“Genesis 5; Moises 6,” Mga Tabang sa Kasulatan: Daang Tugon (2025)
Mga Tabang sa Kasulatan
Genesis 5; Moises 6
Naghimo og rekord ang kaliwatan ni Adan sa ilang nadawat nga mga pagpadayag ug kagikan. Daghan sa kaliwat ni Adan ang nahimong daotan. Gitawag sa Ginoo si Enoch aron mahimong propeta ug sa pagsangyaw sa paghinulsol. Walay salig si Enoch sa iyang mga abilidad, pero misaad ang Ginoo nga tabangan siya. Nahimong bantogang propeta si Enoch diha sa yuta. Iyang gitudloan ang mga tawo kon nganong nagkinahanglan sila og Manluluwas og kon sa unsang paagi sila moduol Niya. Iyang gipatin-aw nga human makakat-on si Adan bahin sa plano sa kaluwasan, siya nabunyagan ug nakasinati og espirituwal nga pagkatawo pag-usab.
Mga Kapanguhaan
Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.
Background ug Konteksto
Unsa ka dugay na ang pagkapari dinhi sa yuta?
Ang pagkapari “walay sinugdanan sa mga panahon o katapusan sa mga katuigan.” Ang pagkapari—ug ang mga ordinansa niini—anaa ngadto ni Adan, Eva, ug sa ilang matarong nga kaliwat. Si Propeta Joseph Smith mitudlo: “Ang Pagkapari unang gihatag ngadto ni Adan; naangkon niya ang Unang Kapangulohan, ug naghupot sa mga yawe niini gikan sa henerasyon ngadto sa henerasyon. Naangkon niya kini didto sa Paglalang, sa wala pa maporma ang kalibutan. … Ang Pagkapari usa ka mahangtorong baroganan, ug diha uban sa Dios gikan sa kahangtoran, ug hangtod sa kahangtoran nga walay sinugdanan sa mga panahon o kataposan sa mga katuigan.”
Genesis 5:3–32; Moises 6:10–24
Nabuhi ba gyod ang mga patriyarka sa karaan sulod sa ginatos ka katuigan?
Girekord sa Biblia nga si Adan ug ang pipila sa iyang kaliwat tag-as kaayo og kinabuhi. Wala klarong gipasabot sa mga kasulatan ang rason kon nganong tag-as silag kinabuhi. Human sa asoy sa Lunop, makita sa rekord nga nagkaubos ang mga edad sa mga tawo sa nagsunod nga mga henerasyon hangtod nga naabot kini sa edad nga atong nailhan karon. Kining tag-as nga mga kinabuhi narekord usab sa Doktrina ug mga Pakigsaad 107:41–52. Dihang gihimo ni Joseph Smith ang iyang bag-ong hubad sa Biblia, giusab niya ang pipila sa mga edad sa mga patriyarka pero gipabilin ang ilang talagsaong taas nga mga kinabuhi.
Genesis 5:19–24; Moises 6:26
Unsay atong makat-onan bahin sa pagpangalagad ni Enoch gikan ni Joseph Smith?
Ang pagpangalagad ni Enoch mas mahinungdanon kay sa gihulagway sa Biblia. Sa Genesis 5, atong nakat-onan nga si “Enoch naglakaw uban sa Dios: ug nawala siya; kay gikuha siya sa Dios.” Giklaro sa basahon sa mga Hebreohanon nga si Enoch nahimaya. Ug girekord sa Judas ang mubong panaagna nga gihimo ni Enoch.
Samtang gitrabaho ni Propeta Joseph Smith ang iyang dinasig nga hubad sa Biblia, gipadayag sa Ginoo kaniya ang daghang importanteng detalye bahin kang Enoch. Apil niini nga mga detalye, nga narekord sa Moises 6–7, ang calling ni Enoch nga mahimong propeta, iyang pagsangyaw, ang siyudad nga Zion nga iyang gitukod, ug ang iyang mga panan-awon, mga panagna, ug dinasig nga mga pagtulun-an.
Unsay ipasabot sa “magpuyo” ug “maglakaw uban” sa Dios?
