« មេរៀនទី ១២ ឯកសាររៀបចំសម្រាប់ថ្នាក់ ៖ យើងត្រូវការការកើតជាថ្មីខាងវិញ្ញាណ » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន ( ឆ្នាំ ២០២១ )
« មេរៀនទី ១២ ឯកសាររៀបចំសម្រាប់ថ្នាក់ » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន
មេរៀនទី ១២ ឯកសាររៀបចំសម្រាប់ថ្នាក់
យើងត្រូវការការកើតជាថ្មីខាងវិញ្ញាណ
អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានអង្កេតថា « ព្រះគម្ពីរមរមនគឺជាក្បួនខ្នាតណែនាំរបស់យើង ពេលយើងធ្វើដំណើរលើផ្លូវចេញពីការណ៍អាក្រក់ទៅរកការណ៍ល្អ ទៅកាន់ការណ៍ប្រសើរ ហើយខិតខំផ្លាស់ប្ដូរដួងចិត្តរបស់យើង » ( « The Atonement and the Journey of Mortality » Ensign ខែ មេសា ឆ្នាំ ២០១២ ទំព័រ ៤០ ) ។ នៅក្នុងព្រះគម្ពីរមរមន ការផ្លាស់ប្ដូរនេះត្រូវបានពិពណ៌នាថាជា ការចាប់កំណើតជាថ្មីខាងវិញ្ញាណ ការផ្លាស់ប្ដូរដួងចិត្ត និងការប្រែចិត្តជឿ ។ នៅពេលអ្នកសិក្សាឯកសារនេះ ដើម្បីរៀបចំខ្លួនបង្រៀន សូមពិចារណាពីរបៀបដែលការរស់នៅតាមគោលលទ្ធិនៃព្រះគ្រីស្ទ អាចជួយអ្នកឲ្យប្រែចិត្តជឿកាន់តែខ្លាំង ហើយកាន់តែក្លាយដូចជាព្រះយេស៊ូវគ្រីស្ទ ។
ផ្នែកទី ១
តើការរស់នៅតាមគោលលទ្ធិនៃព្រះគ្រីស្ទ អាចជួយខ្ញុំឲ្យប្រែចិត្តជឿកាន់តែខ្លាំងយ៉ាងដូចម្តេច ?
សេចក្ដីសង្ខេបខាងក្រោមនេះរៀបរាប់ពីអ្វីដែលនឹងកើតឡើង នៅពេលយើងបានប្រែចិត្តជឿពិតប្រាកដនោះ ៖
ការប្រែចិត្តជឿរួមមានការផ្លាស់ប្តូរឥរិយាបទ ប៉ុន្តែវាមិនគ្រាន់តែជាឥរិយាបថប៉ុណ្ណោះទេ វាគឺជាការផ្លាស់ប្ដូររាល់និស្ស័យរបស់យើង ។ វាគឺជាការផ្លាស់ប្តូរយ៉ាងចាំបាច់មួយដែលព្រះអម្ចាស់ និងពួកព្យាការីរបស់ទ្រង់ចាត់ទុកថាជាការចាប់កំណើតជាថ្មី ការផ្លាស់ប្តូរដួងចិត្ត និងពិធីបុណ្យជ្រមុជដោយភ្លើង ។( « COnversion » Gospel Topics នៅលើគេហទំព័រ topics.ChurchofJesusChrist.org )
ឧទាហរណ៍ ក្រោយពីអាលម៉ាជាកូនត្រូវបានទេវតាមួយអង្គហៅឲ្យប្រែចិត្ត នោះលោកបានរងទុក្ខនឹងការសោកស្ដាយយ៉ាងខ្លាំង ដោយសារតែអំពើបាបរបស់លោក ។ ពេលអាលម៉ាបានរងទុក្ខ លោកបានងាកទៅសូមជំនួយពីព្រះអម្ចាស់ ពេលនោះអំពើបាបរបស់លោកត្រូវបានអភ័យទោសឲ្យ ហើយលោកបានដកពិសោធន៍ការកើតជាថ្មីខាងវិញ្ញាណ ( សូមមើល ម៉ូសាយ ២៧:១១–២៣ ) ។
ការសិក្សានៅក្នុងរៀបចំសម្រាប់ថ្នាក់រៀន
សូមអាន ម៉ូសាយ ២៧:២៥–២៦ ហើយរកមើលអ្វីដែលព្រះអម្ចាស់បានបង្រៀនអាលម៉ាអំពីភាពចាំបាច់នៃការកើតជាថ្មីខាងវិញ្ញាណ ។
