Mga Pagtulon-an sa mga Presidente
Hugna 31: Pagdaginot, Kakugi, ug Pagpaningkamot sa Kaugalingon


Hugna 31

Pagdaginot, Kakugi, ug Pagpaningkamot sa Kaugalingon

Si Presidente Young nasayud sa bili sa pagpaningkamot sa pag-andam sa mga Santos sa pagtukod sa gingharian sa Dios. Iyang gitambagan ang mga pioneer, “Kay sa mangita kon unsay mabuhat sa Ginoo alang kanato, mangutana kita unsay atong mabuhat alang sa atong mga kaugalingon (DBY, 293). Si Presidente Heber C. Kimball, higala ug Magtatambag sa Unang Kapangulohan ni Presidente Young, nagtrabaho sa daghang mga adlaw sa kaumahan uban kaniya ug unya nahinumdom nianang panahona sama sa mosunod: “Si [Brother] Brigham ug ako motrabaho pag-ayo, magtinabangay, alang sa singkwenta sentabos nga dolyar ug nag-abang kami og balay ug mopalit sa among kaugalingong pagkaon; mokita kami og sitentay singko sentabos sa usa ka adlaw kon motrabaho kami sa kumpayan; motrabaho kami gikan sa pagsidlak sa adlaw hangtud sa pagsalop sa adlaw, ug hangtud sa alas nwebe sa gabii kon adunay timailhan nga magulan. Among kahigon ug bugkuson human pamutla sa tig-ani ang 35 ka litro nga trigo sa usa ka adlaw, ug mamugha og kahoy, nga ang snow kutob sa among mga hawak alang sa diseotso sentabos ka dolyar nga matag 3.5 metro kubiko, ug modawat sa among suweldo sa sitentay singko sentabos nga dolyar sa matag 35 ka litro nga trigo” (DNW, 30 sa Hulyo 1862). Si Presidente Young mipasabut sa kaimportante sa pagdaginot, pagkugi, ug pagpaningkamot sa kaugalingon, nag-ingon: “Sila kinsa nga nakasiguro og kinabuhing dayon mga tigbuhat sa pulong ingon man mga tigpaminaw” (DBY, 290).

Mga Pagtulun-an ni Brigham Young

Kinahanglang maningkamot kita ug mogamit sa atong panahon sa maalamon nga pagserbisyo sa atong mga pamilya ug sa pagtukod sa gingharian sa Dios.

Unsay ania kanato? Ang atong panahon. Gamita kini sumala sa inyong kagustuhan. Ang panahon gihatag nganha kaninyo, ug kon kini gigahin sa labing maayong kaayohan sa pagpalambo sa kamatuoran dinhi sa yuta, kini gipasidungog ngari kanato, ug bulahan kamo; apan kon kita mogahin sa atong panahon sa katapulan ug sa kabuang kini alang sa atong kadautan (DBY, 290).

Kita kinahanglang mohatag og subay sa mga adlaw nga atong gigahin sa kabuang (DBY, 290).

Sa panahon nga gihatag sa tawo dinhi sa yuta walay angay nga mawala o mausik. Human sa angay nga pagpahulay ug paglingaw-lingaw kinahanglang walay usa ka adlaw, oras, o minuto nga atong igahin sa katapul, apan ang matag minuto sa matag adlaw sa atong mga kinabuhi kinahanglan kitang maningkamot sa pagpalambo sa atong mga hunahuna ug sa pagdugang sa hugot nga pagtuo diha sa balaan nga Ebanghelyo, sa gugma nga putli, pailub, ug maayong buhat, aron kita motubo sa kahibalo sa kamatuoran sumala sa gipamulong ug gipanagna ug gisulat (DBY, 290).

Ang pagkatapulan ug pag-usik-usik dili pinasubay sa mga lagda sa langit. Pagtipig kutob sa inyong mahimo, aron kamo makaangkon og kabuhong sa pagpanalangin sa inyong mga higala ug sa inyong mga kaaway (DBY, 290).

