Mga Tabang sa Kasulatan: Daang Tugon

Pagtuon sa Daang Tugon

Mga Kapanguhaan

• Unsay makatabang nako nga masabtan ang Daang Tugon?

• Pagkat-on og Dugang

Pahinumdom: Ang pagkutlo sa tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw diha sa mga endnote wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.

Unsay makatabang nako nga masabtan ang Daang Tugon?

Ang Daang Tugon adunay sukaranang mga pagtulun-an bahin sa Dios, sa Iyang plano sa kaluwasan, ug sa pakigsaad sa relasyon nga iyang gitinguha uban sa kada usa nato. Pero, posibleng lisod tingali sabton ang pipila ka aspeto sa Daang Tugon tungod sa kalainan sa panahon ug kultura tali sa karaang panahon ug karon. Ang mosunod nga mga baroganan ug sugyot makatabang nimo nga masabtan ug magamit samtang magtuon ka sa Daang Tugon.

Tinguhaa ang giya sa Espiritu Santo

Ang Espiritu Santo mao ang usa ka magtutudlo ug tigpadayag. Pinaagi sa Espiritu, mabuksan sa Dios ang atong pagsabot ug matabangan kita sa pagkahibalo sa kamatuoran. Mainampoong magtinguha nga makauban ang Espiritu Santo samtang kamo magtuon. Samtang inyo nang buhaton, molawom ang inyong pagsabot sa Daang Tugon.

Pangitaa si Jesukristo

Ang Daang Tugon nagpamatuod kang Jesukristo. Kini naglangkob sa mga panagna sa Iyang mortal nga pagpangalagad, maulaong sakripisyo, ug ang Ikaduhang Pag-anhi. Pinaagi sa mga gibuhat ug mga pulong ni Jehova diha sa Daang Tugon, makakat-on kita sa Iyang kinaiya, mga hiyas, ug mga pagtulun-an. Makaplagan usab nato ang mga simbolo nga nagpamatuod Niya. Klaro ang kadaghanan niini nga mga simbolo, ug ang uban dili kaayo klaro. Samtang magtuon ka sa Daang Tugon, bantayi kon unsay imong nakat-onan bahin kang Jesukristo. Pwede kamong mas mapaduol Niya samtang magkat-on kamo bahin sa Iyang gugma, kaluoy, ug gahom diha sa kinabuhi sa mga tawo sa karaang panahon.

Adam and Eve Offering Sacrifices [Si Adan ug Eva nga Nagtanyag og mga Halad], ni Keith Larson

Gamita ang kasulatan sa Pagpahiuli

Sa atong dispensasyon, gipanalanginan kita sa Ginoo og daghang kasulatan nga nagsuporta ug nagklaro sa mga pagtulun-an sa Daang Tugon. Pananglitan, ang Basahon ni Mormon naglangkob sa daghang pakisayran ug pagkutlo gikan sa Daang Tugon. Giklaro sa dinasig nga hubad ni Propeta Joseph Smith sa Biblia ang daghang tudling sa Daang Tugon. Ang mga basahon ni Moises ug Abraham diha sa Perlas nga Labing Bililhon adunay mga detalye ug doktrinal nga mga panabot nga wala marekord sa Genesis. Ug pipila sa mga pagpadayag ni Joseph Smith ang narekord sa Doktrina ug mga Pakigsaad nagpatin-aw ug nagklaro usab sa mga tudling sa Daang Tugon.

Ang paggamit sa mga kasulatan sa Pagpahiuli makatabang ninyo nga mas masabtan ang Daang Tugon ug ang kaimportante sa mensahe niini.

Gamita ang mga tabang sa pagtuon sa kasulatan

Ang mga edisyon sa Biblia sa mga Santos sa Ulahing mga Adlaw naay mapuslanong mga himan aron masabtan ang Daang Tugon. Kini naglakip sa mga ulohan sa kapitulo, mga footnote, ug Giya ngadto sa mga Kasulatan, Bible Dictionary, ug mga mapa. Ang Gospel Library app usab adunay “Define” nga feature para sa tabang sa pagsabot sa kahulogan sa mga pulong.

Ang mosunod nga mga kapanguhaan makita diha sa mga footnote sa mga edisyon sa Daang Tugon sa mga Santos sa Ulahing mga Adlaw:

• Hubad ni Joseph Smith (HJS). Mga piniling bahin gikan sa Hubad ni Joseph Smith sa Biblia. Daghan sa mas mugbong rebisyon sa Propeta ang naa sa mga footnote, samtang ang mas tag-as nga piniling mga bahin naa sa Joseph Smith Translation Appendix (found in Study Helps in the Scriptures collection of Gospel Library).

