Dawata ang Balaang Espiritu isip Inyong Giya
Pagkatalagsaon nga gasa ang moabut niadtong mobutang sa ilang pagtuo kang Jesukristo. Kana nga gasa mao ang Balaang Espiritu.
Niining Dominggo sa Pasko sa Pagkabanhaw, ang atong mga hunahuna matumong ngadto sa Pagkabanhaw ni Ginoong Jesukristo ug sa walay sulod nga lubnganan nga naghatag og paglaum sa matag tumutuo sa kadaugan ni Kristo batok sa siguradong kapildihan. Ako nagtuo, uban ni Apostol Pablo, nga sama nga ang Dios “nagbanhaw kang Kristo gikan sa mga patay [sa ingon] magahatag usab [Siya] og kinabuhi nganha sa [atong] mga kamatayong mga lawas pinaagi sa iyang Espiritu nga nagapuyo sa sulod [kanato].”1
Ang paghatag og kinabuhi nagpasabut nga buhion. Sama nga buhion og balik ni Kristo ang atong mga lawas human sa pisikal nga kamatayon pinaagi sa gahum sa Iyang Pagkabanhaw, sa ingon usab Siya mobuhi kanato gikan sa espiritwal nga kamatayon.2 Sa basahon ni Moises, atong mabasa si Adan nga misinati niini nga matang sa pagkabuhi: “[Si Adan] gibunyagan, ug ang Espiritu sa Dios mikunsad diha kaniya, ug sa ingon siya natawo sa Espiritu, ug nabuhi diha sa iyang kaugalingon.”3
Pagkatalagsaon nga gasa ang moabut niadtong mobutang sa ilang pagtuo kang Jesukristo. Kana nga gasa mao ang Balaang Espiritu nga naghatag kanato sa unsay gitawag sa Bag-ong Tugon nga “[kinabuhi] pinaagi kang Kristo.”4 Apan mobaliwala ba kita usahay sa ingon nga gasa?
Mga kaigsoonan, usa ka talagsaong pribilehiyo nga “makadawat sa Balaang Espiritu alang sa [atong] paggiya,”5 nga gipakita sa mosunod nga kasinatian.
Panahon sa Gubat sa Korea, si Ensign Frank Blair miserbisyo sa usa ka barko nga sakyanan sa mga tropa nga nadestino sa Japan.6 Ang barko dili kaayo dako aron magkinahanglan og pormal nga chaplain, mao nga ang kapitan mihangyo ni Brother Blair nga mahimong dili pormal nga chaplain sa barko, kay nakaobserbar nga ang batan-on usa ka tawo nga dunay pagtuo ug baruganan, gitahud pag-ayo sa tanang tripulante.
Misulat si Ensign Blair: “Ang among barko naabtan og dakong bagyo. Ang mga balud hapit 45 ka pye [14 ka metros] ang gitas-on. Oras nako sa pagbantay … diin nianang panahona usa sa among tulo ka mga makina mihunong sa pag-andar ug dunay gi-report nga liki sa sentro sa barko. Duha ang among nahabiling makina, diin ang usa nag-andar lang sa katunga sa gikusgon niini. Anaa kami sa grabeng kakuyaw.”
Nahuman ni Ensign Blair ang iyang oras sa pagbantay ug nangandam na aron matulog sa dihang nanuktok ang kapitan sa iyang pultahan. Mihangyo siya, “Mahimo ba nga mag-ampo ka alang niining barko?” Siyempre, miuyon si Ensign Blair nga mobuhat sa ingon.
Nianang puntoha, si Ensign Blair mahimo lang nga mag-ampo sa yano, “Langitnong Amahan, palihug panalangini ang among barko ug ipabilin kami nga luwas,” ug dayon matulog na. Imbis niana, nag-ampo siya nga masayud kon aduna ba siyay mabuhat aron makatabang sa pagsiguro nga mahimong luwas ang barko. Agig tubag sa pag-ampo ni Brother Blair, ang Espiritu Santo midasig kaniya sa pag-adto sa lawak-pangnabigar sa barko [bridge], makigsulti sa kapitan, ug magkat-on pa. Iyang nasayran nga ang kapitan naningkamot sa pagtino unsa ka paspas nga padaganon ang nahabilin nga mga makina sa barko. Mibalik si Ensign Blair sa iyang cabin aron mag-ampo pag-usab.
Nag-ampo siya, “Unsay akong mabuhat aron makatabang sa pagsulbad sa problema sa mga makina?”
Agig tubag, ang Espiritu Santo mihunghong nga kinahanglan siyang molakaw libut sa barko ug mag-obserbar aron makakuha og dugang nga impormasyon. Mibalik na usab siya sa kapitan ug nangayo og pagtugot nga molakaw libut sa barko. Dayon, gihigtan og makasuporta nga pisi ang iyang hawak, migawas siya ngadto sa bagyo.