Ang tanan nga kalabut sa pagtukod sa Zion nagkinahanglan og tinuod, sobra nga paningkamot [tan-awa sa 2 Nephi 5:17]. Walay hinungdan ang paghisgot kabahin sa pagtukod og bisan unsa nga gingharian gawas sa pagtrabaho;, nagkinahanglan kini og pagtrabaho sa matag bahin sa atong organisasyon, sa mental, o sa espirituhanon, ug mao lamang kana ang bugtong paagi sa pagtukod sa Gingharian sa Dios (DBY, 291).

Dili ba ang pagtukod sa Gingharian sa Dios dinhi sa yuta usa ka temporal nga pagtrabaho sa tanang panahon? (DBY, 290–91).

Mao kini ang labing dako nga bahandi nga atong mapanag-iya—nga makahibalo unsaon sa pagdumala sa atong mga trabaho sa matarung, mopahimulos sa matag oras sa mapuslanong paagi alang sa kaayohan sa atong mga asawa ug mga anak ug mga silingan (DBY, 290).

Kinahanglang motrabaho kita ug mokuha sa bulawan gikan sa mga kabukiran nga ikabutang diha kon kita buot nga maglakaw sa kadalanan nga gisemento og bulawan. Ang mga anghel nga karon naglakaw sa ilang bulawanon nga mga kadalanan, ug adunay kahoy sa kinabuhi diha sa ilang paraiso, kinahanglang makaangkon niana nga bulawan ug ibutang kini diha. Kon kita adunay mga dalan nga gisemento og bulawan, kini ato untang ibutang sa atong mga kaugalingon. Kon kita mopahimulos diha sa Zion sa iyang katahum ug himaya, mahitabo kini kon kita ang nakatukod niini. Kon mopahimulos kita sa Zion nga karon atong gipaabut, kini human nato natubos ug naandam. Kon kita nagpuyo sa siyudad sa Bag-ong Jerusalem, kini tungod kay kita mipahimutang sa pundasyon ug mitukod niini. Kon kita isip mga indibidwal dili makahuman niana nga buhat, kita mipahimutang sa pundasyon alang sa atong mga anak ug sa mga anak sa atong mga anak, sama sa gibuhat ni Adan. Kon kita buot nga maluwas diha sa arka, sama ni Noe ug sa iyang pamilya, kini tungod kay kita mitukod niini. Kon ang Ebanghelyo gisangyaw ngadto sa mga kanasuran, kini tungod kay ang mga Elder sa Israel … misangyaw sa Ebanghelyo ngadto sa kinatumyang bahin sa yuta (DBY, 291).

Ang akong hugot nga pagtuo dili mogiya kanako sa paghunahuna nga ang Ginoo mohatag kanato og inasal nga mga baboy, pan nga gibutangan na og mantekilya, uban pa; mohatag siya kanato sa abilidad sa pagpananom og lugas, sa pagkuha sa mga prutas sa yuta, sa paghimo og kapuy-an, sa pagkuha og mga tabla aron himoong kahon, ug kon moabut na ang tingani, mohatag kanato og lugas, kini anaa kanato ang pagtipig niini—sa pagtigum sa trigo hangtud nga kita adunay usa, duha, lima, o pito ka tuig nga tagana nga magamit, hangtud adunay igong panginabuhian nga gitigum sa mga katawhan aron sa [pagsangkap] og pan [alang] sa ilang mga kaugalingon ug niadtong kinsa moanhi dinhi nangita alang sa kaluwasan (DBY, 291–92).

Ang Ginoo mihatag og kaabunda sa yuta alang sa atong paggamit.

Mosulti ako ngadto sa akong mga kaigsoonan, dali tun-an nato unsaon sa pagpundok sa naglibut kanato gikan sa mga elemento sa kaabunda sa matag kahamugaway sa kinabuhi, ug balhinon kini ngadto sa atong mga panginahanglan ug kalipay [tan-awa sa D&P 59:18–20]. Dili kita magpabilin nga walay kahibalo, uban sa walay kahibalo, apan atong ipakita sa ignorante unsaon nga magmaalamon (DBY, 294).