ការកើតជាថ្មីខាងវិញ្ញាណ ឬការប្រែចិត្តជឿ ពុំមែនជាព្រឹត្តិការណ៍អកម្មនោះទេ ។ « ការប្រែចិត្តជឿជាលទ្ធផលកើតមកពីកិច្ចប្រឹងប្រែងដ៏សុចរិតមួយដើម្បីដើរតាមព្រះអង្គសង្គ្រោះ ។ កិច្ចប្រឹងប្រែងទាំងនេះរួមមានការអនុវត្តសេចក្តីជំនឿលើព្រះយេស៊ូវគ្រីស្ទ ការប្រែចិត្តពីអំពើបាប ការទទួលពិធីបុណ្យជ្រមុជទឹក ការទទួលអំណោយទានជាព្រះវិញ្ញាណបរិសុទ្ធ និងការកាន់ខ្ជាប់ដរាបដល់ទីបំផុតក្នុងសេចក្តីជំនឿ [ ដែលអនុវត្តនូវគោលលទ្ធិនៃព្រះគ្រីស្ទ ] » ( « Conversion » Gospel Topics នៅលើគេហទំព័រ topics.ChurchofJesusChrist.org ) ។
បទពិសោធន៍របស់ប្រជាជនស្ដេចបេនយ៉ាមីន បង្ហាញពីរបៀបដែលការអនុវត្តនូវគោលលទ្ធិនៃព្រះគ្រីស្ទ ដឹកនាំទៅរកការកើតជាថ្មីខាងវិញ្ញាណ និងការប្រែចិត្តជឿលើព្រះអម្ចាស់ ។
នៅក្នុងទេសនកថាចុងក្រោយរបស់ទ្រង់ ស្ដេចបេនយ៉ាមីនបានបង្រៀនថា យើងទាំងអស់គឺជា « អ្នកបម្រើដ៏ឥតប្រយោជន៍ » ហើយ « ជាប់ជំពាក់គុណដល់អស់កល្បជានិច្ច » ដល់ព្រះ ( ម៉ូសាយ ២:២១–២៥, ៣៤ ) ។ រួចទ្រង់បានថ្លែងទីបន្ទាល់ថា យើងអាចត្រូវបានប្រោសលោះ តែតាមរយៈព្រះយេស៊ូវគ្រីស្ទប៉ុណ្ណោះ ។ ដោយបានជ្រួតជ្រាបពីសារលិខិតនេះ នោះប្រជាជនរបស់ស្ដេចបេនយ៉ាមីនបានដួលទៅលើដីដោយគារវភាព និងការកោតខ្លាច ( សូមមើល ម៉ូសាយ ៣:១៧–៤:២ ) ។
ការសិក្សានៅក្នុងរៀបចំសម្រាប់ថ្នាក់រៀន
សូមអាន ម៉ូសាយ ៤:២–៣ ហើយរកមើលរបៀបដែលប្រជាជនរបស់ស្ដេចបេនយ៉ាមីនបានអនុវត្តគោលលទ្ធិនៃព្រះគ្រីស្ទ និងពរជ័យទាំងឡាយដែលពួកគេបានទទួល ។
យើងរៀនចេញពី ម៉ូសាយ ៤ ថា ក្រោយពេលដែលប្រជាជនរបស់ទ្រង់បានទទួលការអភ័យទោសចំពោះអំពើបាបរបស់ពួកគេរួចហើយ នោះស្ដេចបេនយ៉ាមីនបានបង្រៀនពួកគេឲ្យជឿលើព្រះ ហើយរស់នៅដោយសេចក្ដីជំនឿ ដើម្បីពួកគេអាច « បានទទួលការផ្ដាច់បាបទាំងឡាយរបស់ [ ពួកគេ ] ជានិច្ច » ( ខទី ១២ ) ។ នៅពេលទ្រង់បានបញ្ចប់ទេសនកថារបស់ទ្រង់ហើយ ស្ដេចបេនយ៉ាមីនសព្វព្រះទ័យចង់ដឹងថា តើប្រជាជនទ្រង់បានជឿអ្វីដែលទ្រង់បានបង្រៀនដែរឬអត់ ( សូមមើល ម៉ូសាយ ៥:១ ) ។
ការសិក្សានៅក្នុងរៀបចំសម្រាប់ថ្នាក់រៀន
សូមអាន ម៉ូសាយ ៥:២–៧ ហើយរកមើលអ្វីដែលព្រះអម្ចាស់បានធ្វើដល់ប្រជាជនរបស់ស្ដេចបេនយ៉ាមីន កាលពួកគេបានអនុវត្តគោលលទ្ធិនៃព្រះគ្រីស្ទនៅក្នុងជីវិតរបស់ពួកគេ ។
អែលឌើ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់បានធ្វើការអង្កេតឃើញដូចតទៅនេះអំពីការកើតជាថ្មីខាងវិញ្ញាណ ៖
