butang sa Dios, nga aron padayon siyang masayud sa hunahuna sa Dios; ug makahimo siya sa pag-ila tali sa maayo ug sayop, tali sa mga butang sa Dios ug sa mga butang nga dili iya sa Dios. Ug ang Priesthood––ang Espiritu nga anaa sulod kaniya, magpadayon sa pagtubo hangtud nga mahimo kining sama sa usa ka tinubdan sa buhi nga tubig; hangtud nga mahimo kining sama sa kahoy sa kinabuhi; hangtud nga usa na kini ka nagpadayon nga tinubdan sa salabutan ug panudlo ngadto niana nga indibidwal (DBY, 132).

Ang mga kalalakin-an kinsa mga tigdala sa balaang Priesthood, kinsa gisaligan sa mga pulong sa kinabuhing dayon ngadto sa kalibutan, kinahanglang padayon nga maningkamot diha sa ilang mga pulong ug mga lihok ug sa inadlaw-adlaw nga kinaiya sa pagbuhat og dakong pasidungog sa ilang calling ug katungdanan isip mga ministro ug mga representante sa Labing Makagagahum (DBY, 130).

Kon ang balaang Priesthood anaa sa yuta, ug ang kahingpitan sa Gingharian sa Dios moabut ngadto sa mga tawo, nagkinahanglan kini og higpit nga pagkamasulundon sa matag punto sa balaod ug doktrina ug sa matag ordinansa nga gipadayag sa Ginoo (DBY, 132).

Kon ang inyong pagtuo nakapunting diha sa husto nga butang, ang inyong pagsalig dili matarug, ang inyong mga kinabuhi putli ug balaan, ang matag usa nagtuman sa mga katungdanan sa iyang calling sumala sa Priesthood ug sa kapasidad nga gihatag nganha kaninyo, mapuno kamo sa Espiritu Santo, ug kini mahimong ingon ka imposible alang sa bisan kinsa nga tawo nga molingla ug modala kaninyo sa kadautan sama sa usa ka balhibo nga nagpabilin nga wala masunog diha sa taliwala sa hilabihan nga kainit (DBY, 132).

Hangtud nga ang usa ka hakog, kinaugalingon nga tinguha mahanaw gikan sa atong mga hunahuna, ug mahimo kitang matinguhaon sa kaayohan sa tanan, dili gayud kita makahimo sa pagpalambo sa atong balaang Priesthood ingon nga kita kinahanglang mohimo (DBY, 133).

Ang balaang priesthood nagdala og sagradong mga panalangin ngadto sa mga indibidwal ug mga pamilya.

Kini nga Priesthood gipahiuli na usab, ug pinaagi sa katungod niini mahimo kitang masumpay ngadto sa atong mga katigulangan, pinaagi sa ordinansa sa pagbugkos, hangtud nga makahimo kita og hingpit nga pagkasumpay gikan ni Amahang Adan ngadto na sa katapusang panahon sa yuta [tan-awa sa D&P 128:18] (DBY, 400). Nangamuyo ako sa mga Elder sa Israel matag adlaw, kon ako adunay kahigayunan, sa pagsunod sa ilang relihiyon––sa pagpakabuhi sa ingon nga ang Espiritu Santo mahimo nilang kanunay nga kauban; ug dayon mahimo silang sarang nga mahimo nga mga maghuhukom sa Israel, sa pagpangulo isip mga Bishop, tigdumala nga mga Elder, ug mga High Councilor, ug isip mga kalalakin-an sa Dios, sa pagdala sa ilang mga pamilya ug mga higala sa mabinationg paagi ug sa pagdala kanila diha sa dalan sa kamatuoran ug hiyas, ug sa katapusan ngadto sa Gingharian sa Dios (DBY, 136–37).

Mga Sugyot alang sa Pagtuon

Ang Ginoo midumala sa Iyang buhat didto sa langit ug dinhi sa yuta pinaagi sa priesthood.

Sumala ni Presidente Young, unsa ang priesthood? (Tan-awa usab sa D&P 84:17–22.)
Sa unsang paagi nga ang tanan nga atong gibuhat “nga may kalabutan sa husto nga pagpatunhay niini nga kinabuhi” mahimong ubos sa priesthood? Sa unsang paagi kini makaapekto sa inyong mga lihok diha sa panimalay, sa simbahan, sa eskwelahan, ug sa trabahoan?
Unsa ang tugutan sa priesthood nga buhaton sa matinud-anong mga elder didto sa kalibutan sa mga espiritu?
Unsaon nato, isip mga miyembro sa Simbahan, sa pagpakabuhi sumala sa mga baruganan ug kapunongan sa priesthood? (Tan-awa usab sa D&P 20:38–60.) Unsa man ang impluwensya sa priesthood diha sa inyong kinabuhi? Unsaon man ninyo nga ang impluwensya ug gahum sa priesthood mahimong mas epektibo diha sa inyong kinabuhi ug sa kinabuhi sa inyong pamilya?

Ang mga yawe sa priesthood “makaabli sa panudlanan sa Ginoo.”

Nganong ang mga yawe sa priesthood wala man mawala sa Simbahan tungod sa kamatayon ni Propeta Joseph Smith?
Sa unsang paagi nga ang mga yawe sa priesthood “makaabli sa panudlanan sa Ginoo” ug makadala og kaluwasan ngadto sa tawhanong pamilya?
Unsa ang gitudlo ni Presidente Young kabahin sa mga yawe sa priesthood? (Tan-awa usab sa D&P 107:18–20, 35; 132:7.) Unsa man ang gitugutan niadtong mga yawe nga buhaton sa mga sulugoon sa Ginoo?

Ang pagdawat ug paggamit sa gahum sa priesthood nagkinahanglan og personal nga pagkamatarung.

Sa unsang paagi nga ang personal nga kinabuhi sa naghupot sa priesthood makaimpluwensya sa iyang abilidad sa pagbuhat alang sa Ginoo? Nganong ang personal nga pagkamatarung importante man kaayo? (Tan-awa usab sa D&P 107:99–100; 121:41–46.)
Sa unsang paagi nga ang “mga kalalakin-an kinsa mga tigdala sa balaang Priesthood” makapasidungog sa ilang katungdanan ug calling? Unsa nga mga panalangin ang moabut sa mga miyembro kinsa nagtuman sa mga katungdanan sa ilang mga calling?
Sa unsang paagi nga ang pagkahakog ug ang gahum sa priesthood dili magkauyon? Nganong kinahanglan natong wagtangon ang pagkahakog kon kita mopalambo sa priesthood? (Tan-awa usab sa D&P 121:37.) Sa unsang mga paagi nga ang pagkahakog usa ka problema taliwala kanato karon? Unsaon nato sa pagbuntog ang pagkahakog?

Ang balaang priesthood nagdala og sagradong mga panalangin ngadto sa mga indibidwal ug mga pamilya.

Giunsa sa priesthood pagpanalangin ug paglig-on ang inyong pamilya? Nganong ang gahum sa priesthood importante kaayo sa pagmugna og mahangturong mga pamilya? (Tan-awa usab sa D&P 128:18; 131:1–4; 132:19.)
Unsa ang mahimong buhaton sa mga naghupot sa priesthood aron “sa pagdala sa ilang mga pamilya ug mga higala sa mabinationg paagi ug sa pagdala kanila diha sa dalan sa kamatuoran ug hiyas”?