Ang Ginoo nakahimo na sa iyang bahin sa trabaho; gilibutan kita niya sa mga elemento nga adunay trigo, karne, lino [flax], delana, sida, prutas, ug sa tanan nga ikatukod, ikapanindot ug ikahimaya sa Zion sa katapusang mga adlaw, ug atong katungdanan sa paghulma niini nga mga elemento ngadto sa atong mga gusto ug mga panginahanglan, sumala sa kahibalo nga ania kanato karon ug sa kaalam nga atong naangkon gikan sa mga kalangitan pinaagi sa atong pagkamatinud-anon. Niining paagiha nga ang Ginoo modala pag-usab sa Zion dinhi sa yuta, ug sa wala nay laing paagi (DBY, 294).

Katungdanan nato kini ang pagkaaktibo ug pagkamakugihon sa pagbuhat sa tanan nga atong mahimo sa pagtabang sa atong mga kaugalingon, sa pagtukod sa Iyang Gingharian, sa pagpanalipod sa atong mga kaugalingon batok sa atong mga kaaway, sa pagpahimutang sa atong mga plano sa maalamong paagi, ug sa pagbuhat sa tanang paagi nga mahunahuna sa pagtukod sa Gingharian sa Dios dinhi sa yuta, ug sa pagbalaan ug pag-andam sa atong mga kaugalingon sa pagpuyo sa Iyang presensya (DBY, 294–95).

Samtang kita adunay tambok nga yuta niini nga walog, ug liso nga ikatanum, dili kinahanglan nga mohangyo kita sa Ginoo sa pagpakaon kanato, o sa pagsunod sunod kanato dala ang pan naghangyo kanato nga kan-on kini. Siya dili mohimo niini, ni ako, kon ako pa ang Ginoo. Atong mapakaon ang atong mga kaugalingon dinhi, ug kon kita mabutang sa kahimtang diin kita dili makahimo, kini panahon na alang sa Ginoo sa paghimo og milagro aron kita mabuhi (DBY, 294).

Ang mga tawo nagkasumpaki, nagkaaway, naningkamot sa pagpamintaha sa usag usa, ug unsaon nga makaangkon satanang bahandi nga ania sa kalibutan. … Apan pananglit kita motrabaho aron sa pagpundok sa tanan nga anaa sa ilawom ug diha sa ibabaw sa atong inahang yuta ug gamiton kini, aduna bay kulang? Wala, adunay igo alang sa tanan. Niana tan-awa kining mga butanga ingon nga sila mao, mga Santos sa Ulahing mga Adlaw, ug kamo nga dili mga Santos sa Ulahing mga Adlaw, nagtan-aw sa mga butang nga ingon nga sila mao. Ug ako naglaum ug nag-ampo alang kaninyo, nga dili mga miyembro, ug alang niadtong nagpatuo nga mga Santos sa Ulahing mga Adlaw, nga kita adunay maanindot nga kalinaw dinhi, aron kita makahimo sa atong hudno, makaabli sa atong kaugalingong minahan, makahimo sa atong mga agianan sa tren, makatikad sa yuta, makapahigayon sa atong negosyo nga walay paghunong; nga kita makaatiman sa pagpaanindot sa yuta (DBY, 295).

Kinahanglang magmaalamon kita sa paggamit sa mga kapanguhaan nga gihatag sa Ginoo kanato.

Ang katigayunan sa gingharian o sa nasud wala kaayo mag-apil sa kasagaran sa mga panalapi niini kay sa katambok sa yuta niini ug sa kakugi sa mga katawhan niini (DBY, 297).

Ang panahon ug ang abilidad sa pagtrabaho mao ang puhunan sa tibuok katawhan sa kalibutan, ug kitang tanan nakautang sa Dios alang sa abilidad sa paggamit sa panahon nga mapahimuslan ug siya maningil kanato sa higpit nga pagsubay sa paggamit nga atong gihimo niini nga abilidad; ug dili lamang siya maningil sa atong mga buhat, apan ang atong mga pulong ug mga hunahuna pagahukman usab (DBY, 301).

