Genesis 37–41

Si Jose gipaboran sa Ginoo ug sa iyang amahan nga si Jacob, apan nasuko kaniya ang iyang mga igsoong lalaki. Gibaligya si Jose sa iyang mga igsoon ngadto ni Potifar sa Ehipto. Ang Ginoo nag-uban ni Jose diha sa iyang mga kasakit. Miuswag siya sa panimalay ni Potifar hangtod nga sayop siyang giakusahan ug gipriso. Miuswag si Jose diha sa prisohan ug gihubad niya ang mga damgo sa mayordomo ug magbubuhat sa tinapay sa Paraon. Dayon, gihubad ni Jose ang mga damgo sa Paraon mismo, nga nagpasidaan sa umaabot nga gutom. Gihimo sa Paraon si Jose nga magmamando sa Ehipto, ug gipatuman ni Jose ang usa ka plano sa pagpondo og pagkaon ingon nga pagpangandam sa gutom.

Mga Kapanguhaan

Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.

Background ug Konteksto

Genesis 37–45

Sa unsang paagi si Jose susama ni Jesukristo?

Daghang aspeto sa kinabuhi ni Jose ang magpahinumdom nato ni Jesukristo. Ang mosunod mao ang pipila ka mga ehemplo:

Mga tudling bahin ni Jose	Mga kaparehas ni Jose ug ni Jesukristo	Mga tudling bahin ni Jesukristo
Mga tudling bahin ni Jose Genesis 37:3	Mga kaparehas ni Jose ug ni Jesukristo Sila minahal nga mga anak.	Mga tudling bahin ni Jesukristo Mateo 3:17; Moises 4:2
Mga tudling bahin ni Jose Genesis 37:4	Mga kaparehas ni Jose ug ni Jesukristo Gisalikway sila sa pipila sa ubang anak sa ilang amahan.	Mga tudling bahin ni Jesukristo Isaias 53:3; Juan 1:11
Mga tudling bahin ni Jose Genesis 37:18	Mga kaparehas ni Jose ug ni Jesukristo Nagkahiusa ang mga nagkunsabo nga mga tawo batok kanila.	Mga tudling bahin ni Jesukristo Mateo 26:3–4
Mga tudling bahin ni Jose Genesis 37:23	Mga kaparehas ni Jose ug ni Jesukristo Gihuboan sila sa ilang besti.	Mga tudling bahin ni Jesukristo Mateo 27:28
Mga tudling bahin ni Jose Genesis 37:26	Mga kaparehas ni Jose ug ni Jesukristo Gitraydor sila sa mga tawo nga ginganlag Judah (“Judas” ang Gregong katumbas sa Hebreohanong ngalan nga Judah).	Mga tudling bahin ni Jesukristo Mateo 27:3
Mga tudling bahin ni Jose Genesis 37:28	Mga kaparehas ni Jose ug ni Jesukristo Gibaligya sila sa presyo sa ulipon sa ilang panahon—si Jose para sa 20 ka pirasong plata ug si Kristo sa 30.	Mga tudling bahin ni Jesukristo Mateo 27:3
Mga tudling bahin ni Jose Genesis 37:29	Mga kaparehas ni Jose ug ni Jesukristo Si Jose gipangita sa iyang magulang nga lalaki diha sa gahong nga walay sulod; si Kristo gipangita sa iyang mas senyor nga Apostol diha sa walay sulod nga lubnganan.	Mga tudling bahin ni Jesukristo Juan 20:3–6
Mga tudling bahin ni Jose Genesis 39:10	Mga kaparehas ni Jose ug ni Jesukristo Nabuntog nila ang dakong tentasyon.	Mga tudling bahin ni Jesukristo Mga Hebreohanon 4:15; Doktrina ug mga Pakigsaad 20:22
Mga tudling bahin ni Jose Genesis 39:12–18	Mga kaparehas ni Jose ug ni Jesukristo Sayop silang giakusahan og pagkadaotan.	Mga tudling bahin ni Jesukristo Mateo 26:59
Mga tudling bahin ni Jose Genesis 40:8; 41:16	Mga kaparehas ni Jose ug ni Jesukristo Ilang gihatag sa Dios ang himaya para sa mga butang nga ilang gihimo.	Mga tudling bahin ni Jesukristo Juan 8:28–29
Mga tudling bahin ni Jose Genesis 42:8; 45:3–5	Mga kaparehas ni Jose ug ni Jesukristo Wala sila mailhi niadtong nakaila unta nila.	Mga tudling bahin ni Jesukristo Juan 6:42
Mga tudling bahin ni Jose Genesis 45:1–5	Mga kaparehas ni Jose ug ni Jesukristo Gipaila ni Jose ang iyang kaugalingon ngadto sa iyang mga igsoon dihang mibalik sila sa ikaduhang higayon. Ipaila ni Jesukristo ang Iyang kaugalingon ngadto sa kalibotan sa Iyang Ikaduhang Pag-anhi.	Mga tudling bahin ni Jesukristo Mateo 24:30–31; Doktrina ug mga Pakigsaad 45:51–53
Mga tudling bahin ni Jose Genesis 45:3–5	Mga kaparehas ni Jose ug ni Jesukristo Kinabubut-on nilang gipasaylo kadtong naghinulsol.	Mga tudling bahin ni Jesukristo Mosiah 26:30
Mga tudling bahin ni Jose Genesis 42:35; 45:7	Mga kaparehas ni Jose ug ni Jesukristo Sila mga manluluwas sa ilang katawhan og gihatagan kinig makaluwas nga tinapay.	Mga tudling bahin ni Jesukristo Juan 4:42; 6:35, 51; Alma 5:34