បងប្អូនអាចសួរថា ហេតុអ្វីការផ្លាស់ប្ដូរយ៉ាងធំនេះមិនកើតឡើងលឿនជាងនេះចំពោះខ្ញុំ ? បងប្អូនគួរតែចងចាំថា គំរូដ៏អស្ចារ្យនៃប្រជាជនរបស់ស្ដេចបេនយ៉ាមីន អាលម៉ា និងមនុស្សដទៃទៀតនៅក្នុងព្រះគម្ពីរគឺបែបនោះ—អស្ចារ្យ និងមិនធម្មតា [ សូមមើល អែសរ៉ា ថាហ្វ ប៊ែនសឹន « A Mighty Change of Heart » Ensign ខែ តុលា ឆ្នាំ ១៩៨៩ ទំព័រ ២–៥ ] ។ សម្រាប់ពួកយើងភាគច្រើន ការផ្លាស់ប្ដូរទាំងឡាយគឺភាគច្រើនកើតឡើងបន្តិចម្ដងៗ ហើយកើតតាមពេលវេលា ។ ការកើតម្ដងទៀត គឺពុំដូចជាការកើតខាងរូបកាយទេ វាគឺជាដំណើរការមួយ មិនមែនជាព្រឹត្តិការណ៍មួយនោះទេ ។ ហើយការចូលរួមក្នុងដំណើរការនោះ គឺជាគោលបំណងដ៏សំខាន់នៃជីវិតរមែងស្លាប់ ។
… ចូរយើងទទួលទានសាក្រាម៉ង់ដោយស័ក្ដិសមជារៀងរាល់សប្ដាហ៍ ហើយបន្តប្រើប្រាស់ព្រះវិញ្ញាណបរិសុទ្ធ ដើម្បីរកឲ្យឃើញ ហើយដកចេញនូវសំណល់ចុងក្រោយនៃភាពមិនបរិសុទ្ធដែលនៅក្នុងខ្លួនយើង ។ ខ្ញុំថ្លែងទីបន្ទាល់ថា ពេលបងប្អូនបន្តនៅក្នុងផ្លូវនៃការកើតជាថ្មីខាងវិញ្ញាណ នោះព្រះគុណដ៏ធួនរបស់ព្រះយេស៊ូវគ្រីស្ទ នឹងដកយកចេញនូវអំពើបាបរបស់បងប្អូន និងស្នាមប្រឡាក់នៃអំពើបាបទាំងនោះនៅក្នុងខ្លួនបងប្អូន នោះការល្បួងនឹងបាត់បង់ភាពទាក់ទាញរបស់វា ហើយតាមរយៈព្រះគ្រីស្ទ បងប្អូននឹងបានបរិសុទ្ធដូចជាទ្រង់ និងព្រះវរបិតារបស់យើងដែលបរិសុទ្ធផងដែរ ។( « Born Again » Liahona ខែ ឧសភា ឆ្នាំ ២០០៨ ទំព័រ ៧៨ )
ប្រធាន បូនី អិល អូស្ការសុន អតីតប្រធានយុវនារីទូទៅ បានបង្រៀន ៖
យើងទាំងអស់គ្នាចាំបាច់ត្រូវព្យាយាមដើម្បីធ្វើឲ្យដួងចិត្ត និងនិស្ស័យរបស់យើងបានផ្លាស់ប្ដូរ ដើម្បីយើងឈប់មានបំណងធ្វើតាមផ្លូវរបស់លោកិយ ប៉ុន្ដែដើម្បីធ្វើឲ្យព្រះសព្វព្រះទ័យវិញ ។ ការប្រែចិត្តជឿពិត គឺជាដំណើរការមួយដែលត្រូវការពេលវេលា ហើយទាក់ទងនឹងការស្ម័គ្រចិត្តដើម្បីអនុវត្តសេចក្ដីជំនឿ ។ … វាត្រូវការនូវភាពខ្ជាប់ខ្ជួន និងកិច្ចខិតខំប្រចាំថ្ងៃ ។( « Do I Believe? » Liahona ខែ ឧសភា ឆ្នាំ ២០១៦ ទំព័រ ៨៨ )
កត់ត្រាគំនិតរបស់អ្នក
សូមពិចារណាមើល វីដេអូ « The People of King Benjamin Make a Covenant (Mosiah 5) » (3:41) ហើយបន្ទាប់មកកត់ត្រាការប្តេជ្ញាចិត្តផ្ទាល់ខ្លួនដែលអ្នកអាចធ្វើដើម្បីបន្តនៅលើផ្លូវនៃការប្រែចិត្តជឿ ។
ផ្នែកទី ២
តើខ្ញុំអាចបង្ហាញព្រះអម្ចាស់ថា ខ្ញុំពិតជាចង់មានការផ្លាស់ប្ដូរដួងចិត្តដោយរបៀបណា ?