Ang tanang puhunan nga ania sa yuta mao ang kusog ug paghago sa mga nagtrabaho nga mga lalaki ug mga babaye. … Ang pagtrabaho maoy nakapatukod sa atong mga meetinghouse, mga templo, mga balay-hukmanan, maanindot nga mga balay-hawanan alang sa musika ug maanindot nga eskwelahan; ang pagtrabaho mao ang nagtudlo sa atong mga anak, ug nakapasinati nila sa lain-laing mga sanga sa edukasyon, nakapahanas kanila sa ilang kaugalingong pinulongan ug sa ubang mga pinulongan, ug sa matag sanga sa kahibalo nga nasabtan sa mga katawhan (DBY, 292).

Ayaw gayud tuguti ang bisan unsa nga mausik. Pagmapanagan-on, tiguma ang tanan, ug unsa pay dugang ninyong makuha sa pag-atiman sa inyong mga kaugalingon, tawga ang inyong mga silingan sa pagtabang kaninyo sa paghurot niini (DBY, 292).

Himoa ang mga butang sa kalinaw ug walay kabalaka, punita ang tanan, ayaw og pag-usik-usik (DBY, 292).

Ayaw gayud paghunahuna nga kamo adunay daghang pan kanunay nga motugot sa inyong mga anak nga mag-usik-usik sa panit o unod niini. Kon ang usa ka tawo adunay nagkantidad og minilyon ka mga litro sa trigo ug mais, dili siya kaayo datu igo sa … pagsilhig og usa ka grano niini ngadto sa kalayo; ipakaon kini sa bisan unsa ug ibalik pag-usab ngadto sa yuta, ug sa ingon motuman sa katuyoan diin kini motubo. Hinumdumi kini, ayaw gayud pag-usik-usik og bisan unsa, atimana ang tanan (DBY, 292).

Kaayohan nato kini ang pag-atiman sa mga panalangin nga gihatag sa Dios kanato; kon kita mopadayon sa sukwahi nga dalan, atong giputol ang gahum ug himaya nga giplano sa Dios nga atong mapanunod. Pinaagi kini sa atong kaugalingon nga pagkamabinantayon, pagdaginot, ug paghukom nga gihatag sa Dios kanato, nga kita nakatipig sa atong lugas, sa atong mga panon ug kahayupan, … mga kabalayan ug mga yuta, ug nakapadaghan kanila sa atong palibot, sa kanunay nakaangkon og gahum ug impluwensya alang sa atong mga kaugalingon isip mga indibidwal ug alang sa Gingharian sa Dios sa kinatibuk-an (DBY, 292).

Gamita ang igo lamang sa inyong mga kinitaan aron sa paghimo sa inyong mga lawas ug inyong mga pamilya nga malipayon ug hamugaway, ug tiguma ang nahibilin (DBY, 292).

Kon kamo gusto nga maadunahan, tiguma unsay inyong makuha. Ang buang makakwarta; apan nagkinahanglan og usa ka maalamon nga tawo sa pagtigum ug sa paggasto niini sa iyang kaugalingong kaayohan (DBY, 292).

Kinahanglan kita nga magtukod og maayong mga panimalay ug maghimo og maanindot nga mga komunidad.

Patukura ang mga tawo og maanindot nga mga balay, patamna og maayong mga ubasan ug prutasan, pahimoa og maanindot nga mga dalan, patukura og matahum nga mga siyudad diin makita ang talagsaon nga mga edipesyo alang sa kaharuhay sa publiko, maanindot nga mga kadalanan nga gilinyahan og kapasilongan nga mga kahoy, mga tuburan sa tubig, tin-aw nga nagdan-ag nga mga tubig, ug tanang kahoy, gagmay nga kahoy ug mga bulak nga motubo niini nga klima, aron sa paghimo sa atong panimalay sa bukid nga usa ka paraiso ug ang atong mga kasingkasing magpasalamat ngadto sa Dios ni Joseph, nagpahimulos niining tanan uban sa mapasalamaton nga mga kasingkasing, moingon sa kanunay, “dili ako apan ang imong kabubut-on ang matuman, O Amahan” (DBY, 302).

