« មេរៀនទី ៩ ឯកសាររៀបចំសម្រាប់ថ្នាក់ ៖ សេចក្ដីជំនឿលើព្រះយេស៊ូវគ្រីស្ទ » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន ( ឆ្នាំ ២០២១ )
« មេរៀនទី ៩ ឯកសាររៀបចំសម្រាប់ថ្នាក់ » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន
មេរៀនទី ៩ ឯកសាររៀបចំសម្រាប់ថ្នាក់
សេចក្ដីជំនឿលើព្រះយេស៊ូវគ្រីស្ទ
តើអ្នកធ្លាប់មានបំណងដ៏ខ្លាំងមួយចង់កែលម្អ និងផ្លាស់ប្ដូរខ្លួន ដើម្បីអ្នកអាចក្លាយកាន់តែដូចជាព្រះអង្គសង្គ្រោះដែរឬទេ ? បងប្រុស ប្រៃអិន ខេ អាស្ដុន អតីតទីប្រឹក្សាទីពីរក្នុងគណៈប្រធានសាលាថ្ងៃអាទិត្យទូទៅបានបង្រៀនថា « វាគឺជាគោលលទ្ធិរបស់ព្រះគ្រីស្ទ ដែលអនុញ្ញាតឲ្យយើងមានអំណាចខាងវិញ្ញាណ ដែលនឹងលើកស្ទួយយើងចេញពីសភាពខាងវិញ្ញាណនាពេលបច្ចុប្បន្នរបស់យើង ទៅកាន់សភាពមួយដែលយើងអាចក្លាយជាឥតខ្ចោះដូចជាព្រះអង្គសង្គ្រោះដែរ » ( « The Doctrine of Christ » Liahona ខែ វិច្ឆិកា ឆ្នាំ ២០១៦ ទំព័រ ១០៦ ) ។ គោលលទ្ធិនៃព្រះគ្រីស្ទសំដៅទៅលើការមានសេចក្ដីជំនឿលើទ្រង់ និងដង្វាយធួនរបស់ទ្រង់ ការប្រែចិត្ត ពិធីបុណ្យជ្រមុជទឹក ការទទួលបានអំណោយទាននៃព្រះវិញ្ញាណបរិសុទ្ធ និងការកាន់ខ្ជាប់ដរាបដល់ចុងបំផុត ( សូមមើល នីហ្វៃទី២ ៣១:២, ១០–២១; នីហ្វៃទី៣ ២៧:១៣–២២ ) ។ នៅពេលអ្នកសិក្សាពីគោលលទ្ធិនៃព្រះគ្រីស្ទ ដោយចាប់ផ្ដើមជាមួយនឹងសេចក្ដីជំនឿលើទ្រង់ សូមគិតអំពីរបៀបដែលអ្នកចង់ផ្លាស់ប្ដូរ ហើយគិតពីបុគ្គលដែលអ្នកចង់ក្លាយទៅជា ។
ផ្នែកទី ១
តើខ្ញុំអាចធ្វើអ្វីខ្លះ ដើម្បីពង្រឹងសេចក្តីជំនឿរបស់ខ្ញុំលើព្រះយេស៊ូវគ្រីស្ទ ?
សេចក្ដីសង្ខេបខាងក្រោមនេះពន្យល់អំពីអត្ថន័យនៃការមានសេចក្ដីជំនឿលើព្រះយេស៊ូវគ្រីស្ទ ៖
ការមានសេចក្តីជំនឿលើព្រះយេស៊ូវគ្រីស្ទមានន័យថា ការពឹងផ្អែកទាំងស្រុងទៅលើទ្រង់—ដោយទុកចិត្តលើព្រះចេស្ដា ព្រះបញ្ញាញាណ និងសេចក្តីស្រឡាញ់ដ៏និរន្តរ៍របស់ទ្រង់ ។ វារួមមានទាំងការជឿលើការបង្រៀនរបស់ទ្រង់ផងដែរ ។ វាមានន័យថា យើងត្រូវមានជំនឿទោះបីជាយើងមិនយល់គ្រប់កិច្ចការទាំងអស់ដែលទ្រង់ធ្វើក៏ដោយ ។ … ទ្រង់ត្រៀមជាស្រេចដើម្បីជួយយើង ដូចដែលយើងនៅចងចាំដល់ការអង្វររបស់ទ្រង់ថា « ចូរមើលមកឯយើងដោយនូវគ្រប់ទាំងគំនិត ចូរកុំសង្ស័យ ចូរកុំខ្លាចឡើយ » ( គោលលទ្ធិ និង សេចក្ដីសញ្ញា ៦:៣៦ ) ។ ( «Faith in Jesus Christ » Gospel Topics នៅលើគេហទំព័រ topics.ChurchofJesusChrist.org )