Human gipahayag ni Enoch ang iyang mga kabalaka bahin sa iyang abilidad sa paghimo sa gihangyo sa Dios kaniya, gidapit sa Ginoo si Enoch nga “magpuyo” Kaniya ug “maglakaw uban” Kaniya. Gihulagway ni Elder David A. Bednar ang kahulogan niining duha ka pagdapit:
“Ang pulong nga magpuyo nagpasabot nga dili matarog o lig-on ug molahutay nga dili magpadaog. Si Elder Jeffrey R. Holland mipasabot nga ang ‘magpuyo’ isip usa ka aksiyon nagpasabot “‘[sa] pagpabilin—apan [sa] pagpabilin sa kahangtoran.” Kana mao ang awhag sa mensahe sa ebanghelyo ngadto sa … tanan … sa kalibotan. Duol, apan moduol aron sa pagpabilin. Duol uban sa konbiksyon ug paglahutay. Duol hangtud sa hangtud, alang kaninyo ug alang sa kaayohan sa tanang kaliwatan nga mosunod kaninyo.’ Sa ingon, kita magpuyo diha ni Kristo samtang kita lig-on ug makanunayon sa atong debosyon ngadto sa Manunubos ug sa Iyang balaan nga mga katuyoan, sa mga panahon nga maayo ug dili maayo. …
“Kita kinahanglan mahinumdom kanunay sa panudlo sa Ginoo ngadto ni Enoch, “Ikaw magpuyo ngari kanako, ug ako nganha kanimo’ [Moises 6:34]. Ug ako mopamatuod sa saad sa Manluluwas nga magpuyo nganhi kanato mao ang tinuod ug gikinahanglan sa matag miyembro nga nagtuman sa pakigsaad sa Iyang gipahiuli nga Simbahan. …
“Ang pagkinabuhi diha ug uban sa Manluluwas nagpatigbabaw sa duha ka importante nga mga aspeto sa pagkadisipulo: (1) pagsunod sa mga sugo sa Dios, ug (2) paghinumdom ug pagtahod sa sagrado nga mga pakigsaad nga nagkonektar nato ngadto sa Amahan ug sa Anak.”
Unsay nahitabo kang Enoch human niya dihogi ang iyang mga mata og lapok?
Human sunda ang instruksiyon sa Ginoo nga dihogan ang iyang mga mata og lapok, nakita ni Enoch ang “mga butang nga dili makita sa kinaiyanhon nga mata.” Gipanalanginan sa Ginoo si Enoch og gasa sa pagkamanalagna. Ang manalagna mao ang “usa ka tawo nga gihatagan og katungod sa Dios sa pagtan-aw uban sa espirituhanon nga mga mata sa mga butang nga gitago sa Dios gikan sa kalibutan. Siya usa ka tigpadayag ug usa ka propeta.”
Ingon nga manalagna, nakita ni Enoch ang “tanan nga mga butang, gani ngadto sa kinatumyan sa kalibutan.” Sa Simbahan karon, ang Unang Kapangulohan ug ang Kurom sa Napulog Duha ka Apostoles gipaluyohan isip mga propeta, manalagna, ug mga tigpadayag.
A Seer Hath the Lord Raised Up [Ang Manalagna nga Gipatindog sa Ginoo], ni Eva Timothy
Sa unsang paagi kita maapektohan sa Pagkapukan?
Si Enoch mitudlo nga gipangutana ni Adan ang Dios kon nganong kinahanglang maghinulsol ug mabunyagan ang tanang tawo. Ingon nga tubag, gitudloan sa Dios si Adan og importanteng mga kamatuoran nga nagpasabot kon sa unsang paagi ang Pagkapukan makaapektar sa kaliwat ni Adan ug Eva.
Una, giklaro sa Dios nga dili lang kay basta mapasaylo ang kalapasan ni Adan ug Eva diha sa Tanaman sa Eden, apan usab mapasa ngadto sa ilang mga anak ang mga sangpotanan sa ilang mga sala. Gisubli ni Propeta Joseph Smith kini nga kamatuoran dihang siya mitudlo, “Kami nagtuo nga ang mga tawo pagasilotan sa ilang kaugalingon nga mga sala, ug dili tungod sa mga kalapasan ni Adan.”