Panindota ang inyong mga tanaman, ang inyong mga balay, ang inyong mga uma, panindota ang siyudad. Kini makapalipay kanato, ug modaghan ang abut. Ang yuta usa ka maayong yuta, ang mga elemento maayo kon kita mogamit niini alang sa atong kaugalingong kaayohan, sa kamatuoran ug pagkamatarung. Dayon kinahanglang makontento kita, ug maningkamot gayud sa paghimo sa atong mga kaugalingon nga maayog lawas, adunahan, ug matahum, ug ipatunhay ang atong mga kaugalingon sa labing mahimo nga paagi, ug magpakabuhi kutob sa atong mahimo, ug mobuhat sa tanang maayo kutob sa atong mahimo (DBY, 302).

Ang matag kalamboan nga atong mahimo dili lamang makadugang sa atong kahayahay apan usab sa atong bahandi (DBY, 302).

Inyo ang katungod, mga asawa, sa paghangyo sa inyong mga bana sa pagbutang og matahum nga kapasilongan ug mga bungang kahoy, ug sa pagkuha og mga bagon ug mga bulak nga ikadayandayan sa gawas sa inyong pinuy-anan, ug kon ang inyong mga bana walay panahon, pangunayi kini sa pagkuha ug itanum kini. Ang uban, tingali, moingon, “O, wala akoy butang gawas sa usa lamang ka balay nga troso, ug kini walay bili.” Oo; kini adunay bili. Hugasi ug masilyahi, ug pakatayi og bagon ang pultahan, aron nga ang tanan nga moagi moingon, “Pagkanindot nga gamayng balay!” Inyo kining kahigayunan ug manghinaut ako nga inyong gamiton sa inyong mga kaugalingon ang inyong kaugalingong mga katungod (DBY, 200).

Paghimo og nindot nga mga balay, pagtuon unsaon sa pagtukod; himoa nga mahimong maayong mekaniko ug negosyante, aron kamo makahibalo unsaon sa pagtukod og balay, kamalig, o tindahan, unsaon sa pag-uma, ug unsaon sa pagbuhi og kahayupan sa uma, ug pag-atiman niini pinaagi sa paghatag og husto nga kapasilongan ug maayong kabutangan niini sa panahon sa tingtugnaw, ug magpakita sa inyong mga kaugalingon nga takus sa mas daghan pang mga bahandi nga ihatag kaninyo kaysa niini nga walog ug unsay ikahatag niini (DBY, 302).

Nakasulod ako sa mga balay nga walay bisan gamay nga kahayahay alang sa mga babaye, walay bangko nga katungtungan sa ilang mga balde sa tubig, ug sila mobutang niini sa salog, ug gani ang ilang mga bana maglingkod diha sa daghang mga katuigan ug wala gayud mohimo og bisan unsa nga pag-ayo sama sa bangko nga kabutangan sa balde. Gani sila adunay abilidad, apan wala nila gamita (DBY, 198–99).

Ipaayo sa bana ang iyang kusina ug ang butanganan sa mga plato ug diha sa iyang mga kwarto nga katulganan alang sa kaayohan sa iyang pamilya, ug ipatarung ang iyang tanaman, agianan, uban pa, magpanindot sa inyong mga pinuy-anan ug sa mga palibut niini, magsemento sa mga agianan ug mananom og kapasilongan nga mga kahoy (DBY, 198).

Kita kinahanglan nga mapaningkamuton sa kaugalingon isip mga pamilya ug isip mga katawhan.

Kami buot nga kamo gikan karon mapaningkamuton sa kaugalingon nga mga katawhan [tan-awa sa D&P 78:14]. Paminawa kini, O Israel! Paminawa kini, mga silingan, mga higala ug mga kaaway, mao kini ang gikinahanglan sa Ginoo niining mga katawhan (DBY, 293).

