Mga Tabang sa Kasulatan
Pasiuna

Mga Tabang sa Kasulatan: Daang Tugon

Pasiuna

Kini nga kapanguhaan gidesinyo sa pagtabang sa mga tigkat-on nga mas masabtan ang Daang Tugon. Tumong niini nga tabangan ang pagtuon sa kasulatan—dili aron pulihan kini. Gihatag niini ang mosunod nga mga tabang:

  • Impormasyon sa gigikanan. Makasaysayanon, pang-kultura, ug geograpikanhong mga panabot nga naghatag og konteksto sa mga istorya, mga pagtulun-an, ug doktrina sa mga kasulatan.

  • Mga pagpasabot sa pinulongan. Mga katin-awan sa malisod nga mga pulong, mga karaang ekspresyon, ug makalibog nga mga hubad.

  • Tabang sa mga lisod o makalibog nga mga tudling. Mga kasulatan sa Pagpahiuli, mga pulong sa modernong mga propeta ug apostoles, ug kasaligan nga iskolar aron sa pagtabang sa pagklaro sa kahulogan sa lisod nga mga tudling.

  • Mga pakigpulong ug mga artikulo. Usa ka “Pagkat-on og Dugang” nga seksiyon nga adunay mga mensahe gikan sa mga lider sa Simbahan ug mga artikulo nga gihimo sa Simbahan nga may kalabotan sa mga istorya ug mga pagtulun-an nga makita diha sa mga kasulatan.

  • Media. Mga hulagway ug mga video nga makatabang sa mga magbabasa sa paghanduraw ug pagsabot sa kahimtang, mga butang, simbolismo, ug mga istorya sa mga kasulatan.

Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.

Samtang nagtinguha kamo nga mas masabtan ang Daang Tugon, hinumdomi ang kaimportante sa pagtuon kon unsay gitudlo sa buhing mga propeta ug apostoles sa Manluluwas. Samtang kamo magtuon, tinguhaa ang pagkat-on kon sa unsang paagi nga ang mga sulugoon sa Ginoo mohubad, mopasabot, ug mogamit sa mga kasulatan (tan-awa ang “Paggamit sa mga Pagtulun-an sa mga Lider sa Simbahan aron sa Pagsabot sa mga Kasulatan” diha sa Mga Kahanas sa Pagtuon sa Kasulatan).

Sugdi ang imong pagtuon sa mga kasulatan pinaagi sa pag-ampo. Pangayoa ang giya sa Espiritu Santo, nga importante sa inyong pagpangita sa kamatuoran. Isip usa ka sakop sa Dios nga Kapangulohan, ang Espiritu Santo nagpamatuod sa Amahan ug sa Anak, nagtudlo sa kamatuoran, ug nagbalaan kanato. Ang Espiritu nagdala og mga butang sa atong panumdoman, naghatag og kahupayan, mipuno kanato og paglaom, ug nagpakita kanato kon unsaon sa paggamit sa unsay atong nakat-onan.