Nagbarug sa lubot sa barko, giobserbahan niya ang mga higanteng pala sa barko [propeller] samtang mogawas kini sa tubig kon ang barko maisa ibabaw sa balud. Usa ra ang hingpit nga naglihok, ug paspas kaayo ang pagtuyok niini. Human niini nga mga obserbasyon, nag-ampo pag-usab si Ensign Blair. Ang klarong tubag nga iyang nadawat mao nga ang nahabilin nga maayong makina nabug-atan ra kaayo ug kinahanglang pahinayan. Busa mibalik siya sa kapitan ug mihimo niana nga rekomendasyon. Nasurprisa ang kapitan, gisultihan siya nga ang engineer sa barko bag-o lang misugyot og sukwahi niini—nga pakusgan nila ang kapaspas sa maayong makina aron maunhan ang unos. Bisan pa niana, ang kapitan mipili nga sundon ang sugyot ni Ensign Blair ug gipahinayan ang makina. Pagka-kaadlawon ang barko luwas nga miabut sa kalma nga katubigan.
Paglabay lamang sa duha ka oras, ang maayong makina mihunong na gyud sa pag-andar. Uban sa katunga lang nga kusog sa nahabilin nga makina, ang barko nakahimo sa inanay nga pag-abut sa dunggoanan.
Misulti ang kapitan kang Ensign Blair, “Kon wala pa nato pahinayi kadto nga makina niadtong puntoha, maguba unta kini sa tunga-tunga sa unos.”
Kon wala kadto nga makina, wala gayud untay paagi sa pagtimon. Ang barko makulob unta, ug malunod. Mipasalamat ang kapitan sa batan-ong LDS nga opisyal ug miingon nga nagtuo siya nga ang pagsunod sa espiritwal nga mga impresyon ni Ensign Blair nakaluwas sa barko ug sa mga tripulante niini.
Karon, makapaukyab kaayo kini nga istorya. Samtang walay kalagmitan nga mag-atubang kita og ingon ka kuyaw nga mga kahimtang, kini nga istorya naglangkob og importanting mga giya kon unsaon nato nga mahimong mas kanunay nga makadawat sa giya sa Espiritu.
Una, kabahin sa pagpadayag, kinahanglang magpakabuhi kita sa paagi nga nagtugot kanato nga makadawat og langitnong pag-aghat. Si Ensign Blair nagpakabuhi og limpyo ug matinud-anong kinabuhi. Kon dili pa siya masulundon, wala unta siyay espiritwal nga pagsalig nga gikinahanglan aron mag-ampo sama sa iyang gibuhat alang sa kasiguroan sa iyang barko ug makadawat og ingon ka piho nga giya. Kinahanglang maningkamot ang matag usa kanato nga mapahiangay ang atong kinabuhi sa mga sugo sa Dios aron Iyang magiyahan.
Usahay dili kita makadawat og mga pag-aghat sa espiritu tungod kay dili kita takus. Ang paghinulsol ug pagkamasulundon mao ang paagi sa pagkab-ot og klaro nga komunikasyon. Ang Daang Tugon nga pulong sa paghinulsol nagpasabut nga “moliko” o “mobalik.”7 Kon gibati ninyo nga layo sa Dios, gikinahanglan lamang ninyong mohimo sa desisyon nga mobiya sa sala ug moatubang sa Manluluwas, diin makita ninyo Siya nga naghulat kaninyo, nagtuyhad sa Iyang mga kamot. Mahinamon Siya nga mogiya kaninyo, ug gikinahanglan lamang ninyong mag-ampo aron makadawat pag-usab niana nga giya.8
Ikaduha, si Ensign Blair wala lang mohangyo sa Ginoo sa pagsulbad sa iyang problema. Nangutana siya unsay mahimo niyang buhaton aron mahimong parte sa solusyon. Sa samang paagi mahimo kitang mangutana, “Ginoo, unsay kinahanglan nakong buhaton aron mahimong parte sa solusyon?” Imbis nga maghimo og talaan sa atong mga problema diha sa pag-ampo ug mohangyo sa Ginoo sa pagsulbad niini, angay kitang mangita og mas aktibong mga paagi nga makadawat sa tabang sa Ginoo ug mopasalig sa paglihok sumala sa giya sa Espiritu.
Adunay ikatulo nga importanting leksyon sa istorya ni Ensign Blair. Makahimo ba siya sa pag-ampo uban sa ingon ka kalma nga kasiguroan kon wala pa siya makadawat og giya gikan sa Espiritu sa nangaging mga okasyon? Ang pag-abut sa bagyo dili mao ang panahon nga magtinguha sa gasa sa Espiritu Santo human nga gipasagdan kini ug maghunahuna unsaon sa paggamit niini. Kining batan-ong lalaki klaro nga nagsunod og sundanan nga gigamit na niya sa makadaghan kaniadto, lakip isip full-time nga misyonaryo. Magkinahanglan kita sa Balaang Espiritu isip atong giya sa malinawong katubigan, aron ang Iyang tingog dili nato masaypan panahon sa makalilisang nga unos.