Kamo nga mga Santos sa Ulahing mga Adlaw, kat-uni ang pagtabang sa inyong mga kaugalingon. Kon kamo dili makaangkon sa tanan nga inyong gihandom karon, pagkat-on sa pagbuhat nga wala kanang dili ninyo mapalit ug mabayran; ug ibutang ang inyong mga hunahuna ubos sa pagmando nga kamo kinahanglan ug magpuyo sumala sa inyong kinitaan (DBY, 293).

Kinsa ang angayan sa pagdayeg? Ang mga tawo kinsa miatiman sa ilang mga kaugalingon o kinsa sa kanunay misalig sa dakong mga kalooy sa Ginoo sa pag-atiman kanila? Dili kita makapaabut sa Ginoo sa paghatag kanato og prutas kon wala kita mananom og mga kahoy; o nga kon kita dili modaro ug mopugas ug moani, kinahanglang mangayo kita sa Ginoo sa pagluwas kanato sa atong panginahanglan, sama sa pagluwas kanato gikan sa sangputanan sa atong kaugalingong kabuang, pagkamasinupakon ug pag-usik-usik (DBY, 293).

Ang paagi sa pagpakita sa atong hugot nga pagtuo ug pagsalig sa Dios anaa kaninyo ug kanako sa pagbuhat sa tanan nga makapatunhay ug makapreserbar sa atong mga kaugalingon; ug ang komunidad nga magtinabangay, uban sa ilang mga kasingkasing ug kamot, sa pagtuman niini, ang ilang mga paningkamot magkahiusa (DBY, 293).

Mga kaigsoonan, pagkat-on. Nakakat-on kamo og daghan, tinuod kini; apan pagkat-on pa og dugang; pagkat-on sa pag-amuma sa inyong mga kaugalingon; pagtipig og lugas ug harina, ug tipigi kini alang sa panahon sa kanihit. Mga igsoong mga babaye, ayaw sugoa ang inyong mga bana sa pagbaligya sa katapusang litro sa bugas aron ipalit og butang alang kaninyo gikan sa tindahan, apan tabangi ang inyong mga bana sa pagtipig niini alang sa adlaw sa panginahanglan, ug kinahanglan kamo adunay usa o duha ka tuig nga pagkaon nga giandam (DBY, 293).

Imbis sa mangita kon unsay mabuhat sa Ginoo alang kanato, mangutana kita unsay atong mabuhat alang sa atong mga kaugalingon (DBY, 293).

Bisan unsa ang naangkon sa mga Santos sa Ulahing mga Adlaw nakuha pinaagi sa hilabihang pagpaningkamot ug dili matarug nga tinguha (DBY, 294).

Mga Sugyot alang sa Pagtuon

Kinahanglang maningkamot kita ug mogamit sa atong panahon sa maalamon nga pagserbisyo sa atong mga pamilya ug sa pagtukod sa gingharian sa Dios.

  • Unsa ang tambag ni Presidente Young mahitungod sa paggamit sa “matag minuto sa matag adlaw”? (Tan-awa usab sa Alma 34:33.) Ngano nga ang panahon usa ka bililhon nga gasa? Unsa nga mga baruganan ang nakatabang kaninyo sa pagpalambo sa inyong paagi sa paggahin sa inyong panahon?

  • Ngano nga ang pagkatapulan ug pag-usik-usik supak sa “mga lagda sa langit”? (Tan-awa usab sa Doktrina ug mga Pakigsaad 42:42.)

  • Ngano nga ang pagtukod sa Zion nagkinahanglan sa tanang matang sa pagtrabaho? Sa unsa nga mga paagi nga kita kinahanglang maningkamot sa mental, pisikal, ug sa espirituhanon nga paagi sa pagtukod sa Zion?

Ang Ginoo mihatag og kabuhong sa yuta alang sa atong paggamit.

  • Unsaon sa Ginoo sa “pagdala pag-usab sa Zion dinhi sa yuta”? Sa unsa nga piho nga mga paagi nga kita makatukod Zion?