ប៊ីស្សព រីឆាត ស៊ី អេជ្ជលី អតីតទីប្រឹក្សាក្នុងគណៈប៊ីស្សពជាអធិបតីបានថ្លែងថា « សេចក្ដីជំនឿគឺជាជម្រើសមួយ ហើយយើងត្រូវតែព្យាយាមស្វែងរកវា និងអភិវឌ្ឍ » ( « Faith—the Choice Is Yours » Liahona ខែ វិច្ឆិកា ឆ្នាំ ២០១០ ទំព័រ ៣២ ) ។
ព្យាការីអាលម៉ាបានបង្រៀនយ៉ាងមានអានុភាពអំពីគោលការណ៍នៃសេចក្ដីជំនឿ ។ អាលម៉ាបានព្រួយបារម្ភអំពីពួកសាសន៍សូរាំ ដែលឈប់ជឿលើព្រះយេស៊ូវគ្រីស្ទ ហើយបានឃ្លាតឆ្ងាយចេញពីសាសនាចក្ររបស់ទ្រង់ ។ នៅពេលអាលម៉ា និងដៃគូផ្សព្វផ្សាយសាសនារបស់លោកបានទៅផ្សាយដំណឹងល្អនៅក្នុងចំណោមពួកគេ នោះលោកបានឃើញថា ពួកសាសន៍សូរាំមួយចំនួនបានបន្ទាបខ្លួន ដោយសារតែភាពក្រីក្ររបស់ខ្លួន ហើយបានទទួលសារលិខិតរបស់លោក ។ លោកចង់ឲ្យពួកគេយល់ពីរបៀបដែលព្រះអង្គសង្គ្រោះអាចផ្លាស់ប្ដូរជីវិតរបស់ពួកគេបាន ។ ( សូមមើល អាលម៉ា ៣១–៣២ ) ។
ខណៈកំពុងបង្រៀនពួកសាសន៍សូរាំ អាលម៉ាបានប្រៀបធៀបព្រះបន្ទូលរបស់ព្រះទៅនឹងគ្រាប់ពូជមួយ ហើយបានពន្យល់ថា វានឹងដុះ ពេលយើងដាំវានៅក្នុងដួងចិត្តរបស់យើង ហើយថែទាំវាដោយប្រុងប្រយ័ត្នតាមរយៈការអនុវត្តសេចក្ដីជំនឿ ( សូមមើល អាលម៉ា ៣២:២៦–៣៣ ) ។
ការសិក្សានៅក្នុងរៀបចំសម្រាប់ថ្នាក់រៀន
នៅពេលអ្នកអាន អាលម៉ា ៣២:២១, ២៧–៣០ សូមពិចារណាគូសចំណាំពាក្យ ឬឃ្លាណាដែលបង្រៀនពីរបៀបដែលយើងអាចបង្កើនសេចក្ដីជំនឿបាន ។
ដោយថ្លែងពីការប្រៀបធៀបគ្រាប់ពូជរបស់អាលម៉ា ដែលតំណាងឲ្យព្រះបន្ទូលរបស់ព្រះ ប្រធាន ឌៀថើរ អេហ្វ អុជដូហ្វ កាលនៅក្នុងគណៈប្រធានទីមួយបានបង្រៀន ៖
ជាញឹកញាប់បំផុត យើងទទួលដំណឹងល្អ ដូចជាកសិករដែលដាក់គ្រាប់ពូជដាំក្នុងដីនាពេលព្រឹក ហើយរំពឹងថាបានបណ្ដូលពោតនៅពេលរសៀល ។ …
ការដឹងថា គ្រាប់ពូជនោះល្អ គឺមិនទាន់គ្រប់គ្រាន់នោះទេ ។ យើងត្រូវតែ « ថែទាំវាដោយថ្នាក់ថ្នម ដើម្បីវាអាចដុះឫស » [ អាលម៉ា ៣២:៣៧ ] ។ …
… ភាពជាសិស្សមិនមែនជាការអង្គុយមើលកីឡាឡើយ ។ យើងមិនអាចរំពឹងថានឹងបានដកពិសោធន៍ពរជ័យនៃសេចក្ដីជំនឿ ដោយការឈរធ្មឹងនៅមួយកន្លែងឡើយ គឺដូចជាការដែលយើងមិនអាចទទួលបានប្រយោជន៍នៃសុខភាពបានដែរ ដោយការគ្រាន់តែអង្គុយលើសាឡុងមើលព្រឹត្តិការណ៍កីឡាលើទូរទស្សន៍ ហើយផ្ដល់ដំបូន្មានដល់អត្តពលករនោះ ។( « The Way of the Disciple » Liahona ខែ ឧសភា ឆ្នាំ ២០០៩ ទំព័រ ៧៦, ៧៧ )
សញ្ជឹងគិតនៅក្នុងការរៀបចំសម្រាប់ថ្នាក់រៀន
តើអ្នកអាចផ្ដល់ដំបូន្មានអ្វីខ្លះ ដល់នរណាម្នាក់ដែលបាក់ទឹកចិត្តដោយសារគាត់ ឬនាងបានធ្វើសកម្មភាពដោយសេចក្ដីជំនឿ ប៉ុន្ដែមិនទាន់បានទទួលផលផ្លែនៃសេចក្ដីជំនឿនៅឡើយ ?