Genesis 37:3

Unsa ang kupo nga gihatag ngadto ni Jose?

Ang Hebreohanong pulong nga gihubad nga “kupo” diha sa King James Version sa Biblia pwede usab kining magtumong sa “sinina,” “kupo,” o “tunic.” Gisugyot sa mga iskolar nga ang hugpong sa mga pulong nga “kupo nga daghan og kolor” naghulagway tingali sa binurdahan nga sinina nga moabot sa mga palad ug mga tiil. Posibleng nadawat ni Jose kini nga kupo aron ipakita ang iyang tahas ingon nga anak ni Jacob nga naay katungod sa pagkamagulang. Ang bisti ni Jose, apil ang iyang mga damgo ug ang pagdapig sa iyang amahan, nakadugang sa kasina sa iyang mga igsoon ngadto kaniya.

Genesis 37:3, 23

Unsay gitudlo sa Basahon ni Mormon bahin sa kupo ni Jose?

Sa Basahon ni Mormon, si Kapitan Moroni naghatag og dugang impormasyon bahin sa kupo ni Jose nga wala marekord diha sa Biblia. Iyang gipasabot nga gigisi sa mga igsoon ni Jose ang iyang kupo ug nga ang usa sa mga piraso niini gitipigan. Ang amahan ni Jose nga si Jacob sa kaulahian nanagna nga ang nahibiling parte sa kupo ni Jose nagsimbolo sa nahibilin sa binhi ni Jose nga tipigan sa Dios. Ang mga Nephita ug Lamanita diha sa Basahon ni Mormon mao ang mga “salin sa binhi ni Jose.” Ang Ginoo misaad nga ang kaliwatan ni Jose “dili gayod mangamatay samtang magbarog pa ang kalibotan.”

Igsoong mga lalaki ni Jose mikuha sa iyang kupo — Paghulagway sa igsoong mga lalaki ni Jose nga mikuha sa iyang kupo, ni Sam Lawlor

Genesis 37:34

Nganong gigisi ni Jacob ang iyang kupo ug nagsul-ob og bisting sako?

Ang mga tawo sa Daang Tugon sagad maghimog tradisyonal nga mga buhat o sinyales aron ipahayag ang grabeng kaguol. Gigisi ni Jacob ang iyang kupo ug nagsul-ob og bisting sako dihang nagtuo siya nga namatay si Jose. Ang bisting sako maoy gaspangon nga materyal nga gama sa balhibo sa kanding o kamelyo nga suoton panahon sa pagbangotan o paghinulsol. Ang pagsul-ob og bisting sako sagad ubanan og paggisi sa sapot sa usa ka tawo.