  • Si Presidente Young miingon nga “sa ilawom ug diha sa ibabaw sa atong inahang yuta … adunay igo alang sa tanan.” Ngano sa inyong hunahuna adunay hilabihan nga kakabus sa kalibutan? Unsa ang atong mahimo sa atong mga pamilya, sa mga organisasyon sa Simbahan, ug sa mga komunidad sa pagpakigbahin sa usag usa unsa ang gihatag sa Ginoo kanato? (Tan-awa usab sa Jacob 2:18–19; D&P 104:14–18.)

Kinahanglang magmaalamon kita sa paggamit sa mga kapanguhaan nga gihatag sa Ginoo kanato.

  • Ngano nga kinahanglan nga dili mag-usik-usik og bisan unsa, apan moatiman sa tanang butang”? Unsaon nato sa paggamit ang tambag ni Presidente Young mahitungod niini nga hilisgutan sa pagtipig og pagkaon ug pagpangandam sa emerhensya?

  • Giunsa nato sa “pagputol ang gahum ug himaya nga giplano sa Dios nga atong mapanunod”?

  • Unsaon nato sa paggamit ang tambag ni Presidente Young, “Ang buang makakwarta; apan nagkinahanglan og usa ka maalamon nga tawo sa pagtigum ug sa paggasto niini sa iyang kaugalingong kaayohan”?

Kinahanglan kita nga magtukod og maayong mga panimalay ug maghimo og maanindot nga mga komunidad.

  • Unsa ang gisulti ni Presidente Young nga buhaton sa mga Santos sa paghimo sa ilang “panimalay nga usa ka paraiso ug ang [ilang] mga kasingkasing mapuno sa pagpasalamat”? Unsa ang atong mabuhat sa paghimo sa atong mga panimalay ug mga komunidad nga mas maanindot? (Tan-awa usab sa D&P 82:14.) Sa unsa nga paagi nga ang maanindot nga palibut makatabang kanato sa pisikal, sa emosyon, ug sa espirituhanon nga paagi?

Kita kinahanglan nga mapaningkamuton sa kaugalingon isip mga pamilya ug isip mga katawhan.

  • Unsa ang tambag ni Presidente Young kabahin sa pagpakabuhi sumala sa atong kinitaan? Ngano nga kining yano nga mga sumbanan usahay malisud sundon? Unsa ang pipila ka mga piho nga mga paagi kita makasiguro nga kita nagpuyo sumala sa atong mga kinitaan?

  • Timbang-timbanga unsa ang gisulti ni Presidente Young mahitungod sa pag-amuma sa atong mga kaugalingon, ug hunahunaa unsa ang inyong gihimo aron sa pagsiguro nga ang inyong pamilya maningkamot sa kaugalingon sa panahon sa panginahanglan. Paghimo og plano aron madugangan ang inyong pagpaningkamot sa kaugalingon diha sa inyong pamilya ug komunidad.

  • Sa unsa nga paagi nga ang makugihon nga pagtrabaho usa ka pagpakita sa hugot nga pagtuo? Unsa ang relasyon tali sa pagpaningkamot sa kaugalingon ug pagsalig sa mga kalooy ni Kristo?

  • Si Presidente Young miawhag sa mga Santos sa pag-atiman sa ilang mga kaugalingon, apan mitambag usab siya kanila sa paghiusa diha sa ilang mga komunidad. Sa unsa nga paagi nga ang atong mga paningkamot sa pag-amuma sa atong mga kaugalingon ug pagtukod sa atong mga komunidad magkauban? Sa unsa nga paagi nga ang mga paningkamot sa uban makatabang kaninyo nga mas makaamuma sa kaugalingon?

Imahe
stores in Salt Lake City

Mga tindahan sa kooperatiba sa Siyudad sa Salt Lake sa mga 1869. Si Presidente Young nag-awhag og industriya sa panimalay, pagdaginot, ug kaugalingong pagpaningkamot diha sa mga Santos.

Imahe
William Carter plowing

Si William Carter nagdaro didto sa iyang panimalay sa St. George, Utah, 1893.