Gitudloan usab sa Dios si Adan nga ang iyang kaliwat “gipanamkon diha sa sala,” (o “ipakatawo sa kalibotan sa sala”). Ingon nga mortal nga mga tawo nga nagpuyo sa napukan nga kalibotan, makasala ta, nga nakapahimo natong hugaw ug nagbulag nato gikan sa Dios. Samtang kini nga kasinatian mohatag natog kahigayonan “masayud sa paghatag og bili sa maayo” human kita “motilaw sa kapait,” kinahanglan usab kitang mahinloan sa atong mga sala pinaagi ni Jesukristo, kay “walay mahugaw nga butang nga makapuyo didto, o makapuyo sa iyang atubangan” sa presensya sa Dios.
Gisugo sa Dios si Adan nga tudloan ang iyang mga anak nga maghinulsol, magpabunyag, ug dawaton ang Espiritu Santo aron sila mabalaan gikan sa ilang mga sala pinaagi ni Jesukristo. Ang Dios mipahayag, “Kini mao ang laraw sa kaluwasan ngadto sa tanan nga mga tawo, pinaagi sa dugo sa akong Bugtong Anak.”
Unsay kalabotan mahitungod sa ngalan ni Jesukristo?
Pagkutlo sa mga pulong sa Dios diha ni Adan, mitudlo si Enoch nga si Jesukristo “ang bugtong ngalan nga ihatag ubos sa langit, diin ang kaluwasan moabut ngadto sa mga katawhan.” Usa kini sa daghang pahayag diha sa mga kasulatan bahin sa kamahinungdanon sa ngalan sa Manluluwas. Si Elder Paul B. Pieper mitudlo: “Ang atong Langitnong Amahan gusto nga hingpit kining masabtan nga ang ngalan sa Iyang Anak, si Jesukristo, dili lamang usa sa yanong ngalan taliwala sa kadaghanan. Ang ngalan sa Manluluwas adunay lahi ug mahinungdanong gahom. Kini ang bugtong ngalan diin ang kaluwasan posible.”
Unsay atong nahibaloan bahin sa pagbunyag ug sa gasa sa Espiritu Santo sa panahon sa Daang Tugon?
Sa pipila ra ka pakisayran sa Espiritu Santo diha sa Daang Tugon, walay naghisgot bahin sa gasa sa Espiritu Santo. Wala hisgoti sa Daang Tugon ang ordinansa sa pagbunyag. Pero, giklaro sa pagpadayag pinaagi ni Propeta Joseph Smith nga gipanalanginan si Adan ug ang iyang kaliwatan sa kahingpitan sa ebanghelyo, apil ang mga ordinansa sa bunyag ug ang pagpandong sa mga kamot para sa gasa sa Espirtu Santo. Ang Basahon ni Mormon naghatag usab og mga pananglitan niini nga mga ordinansa nga gitudlo ug nadawat, sa una pa ug human sa pag-anhi ni Jesukristo.
Unsay gitudlo kanato sa mga titulo nga “Tawo sa Pagkabalaan” ug “Anak sa Tawo” bahin sa Langitnong Amahan ug kang Jesukristo?
Ang ngalan sa Dios Amahan mao ang Tawo sa Pagkabalaan diha sa pinulongan ni Adan, ug ang Manluluwas sagad tawgong Anak sa Tawo diha sa mga kasulatan. Si Elder D. Todd Christofferson mipasabot kon sa unsang paagi ang mga pagtulun-an ni Enoch motabang natong mas makasabot niining sagradong mga titulo: “Sa bata pa, naghunahuna ko nganong sa Bag-ong Tugon si Jesus kasagarang gipasabot (ug gani mipasabut sa Iyang kaugalingon) isip ang Anak sa tawo nga Siya sa tinuod lang mao man ang Anak sa Dios, apan ang pamahayag ni Enoch miklaro niini nga kining mga pagpasabot aktwal nga pag-ila sa Iyang pagkabalaan—Siya mao ang Anak sa Tawo sa Pagkabalaan, ang Dios nga Amahan.”
Unsay gitudlo kanato sa mga simbolo sa tubig, espiritu, ug dugo bahin sa pagkatawo pag-usab pinaagi ni Jesukristo?
Samtang gitudloan sa Ginoo si Adan bahin sa katubsanan gikan sa Pagkapukan, Iyang gihulagway ang tulo ka simbolo nga may kalabotan sa pagkatawo. Ang mga elemento sa tubig, dugo, ug espiritu nagkahiusa ang tanan aron makahimog buhing kalag dihang mosulod ang usa ka tawo diha sa mortalidad. Kini nga mga elemento nagdala og importanteng tahas sa usa ka tawo nga matawo pag-usab sa espirituwal.