សូមពិចារណាពីអ្វីដែលយើងអាចរៀនមកពីគំរូរបស់ អាន់តៃ-នីហ្វៃ-លីហៃ អំពីការមានបំណងនៅក្នុងកិច្ចខិតខំរបស់យើងដើម្បីទទួលបាន និងបន្ដមានការផ្លាស់ប្ដូរយ៉ាងធំនៅក្នុងចិត្ត ។ អតីតពួកសាសន៍លេមិនទាំងនេះធ្លាប់ « ព្រៃផ្សៃ រឹងរូស និងសាហាវ ជាប្រជាជនមួយដែលចូលចិត្តក្នុងការធ្វើឃាតកម្មដល់ពួកនីហ្វៃ និងការលួចប្លន់គេ » ( អាលម៉ា ១៧:១៤ ) ។ ប៉ុន្ដែពួកសាសន៍អាន់តៃ-នីហ្វៃ-លីហៃ នៅតែបានទទួលដំណឹងល្អរបស់ព្រះយេស៊ូវគ្រីស្ទ នៅពេលពួកគេត្រូវបានបង្រៀនដោយអាំម៉ូន និងបងប្អូនប្រុសរបស់លោក ហើយមនុស្សជាច្រើនបាន « ប្រែចិត្តជឿដល់ព្រះអម្ចាស់ នោះពួកគេពុំបោះបង់ចោល សាសនាឡើយ » ( អាលម៉ា ២៣:៦ ) ។
ការសិក្សានៅក្នុងរៀបចំសម្រាប់ថ្នាក់រៀន
សូមអាន អាលម៉ា ២៤:៩–១១, ១៥, ១៩ ដោយរកមើលអ្វីដែលពួកសាសន៍អាន់តៃ-នីហ្វៃ-លីហៃ បានធ្វើដើម្បីពង្រឹងការប្រែចិត្តជឿរបស់ពួកគេលើព្រះអម្ចាស់ ។
ដោយថ្លែងពីការផ្លាស់ប្ដូរយ៉ាងធំនៅក្នុងចិត្តដែលប្រជាជនបានដកពិសោធន៍ អែលឌើរ បែដណា បានប្រឹក្សាដូច្នេះ ៖
ការទុកចោលនូវ « គ្រឿងសស្ត្រាវុធនៃការបះបោរ » ជាទីពេញចិត្ត ដូចជាភាពអាត្មានិយម ការឆ្មើងឆ្មៃ និងការមិនគោរពប្រតិបត្តិ ទាមទារឲ្យមានច្រើនជាងគ្រាន់តែការជឿ និងការដឹង ។ ការជឿស៊ប់ ការបន្ទាបខ្លួន ការប្រែចិត្ត និងការព្រមស្ដាប់តាម ត្រូវមកមុនការទម្លាក់គ្រឿងសស្ត្រាវុធនៃការបះបោររបស់យើងចោល ។ តើអ្នក និងរូបខ្ញុំនៅតែជាម្ចាស់នៃគ្រឿងសស្ត្រាវុធ ដែលរារាំងមិនឲ្យយើងបានប្រែចិត្តជឿដល់ព្រះអម្ចាស់ដែរឬទេ ? បើដូច្នោះ នោះយើងត្រូវតែប្រែចិត្តឥឡូវនេះ ។( « Converted unto the Lord » Liahona ខែ វិច្ឆិកា ឆ្នាំ ២០១២ ទំព័រ ១០៨–៩ )
សញ្ជឹងគិតនៅក្នុងការរៀបចំសម្រាប់ថ្នាក់រៀន
តើមាន « គ្រឿងសស្ត្រាវុធនៃការបះបោរ » អ្វីខ្លះ ដែលអាចរារាំងអ្នកមិនឲ្យដកពិសោធន៍នូវការផ្លាស់ប្ដូរដួងចិត្តបាន ?