ផ្នែកទី ២
តើការថែទាំព្រះបន្ទូលរបស់ព្រះតាមរយៈសេចក្ដីជំនឿ អាចនាំខ្ញុំឲ្យខិតជិតព្រះយេស៊ូវគ្រីស្ទដោយរបៀបណា ?
អាលម៉ាបានបង្រៀនថា នៅពេលគ្រាប់ពូជនោះដុះឡើង ហើយចាប់ផ្ដើមលូតលាស់ នោះយើងនឹងដឹងថា គ្រាប់ពូជនោះល្អ ហើយសេចក្ដីជំនឿរបស់យើងនឹងត្រូវបានពង្រឹង ។ បន្ទាប់ពីការលូតលាស់ដំបូងនេះ អាលម៉ាបានព្រមានថាកុំឲ្យ « ទុកសេចក្ដីជំនឿរបស់ខ្លួនមួយអន្លើឡើយ » ហើយភ្លេចថែទាំដើមឈើនោះឡើយ ( សូមមើល អាលម៉ា ៣២:៣០–៣៨ ) ។
ការសិក្សានៅក្នុងរៀបចំសម្រាប់ថ្នាក់រៀន
សូមអាន អាលម៉ា ៣២:៤១–៤៣ ហើយរកមើលពរជ័យដែលកើតមាន នៅពេលយើងថែទាំដើមឈើដោយសេចក្ដីជំនឿជាបន្ដបន្ទាប់ពេញមួយជីវិត ។
នៅពេលអាលម៉ាបានបញ្ចប់ការបង្រៀនអំពីសេចក្ដីជំនឿដល់ពួកសាសន៍សូរាំ នោះលោកបានចង្អុលបង្ហាញថា គ្រាប់ពូជដែលលោកចង់ឲ្យពួកគេដាំក្នុងចិត្តរបស់ពួកគេនោះ គឺសារលិខិតដែលថា ព្រះយេស៊ូវគ្រីស្ទគឺជាព្រះរាជបុត្រានៃព្រះ ដែលបាន « ធ្វើឲ្យធួននឹងអំពើបាបទាំងឡាយរបស់ពួកគេ ហើយថាទ្រង់នឹងមានព្រះជន្មរស់ពីស្លាប់ឡើងវិញ » ( អាលម៉ា ៣៣:២២–២៣ ) ។ អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានសរសេរ ៖
នៅក្នុងការថ្លែងដ៏អស្ចារ្យនេះ អាលម៉ាជំរុញចិត្តអ្នកអានពីការអត្ថាធិប្បាយទូទៅអំពីសេចក្ដីជំនឿលើព្រះបន្ទូលរបស់ព្រះដែលដូចជាគ្រាប់ពូជ ទៅជាការថ្លែងផ្តោតលើសេចក្ដីជំនឿលើព្រះគ្រីស្ទ ដែលជាព្រះបន្ទូលរបស់ព្រះ ដែលបានលូតលាស់ទៅដើមឈើដែលបង្កើតផលផ្លែ ជាដើមឈើដែលមានផ្លែដូចការយល់ឃើញពីមុនរបស់លីហៃអំពីសេចក្តីស្រឡាញ់របស់ព្រះគ្រីស្ទ ។ … ព្រះគ្រីស្ទគឺជាគ្រាប់ពូជ ជាដើមឈើ និងផលផ្លែនៃជីវិតដ៏នៅអស់កល្បជានិច្ច ។( Christ and the New Covenant: The Messianic Message of the Book of Mormon [ ឆ្នាំ ១៩៩៧ ] ទំព័រ ១៦៩ )
សញ្ជឹងគិតនៅក្នុងការរៀបចំសម្រាប់ថ្នាក់រៀន
តើការធ្វើសកម្មភាពដោយសេចក្ដីជំនឿ និងការដាំព្រះយេស៊ូវគ្រីស្ទ និងដំណឹងល្អរបស់ទ្រង់នៅក្នុងចិត្តយើង មានឥទ្ធិពលលើទីបន្ទាល់ និងការប្រែចិត្តជឿរបស់អ្នកយ៉ាងដូចម្ដេច ?