Ang pagbunyag pinaagi sa tubig ug ang pagdawat sa gasa sa Espiritu Santo motultol sa usa ka tawo ngadto sa Manluluwas, nga magtugot nila nga mabag-o pinaagi sa Iyang giula nga dugo. Niining paagiha, ang usa ka tawo mahimong matarong ug mabalaan.
Gihulagway ni Elder D. Todd Christofferson kon unsay ipasabot sa mahimong matarong ug mabalaan pinaagi kang Jesukristo: “Gitanyag sa Manluluwas ngadto sa tanang magpakitag hugot nga pagtuo ug modawat niini, ang mga gasa sa pagkahimong matarong o napasaylo atubangan sa balaod ug ang pagkahimong balaan pod—nga mao, ang pagkahimong walay lama ug balaan. Wala nay laing ngalan, o dalan, o paagi diin pwedeng mahitabo ang maong katubsanan. Ug igo na ang Iyang pagkamaluloy-on aron makab-ot kini.”
Sa unsang paagi si Adan nahimong “anak nga lalaki sa Dios”?
Si Enoch mitudlo nga human mabunyagi si Adan, “ang Espiritu sa Dios mikunsad diha kaniya, ug sa ingon siya natawo sa Espiritu, ug nabuhi diha sa iyang kaugalingon.” Human niini nga balaang kasinatian, nakadungog si Adan og tingog gikan sa langit nga nag-ingon, “Tan-awa, ikaw usa ngari kanako, usa ka anak sa Dios; ug sa ingon ang tanan mahimo nga akong mga anak.”
Ang titulo nga “anak nga lalaki sa Dios” naay duha ka managlahing kahulogan para kang Adan. Dili lang siya kay espiritung anak sa Dios nga gilalang sa iyang dagway, apan si Adan usab mao ang anak nga lalaki sa Dios kay natawo siya pag-usab pinaagi kang Jesukristo. Kadtong nakasinati og espirituwal nga pagkatawo pag-usab ug nakadawat og mga ordinansa sa ebanghelyo sa Manluluwas usahay tawgon usab nga “mga anak ni Kristo.”
Si Elder Neil L. Andersen mipasabot: “Kon buhaton nato ang atong bahin, ang Iyang saad mao nga kita pagatawgon nga ‘mga anak sa Dios.’ Ang matag tawo sa yuta mao ang ‘mga anak’ [Mga Buhat 17:28] sa Dios, apan ang pagatawgon nga ‘mga anak sa Dios’ nagpasabot og mas labaw pa. Samtang kita moduol ngadto ni Jesukristo ug mohimo og mga pakigsaad uban Kaniya, kita mahimong ‘iyang binhi’ ug ‘mga manununod sa gingharian’ [Mosiah 15:11], ‘mga anak ni Kristo, ug anak nga mga lalaki ug iyang anak nga mga babaye’ [Mosiah 5:7].”
Magkat-on pa og Dugang
Paglakaw uban sa Dios
-
David A. Bednar, “Magpuyo ngari Kanako, ug Ako nganha Kanimo; Busa, Maglakaw uban Kanako,” Liahona, Mayo 2023, 123–26
-
Emily Belle Freeman, “Paglakaw diha sa Relasyon sa Pakigsaad uban ni Kristo,” Liahona, Nob. 2023, 76–79
-
Henry B. Eyring, “Lakaw Uban Kanako,” Liahona, Mayo 2017, 82–85
Pagkat-on sa Panglantaw nga sama kang Enoch
-
Brian Hansbrow, “Lessons from Enoch: Expanding Our View of Christ, Ourselves, and Others,” YA Weekly, Peb. 2022, Librarya sa Ebanghelyo
Matawo pag-usab
-
D. Todd Christofferson, “Natawo Pag-usab,” Liahona, Mayo 2008, 76–79
Media
Mga Hulagway
Enoch Preaching [Enoch Nagsangyaw], ni Robert T. Barrett
Enoch and the City of Zion [Si Enoch ug ang Siyudad sa Zion], ni Justin Kunz
Musika
-
“I Will Walk with Jesus,” Hymns—For Home and Church