Genesis 38:6–30

Unsay atong nasabtan bahin sa nahitabo tali ni Juda ug Tamar?

Gisunod sa karaang mga Israelita ang kustombre sa kaminyoon nga nailhan ingon nga “levirate nga kaminyoon.” Ang Levir maoy Latin para sa “igsoong lalaki sa bana.” Sumala niini nga balaod sa kustombre, ang walay anak nga biyuda naay katungod nga pakaslan sa nagsunod nga kamagulangang igsoon nga lalaki sa iyang bana o ang kinaduolang lalaki nga paryente sa bana. Ang matawo nga mga bata niini nga levirate nga mga kaminyoon padakoon para sa namatayng bana sa biyuda ug maisip nga anak sa namatay, dili sa buhi nga igsoon sa bana. Ang levirate nga mga kaminyoon nagseguro usab sa gikinahanglang suporta para sa biyuda ug sa panulundon sulod sa pamilya.

Human mamatay ang unang duha ka bana ni Tamar—ang kamagulangang mga anak ni Juda—misaad si Juda nga mabana niya ang iyang ikatulong anak nga lalaki nga si Shela inigkadako na niini. Dihang wala tumana ni Juda ang iyang saad, nangilad si Tamar aron mamabdos siyag anak ni Juda. Ang kustombre sa levirate nga kaminyoon magtugot unta ni Juda nga minyoan si Tamar kon dili niini pwedeng minyoan ang bisan kinsa sa iyang mga anak.

Lagmit nahibalo si Tamar nga naay sersyosong mga sangpotanan ang iyang mga buhat. Dihang mimando si Juda nga sunogon si Tamar human niya mahibaloi nga mabdos kini, gigamit ni Tamar ang timbri, mga pulseras, ug sungkod nga gihatag ni Juda kaniya ingon nga ebidensiya nga siya ang amahan. Giangkon ni Juda ang iyang sala ug miingon, “Ako ang sad-an.” Naluwas ang kinabuhi ni Tamar ug nanganak siyag kaluha nga batang lalaki. Pinaagi sa iyang anak nga si Perez, si Tamar nahimong katigulangan ni Jesukristo.

Genesis 41:1

Unsa ka dugay nga napriso si Jose?

Duha ka tuig nga napriso si Jose human niya hubara ang damgo sa mayordomo ug magbubuhat sa tinapay. Gibaligya siya sa pagkaulipon dihang mga 17 anyos siya, ug 30 anyos siya dihang gitudlo sa Paraon nga mahimong ikaduhang komandante sa Ehipto. Sa kinatibuk-an, migahin siyag mga 13 ka tuig sa panimalay ni Potifar ug sa prisohan. Wala gisulti sa rekord kon unsa kadugay nagserbisyo si Jose kang Potifar sa wala pa siya napriso, apan ang kamatuoran nga nahimo pa siyang tigdumala sa prisohan nagpakita nga midangat pag pipila ka panahon una niya nakauban ang mayordomo ug magbubuhat sa tinapay. Posibleng napriso si Jose og mga tulo ka tuig o kapin pa.

paghulagway ni Jose sa Ehipto diha sa prisohan — Joseph of Egypt in Prison [Jose sa Ehipto Napriso], ni Jeff Ward

Genesis 41:2–5

Unsa ang kine ug mais?

Ang kine maoy laing pulong para sa “baka,” ug ang pulong “uhay sa mais” gigamit sa pagrepresentar sa lainlaing klase sa lugas, sama sa trigo ug sebada.

Genesis 41:45

Unsay kahulogan sa Ehiptohanong ngalan ni Jose?

Dili klaro kon unsay ipasabot sa Ehiptohanon sa ngalang Zaphnath-paaneah. Ang uban nagsugyot nga apil sa kahulogan ang “tigpadayag sa natago” o “ang Dios nagsulti ug buhi.”