ផ្នែកទី ៣
តើខ្ញុំអាចមានពរជ័យដោយការអនុវត្តសេចក្តីជំនឿរបស់ខ្ញុំលើព្រះយេស៊ូវគ្រីស្ទតាមរបៀបណាខ្លះ ?
កាលមរ៉ូណៃបានបញ្ចប់កិច្ចការរបស់លោកក្នុងព្រះគម្ពីរមរមន លោកបានដាក់បញ្ចូលទេសនកថាដែលឪពុករបស់លោក គឺមរមន បានថ្លែងជាច្រើនឆ្នាំមុន ( សូមមើល មរ៉ូណៃ ៧:១ ) ។ នៅក្នុងទេសនកថានេះ មរមនបានបង្រៀនពីអ្វីដែលអាចសម្រេចបាន តាមរយៈអំណាចនៃសេចក្ដីជំនឿ ។
ការសិក្សានៅក្នុងរៀបចំសម្រាប់ថ្នាក់រៀន
សូមអាន មរ៉ូណៃ ៧:២៥–២៦ ៣៣ ហើយពិចារណាពីពរជ័យ និងអព្ភូតហេតុនានាដែលយើងអាចដកពិសោធន៍បាន នៅពេលយើងអនុវត្តសេចក្ដីជំនឿលើព្រះយេស៊ូវគ្រីស្ទ ។
អែលឌើរ រីឆាដ ជី ស្កត នៃកូរ៉ុមនៃពួកសាវកដប់ពីរនាក់បានបង្រៀនពីរបៀបដែលសេចក្ដីជំនឿរបស់យើងលើព្រះគ្រីស្ទ នាំមកនូវអំណាចបន្ថែមទៀតចូលមកក្នុងជីវិតរបស់យើង ៖
ការមានសេចក្ដីជំនឿដែលមិនរង្គោះរង្គើលើព្រះយេស៊ូវគ្រីស្ទ គឺការពន្លិចជីវិតរបស់បងប្អូនដោយពន្លឺដ៏ភ្លឺចែងចាំង ។ អ្នកលែងនៅតែឯងដើម្បីពុះពារនឹងឧបសគ្គ ដែលអ្នកដឹងថាអ្នកមិនអាចដោះស្រាយបាន ឬគ្រប់គ្រងខ្លួនឯងបានទៀតហើយ ដោយសារទ្រង់បានមានបន្ទូលថា « បើសិនជាអ្នករាល់គ្នាមានសេចក្ដីជំនឿជឿដល់យើង នោះអ្នករាល់គ្នានឹងមានអំណាច ប្រយោជន៍នឹងធ្វើនូវអ្វីៗដែលជា ការចំបាច់ដល់យើង » [ មរ៉ូណៃ ៧:៣៣; បានបន្ថែមអក្សរទ្រេត ] ។
ប្រសិនបើអ្នកខូចចិត្ត ត្រូវបានញាំញីដោយការរំលង ឈឺ នៅឯកោ ឬត្រូវការការលួងលោម និងការគាំទ្រខ្លាំងនោះ ខ្ញុំសូមថ្លែងទីបន្ទាល់យ៉ាងមុតមាំថា ព្រះអម្ចាស់នឹងជួយអ្នក ពេលអ្នកគោរពតាមក្រឹត្យវិន័យខាងវិញ្ញាណដោយប្រុងប្រយ័ត្ន ព្រោះការគោរពតាមនឹងផ្ដល់ជំនួយ ។ ទ្រង់គឺជាបិតារបស់អ្នក ។ អ្នកជាបុត្ររបស់ទ្រង់ ។ ទ្រង់ស្រឡាញ់អ្នក ។ ទ្រង់នឹងមិនធ្វើឲ្យអ្នកខកចិត្តឡើយ ។ ខ្ញុំដឹងថា ទ្រង់នឹងប្រទានពរដល់អ្នក ។( « Obtaining Help from the Lord » Ensign ខែ វិច្ឆិកា ឆ្នាំ ១៩៩១ ទំព័រ ៨៦ )
កត់ត្រាគំនិតរបស់អ្នក
សូមកំណត់បុគ្គលម្នាក់ ឬពីរនាក់នៅក្នុងព្រះគម្ពីរមរមន ដែលបានបង្ហាញសេចក្ដីជំនឿលើព្រះយេស៊ូវគ្រីស្ទ ហើយកត់ត្រាអំពីរបៀបដែលពួកគេទទួលបានពរជ័យ ។ សូមត្រៀមខ្លួនចែកចាយឧទាហរណ៍របស់អ្នកនៅក្នុងថ្នាក់ ។ អ្នកក៏អាចពិចារណាពីរបៀបដែលអ្នកបានដកពិសោធន៍ព្រះចេស្ដារបស់ព្រះអម្ចាស់ កាលអ្នកអនុវត្តសេចក្ដីជំនឿលើទ្រង់ផងដែរ ។