Ang uban tingali naghunahuna nga dili kita angay nga magdahum og inadlaw-adlaw nga giya gikan sa Espiritu tungod kay “dili maayo nga [ang Dios] magsugo diha sa tanan nga mga butang,” basin pa unya mahimo kitang tapulan nga mga sulugoon.9 Kini nga kasulatan, hinoon, gihatag ngadto sa pipila sa nag-unang mga misyonaryo kinsa mihangyo ni Joseph Smith nga modawat og pinadayag nga sila unta ang modawat alang sa ilang kaugalingon. Sa nag-una nga bersikulo, ang Ginoo misulti kanila nga moadto sa mission field “ingon sa ilang gikauyunan tali sa ilang mga kaugalingon ug kanako.” 10
Kini nga mga misyonaryo gusto og piho nga pagpadayag mahitungod sa ilang pagbiyahe. Wala pa sila makakat-on sa pagpangita og kaugalingon nilang giya sa personal nga mga butang. Ang Ginoo mitawag niini nga kinaiya kon unsa gayud kini: pagkatapulan. Ang unang mga miyembro sa Simbahan tingali nalipay kaayo nga adunay tinuod nga propeta nga nameligro sila nga mapakyas sa pagkat-on kon unsaon sa pagdawat og pinadayag sa ilang kaugalingon. Ang pagkamapaningkamuton sa kaugalingon sa espiritwal nga paagi mao ang pagkadungog sa tingog sa Ginoo pinaagi sa Iyang Espiritu alang sa kaugalingong kinabuhi.
Si Alma mitambag sa iyang anak nga “[maki]tambag uban sa Ginoo sa tanan nimo nga buhaton.”11 Ang pagpuyo niini nga paagi—kasagaran natong gitawag nga “pagpakabuhi pinaagi sa Espiritu”—usa ka halangdong pribilehiyo. Nagdala kini og usa ka pagbati sa kalinaw ug kasiguroan ingon man sa mga bunga sa Espiritu sama sa gugma, kalipay, ug kalinaw.12
Ang abilidad ni Ensign Blair sa pagdawat og pinadayag miluwas kaniya ug sa iyang mga kaubanan sa barko gikan sa grabeng unos. Ubang mga matang sa mga unos ang midagsa karon. Ang sambingay sa kahoy sa kinabuhi diha sa Basahon ni Mormon13 naghatag og kusganong paghulagway kon unsaon sa pagkab-ot og espiritwal nga kasiguroan sa ingon nga kalibutan. Kini nga damgo naghisgut sa kalit nga mga gabon sa kangitngit nga motumaw aron sa pagdala og espiritwal nga kalaglagan sa mga miyembro sa Simbahan nga naglakaw sa dalan pabalik sa Dios.14
Sa paghunahuna niini nga hulagway, akong mahanduraw ang daghang mga tawo nga naglakaw niana nga dalan, ang uban hugtanon nga naggunit ang mga kamot sa gunitanan nga puthaw, apan daghan pang uban nga nagsunod lamang sa mga tiil sa mga tawo sa ilang atubangan. Kining ulahi nga paagi nagkinahanglan og gamay ra nga panghunahuna o paningkamot. Mahimo lamang kamong mobuhat ug maghunahuna sa unsay gibuhat ug gihunahuna sa uban. Mosalir kini kon walay seryuso nga mga pagsulay. Apan ang mga unos sa pagpanglingla ug mga gabon sa mga bakak motumaw nga walay pasidaan. Niini nga mga sitwasyon, ang pagkapamilyar sa tingog sa Espiritu Santo usa ka butang nga nag-agad ang espiritwal nga kinabuhi ug kamatayon.
Ang kusganong saad ni Nephi nga “kinsa kadto nga mopatalinghug sa pulong sa Dios, ug hugot nga mogunit niini dili gayud … malaglag; ni ang mga pagtintal ug ang nagdilaab nga mga panâ sa kaaway makabuntog kanila ngadto sa pagkabuta, sa pagdala kanila sa kalaglagan.”15
Ang pagsunod sa mga tiil sa mga tawo nga nag-una kaninyo diha sa dalan dili igo. Dili lamang kita makabuhat ug maghunahuna sa unsay gibuhat ug gihunahuna sa uban; kinahanglang magpuyo kita og giniyahan nga kinabuhi. Kinahanglang ang matag usa kanato magkupot ang kaugalingong kamot diha sa gunitanan nga puthaw. Dayon mahimo kitang moduol sa Ginoo uban sa mapainubsanon nga pagsalig, nasayud nga Siya “moagak [kanato] pinaagi sa kamot, ug mohatag [kanato] og tubag sa [atong] mga pag-ampo.”16 Sa pangalan ni Jesukristo, amen.