Hinumdomi ang katuyoan sa kasulatan

Dili tuyo sa mga magsusulat sa Daang Tugon nga maghatag og komprehensibo nga makasaysayanong asoy sa ilang mga sinulat. Ang ilang tuyo mao ang pagtudlo mahitungod sa Dios ug sa Iyang interaksiyon sa Iyang katawhan. Si Elder D. Todd Christofferson mitudlo, “Ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo—hugot nga pagtuo nga Sila anaa; hugot nga pagtuo nga ang plano sa Amahan alang sa atong pagka-imortal ug kinabuhi nga dayon, hugot nga pagtuo sa Pag-ula ug Pagkabanhaw ni Jesukristo, nga mipalihok niining plano sa kalipay; hugot nga pagtuo sa paghimo sa ebanghelyo ni Jesukristo nga atong pamaagi sa kinabuhi; ug hugot nga pagtuo nga makaila ‘sa bugtong tinuod nga Dios, ug kang Jesukristo, nga [Iyang] pinadala’ (Juan 17:3).”

Hinumdomi ang panglantaw sa tagsulat

Kay lahi ang kalibotan nga atong gipuy-an kay sa niadtong mga magsusulat sa Daang Tugon, nasayop tingali kita sa paggamit sa kaugalingon natong modernong panglantaw ug kultural nga mga sumbanan diha sa atong gibasa. Moresulta kini sa mga dili pagsinabtanay. Paningkamoti nga lantawon ang imong gibasa base sa panglantaw sa dinasig nga mga tagsulat diha sa orihinal nga konteksto niini.

Para sa dugang mga ideya aron matabangan kamong tun-an ang mga kasulatan, tan-awa ang mga hilisgotan nga gihisgotan sa Mga Kahanas sa Pagtuon sa Kasulatan (2025).

Pagkat-on og Dugang

• Gary J. Coleman, “The Book of Mormon: A Guide for the Old Testament,” Ensign, Ene. 2002, 45–49

• Marissa Widdison, “Pagpangita ni Jesukristo diha sa Daang Tugon,” Liahona, Ene. 2022, 12–17

• David R. Seely, “Pagpangita kang Kristo ug sa mga Pakigsaad: Mga Mahinungdanong Paagi ni Nephi sa Pagbasa sa Daang Tugon” (digital lamang nga artikulo), Liahona, Ene. 2022

• Mark L. Pace, “Ang mga Panalangin sa Pagtuon sa Daang Tugon,” Liahona, Ene. 2022, 43–45

• Donald W. Parry, “Ang Pag-ula ni Jesukristo diha sa Daang Tugon,” Liahona, Abr. 2022, 42–43

Mubo nga mga Sulat

1. Tan-awa ang Richard Neitzel Holzapfel ug uban pa, Jehovah and the World of the Old Testament: An Illustrated Reference for Latter-day Saints (2009), 3.

2. Tan-awa ang Juan 14:26; Alma 5:46.

3. Tan-awa ang Alma 32:28; Moroni 10:5; Doktrina ug mga Pakigsaad 11:12–13.

4. 2 Nephi 25:4.

5. Tan-awa ang Lucas 24:25–27; Juan 5:39; 1 Nephi 19:23; 2 Nephi 11:4.

6. Para sa mga ehemplo, tan-awa ang Gary J. Coleman, “The Book of Mormon: A Guide for the Old Testament,” Ensign, Ene. 2002, 45–49.

7. Ang mga ehemplo naglakip sa Doktrina ug mga Pakigsaad 2; 65; 84:5–39; 107:40–57; 113; 116; 132:34–39. Daghang uban pang pagpadayag nga narekord diha sa Doktrina ug mga Pakigsaad naggamit og mga pulong sa Daang Tugon (tan-awa ang Nicholas J. Frederick, “Old Wine in New Bottles: Exploring the Use of the Old Testament in the Doctrine and Covenants,” diha sa Prophets and Prophecies of the Old Testament, ed. Aaron P. Schade ug uban pa [2017], 231–64).

8. D. Todd Christofferson, “Ang Panalangin sa Kasulatan,” Liahona, Mayo 2010, 34.

9. Si Matthew J. Grow, usa ka tigsaysay [historian] sa Simbahan, miingon: “Isip historian, naningkamot kong sundon ang tambag sa usa ka British nga nobelista. Miingon siya, “Ang nangagi usa ka langyaw nga nasod: lahi ang ilang gipanghimo didto” (L. P. Hartley, The Go-Between [1953], prologue). Nagpasabot kana nga kon mobisita kita sa nangagi, dili nato gusto nga mahimong ‘ngil-ad nga turista.’ Gusto natong masabtan ang mga tawo sa ilang kaugalingong konteksto ug sa ilang kaugalingong kultura. Gusto natong magmapailobon sa unsay atong nakita nga ilang mga sayop. Gusto natong magmapainubsanon mahitungod sa mga limitasyon sa atong kaugalingong kahibalo. Ug gusto natong adunay diwa sa gugmang putli bahin sa nangagi.” (“Unsaon nato pagkahibalo kon kasaligan ang usa ka tinubdan mahitungod sa kasaysayan sa Simbahan?,” diha sa Quentin L. Cook, “Kasaysayan sa Simbahan: Usa ka Tinubdan sa Kalig-on ug Inspirasyon,” Liahona, Hulyo 2020, 12).